‘ ’Ke ʼIloga ʼa Kotou ʼu Faiga’
“ ʼI te temi ʼaenī, ku ʼau liliu ai ko he tagata, ku ʼau līaki te ʼu agaaga faka tamasiʼi.” — 1 Kolonito 13:11.
1. ʼE feafeaʼi koa te fakamoʼoni ʼa te tuputupu fakaofoofo ʼo te ʼu meʼa maʼuli?
KO TE kiʼi fuaʼi moa veliveli ʼe feala pe ke sioʼi ʼaki he microscope, ko te tāfolaʼa ʼe ko he manu ʼe meta 30 tona loa pea mo tane 80 tona mamafa. Feiā aipe, mo te kiʼi tegaʼi sekoia ʼaē ʼe liliu ko he toe fuʼu sekoia lahi ʼe meta 90. ʼIo, ko te tuputupu ko he meʼa taulekaleka ia ʼo te maʼuli. Ohage ko te ʼui ʼa te ʼapositolo ko Paulo, ʼe feala ke kita to pea mo kita fakavai, kae ko te “ ʼAtua ʼaē ʼe ina fakatupu”. — 1 Kolonito 3:7.
2. Ko te faʼahiga tuputupu feafeaʼi koa neʼe fakakikite e te Tohi-Tapu?
2 Kae, ʼe ʼi ai foki te tahi age faʼahiga tuputupu ʼe toe fakaofoofo. Neʼe fakakikite e te polofeta ko Isaia fēnei: “Ko ia ʼaē ʼe veliveli ʼe liliu anai ko te lauʼi afe e tahi, pea ko ia ʼaē ʼe veliveli ʼe liliu ia ko te puleʼaga mālohi. Ko ʼau, Sehova, ʼe ʼau fakahaʼele ki muʼa te fahaʼi ʼaia mokā hoko tona temi.” (Isaia 60:22). Ko te fakakikite ʼaia neʼe hoko ʼi te tuputupu ʼa te hahaʼi ʼa te ʼAtua, pea ʼe lolotoga hoko nei.
3. ʼE ʼiloga feafeaʼi ʼi te tānaki ʼo te gāue ʼo te taʼu 1991 ko Sehova neʼe ina fakahaʼele ki muʼa te gāue ʼa tana hahaʼi?
3 ʼI te tānaki ʼo te taʼu gāue 1991 ʼa te kau Fakamoʼoni ʼa Sehova ʼi te malamanei, ʼe ʼiloga mai ai neʼe maʼu tona hahaʼi foʼou ʼe toko 4 278 820, pea ko te toko 300 945 hahaʼi neʼe papitema ʼi te taʼu ʼaia. ʼI te kua hahaʼi ʼaupito ʼonatou ʼaia neʼe hoki hu mai, ko te ʼu kokelekasio foʼou e 3 191 neʼe fakatuʼu, feiā aipe mo te ʼu silikosikilipisio mo te ʼu tisitilike foʼou. ʼE fakafuafua ki te ʼu kokelekasio foʼou e valu ʼi te ʼaho, pea lagi ko te silikosikilipisio foʼou pe ia ʼaho e lua. ʼE ko he tuputupu taulekaleka ia! ʼIo, ko Sehova ʼe ina fakahaʼele ki muʼa te ʼu meʼa, pea ʼe ina tapuakiʼi te ʼu gāue ʼa tana hahaʼi. — Pesalemo 127:1.
