Ko Koutou Koa Ko He Kau Kilisitiano Kua “Katoa ʼi Te ʼUhigaʼi Tagata”?
“I TE temi nee au tamasiʼi ai, nee au palalau fakatamaliki, nee au fakakaukau fakatamaliki, mo au manatu fakatamaliki.” Neʼe fai te ʼu palalau ʼaia e te ʼapositolo ko Paulo. ʼE moʼoni, ko tatou fuli neʼe tou fakalaka ʼi te ʼuhigaʼi tamaliki. Kae neʼe mole tou nonofo feiā ʼo talu ai. Neʼe fakatokagaʼi fēnei mai e Paulo: “I te temi kuʼau tagata ai, nee au maumauʼi ia mea fakatamaliki.”—1 Kolonito 13:11.
ʼO toe feiā pe, neʼe kamata fuli te kau Kilisitiano ohage ko he ʼu kiʼi tamaliki ʼi te faʼahi fakalaumālie. Kae ʼaki te temi, ko tatou fuli ʼe tou “kaku ki te temi e tou tau fuli ai ki te faifaitahi o te tui pea mo te iloi katoa o te Alo o te Atua, [“ki te katoa ʼo te ʼuhigaʼi tagata,” MN ], ki te fuafua o te ulugaʼaga o te katoa o Kilisito.” (Efeso 4:13) Ia 1 Kolonito 14:20 (MN ), ʼe fakaloto mālohiʼi fēnei tatou: “ ʼU tēhina, ʼaua naʼa koutou liliu ko he ʼu kiʼi tamaliki ʼi te fealagia ki te mahino . . . ʼI te faʼahi ʼaē ʼo te ʼu fealagia ki te mahino, koutou liliu ko he ʼu hahaʼi kua katoa te ʼuhigaʼi tagata.”
Ko te maʼu ʼo he kau Kilisitiano kua katoa tonatou ʼuhigaʼi tagata, ʼe ko he tapuakina ki te hahaʼi ʼa te ʼAtua ʼi te temi nei, tāfito la heʼe kua hahaʼi ʼaupito ia nātou ʼaē ʼe foʼofoʼou mai. Ko he kau Kilisitiano kua katoa tonatou ʼuhigaʼi tagata, ʼe nātou tokoni ki te tuʼu lelei ʼo he kokelekasio. Ko te kau Kilisitiano ʼaia ʼe fua lelei tanatou ʼu gāue ki te kokelekasio ʼaē ʼe nātou kau kiai.
ʼE kau ki te natula, te tuputupu ʼo totatou sino, kae ki te tuputupu fakalaumālie ʼe fakamaʼua kiai he faiga mālohi pea mo he temi. Koia ʼe mole tou punamaʼuli ai, ʼi te temi ʼo Paulo, neʼe ʼi ai te kau Kilisitiano neʼe mole nātou “hiki ki te katoa o te tagata kua lahi,” logope neʼe kua fualoa tanatou tauhi ki te ʼAtua. (Hepeleo 5:12; 6:1) Kae e feafeaʼi ia koutou? Peʼe kua lauʼi taʼu takotou tauhi ki te ʼAtua peʼe mole heʼeki faʼa fualoa, kae ʼe ʼaoga ke koutou vakavakaʼi fakalelei ia koutou. (2 Kolonito 13:5) ʼE koutou kau koa ia nātou ʼaē ʼe feala ke fakahigoaʼi ko he kau Kilisitiano kua katoa tonatou ʼuhigaʼi tagata? Kapau ʼe mole heʼeki koutou aʼu ki te ʼuhiga Kilisitiano ʼaia, pea ʼe lava feafeaʼi hakotou kaku kiai?
