Kua vi Mai “Te Temi Ki Te Tokalelei”!
“Kia meʼa fuli ʼe ʼi ai tona temi kua fakakatofa, . . . ko te temi ki te tau pea mo te temi ki te tokalelei.”—Tagata Tānaki 3:1, 8.
1. ʼO ʼuhiga mo te tau pea mo te tokalelei, koteā te meʼa faikehe ʼaē neʼe hoko lolotoga te 20 sēkulō?
KO TE tokolahi ʼo te hahaʼi ʼe nātou loto ki te tokalelei, pea ʼe tou mahino ki te faʼahi ʼaia. ʼE mole lahi te ʼu temi ʼaē neʼe tokalelei ai te 20 sēkulō ʼaenī, mokā tou fakatatau ki te ʼu sēkulō ʼo te hisitolia. Meʼa faikehe foki, heʼe ʼi muʼa atu, neʼe mole heʼeki lahi feiā te ʼu meʼa ʼaē neʼe fai moʼo fakatuʼu te tokalelei. ʼI te taʼu 1920, neʼe fakatuʼu te Sosiete ʼo te ʼu Puleʼaga. ʼI te taʼu 1928, ko te Fuakava Kellogg-Briand, ʼaē neʼe ʼui e te tohi ko “te meʼa lahi tokotahi ʼaia ʼi te ʼu faiga ʼaē neʼe fai moʼo taupau te tokalelei ʼi te hili ʼo te ʼUluaki Tau Faka Malamanei,” neʼe teitei lagolago kiai “te ʼu fenua fuli ʼo te malamanei . . . ʼo nātou tali ke mole nātou fakaʼaogaʼi te tau moʼo fakatokatoka te ʼu fihifihia faka puleʼaga.” Pea ʼi te taʼu 1945, neʼe fakatuʼu ai leva te Kautahi ʼo te ʼAtu Puleʼaga Fakatahi moʼo fetogi te Sosiete ʼo te ʼu Puleʼaga ʼaē neʼe kua puli.
2. Koteā te fakatuʼutuʼu ʼo te Kautahi ʼo te ʼAtu Puleʼaga Fakatahi, pea neʼe koteā tona ʼu fua?
2 Ohage ko te Sosiete ʼo te ʼu Puleʼaga, ʼe fakatuʼutuʼu e te Kautahi ʼo te ʼAtu Puleʼaga Fakatahi ke ina fakatuʼu te tokalelei ʼi te malamanei. Kae neʼe mole lahi te ʼu fua lelei ʼo tana gāue. ʼE moʼoni, ʼe mole heʼeki hoko ʼi he potu ʼo te malamanei he tau ʼe tatau mo te ʼu tau e lua faka malamanei. Kae ʼe lahi te ʼu tau ʼe hoko ʼi te malamanei, pea ʼe fakatupu ai te maʼuli maveuveu ʼa te lauʼi teau afe hahaʼi, mo te maumauʼi ʼo tonatou ʼu koloā pea mo te matematehi ʼo nātou. ʼE feala koa hatatou ʼamanaki ʼe fakahoko anai e te Kautahi ʼo te ʼAtu Puleʼaga Fakatahi “te temi ki te tokalelei,” ʼi te 21 sēkulō?
Ko Te Tafitoʼaga Ki He Tokalelei Moʼoni
3. He koʼe ʼe mole feala ke hoko te tokalelei mokā kei fefehiʼaʼaki te hahaʼi?
3 ʼE mole feʼauga te fefakaʼapaʼapaʼaki, ke feala ai he maʼuli tokalelei ʼo te hahaʼi pea mo te ʼu puleʼaga. ʼE feala moʼoni koa ki he tahi ke tokalelei mo he tahi ʼe fehiʼa ki ai? Kailoa, heʼe ʼui fēnei ia 1 Soane 3:15: “Ko ae e fehia ki tona tehina, e ko he tagata fakapo.” Ohage ko te ʼu meʼa ʼaē kua hoko ʼi totatou temi, ko te fefehiʼaʼaki ʼa te hahaʼi ʼe iku ki te agamālohi.
