Kei Koutou Manatuʼi Koa?
Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:
• He koʼe neʼe tali gafua te Po Tapu ʼi Kolea?
ʼI te temi muʼa, neʼe tui e te hahaʼi ʼi Kolea pea mo te tahi ʼatu fenua, ki te ʼatua ʼo te fale kuka neʼe hifo ifo mai te ʼaluʼaga kohu pea ina foaki te ʼu meʼa ʼofa ʼi Tesepeli. Tahi ʼaē meʼa, ʼi te hili ʼo te Lua Tau Faka Malamanei, ko te kau solia Amelika neʼe nātou tufa te ʼu meʼa ʼofa pea mo fai he tokoni ʼi te ʼu ʼēkelesia ʼo te fenua ʼaia.—15/12, pasina 4, 5.
• ʼI te fakahoko ʼo Isaia 21:8, ko ai “te tagata leʼo” ʼaē ʼe maʼu e te ʼAtua ʼi totatou temi?
Ko te kau Kilisitiano ʼaē neʼe fakanofo ʼaki te laumālie maʼoniʼoni, ʼe nātou gāue ʼi tonatou ʼuhiga kalasi ʼo te tagata leʼo, pea neʼe nātou fakatokagaʼi ki te hahaʼi te faka ʼuhiga ʼo te ʼu meʼa ʼaē ʼe hoko ʼi te malamanei, ʼaē ʼe nātou fakahoko te ʼu lea faka polofeta ʼo te Tohi-Tapu. Neʼe nātou toe tokoni ki te kau ako ʼo te Tohi-Tapu ke nātou ʼiloʼi pea mo līaki te ʼu akonaki pea mo te ʼu aga ʼaē ʼe mole fakatafito ki te Tohi-Tapu.—1/1, pasina 8, 9.
• Neʼe ko ai koa te ʼu “Tēhina Polonia”?
Neʼe ko te kiʼi kūtuga lotu veliveli ʼo te 16 pea mo te 17 sēkulō ʼi Polonia, neʼe nātou fakaloto mālohiʼi te hahaʼi ke nātou mulimuli ki te Tohi-Tapu pea neʼe nātou līaki te ʼu akonaki tāfito ʼo te ʼēkelesia, ohage ko te Tahitolu, mo te papitema ʼo te ʼu kihiʼi tamaliki, pea mo te ʼifeli. ʼAki te temi, neʼe fai te ʼu fakataga kovi kia nātou pea mo fakamālohiʼi nātou ke nātou mavae ki te tahi ʼu fenua.—1/1, pasina 21 ki te 23.
• He koʼe ʼe tonu ke tou falala ki te ʼu lea faka polofeta ʼo te Tohi-Tapu kae mole ki te ʼu fakakikite ʼo te kau futurologues pea mo te kau astrologues?
ʼE mole feala ke kita falala ki te hahaʼi ʼaē ʼe nātou lau ʼe nātou polofeta, koteʼuhi ʼe nātou meʼa noaʼi ia Sehova pea mo te Tohi-Tapu. ʼE gata pe ki te ʼu lea faka polofeta ʼo te Tohi-Tapu ʼaē ʼe feala ke tokoni atu ke koutou ʼiloʼi pe koteā te pikipikiga ʼo te ʼu meʼa ʼaē ʼe hoko pea mo te fakatuʼutuʼu ʼa te ʼAtua, ke fua lelei ai kia koutou pea mo tokotou famili ʼo talu ai.—15/1, pasina 3.
• Koteā ʼihi fakamoʼoni ʼaē ʼe hā ai ʼe tou maʼuʼuli ʼi te ʼu ʼaho fakamuli?
ʼE tou lava sio ki te ʼu gāue kovi ʼa Satana talu mai tana kapu ifo mai te lagi. (Apokalipesi 12:9) ʼE tou maʼuʼuli nei ʼi te temi ʼo te “hau” fakamuli ʼaē ʼe talanoa ki ai te lea faka polofeta ʼo Apokalipesi 17:9-11. Kua tokosiʼi te kau Kilisitiano fakanofo, kae ʼe mahino ia ʼe kei maʼuʼuli anai ʼihi ʼi te kamata ʼo te mamahi lahi.—15/1, pasina 12, 13.
• Neʼe ko te temi fea ʼaē neʼe tohi ai te tohi ʼo Hapakuke, pea he koʼe koa ʼe tou fia lau te tohi ʼaia?