“ Koutou Katoa ʼi Te ʼu Fealagia Ki Te Mahino”
Ko he tahi ʼe kei tamasiʼi ʼi te faʼahi fakalaumālie, ʼe faigafua tana “fetafeaʼaki ʼi te ʼu fuga vai pea mo feʼāveʼaki ʼi hē mo hē e te matagi ʼo te ʼu akonaki fuli pe, ʼaki te kākā ʼa te tagata, ʼi tanatou faiva ʼaē ʼi te faʼufaʼu ʼo te kākā.” Koia neʼe fai e Paulo te fakaloto mālohiʼi ʼaenī: “Tou tuputupu ia meʼa fuli ia ia ʼaē ko te ʼulu, ia Kilisito.” (Efeso 4:14, 15, MN ) ʼO feafeaʼi hatatou kaku ki te potu ʼaia? ʼE ʼui fēnei e Hepeleo 5:14, MN: “Kae ko te meʼa kai fefeka ʼe ʼa nātou ʼaē kua katoa tonatou ʼuhigaʼi tagata, ʼa nātou ʼaē, ʼaki tanatou fakaʼaogaʼi, kua nātou maʼu te ʼatamai ʼe māhani ʼi te ʼiloʼi ʼo te lelei mo te kovi.”
Koutou fakatokagaʼi ko te kau tagata kua katoa tonatou ʼuhigaʼi tagata ʼe nātou maʼu te ʼatamai kua māhani ʼaki tona fakaʼaogaʼi, peʼe ko te maʼuliʼi ʼo te ʼu pelesepeto faka Tohi-Tapu. ʼE hā ʼaki mai, ʼe mole kita moe pea kita ʼala ake kua kita liliu ko he tahi kua lahi; kae ʼe fakamaʼua kiai he temi ke kita tuputupu ʼi te faʼahi fakalaumālie. Koia, ʼaki te ako takitokotahi—tāfito te ako ʼo te ʼu meʼa loloto ʼo te Folafola ʼa te ʼAtua—ʼe lahi te ʼu meʼa ʼe feala ke koutou fai moʼo faka faigafua takotou tuputupu ʼi te faʼahi fakalaumālie. ʼI te ʼu temi pe ʼaenī kua hili, neʼe lahi te puani loloto neʼe talanoa kiai Te Tule Leʼo. Ko nātou ʼaē kua katoa tonatou ʼuhigaʼi tagata ʼe mole nātou tuku keheʼi te ʼu taʼi alatike ʼaia heʼe maʼu ai “he u mea e faigataa te mahino ki ai.” (2 Petelo 3:16) ʼE nātou fia fai mālohi ki te taʼi meʼa kai fefeka feiā!
Ko He Kau Fai Faka Mafola Pea Mo He Kau Faiako Faiga Mālohi
Neʼe fakatotonu fēnei e Sesu ki tana kau tisipulo: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.” (Mateo 28:19, 20, MN ) Tahi ʼaē meʼa, kapau ʼe koutou kau mālohi ki te gāue fai faka mafola, pea ʼe feala ke tokoni atu ki takotou tuputupu ʼi te faʼahi fakalaumālie. He koʼe koa ʼe mole koutou faiga mālohi ke koutou kau kiai ʼo mulimuli ki tokotou ʼu fealagia?—Mateo 13:23.
ʼI ʼihi temi, ʼe feala ʼaki te ʼu fihifihia ʼo te maʼuli ke maʼu gataʼa he temi ki te fai faka mafola. Kae ʼaki ‘takotou faiga mālohi’ ʼi tokotou ʼuhiga tagata fai faka mafola, ʼe koutou fakahā ai takotou faka maʼuhigaʼi te “logo lelei.” (Luka 13:24; Loma 1:16) ʼE feala ke koutou liliu ai “ko he faʼifaʼitakiʼaga ki te kau agatonu.”—1 Timoteo 4:12, MN.
ʼE Nātou Taupau Tanatou Faitotonu
Ko takotou liliu ko he tagata kua katoa ʼi tokotou ʼuhigaʼi tagata, ʼe ina toe fakamaʼua foki he ʼu faiga moʼo taupau takotou faitotonu. Ohage ko tona fakamatala ia Pesalemo 26:1, neʼe tala fēnei e Tavite: “Ê Sehova, fakamāuʼi ʼau, koteʼuhi neʼe ʼau haʼele ʼi taku agatonu.” Ko te faitotonu ʼe ko he tuʼu mālohi pea mo fai katoa ʼo te ʼu aga ʼaē ʼe tonu ke fai. Kae ʼe mole faka ʼuhiga leva kua kita haohaoa. Neʼe lahi te ʼu agahala mamafa ʼaē neʼe fai e Tavite. Kae mai te ʼaluʼaga ʼaē neʼe ina tali tona akonakiʼi pea mo tona fakatonutonuʼi, neʼe ina fakahā ʼaki ai neʼe kei ʼofa fakamalotoloto tona loto kia Sehova ʼAtua. (Pesalemo 26:2, 3, 6, 8, 11) ʼE fakamaʼua e te agatonu he tauhi ʼe fai ʼaki te loto katoa. Neʼe ʼui fēnei e Tavite ki tona foha ko Salomone: “[Ke] ʼiloʼi e koe te ʼAtua ʼo tau tāmai pea tauhi kia te ia ʼaki he loto katoa.”—1 Fakamatala 28:9.