4. Ko ai tokotahi pe ʼaē ʼe feala ke nātou maʼu te tokalelei, pea koteā tona tupuʼaga?
4 Mai tona ʼaluʼaga ʼaē ko Sehova ʼe ko “te Atua o te tokalelei,” koia ʼe gata pe ki te hahaʼi ʼaē ʼe nātou ʼoʼofa kia te ia pea mo nātou fakaʼapaʼapa lahi ki tana ʼu pelesepeto faitotonu, ʼaē ʼe feala ke nātou maʼu te tokalelei. Koia, ʼe mole foaki e Sehova te tokalelei ki te hahaʼi fuli pe. “Neʼe ʼui e toku ʼAtua: ‘ ʼE mole ʼi ai he tokalelei maʼa te kau agakovi.’ ” Ko tona tupuʼaga ʼaē ko te hahaʼi agakovi ʼe mole nātou fia mulimuli ki te takitaki ʼa te laumālie maʼoniʼoni ʼa te ʼAtua, pea ʼe kau te tokalelei ʼi te fua ʼo te laumālie ʼaia.—Loma 15:33; Isaia 57:21; Kalate 5:22.
5. Koteā te meʼa ʼaē ʼe mole tonu ke kau kiai te kau Kilisitiano moʼoni?
5 ʼE mole tonu ke kau te kau Kilisitiano moʼoni ki te fetauʼaki ʼa te hahaʼi—kae ʼe ko te meʼa ʼaia ʼe tau fai e te hahaʼi ʼaē ʼe nātou lau ʼe nātou Kilisitiano, tāfito ʼi te 20 sēkulō. (Sakopo 4:1-4) ʼE moʼoni, ʼe nātou tauʼi te ʼu akonaki ʼaē ʼe mole nātou fakahā te moʼoni ʼo ʼuhiga mo te ʼAtua, kae ko te tau ʼaia ʼe tokoni ki te hahaʼi, kae mole fakatupu lotomamahi kia nātou. ʼE mole ʼalutahi mo te Lotu Faka Kilisitiano moʼoni te fakatagaʼi ʼa te hahaʼi ʼuhi ko te mole tatau ʼo tanatou ʼu lotu peʼe ko te gaohi koviʼi ʼo nātou ʼuhi pe ko te ʼu tokakovi faka puleʼaga. Neʼe fakatotonu fēnei e Paulo ki te kau Kilisitiano ʼo Loma: “Kapau e feala, i te temi e kei fakalogo ai kia koutou, koutou nofo tokalelei mo te hahai fuape.”—Loma 12:17-19; 2 Timoteo 2:24, 25.
6. Ia ʼaho nei, ʼe tou maʼu ʼifea te tokalelei moʼoni?
6 Ia ʼaho nei, ko te tokalelei fakaʼatua, ʼe maʼu pe e nātou ʼaē ʼe nātou atolasio moʼoni kia Sehova ʼAtua. (Pesalemo 119:165; Isaia 48:18) ʼE mole he ʼu faʼahi faka politike ʼe ina fakamaveuveu tanatou logo tahi, koteʼuhi ʼe mole nātou kau ki te ʼu faʼahi ʼaia. (Soane 15:19; 17:14) Mai tona ʼuhiga ʼaē ʼe nātou “logo tahi fakalelei ʼi he laumālie pe e tahi pea mo he manatu pe e tahi,” koia ʼe mole he ʼu maveuveu faka lotu ʼe feala ke fakatupu kovi ki tanatou tokalelei. (1 Kolonito 1:10, MN) Ko te tokalelei ʼaē ʼe maʼu e te kau Fakamoʼoni ʼa Sehova ʼi te temi ʼaenī, ʼe ko he milakulo neʼe fakahoko e te ʼAtua, ohage ko tana fakapapau fēnei: “ ʼE ʼau fakatuʼu anai te tokalelei ohage ko hau ʼu tagata taupau, pea ko te faitotonu ohage ko hau ʼu hahaʼi tufa gāue.”—Isaia 60:17; Hepeleo 8:10.
He Koʼe Ko “Te Temi Ki Te Tau”?
