Koutou Nofo Teuteu Ki Te ʼu Taʼu Maʼuhiga e Afe!

ʼI TE ʼAfio ʼa Kilisito ia Taʼu e Afe, ʼe maʼu anai e te malamanei te ʼu tapuakina lahi. ʼI te takitaki ʼofa ʼa Kilisito, ʼe hikihiki anai te hahaʼi mai tonatou ʼuhiga agahala fakaʼofaʼofa ʼaenī ki he ʼuhiga haohaoa. Koutou fakakaukauʼi age muʼa tona faka ʼuhiga kia koutou. ʼE koutou haohaoa anai! ʼI te ʼaho fuli, ʼe koutou ʼaʼala ake anai kua koutou mālohi age ʼi te ʼaho ʼaē kua ʼosi atu. Ko te lauʼi miliona hahaʼi tagata, mo fafine, mo fānau ʼe nātou ʼamanaki maʼuʼuli ʼi te mālama fiafia ʼaia. ʼE nātou tui papau kiai, pea mo nātou faikole kiai. ʼAki tanatou ako te Tohi-Tapu kua nātou tui papau, ʼe feala ke nātou maʼu te ʼu tapuakina ʼaia.

Kae ʼi muʼa ʼo te kamata ʼo tana ʼAfio ia Taʼu e Afe, ʼe tonu ke pulihi e Sesu Kilisito ia nātou fuli ʼaē ʼe nātou fakafeagai ki tona pule ʼi te kele. ʼE ina fakahoko anai te faʼahi ʼaia ʼi te tau ʼaē ʼe fakahigoaʼi e te Tohi-Tapu ko Halamaketone. (Apokalipesi 16:16) Ko te kau Kilisitiano moʼoni ʼo te kele, ʼe mole nātou kau anai ʼi te tau ʼaia, he ko te tau ʼaia ʼe ʼa te ʼAtua. Pea ʼe mole hoko anai ʼi he koga meʼa pe e tahi ʼo te kele. ʼE ʼui e te Tohi-Tapu, ʼe aʼu anai te tau ʼaia ki te ʼu potu taupotu ʼo te kele. Ko te kau fakafeagai ki te pule ʼa Kilisito ʼe matematehi anai. ʼE mole hāo anai he tahi!​—Selemia 25:33.

ʼOsi ʼaia, pea mafuli anai ia Sesu kia Satana te Tevolo pea mo tana kau temonio. Koutou fakakaukauʼi muʼa te meʼa ʼaē ka hoko, ohage ko tona fakamatala mai e te tohi ʼo te Apokalipesi: “Pea nee au mamata ki he aselo [ia Sesu Kilisito] nee hifo mai te lagi. Nee ina toʼo i tona nima te kalavi o te vanu pea mo he seini lahi. Nee kapa ia ki te talakone te gata afea, ia te tiapolo ko Satana, pea nee ina seiniʼi kia taù e afe.” (Apokalipesi 20:​1, 2) Ki muli age, ʼe fakaʼauha anai ia Satana pea mo tana kau temonio ʼo talu ai.​—Mateo 25:41.

Ko “he hahai kaugamalie, [ʼe] mole he tahi [ʼe] ina malau,” ʼe hāo anai ʼi Halamaketone. (Apokalipesi 7:9) ʼE takitaki anai nātou e Kilisito ke nātou fakaʼaogaʼi katoa “te u matapuna vai mauli,” ohage ko he tagata tauhi ōvi ʼe ina takitaki tana faga ōvi ki te ʼu vai. (Apokalipesi 7:​17) ʼI te mole kei tāʼofi e Satana pea mo tana kau temonio tanatou tuputupu ʼi te faʼahi fakalaumālie, ko te hahaʼi ʼaia ka hāo ʼi Halamaketone ʼe nātou maʼu anai he ʼu tokoni ke nātou tauʼi tonatou ʼu vaivaiʼaga pea mo nātou aʼu ki te ʼuhiga haohaoa!