Ko te taupau ʼo te faitotonu ʼe fakamaʼua ke “mole . . . [kita] kau ʼi te malamanei,” ke ʼaua naʼa kita kau ki te ʼu meʼa faka politike ʼo te ʼu fenua mo tanatou ʼu tau. (Soane 17:16, MN ) ʼE toe fakamaʼua ai foki ke koutou tekeʼi te ʼu aga kovi, ohage ko te folonikasio, mo te tono, pea mo te fakaʼaogaʼi ʼo te toloke. (Kalate 5:19-21) Kae ko te taupau ʼo te faitotonu ʼe mole gata pe tona faka ʼuhiga ki te fakamamaʼo mai te ʼu meʼa ʼaia. Neʼe fai te fakatokaga ʼaenī e Salomone: “Ko he ʼu lago mate, ʼe faka ʼaele kovi ai, pea mo fakaʼalu noa te lolo ʼo te tagata faʼu lolo tākai. ʼO feiā mo he kiʼi fakavalevale ki he tahi ʼe maʼuhiga ʼi te agapoto pea mo te kolōlia.” (Tagata Tānaki 10:1) Māʼia mo he “kiʼi fakavalevale,” ohage la ko he fakahuahua kovi pe ko he faiʼakau mo he fafine peʼe ko he tagata, ʼe feala ke ina holoʼi te matagafua ʼo ia ʼaē ʼe “maʼuhiga ʼi te agapoto.” (Sopo 31:1) Koia, koutou fakahā kua katoa tokotou ʼuhigaʼi tagata ʼo koutou tuku he faʼifaʼitaki ʼi takotou aga, pea mo koutou fakamamaʼo mai te “ ʼu meʼa ʼaē ʼe agaaga ohage ko he meʼa ʼe kovi.”—1 Tesalonika 5:22, Kuen.
Te Kau Agatonu
Ko he Kilisitiano kua katoa tona ʼuhigaʼi tagata ʼe toe ia ia foki te agatonu. Ohage ko te meʼa ʼaē ʼe tou lau ia Efeso 4:24 (MN ), ʼe fakaloto mālohiʼi fēnei te kau Kilisitiano e te ʼapositolo ko Paulo: “[Koutou] kofuʼi te ʼuhigaʼi tagata foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” ʼI te Tauhi Foʼou, ko te kupu faka Keleka ʼaē ʼe fakaliliu ʼaki te kupu “agatonu,” ʼe faka ʼuhiga ki te maʼoniʼoni, ki te faitotonu, pea mo te tauhi. Ko te tagata ʼaē ʼe agatonu ʼe ko he tahi ʼe aga faka lotu; ʼe tokaga lelei ke ina fakahoko tona ʼu maʼua fuli ki te ʼAtua.
Koteā la he tahi ʼu ʼaluʼaga ʼe feala ai ke koutou fakatuputupu te agatonu moʼoni? ʼE feala ke kita gāue tahi mo te ʼu tagata ʼāfea ʼo te kokelekasio. (Hepeleo 13:17) ʼI tanatou mahino ʼe ko Kilisito te ʼUlu ʼaē neʼe fakanofo ki te kokelekasio faka Kilisitiano, ko te kau Kilisitiano ʼaē kua katoa tonatou ʼuhigaʼi tagata, ʼe nātou agatonu kia nātou ʼaē neʼe fakanofo “moʼo fafaga te kokelekasio ʼa te ʼAtua.” (Gaue 20:28, MN ) ʼE mole tau mo feʼauga ke tou fakafifihi peʼe meʼa noaʼi te ʼuhiga pule ʼo te kau tagata ʼāfea ʼaē neʼe fakanofo! ʼE toe fakamaʼua foki ke koutou agatonu ki “te tagata kaugana agatonu mo poto,” pea mo te ʼu hahaʼi ʼaē ʼe ina fakaʼaogaʼi moʼo foaki te “meʼa kai [fakalaumālie] ʼi tona temi totonu.” (Mateo 24:45, MN ) Koutou foimo lau pea mo maʼuliʼi te ʼu fakatotonu ʼaē ʼe maʼu ʼi Te Tule Leʼo pea mo te tahi ʼu tohi.