7, 8. (a) Logope la tanatou tokalelei, kae koteā te manatu ʼa te kau Fakamoʼoni ʼa Sehova ʼo ʼuhiga mo te temi ʼaenī? (b) Koteā te mahafu ʼaē ʼe fakaʼaogaʼi tāfito e te Kilisitiano ʼi tana tau?
7 Logope la tanatou nonofo ʼi te tokalelei, kae ki te kau Fakamoʼoni ʼa Sehova ʼe ko “he temi [tāfito ʼaenī] ki te tau.” ʼE mahino papau ia, ʼe mole ko he tau moʼoni, koteʼuhi ko te fakaʼaogaʼi ʼo ni ʼu mahafu moʼo fakakinauʼi te hahaʼi ke nātou tali te logo lelei ʼo te Tohi-Tapu, ʼe mole ʼalutahi ia mo te fakaafe ʼaē ʼe fai e te ʼAtua, “ko ae e loto ki ai, ke ina too noa te vai mauli.” (Apokalipesi 22:17) ʼE mole fakakinauʼi te hahaʼi ke nātou līaki tanatou lotu! Ko te tau ʼaē ʼe kau kiai te kau Fakamoʼoni ʼa Sehova ʼe ko he tau fakalaumālie. Neʼe tohi fēnei e Paulo: “Ko amatou mahafu ki tamatou tau e mole fau aki te kakano, kae e uhiga mo te Atua, e natou mau te malohi ki te maumauʼi o te u kolotau mo holoʼi te u fakakaukau fakafialahi.”—2 Kolonito 10:4; 1 Timoteo 1:18.
8 Ko te mahafu ʼaē ʼe tou fakaʼaogaʼi tāfito ʼi te ʼu “mahafu ki [tatatou] tau” ʼe ko “te heleta a te Laumalie, aia e ko te Folafola a te Atua.” (Efeso 6:17) ʼE mālohi te heletā ʼaia. “E mauli te folafola a te Atua, pea e gaue, e masilaʼage i te heleta mata lua fuape, e ulu o kaku ki te vaha o te loto mo te laumalie, ki te u hokoga-hui mo te u gakoi-hui, pea e ina fakamau te u fakakaukau mo te u manatu o te loto.” (Hepeleo 4:12) Kapau ʼe nātou fakaʼaogaʼi te heletā ʼaia, pea ʼe feala anai ki te kau Kilisitiano ke nātou maumauʼi “[“te ʼu manatu pea mo,” MN] te u malohi fiamaoluga e malaga ake o fakafehagai ki te iloi o te Atua.” (2 Kolonito 10:5) ʼAki te Tohi-Tapu, ʼe feala ke nātou fakahā te ʼu akonaki hala, mo te ʼu aga ʼaē ʼe kovi, pea mo te ʼu filosofia ʼo te poto fakatagata kae mole ko te poto ia ʼa te ʼAtua.—1 Kolonito 2:6-8; Efeso 6:11-13.
9. He koʼe ʼe tonu ke tou haga tauʼi tatatou kakano agahala?
9 ʼE ʼi ai te tahi faʼahiga tau fakalaumālie ʼe nātou fai, ʼe ko te tauʼi ʼo te kakano agahala. ʼE mulimuli te kau Kilisitiano ki te faʼifaʼitaki ʼa Paulo, ʼaē neʼe ina tala fēnei: “E au akoi mamafa toku sino pea mo puleʼi ia, i te tuania naa hili taku fakaha te fekau kia natou alâ, pea e hoko ai mo hoku fakamavae.” (1 Kolonito 9:27) Neʼe tokoniʼi te kau Kilisitiano ʼo Kolose ke nātou fakamate “[“ ʼonatou,” MN] logoʼagasino fakakelekele: te feauaki, te agauli, te holikovi, mo te manumanu aia e ko he taulaʼatua.” (Kolose 3:5) Pea ko Suta, ʼaē neʼe kau ki te tohi ʼo te Tohi-Tapu, neʼe ina fakaloto mālohiʼi te kau Kilisitiano “ke [nātou] tau o uhiga mo te tui, nee tuku tuà tahi o talu ai ki te kaigalotu.” (Suta 3) He koʼe ʼe tonu ke tou fai te ʼu meʼa ʼaia? ʼE tali fēnei e Paulo: “Kapau e koutou mauli o fai ki te kakano, e maua ke koutou mamate; pea kapau e koutou tamatei te u gaue a te sino aki te Laumalie, e koutou mauli anai.” (Loma 8:13) Kua mahino lelei mai kia tatou, ʼe tonu ke tou haga tauʼi totatou ʼu vaivaiʼaga.