Tou sioʼi takitokotahi te temi
4. Koteā koa te ʼu fehuʼi ʼe tonu ke tou fakasiosio ki ai mokā ʼe tou mamata ki te temi ka haʼu?
4 Kae ʼe ʼiloga mai, ko te tapuaki ʼaia ʼe ina toe foaki mai ʼihi ʼu maʼua. ʼE feʼauga koa te ʼu hahaʼi popoto ki te tali lelei ʼaē ʼo tokaga ki te ʼu meʼa fakalaumālie ʼo te hahaʼi foʼou fuli ʼaia? Ka kita fakasiosio ki te temi ka haʼu, ʼe fakaofoofo he manatu ki he tokolahi pionie, mo he kau tagata faifekau faka minisitelio, mo he kau tagata ʼāfea, pea mo te kau taupau feʼaluʼaki ʼe ʼaoga anai moʼo tokaga ki te tuputupu pea mo te haʼele ʼaia, feiā aipe mo te kaugāue lotolelei ʼaē ʼe ʼaoga ʼi te ʼu filiale pea mo te ʼu Petele ʼi te malamanei katoa moʼo lagolago te faʼahi ʼaia. ʼE ʼomai anai koa maifea te toe hahaʼi tokolahi ʼaia? ʼE mole ʼi ai he mahalohalo, ko te utu ʼe lahi. Kae ko ai koa ʼi te temi nei ʼe fia liliu ko he tagata gāue ʼo te utu ʼaia. — Mateo 9:37, 38.
5. Ko te ʼu ʼaluʼaga feafeaʼi koa neʼe hoko ʼi ʼihi fenua ʼuhi ko te tuputupu fakavilivili?
5 Neʼe toe fakahā foki, ʼe lahi te ʼu kokelekasio ʼe lauʼi teau te hahaʼi faka mafola ʼo te Puleʼaga ʼe nātou maʼu pe ia te tagata ʼāfea e tahi pea mo te ʼu tagata faifekau faka minisitelio e tahi pe ʼe lua. ʼI ʼihi koga meʼa ʼe mole feʼauga te kau minisi kilisitiano moʼo fai te ʼu ako faka tohi-tapu, ʼo liu talitali muʼa te hahaʼi ʼaē ʼe fia ako ke maʼu niʼihi moʼo fai tanatou ʼu ako. Ko ʼihi koga meʼa, ko te ʼu kokelekasio foʼou neʼe fakatupu ʼuhi ko te tuputupu vave ʼaia. Ko te ʼu kokelekasio e tolu, e fā pe ʼe nima, ʼe nātou fevaevaeʼaki ia te Fale ʼo te Puleʼaga e tahi. Lagi kua koutou sisio pe ki te tuputupu ʼaia ʼi tokotou koga meʼa.
6. He koʼe ʼe maʼuhiga ke tou fai he sivi ʼo ʼuhiga mo tatou totonu?
6 Koteā koa te ʼuhiga ʼo te ʼu meʼa ʼaia kia tatou? ʼI te kua nounou ʼo te temi, ʼe ʼaoga kia tatou fuli ke tou fakatokaga ki totatou ʼu ʼaluʼaga, pe ʼe feala hatatou fakaʼaoga fakalelei totatou temi pea mo totatou mālohi moʼo fai te ʼu meʼa ʼaē ʼe tonu ke fai (Efesi 5:15-17). Neʼe faitohi ia te ʼapositolo ko Paulo ki te kau kilisitiano hepeleo ʼo te ʼuluaki sekulo, ʼo ina ʼui fēnei: “ ʼIo, talu mai fualoa, kua tonu ke tau mo koutou ia te fai akonaki, kei ʼaoga ke toe akonakiʼi koutou e hina tahi mai te kamataʼaga ʼo te ʼu akonaki ʼuluaki ʼo te ʼu folafola taputapu ʼa te ʼAtua; pea mo liu toe tau mo koutou te huʼa pipi, ʼe mole ko he meʼa kai mālohi ia.” (Hepeleo 5:12). ʼE ʼiloga mai ʼi te ʼu palalau ʼaenī, ko te ʼu kilisitiano takitokotahi ʼe toe ʼaoga ke nātou popoto ʼi te faʼahi fakalaumālie. Pea ʼe ʼi ai te tuʼutāmaki tāfito ki ʼaē ʼe nofo veliveli ʼi te faʼahi fakalaumālie ʼi tana mole faiga ki te poto faka kilisitiano. ʼO ʼuhiga mo te faʼahi ʼaia, ʼe fakaloto mālohiʼi tatou e Paulo fēnei: “Vakaʼi ʼi te faigataʼaʼia pe ʼe koutou tui, vakaʼi tokotou ʼuhiga totonu, pea ke koutou haga fai aipe.” (2 Kolonito 13:5). ʼE koutou sivi koa ia koutou totonu kua koutou tuputupu fakalaumālie talu mai te temi neʼe koutou papitema ai? Pe ʼe kei koutou nonofo tuʼumaʼu pe ʼi ʼakotou ʼu ʼuluaki faiga? Kae, ko ai koa ʼe ina ʼiloʼi?