Tou Fakahā Te ʼOfa ʼAki ʼAtatou ʼu Aga
Neʼe faitohi fēnei ia Paulo ki te kau Kilisitiano ʼo Tesalonika: “Koutou tahi tuputupu ʼi takotou feʼofaniʼaki.” (2 Tesalonika 1:3, MN ) Ko te tuputupu ʼi te ʼofa ʼe ko he koga maʼuhiga ʼo te tuputupu fakalaumālie. Ohage ko tona fakamatala ia Soane 13:35, neʼe ʼui fēnei e Sesu: “Aki te mea aia, e iloi anai e te tagata fuape, ko koutou ko aku tisipulo, kapau e koutou maù te feʼofaʼofani.” Ko he ʼofa fakatautehina feiā ʼe mole ʼiloga ʼaki pe he ʼu meʼa ʼe kita logoʼi ʼi tokita loto. ʼE ʼui fēnei e te tikisionalio (Vine’s Expository Dictionary of Old and New Testament Words): “ ʼE hoki feala ke ʼiloʼi te ʼofa ʼaki te ʼu gāue ʼaē ʼe ina uga ke kita fai.” Koia, koutou kātaki ʼi takotou faiga ki te katoa ʼo te ʼuhigaʼi tagata ʼo koutou gāueʼi te ʼofa!
Ohage la, ia Loma 15:7, ʼe tou lau fēnei ai: “Koutou fe’talitaliʼaki koutou.” Ko he tahi faʼahiga fakahā ʼo te ʼofa, ʼe ko takotou tauʼalofa ki ʼokotou tēhina pea mo tuagaʼane, pea mo nātou ʼe foʼofoʼou mai ki te ʼu fono ʼo te kokelekasio—ʼaki he loto māfana pea mo he loto fakafiafia! Koutou faigaʼi ke koutou ʼiloʼi ia nātou takitokotahi. Koutou agaʼofa ki te hahaʼi. (Filipe 2:4) Lagi ʼe feala pe ke koutou fakahā te tali kāiga pea mo fakaafe niʼihi ki tokotou loto fale. (Gaue 16:14, 15) ʼE feala pe ʼi ʼihi temi ke ʼahiʼahiʼi te loloto ʼo totatou ʼofa e te ʼuhiga heʼe haohaoa ʼo niʼihi, kae mai tona ʼaluʼaga ʼaē neʼe koutou ako te ‘kātakiʼi ʼo nātou ʼaki te ʼofa,’ ʼe koutou fakahā ai kua koutou liliu ʼo katoa ʼi te ʼuhigaʼi tagata.—Efeso 4:2.
Tou Fakaʼaogaʼi Totatou ʼu Koloā Moʼo Lagolago Ki Te Tauhi Maʼa
ʼI te ʼu temi ʼāfea, neʼe mole fakahoko fuli e te hahaʼi ʼa te ʼAtua tonatou maʼua ʼo ʼuhiga mo te lagolago ki te fale lotu ʼa Sehova. Koia neʼe fekauʼi ai e te ʼAtua te ʼu polofeta, ohage ko Asea, mo Malakia, moʼo uga Tana hahaʼi ki te potu ʼaia. (Asea 1:2-6; Malakia 3:10) ʼI te temi nei, ko te kau Kilisitiano ʼaē kua katoa tonatou ʼuhigaʼi tagata ʼe nātou fakaʼaogaʼi fakafiafia tonatou ʼu koloā moʼo lagolago ki te tauhi kia Sehova. Tou faʼifaʼitaki kia nātou ʼaia ʼo tou muliʼi te pelesepeto ʼaē ʼe tuʼu ia 1 Kolonito 16:1, 2, ʼo tou ‘tuku keheʼi he meʼa’ moʼo tokoni ki te kokelekasio pea mo te gāue faka malamanei ʼa te kau Fakamoʼoni ʼa Sehova. ʼE fakapapau fēnei mai e te Folafola ʼa te ʼAtua: “Ko ae e lahi tana to, e toe lahi anai tana utu.”—2 Kolonito 9:6.