10. Koteā ʼaē neʼe hoko ʼi te taʼu 1914, pea koteā ʼaē ka ʼamanaki hoko?
10 Kae ko te tahi tupuʼaga ʼo tatatou ʼui ʼaē ko te temi ʼaenī ʼe ko he temi ki te tau, ʼe tupu ko te kua vave hoko mai ʼo “te ʼaho lagavaka ʼo totatou ʼAtua.” (Isaia 61:1, 2) ʼI te taʼu 1914, neʼe hoko ai te temi ʼaē neʼe fakakatofa e Sehova moʼo fakatuʼu te Puleʼaga Faka Mesianike, pea mo ina fakagafua ki te Puleʼaga ʼaia ke ina tauʼi te tuʼu ʼa Satana. Neʼe fakagata ʼi te temi ʼaia te temi ʼaē neʼe ina tuku ai ki te tagata ke ina puleʼi faʼitaliha te malamanei, kae mole kau kiai te ʼAtua. Tokolahi te hahaʼi ʼe nātou fakafisi tuʼumaʼu ki te Pule Faka Mesianike ʼa te ʼAtua, ohage ko tona fai e te tokolahi ʼi te ʼuluaki sēkulō. (Gaue 28:27) Koia, ʼuhi ko tanatou fakafeagai ki te Puleʼaga, ʼe tonu ai kia Kilisito ke “ ʼalu ʼo pule ʼi te lotolotoiga ʼo [tona] ʼu fili.” (Pesalemo 110:2) Meʼa fakafiafia foki, ia Apokalipesi 6:2 ʼe fakapapau ai ʼe “malo” anai ʼi te tau ʼaia. ʼE ina fai anai te faʼahi ʼaia lolotoga “te tau o te aho [“fakamataku,” MN] o te Atua Mafimafi . . . nee higoa fakahepeleo ko halamakatone.”—Apokalipesi 16:14, 16.
ʼE Ko “Te Temi Moʼo Palalau”
11. He koʼe ʼe faʼa kātaki lahi ia Sehova, kae koteā ʼaē ka hoko anai?
11 Kua hili kiai taʼu e 85 talu mai te taʼu 1914 ʼaē neʼe hoko ai te ʼu fetogi lahi ʼi te malamanei. Kua fualoa ʼo te kātakiʼi e Sehova te malamanei. Neʼe ina fakahā lelei ki tana kau Fakamoʼoni te maʼuhiga ʼo te temi ʼaenī, pea ko te lauʼi teau miliona hahaʼi ʼaē ʼe tonu ke hāofaki. ʼE tonu ke tou tala kia nātou te faʼahi ʼaia koteʼuhi ko “te Aliki . . . e mole loto ia ke mate niʼihi, kae ke tafoki te tagata fuape o fakahemala.” (2 Petelo 3:9) Kae kua vave hoko mai te “ha anai mai Selo te Aliki Sesu fakatahi mo te kau aselo o tona Mafimafi.” Pea ko nātou ʼaē neʼe nātou fakafisi ki te logo lelei ʼo te Puleʼaga ʼa te ʼAtua, ʼe hoko anai kia nātou “te lagavaka” ʼaē ka fakahoko e Sesu “kia natou e mole natou iloi te Atua, pea mo natou e mole fakalogo ki te Evaselio o totatou Aliki ko Sesu.”—2 Tesalonika 1:6-9.