Ko te tohi ʼo Hapakuke neʼe tohi ʼi te taʼu 628 ʼi muʼa ʼo totatou temi, pea ʼe maʼu ai te ʼu faifakamāu ʼa Sehova ki Suta ʼāfea pea mo Papiloni. ʼE toe palalau ki te fakamāu fakaʼatua ʼaē kua vave hoko ki te tuʼu agakovi ʼaenī.—1/2, pasina 8.
• ʼE tou maʼu ʼifea ʼi te Tohi-Tapu te tokoni poto ʼa he faʼe ki te ʼu fafine ʼohoana faʼafai?
Ko te kapite fakaʼosi ʼo te tohi ʼo Tāʼaga Lea, te kapite 31, ʼe ko he matapuna lelei ki te ʼu tokoni ʼaia.—1/2, pasina 30, 31.
• He koʼe ʼe tonu ke tou loto fakafetaʼi kia Sehova ʼi tana fakahā mai kia tatou “te manatu a Kilisito”? (1 Kolonito 2:16)
ʼAki te ʼu Evaselio, neʼe faka fealagia mai e Sehova ke tou ʼiloʼi te ʼu manatu ʼa Sesu, mo tona loto, mo tana ʼu gāue pea mo te ʼu meʼa ʼaē neʼe ina fakamuʼamuʼa. ʼE lava tokoni mai te faʼahi ʼaia ke tou faʼifaʼitaki ia Sesu, tāfito ke tou faka maʼuhigaʼi te gāue fai faka mafola ʼaē ʼe ina hāofaki ai te maʼuli ʼo te hahaʼi.—15/2, pasina 25.
• Ia ʼaho nei, ʼe tali koa te ʼAtua ki te ʼu faikole?
Ei. Logope la ʼe fakahā e te Tohi-Tapu ʼe mole tali te ʼAtua ki te ʼu faikole fuli, kae ko te ʼu meʼa ʼaē ʼe hoko ʼi totatou temi ʼe nātou fakamoʼoni ai neʼe tali ʼi ʼihi temi ki te hahaʼi ʼaē neʼe nātou faikole ke nātou maʼu he fakaloto fīmālie pea mo he tokoni, ohage la moʼo fakatokatoka he ʼu fihifihia faka taumatuʼa.—1/3, pasina 3 ki te 7.
• Koteā ʼaē ʼe feala ke tou fai ke tou maʼu te mālohi ʼo Sehova?
ʼE feala hatatou faikole kia te ia, mo tou maʼu te mālohi fakalaumālie ʼi te Tohi-Tapu, pea mo fakaloto mālohi tatou ʼi tatatou fakatahi mo totatou ʼu tēhina mo tuagaʼane.—1/3, pasina 15, 16.
• ʼE lava tokoni feafeaʼi te ʼu mātuʼa ki tanatou fānau ke fua lelei kia nātou te ʼu fono faka Kilisitiano?
ʼE feala ke nātou tokoni ki tanatou fānau ke nātou nonofo ʼalaʼala, ʼo lagi nātou fakatuʼutuʼu ke nātou mālōlō ʼi muʼa ʼo te ʼu fono. ʼE feala ke fakaloto mālohiʼi te fānau ke nātou tohi he ʼu “nota,” ohage la ke nātou tohi ʼi he moʼi pepa, ʼi te temi fuli pe ʼaē ʼe fakaʼaogaʼi ai he ʼu kupu peʼe ko he ʼu higoa ʼe nātou ʼiloʼi.—15/3, pasina 17, 18.
• Koteā te ʼu meʼa ʼaē ʼe feala ke tou ako ʼo ʼuhiga mo te faʼifaʼitaki ʼo Sopo?
Neʼe fakamuʼamuʼa e Sopo tana felogoi mo Sehova, neʼe mole aga fakapalatahi, neʼe faiga ke agatonu ki tona ʼohoana, neʼe tuʼania ki te maʼuli fakalaumālie ʼo tona famili, pea neʼe nofo agatonu ʼi te ʼu ʼahiʼahi.—15/3, pasina 25 ki te 27.
• ʼE maʼu koa ʼi te Tohi-Tapu he ʼu logo neʼe fufū?
Kailoa. Ko te ʼui ʼaē ʼe ʼi ai he logo ʼe fufū ai, ʼe toe fai foki ki he ʼu tohi fakamālama. ʼE mole ʼi ai he ʼuhiga ʼo te ʼu logo ʼaē ʼe lau ʼe fufū ʼi te Tohi-Tapu, mai tona ʼuhiga ʼaē ʼe kehekehe te ʼu faʼahiga tohi ʼo te ʼu kupu ʼi te ʼu tohi faka Hepeleo.—1/4, pasina 30, 31.