ʼAua naʼa koutou meʼa noaʼi te tahi ʼu koloā ʼe koutou maʼu, ohage ko tokotou temi pea mo tokotou mālohi. Koutou faigaʼi ʼo ‘totogi te temi’ mai takotou ʼu fakatuʼutuʼu ʼaē ʼe mole faʼa maʼuhiga. (Efeso 5:15, 16; Filipe 1:10) Koutou ako peʼe feafeaʼi te fakaʼaogaʼi fakalelei ʼo tokotou temi. Kapau ʼe koutou fai feiā, pea ʼe lagi feala anai ke koutou kau ki te ʼu fakatuʼutuʼu ʼaē ʼe fai moʼo taupau fakalelei te ʼu Fale ʼo Te Puleʼaga, pea mo ʼihi atu gāue ʼaē ʼe nātou lagolago ki te tauhi kia Sehova. Kapau ʼe koutou fakaʼaogaʼi feiāʼi tokotou ʼu koloā, pea ʼe toe fakamoʼoni ai anai kua koutou liliu ko he kau Kilisitiano kua katoa ʼi te ʼuhigaʼi tagata.
Tou Hiki Ki Te Katoa ʼo Te ʼUhigaʼi Tagata
ʼE ko he tapuakina moʼoni te ʼu tagata pea mo te ʼu fafine ʼaē ʼe nātou ako pea mo maʼu te ʼatamai mālama, mo fai faka mafola ʼaki he faʼafai, mo faitotonu, mo agatonu pea mo agaʼofa, pea mo nātou lotolelei ke nātou tokoni ʼi te faʼahi fakasino pea mo te faʼahi fakakoloa ki te gāue ʼo te Puleʼaga. ʼE mole tou punamaʼuli ai ki te fakaloto mālohi fēnei ʼa te ʼapositolo ko Paulo: “ ʼI tatatou kua tuku te akonaki ʼo te kamataʼaga ʼo ʼuhiga mo Kilisito, tou hiki atu ki te katoa ʼo te ʼuhigaʼi tagata”!—Hepeleo 6:1, MN.
Ko koutou koa ko he Kilisitiano kua katoa ʼi te ʼuhigaʼi tagata? Peʼe kei hage pe koa koutou, ʼi he ʼu faʼahiga ʼaluʼaga, ko he kiʼi tamasiʼi ʼi te faʼahi fakalaumālie? (Hepeleo 5:13) Kapau koia ʼaia, pea koutou faiga mālohi ke koutou ako takitokotahi, mo fai faka mafola, pea mo koutou ʼofa ki tokotou ʼu tēhina. Koutou tali leleiʼi te ʼu tokoni pea mo te ʼu akonaki ʼaē ʼe fai atu e te kau Kilisitiano ʼaē kua katoa ʼi te ʼuhigaʼi tagata. (Tāʼaga Lea 8:33) Koutou fakahoko katoa tokotou ʼu maʼua faka Kilisitiano. ʼAki te temi pea mo he ʼu faiga, ʼe feala mo koutou ke koutou “aʼu ki te logo tahi ʼi te tui pea mo te ʼatamai mālama totonu ʼo ʼuhiga mo te ʼAlo ʼo te ʼAtua, ki te katoa ʼo te ʼuhigaʼi tagata, ki te fakafuafua ʼo te ʼaluʼaga ʼo te katoa ʼa Kilisito.”—Efeso 4:13, MN.
[Talanoa ʼo te pasina 27]
Ko he kau Kilisitiano kua katoa tonatou ʼuhigaʼi tagata, ʼe nātou tokoni ki te tuʼu lelei ʼo he kokelekasio. Ko te kau Kilisitiano ʼaia ʼe fua lelei tanatou ʼu gāue ki te kokelekasio
[Paki ʼo te pasina 29]
Ko nātou ʼaē kua katoa ʼi te ʼuhigaʼi tagata ʼe nātou tokakaga ki te ʼu hahaʼi ʼo te kokelekasio