12. (a) He koʼe ʼe mole hona ʼaoga ke tou kumikumi pe ko te ʼaho fea ʼaē ka kamata ai te mamahi lahi? (b) Koteā te fakatokaga ʼaē neʼe fai e Sesu ʼo ʼuhiga mo te tuʼutāmaki ʼaē ka hoko?
12 Ko ʼafea ʼaē ka gata ai te faʼa kātaki ʼa Sehova? ʼE mole hona ʼaoga ke tou kumikumi pe ko te ʼaho fea ʼaē ka kamata ai te “mamahi lahi.” He neʼe ʼui fakalelei fēnei e Sesu: “O uhiga leva mo te aho alâ pea mo te hola, e mole iloi e he tahi.” ʼI te tahi faʼahi, neʼe ina fakatotonu fēnei: “Koia, koutou alaʼala, koteuhi e mole koutou iloi pe ko te aho fea e haele mai ai toutou Aliki. . . . Koutou nofo teuteu, koteuhi e haele mai te Foha o te tagata i te hola e mole koutou manatu ki ai.” (Mateo 24:21, 36, 42, 44) Ko tona faka ʼuhiga ʼe tonu ʼi te ʼaho fuli, ke tou vakavakaʼi te ʼu meʼa ʼaē ʼe hoko ʼi te malamanei, pea mo tou fakatalitali ki te hoko mai ʼo te mamahi lahi. (1 Tesalonika 5:1-5) ʼE tuʼutāmakiʼia te manatu ʼaē ke tou maʼuli fīfīmālie, ʼo tou atalitali ke tou sio ki te mafuliʼaga ʼo te ʼu meʼa ʼaē ka hoko! Neʼe ʼui fēnei e Sesu: “Koutou tokaga kia koutou, naa mafasia outou loto i te maveuveu, mo te inu vale pea mo te u fakahoha o te mauli, naa ha fakapunamauli kia koutou te aho aia o hage he kupega.” (Luka 21:34, 35) ʼE feala ke tou tui papau ki te faʼahi ʼaenī: Ko te ʼu “lau matagi e fa” ʼo te fakaʼauha ʼaē ʼe lolotoga tāʼofi nei e te ʼu “aselo e fa” ʼa Sehova, ʼe mole nātou tāʼofi anai ʼo talu ai.—Apokalipesi 7:1-3.
13. Koteā ʼaē kua ʼiloʼi e te teitei toko ono miliona hahaʼi?
13 ʼE tou ʼiloʼi kua vave hoko mai te ʼaho ʼo te fakamāu, koia ʼe maʼuhiga ʼaupito ai kia tatou te ʼui ʼa Salomone ʼe ʼi ai te “temi moʼo palalau.” (Tagata Tānaki 3:7) Kua ʼiloʼi e te teitei ono miliona kau Fakamoʼoni ʼa Sehova ʼe tonu ke nātou palalau ʼi te temi ʼaenī, koia ʼe nātou gāue mālohi ai moʼo palalau ki te kolōlia ʼo te ʼuhiga hau ʼo te ʼAtua pea mo fakatokagaʼi ki te hahaʼi tona ʼaho lagavaka. ʼE nātou fakaʼaogaʼi fakamalotoloto tonatou maʼuli ʼi te ʼaho ʼaenī ʼo te ʼu mālohi faka solia ʼa Kilisito.—Pesalemo 110:3; 145:10-12.
ʼE Nātou Talanoa Ki Te “Tokalelei Kae Mole He Tokalelei”
14. Ko ai te ʼu polofeta loi ʼaē neʼe maʼuʼuli ʼi te fitu sēkulō ʼi muʼa ʼo totatou temi?
14 Lolotoga te fitu sēkulō ʼi muʼa ʼo totatou temi, neʼe tala e te ʼu polofeta ʼo te ʼAtua ko Selemia pea mo Esekiele te ʼu fakamāu ʼaē ka fakahoko e Sehova ki Selusalemi ʼuhi ko tana talagataʼa. Ko te fakaʼauha ʼaē neʼe nā fakakikite, neʼe hoko ʼi te taʼu 607 ʼi muʼa ʼo totatou temi, logope la te ʼu fakafeagai ʼa te kau takitaki lotu maʼuhiga pea mo mālolohi ki te ʼu tagata ʼave logo ʼaia ʼa te ʼAtua. Ko te kau takitaki lotu ʼaia neʼe ko “he ʼu polofeta vavale . . . neʼe nātou fakahēʼia te hahaʼi [ʼa te ʼAtua], ʼo nātou ʼui fēnei, ‘ ʼE ʼi ai te tokalelei!’ kae mole he tokalelei ia.”—Esekiele 13:1-16; Selemia 6:14, 15; 8:8-12.
