ʼE Tokaga Koa He Tahi Kia Tatou?
“Ko te ʼu loʼimata ʼo nātou ʼaē ʼe maʼuʼuli taʼomia” kua liliu ko he liuʼa. Ko te ʼu loʼimata ʼaia ʼa te hahaʼi ʼe maʼuli mamahi ʼi te ʼu “aga faka taʼomia” ʼaē ʼe fai ʼi te malamanei katoa. ʼI te agamāhani, ko te hahaʼi ʼaia ʼe nātou manatu ʼe mole honatou “tagata fakaloto fīmālie”—pea ʼe mole he tahi ʼe tokaga kia nātou.—Tagata Tānaki 4:1.
LOGOLA te lahi ʼaupito ʼo te ʼu loʼimata ʼaia ʼa te hahaʼi, kae ʼe ʼi ai ʼihi ʼe mole nātou tokagaʼi tonatou nofo mamahi. ʼE mole nātou tokagaʼi te maʼuli mamahi ʼa ʼihi, ohage ko tona fai e te pelepitelo pea mo te tagata Levite ʼaē neʼe talanoa kiai Sesu Kilisito ʼi tana lea fakatātā ʼo ʼuhiga mo te tagata neʼe tāmateʼi, mo kaihaʼa ʼana meʼa, pea tuku kua teitei mate ʼi te vaʼe ala. (Luka 10:30-32) ʼE mole nātou tokaga ki ʼihi, kehe pe ke maui mālie tonatou maʼuli pea mo tonatou famili. ʼI tona fakahagatonu, ʼe nātou ʼui fēnei, “Meʼa la ke feafeaʼi!”
ʼE mole tonu ke tou punamaʼuli ki te faʼahi ʼaia. Neʼe fakakikite e te ʼapositolo ko Paulo, ʼi “te u aho fakamuli” ʼe liliu anai te tokolahi ʼo “heeʼofa.” (2 Timoteo 3:1, 3) Neʼe ʼi ai te tagata neʼe meo ʼo ʼuhiga mo te aga ʼa te hahaʼi ʼaē ʼe mole kei nātou tokagaʼi he meʼa. Neʼe ina ʼui fēnei, “ko te manatu ʼāfea ʼaē ʼa te kau Ilelani ʼo ʼuhiga mo te tokaga ki ʼihi pea mo te vaevae mo ʼihi, kua fetogi e te manatu foʼou ʼaē ʼe ina uga te hahaʼi ke nātou gāue maʼa nātou pea mo tokaga kia nātou totonu.” ʼI te malamanei katoa, ko te hahaʼi ʼe nātou gāue maʼa nātou pea mo nātou toʼo he ʼu meʼa maʼa nātou totonu, ʼo mole nātou tokagaʼi te maʼuli mamahi ʼa ʼihi.
ʼE ʼAoga Ke Tokaga He Tahi Kia Tatou
ʼE mahino papau ia, ʼe ʼaoga ke tokaga he tahi kia tatou. Ohage la, ko te meʼa ʼaē neʼe hoko ki te matuʼa Siamani ʼaē “neʼe maʼu atu ʼe kei heka pe ʼi muʼa ʼo tana foʼi televisio—kae neʼe kua mate ʼi te Po Tapu kua hili kiai taʼu e nima.” Ko te “tagata māʼimoa ʼaia neʼe kua mavete mo tona ʼohoana pea neʼe maʼuli tokotahi,” kae neʼe hoki tokagaʼi tona puli ʼi te temi ʼaē neʼe ʼosi ai tana falā ʼi te fale paʼaga, ʼi te mole kei feala ke ina totogi te ʼapi ʼaē neʼe ina lue. Neʼe mole he tahi moʼo tokaga kia ia.
Koutou toe manatuʼi foki mo te hahaʼi ʼaē ʼe maʼuli mamahi ʼi te pule fefeka ʼa te kau takitaki mālohi pea mo mānumānu. ʼI te tahi fenua, ko te toko 200 000 hahaʼi (ko te vahe e tahi ki te fā ʼo te hahaʼi ʼo te fenua ʼaia) “neʼe mamate ʼuhi ko te agamālohi pea mo te pakupaku,” he neʼe kaihaʼa tonatou ʼu kele. E feafeaʼi ki te ʼu tamaliki ʼaē neʼe sio mata ki te ʼu fai fakapō fakalialia ʼaē neʼe hoko? Neʼe fai te fakamatala ʼaenī: “ ʼE fakamataku te kaugamālie ʼo te ʼu tamaliki [ʼo te fenua ʼaia] ʼaē neʼe sio mata ki te ʼu meʼa fakamataku ʼaē neʼe hoko—te ʼu fakapō, te tā ʼo te hahaʼi, mo te hahaʼi fafine ʼaē neʼe fakaʼalikiʼi e te tahi ʼu tamaliki.” Ko nātou ʼaē neʼe hoko kia nātou te ʼu meʼa fakalialia ʼaia, ʼe mole tou punamaʼuli ai mokā nātou fetāgihi pea mo feʼekeʼaki fēnei, “ ʼE ʼi ai koa he tahi ʼe tokaga kia ʼau?”
ʼO mulimuli ki te talanoa ʼa te Kautahi ʼo Te ʼAtu Puleʼaga Fakatahi, ko te toko 1 300 000 000 hahaʼi ʼi te ʼu fenua māsisiva, ʼe nātou maʼuʼuli ʼaki te kiʼi tola e tahi ʼi te ʼaho fuli. ʼE mahino ia, ʼe nātou feʼekeʼaki peʼe ʼi ai he tahi ʼe ina tokagaʼi nātou. ʼE feiā te manatu ʼa te toko lauʼi afe hahaʼi ʼaē neʼe feholaki mai tonatou fenua, pea ʼe ʼui e te sulunale The Irish Times ʼo ʼuhiga mo nātou ʼaia, “ ʼe tonu ke nātou fili peʼe nātou nonofo anai ʼi te nofoʼaga faka temi ʼo te fenua matāpule ʼaē ʼe mole ina faʼa tali leleiʼi nātou, peʼe nātou liliu anai ki tonatou fenua ʼaē kei tokakovi ʼuhi ko te tau pea mo te fakapalatahi.” ʼI te alatike pe ʼaia, neʼe fakahā ai te meʼa fakaʼofaʼofa: “Pupunu ʼokotou mata, koutou lau ʼo aʼu ki te tolu, neʼe hoki mate age pe te tamasiʼi. Ko he tahi pe ʼi te ʼu tamaliki ʼe toko 35 000 ʼaē ʼe mate anai ʼi te ʼaho nei ʼuhi ko te pakupaku peʼe ko te mahaki ʼaē ʼe feala pe tona faitoʼo.” ʼE mole tou punamaʼuli ki tanatou tagi ʼuhi ko tanatou maʼuli mamahi pea mo tanatou heʼe ʼamanaki.—Vakaʼi ia Sopo 7:11.
Neʼe fakatuʼutuʼu koa ke feiā te maʼuli? ʼE tokaga moʼoni koa he tahi kia tatou, pea ʼe ina toe maʼu koa mo te mālohi moʼo fakagata te ʼu mamahi pea mo faitoʼo te ʼu kovi fuli ʼaē ʼe tau mo te hahaʼi?
[Haʼuʼaga ʼo te paki pasina 3]
A. Boulat/Sipa Press