“Te ʼu agaaga faka tamasiʼi”
7. Ke ʼiloga te ʼu faiga fakalaumālie, koteā koa ʼe tonu ke kita fai?
7 “ ʼI taku kei tamasiʼi, neʼe ʼau talanoa faka tamasiʼi pe, pea neʼe ʼau fakakaukau faka tamasiʼi, pea neʼe ʼau loto faka tamasiʼi foki; kae ʼi te temi ʼaenī ku ʼau liliu ai ko he tagata, ku ʼau līaki te ʼu agaaga faka tamasiʼi”, ko te ʼui ʼaia ʼa te ʼapositolo ko Paulo (1 Kolonito 13:11). ʼI muʼa atu, ko tatatou tuputupu fakalaumālie neʼe hage ʼatatou ʼu fakakaukau mo ʼatatou ʼu gāue ko he tamasiʼi. Kae, ke ʼiloga ʼatatou ʼu faiga, ʼe tonu ke tou līaki “te ʼu agaaga faka tamasiʼi”, ohage ko te ʼui ʼa Paulo. Koteā koa te ʼu agaaga ʼaia?
8. ʼO ʼuhiga mo te palalau ʼa Paulo ia Hepeleo 5:13, 14, koteā koa te faʼahiga agaaga ʼa te tamasiʼi fakalaumālie?
8 ʼUluaki, tou fakatokagaʼi te ʼu palalau ʼa Paulo ia Hepeleo 5:13, 14: “Heʼe ko ʼaē ʼe ʼinu huʼa pipi ʼe fakapōʼuli ki te folafola faitotonu, heʼe ko te tamasiʼi. Kae ko te meʼa kai mālohi ʼe pipiki ki te ʼu tagata popoto, kia nātou ʼaē, kua māhani ʼi te ʼu fealagia fakasiosio ʼo ʼuhiga mo te meʼa ʼe kovi pea mo te meʼa ʼe lelei.” Kua ‘koutou ʼiloʼi koa te folafola faitotonu’? Kua koutou mahino lelei koa ki te Folafola ʼa te ʼAtua ʼaē ko te Tohi-Tapu ke feala ai ha koutou ʼiloʼi “te fakasiosio ʼo ʼuhiga mo te meʼa ʼe kovi pea mo te meʼa ʼe lelei”? ʼE ʼui e Paulo ko te hahaʼi popoto ʼe nātou mafai ʼuhi ko tanatou toʼo tuʼumaʼu te “meʼa kai mālohi”. Koia, ko he holi pe ʼe ko he fiakai ʼa he tahi ki te meʼa kai mālohi fakalaumālie ʼe ko he fakaʼiloga ia ʼo he tahi ʼe tuputupu fakalaumālie pe ʼe nofo tuʼumaʼu pe ia ko he tamasiʼi fakalaumālie.