15. ʼE ʼi ai koa ni ʼu polofeta loi ia ʼaho nei? Koutou fakamahino.
15 Ohage ko te kau “polofeta vavale” ʼo te temi ʼaia, ko te tokolahi ʼo te kau takitaki lotu ia ʼaho nei ʼe mole nātou tala ki te hahaʼi kua vave hoko mai te ʼaho faifakamāu ʼa te ʼAtua. Kae ʼe nātou vikiʼi te ʼu faʼufaʼu faka politike, ʼo nātou ʼui ʼe nātou lava fakatuʼu anai te tokalelei pea mo te fīmālie. ʼE maʼuhiga age kia nātou hanatou fakafiafia te hahaʼi ʼi hanatou fakafiafia te ʼAtua, pea ʼe nātou fakamatala ki tanatou hahaʼi tauhi te ʼu meʼa ʼaē ʼe nātou fia logo kiai, kae mole nātou fakamahino kua fakatuʼu te Puleʼaga ʼa te ʼAtua, pea kua vave fakaʼosi e te Hau Mesianike ia tana tau. (Taniela 2:44; 2 Timoteo 4:3, 4; Apokalipesi 6:2) ʼI tonatou ʼuhiga polofeta loi, ʼe nātou toe talanoa foki ki te “tokalelei, kae mole he tokalelei.” ʼE puli anai tanatou falala, pea ʼe nātou matataku anai mokā hoko fakapunamaʼuli anai kia nātou te ʼita ʼo Ia ʼaē neʼe nātou fakafofoga kovi pea mo ʼulihi tona huafa. Ko te kau takitaki ʼo te kautahi faka malamanei ʼo te lotu hala, ʼaē ʼe fakatatau e te Tohi-Tapu ki he fafine paomutu, ʼe mate anai ia ʼi tana kalagaʼi te tokalelei, ʼaē ʼe mole moʼoni.—Apokalipesi 18:7, 8.
16. (a) Koteā ʼaē ʼe ʼui ʼo ʼuhiga mo te kau Fakamoʼoni ʼa Sehova? (b) Koteā ʼaē ʼe nātou fai, ʼaē ʼe nātou kehe ai mo nātou ʼaē ʼe nātou kalaga “tokalelei, kae mole he tokalelei”?
16 Tatau aipe peʼe hoko atu te loi ʼa te kau takitaki maʼuhiga pea mo mālolohi ʼi tanatou fakapapau te tokalelei, kae ʼe mole ina fakavaivaiʼi anai te falala ʼo nātou ʼaē ʼe tui ki te fakapapau ʼa te ʼAtua ʼo ʼuhiga mo te tokalelei moʼoni. Kua hili kiai te sēkulō, kua ʼiloʼi ko te kau Fakamoʼoni ʼa Sehova ʼe ko ni ʼu hahaʼi ʼe nātou tui ki te Folafola ʼa te ʼAtua, mo nātou fakafeagai ʼaki he lototoʼa ki te lotu hala, pea mo nātou lagolago mālohi ki te Puleʼaga ʼa te ʼAtua. ʼE mole nātou kākāʼi te hahaʼi ʼaki he ʼu fakamatala matalelei ʼo ʼuhiga mo te tokalelei, kae ʼe nātou faiga mālohi ke nātou fakahā fakahagatonu ki te hahaʼi te moʼoni, ko te temi ʼaenī ʼe ko he temi ki te tau.—Isaia 56:10-12; Loma 13:11, 12; 1 Tesalonika 5:6.