ʼI te pule agaʼofa ʼa Kilisito, ʼe ʼāsili lelei anai te ʼaluʼaga ʼo te maʼuli. ʼAki ia Sesu Kilisito, ʼe pulihi anai e Sehova ʼAtua te ʼu meʼa fuli ʼaē ʼe fakatupu mamahi peʼe fakatupu tuʼania. ʼE “ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi.” (Apokalipesi 21:4) ʼE toe fakamatala mai e te polofeta ko Isaia te ʼaluʼaga ʼaia, ʼo ina ʼui fēnei: “ ʼI te temi ʼaia ʼe ava ai anai te ʼu mata ʼo te kau kivi, pea ʼe ava ai anai te ʼu taliga ʼo te kau tuli. ʼI te temi ʼaia ko te ketu ʼe kake anai ohage ko he tia pea ko te ʼalelo ʼo te tagata noa ʼe kalaga fakafiafia anai.” (Isaia 35:​5, 6) Pea ko te kau mate, ia “natou lalahi mo natou liliki,” ʼe fakatuʼuake anai nātou ki te maʼuli ʼaki te ʼamanaki ʼaē ke mole nātou toe mamate ʼi he temi!—​Apokalipesi 20:⁠12.

ʼI te temi ʼaenī, ʼe lolotoga tānaki te “hahai kaugamalie” ʼaē ka hāo anai ʼi Halamaketone. ʼE nātou nofo teuteu ki te ʼAfio ʼa Kilisito ia Taʼu e Afe. Logope la ʼe mole nātou ʼiloʼi peʼe kamata ʼafea te ʼafio ʼaia, kae ʼe nātou falala ʼe hoko anai ʼi te temi ʼaē neʼe fakakatofa kiai e te ʼAtua. ʼE feala ke koutou kau ia nātou, kae ʼe tonu ke koutou nofo teuteu mo koutou​—ʼe mole maʼua ke koutou fakatau takotou ʼu meʼa pea mo koutou folau ki he potu mamaʼo, kae ʼe maʼua ke koutou ako te Tohi-Tapu ke koutou maʼu te ʼatamai mālama totonu ʼo ʼuhiga mo Sehova ʼAtua pea mo tana fakatuʼutuʼu. Ko te faʼahi ʼaia ʼe mole totogi pea ʼe mole fakakinauʼi koutou, kae ʼe fiafia anai te kau Fakamoʼoni ʼa Sehova ʼi te fakahā atu pe koteā te ʼu fua ʼaē ka koutou maʼu mo tokotou famili, kapau ʼe koutou ako te Tohi-Tapu. Kapau ʼe ʼaoga, pea ʼe feala ki te hahaʼi ʼaē ʼe nātou tā te nusipepa ʼaenī ke nātou tuku atu he tahi ʼu fakamahino.

[Talanoa ʼo te pasina 7]

Ko Taʼu e Afe Moʼoni Peʼe Kailoa?

Mai tona ʼuhiga ʼaē neʼe teitei tohi katoa te tohi ʼo Apokalipesi ʼaki he ʼu palalau fakatātā, koia ʼe tonu ai ke lagaʼi te fehuʼi maʼuhiga. E feafeaʼi ki te ʼAfio ʼa Kilisito ia Taʼu e Afe ʼaē ʼe talanoa kiai te tohi ʼo Apokalipesi? ʼE ko he ʼu taʼu moʼoni peʼe ko he ʼu taʼu fakatātā?

ʼE ʼi ai te ʼu fakamoʼoni, ko te temi ʼaia ʼe ko taʼu e afe moʼoni. Koutou vakaʼi te faʼahi ʼaenī: ʼE ʼui e te ʼapositolo ko Paulo ʼo ʼuhiga mo te ʼAfio ʼa Kilisito ia Taʼu e Afe ʼaē ka fakamāuʼi ai te malamanei, ʼe ko he ʼaho. (Gaue 17:31; Apokalipesi 20:4) Neʼe tohi e te ʼapositolo ko Petelo, ko ʼaho e tahi (ko hola e 24) ʼe hage kia Sehova ko taʼu e afe. (2 Petelo 3:8) Ko he fakamoʼoni ʼaia, ko te “aho” fakamāu ʼaia ʼe fai ia taʼu e afe. Tahi ʼaē meʼa, ia Apokalipesi 20:3, 5-7 (MN) ʼe tuʼa fā tana talanoa ki “te ʼu taʼu e afe,” kae mole talanoa ai ki “he ʼu taʼu e afe.” ʼE hā mai ai, ko te temi ʼaia neʼe faka tuʼakoi.