ʼE Mole Kei Nofo Fakalogologo Ia Sehova
17. Koteā te faka ʼuhiga ʼo te ʼui ʼaē ʼe fakagata anai e Sehova tana nofo fakalogologo?
17 Neʼe toe ʼui fēnei e Salomone: “ ʼE fakamāu anai e te ʼAtua moʼoni ia ia ʼaē ʼe agatonu pea mo ia ʼaē ʼe agakovi, heʼe ʼi ai te temi kia meʼa fuli pe.” (Tagata Tānaki 3:17) Ei, ʼe ʼi ai te ʼaho kua fakakatofa e Sehova moʼo fakahoko tana fakamāu ki te lotu hala pea mo “te ʼu hau ʼo te kele [ʼaē] kua nātou teuteu . . . [moʼo] fakafeagai kia Sehova pea mo tana fakanofo.” (Pesalemo 2:1-6; Apokalipesi 16:13-16) Ka hoko anai te temi ʼaia, pea ʼe ʼosi ai anai te ʼu ʼaho ʼaē neʼe nofo “fakalogologo” ai Sehova. (Pesalemo 83:1; Isaia 62:1; Selemia 47:6, 7) ʼAki tana Hau Mesianike ko Sesu Kilisito ʼaē kua ʼafio, ʼe “palalau” anai ʼi he lea ʼe mahino anai kiai tana kau fakafeagai: “Ko Sehova totonu ʼe hū anai ki tuʼa ohage ko he tagata mālohi. Ohage ko he tagata tau ʼe ina fakaʼala ake anai te faiva. ʼE kalaga anai, ei, ʼe ina fai anai he kalaga ki te tau; ʼe mālohi age anai ʼi tana ʼu fili. ‘Neʼe fualoa taku mole gū. Neʼe ʼau nofo fakalogologo. Neʼe ʼau lolomi ʼau. Ohage ko he fafine ʼe faifānau, ʼe ʼau toʼetoʼe anai, mo mānava fakavilivili, pea mo faiga mālohi ke ʼau mānava. ʼE ʼau maumauʼi anai te ʼu moʼuga pea mo te ʼu moʼuga liliki, pea mo ʼau fakamagemage anai te tuvao fuape. Pea ʼe ʼau fakaliliu anai te ʼu vaitafe ko he ʼu motu, mo ʼau fakamamaha anai te ʼu liuʼa. Pea ʼe ʼau fakahaʼele anai te hahaʼi kivi ʼi te ala ʼaē neʼe mole nātou ʼiloʼi; ʼi he ala neʼe mole nātou ʼiloʼi, ʼe ʼau fakahaʼele anai nātou. ʼE ʼau fetogi anai ʼi ʼonatou muʼa te potu ʼaē ʼe fakapōʼuli ke mālamagia, pea mo te kele ʼaē ʼe mole matatau ke liliu ko he fenua lafalafa. Koʼena te ʼu meʼa ʼaē ka ʼau fai moʼoni anai maʼa nātou, pea ʼe mole ʼau līaki anai nātou.’ ”—Isaia 42:13-16.
18. Koteā tona faka ʼuhiga ʼe “nofo fakalogologo” anai te hahaʼi ʼa te ʼAtua?
18 ʼI te temi ʼaē ka “kalaga” ai Sehova moʼo puipui tona ʼuhiga ʼAtua, ʼe mole toe ʼaoga anai ki tana hahaʼi ke nātou kalaga ke hāofaki nātou. ʼE nātou “nofo fakalogologo” anai. ʼE hoko anai kia nātou te ʼu palalau ʼaenī neʼe fai ki te ʼu kaugana ʼa te ʼAtua ʼo te temi muʼa: “ ʼE mole ʼaoga anai ke koutou tau ʼi te lakaga ʼaia. Koutou tutuʼu ki ʼokotou tuʼulaga, koutou tutuʼu maʼu, pea koutou mamata ko Sehova ʼe ina hāofaki koutou.”—2 Fakamatala 20:17.
19. Koteā te pilivilesio ʼaē kua vave maʼu e te ʼu tēhina fakalaumālie ʼa Kilisito?
19 ʼE ko he toe maumau lahi ʼaē ka hoko kia Satana pea mo tana kautahi! Ko te ʼu tēhina ʼa Kilisito ʼaē kua faka kolōlia, ʼe nātou kau anai mo nātou ki te mālo ʼo te faitotonu, ʼo mulimuli ki te fakapapau ʼaenī: “Kua vavepe te laliki anai o Satana e te Atua o te tokalelei ki outou lalo vae.” (Loma 16:20) Kua vave hoko mai te temi ʼo te tokalelei, ʼaē kua fualoa tatatou talitali kiai.
20. Ko te temi fea ʼaē kua ōvi mai?
20 ʼE lahi anai te ʼu tapuakina ʼaē ka maʼu e te hahaʼi fuli ʼaē ka hāofaki ʼi te temi ʼaē ka fakahā ai e Sehova tona mālohi lahi! Mole fualoa, pea ʼe fakatahi anai kia nātou te ʼu tagata mo te ʼu fafine agatonu ʼo te temi muʼa, heʼe hoko mai anai te temi ʼaē neʼe fakakatofa ki te fakatuʼuake. Ko te ʼAfio ʼa Kilisito ia Taʼu e Afe ʼe liliu moʼoni anai ko “he temi moʼo tō ʼakau . . . , ko he temi moʼo faitoʼo . . . , ko he temi moʼo laga fale . . . , ko he temi moʼo kata . . . , ko he temi moʼo gaoʼi . . . , ko he temi moʼo fāʼufua pea mo . . . he temi moʼo feʼofani.” Ei, pea ʼe ko “te temi [anai] ki te tokalelei” ʼo talu ai!—Tagata Tānaki 3:1-8; Pesalemo 29:11; 37:11; 72:7.
Koteā Takotou Tali?
◻ Koteā te tafitoʼaga ʼaē ʼe ʼaoga ki he tokalelei ʼe heʼegata?
◻ He koʼe ʼe faka ʼuhiga e te kau Fakamoʼoni ʼa Sehova te temi ʼaenī ʼe ko “te temi ki te tau”?
◻ Ko te temi fea ʼaē ʼe tonu ai ke “palalau” te hahaʼi ʼa te ʼAtua, pea ko te temi fea ʼaē ʼe tonu ai ke nātou “nofo fakalogologo”?
◻ Ko ʼafea ʼaē ka fakagata ai e Sehova tana nofo fakalogologo pea ʼe ina fakahoko feafeaʼi anai?
[Talanoa ʼo te pasina 13]
Kua Fakakatofa e Sehova He Temi
◻ ke ina uga ia Koke ke ina tauʼi te hahaʼi ʼa te ʼAtua.—Esekiele 38:3, 4, 10-12
◻ ke ina ʼai ki te loto ʼo te kau takitaki ke nātou fakaʼauha ia Papiloni Lahi.—Apokalipesi 17:15-17; 19:2
◻ ke ina fakahoko te ʼohoana ʼo te Akeno.—Apokalipesi 19:6, 7
◻ ke ina fakahoko te tau ʼo Halamaketone.—Apokalipesi 19:11-16, 19-21
◻ ke ina haʼi ia Satana ke kamata ai te ʼAfio ʼa Sesu ia Taʼu e Afe.—Apokalipesi 20:1-3
ʼE fakahoahoa feiā te ʼu meʼa ʼaia ʼaē ka hoko ohage ko tona tuʼu ʼi te Tohi-Tapu. ʼE feala ke tou ʼiloʼi papau ko te ʼu meʼa ʼaia e nima ʼe hoko anai ʼo mulimuli ki tona fakatuʼutuʼu e Sehova pea mo te temi totonu ʼaē kua ina fakakatofa ke ina fakahoko ai.
[Paki ʼo te pasina 15]
ʼI te ʼAfio ʼa Kilisito ia Taʼu e Afe, ʼe mahino ia ʼe ko he temi anai . . .
moʼo kata . . .
moʼo fāʼufua . . .
moʼo feʼofani . . .
moʼo tō ʼakau . . .
moʼo gaoʼi . . .
moʼo laga fale . . .