9. He koʼe koa ko te fiakai fakalaumālie ʼa he tahi ko he fakaʼiloga ʼe tuputupu fakalaumālie?
9 Koia ʼaē, ʼe feafeaʼi koa takotou fiakai fakalaumālie? Koteā koa takotou manatu ʼo ʼuhiga mo te mahu ʼaē ʼo te meʼa kai fakalaumālie ʼaē ʼe foaki mai tuʼumaʼu e Sehova ʼaki te ʼu tohi faka tohi-tapu, ʼi te ʼu fono faka kilisitiano pea mo te ʼu fakatahi (Isaia 65:13)? ʼE mahalope ʼe koutou fiafia ʼaupito mokā hā he ʼu tohi foʼou ʼi te ʼu fakatahi faka tisitilike ʼaē ʼi te ʼu taʼu fuli. Kae koteā koa ʼe koutou fai mo te ʼu tohi ʼaia mokā koutou aʼu ki tokotou ʼapi? Koteā koa te meʼa ʼe koutou fai mokā koutou maʼu te ʼu numelo foʼou ʼo te ʼu nusipepa Koutou ʼaʼala! pea mo Te Tule Leʼo? ʼE koutou lau koa te ʼu tohi ʼaia, pe ʼe koutou sioʼi pe koutou te ʼu manatu tāfito pea koutou hili fakatahi mo ʼihi ʼa kotou ʼu tohi? Ko he ʼu fehuʼi fēnei ʼe toe ʼaoga ʼo ʼuhiga mo te ʼu fono faka kilisitiano. ʼE koutou kau tuʼumaʼu koa ki te ʼu fono fuli? ʼE koutou teuteu koa ʼo ʼuhiga mo te ʼu tali ʼo te ʼu fehuʼi? Ko ʼihi neʼe kua māhani pe nātou ki he meʼa kai fakalaumālie ʼe mole faʼa lahi, mo he lautohi fakavilivili. ʼE kehekehe ʼosi ia mo te talanoa ʼa te pesalemo, ʼaē ʼe ʼui fēnei: “ ʼE ʼau manako ki tau lao! ʼI te ʼaho fuli pe ʼe ina fakamaʼua ia ʼau.” Pea toe ʼui e te hau ko Tavite: “ ʼE ʼau faka kōlolia anai koe ʼi te kokelekasio lahi; ʼi te hahaʼi tokolahi ʼe ʼau fakavikiviki anai koe.” (Pesalemo 35:18; 119:97). ʼIo, ko te maʼoluga ʼaē ʼo tatatou leleiʼia te ʼu fakatuʼutuʼu fakalaumālie ʼe ko he fakaʼiloga ia ʼo ʼatatou ʼu tuputupu fakalaumālie.
10. Koteā te agaaga ʼa te tamasiʼi fakalaumālie ʼe hinoʼi mai ia Efesi 4:14?
10 Neʼe hinoʼi foki e Paulo te tahi agaaga ʼo te tamasiʼi fakalaumālie ʼi tana valoki ʼaenī: “Ke ʼaua naʼa tou hage ko he ʼu tamasiʼi ʼe fetafeaʼaki ʼi te fugavai pea mo feʼāveʼaki e te matagi ʼo he akonaki pe, ʼaki te kākā ʼa te tagata, ʼi tanatou poto ʼi te gaohi ʼaē ʼo te kākā.” (Efesi 4:14). ʼE ʼiloʼi pe foki e te ʼu mātuʼa, ko te ʼu tamasiʼi ʼe nātou fia ʼiloʼi te meʼa fuli. ʼE ko he agaaga ʼaia ʼe lelei foki, koteʼuhi ʼe ina teuteuʼi nātou ke nātou mahino pea mo tuputupu mamalie ko he ʼu tagata popoto. Ko te meʼa ʼaē ʼe kovi tāfito, ko tanatou mole heʼeki māhani mo te ʼu meʼa ʼaia, koia ko tanatou fia ʼiloʼi ʼe feala taki nātou ki te ʼu faigataʼaʼia, feiā aipe mo te ʼu fakatupu tuʼutāmaki kia nātou totonu pea mo niʼihi foki. ʼE toe moʼoni foki mo te faʼahi ʼaia ʼo ʼuhiga mo te ʼu tamasiʼi fakalaumālie.
11. a) Koteā koa te manatu ʼa Paulo ʼi tana fakaʼaoga ʼaē te kupu ko te “fetafeaʼaki ʼi te fugavai pea mo feʼāveʼaki e te matagi ʼo he akonaki”? b) Koteā koa te ʼu ‘matagi’ ʼaē ʼe felāveʼi mo tatou ʼi te temi nei?
11 Koteā koa te manatu ʼa Paulo ʼi tana ʼui ʼaē ko te ʼu tamasiʼi fakalaumālie ʼe nātou fetafeaʼaki “ ʼi te fugavai pea mo feʼāveʼaki e te matagi ʼo he akonaki”? ʼI heni ko te kupu ʼaē ko te “matagi” neʼe fakaliliu e te kupu faka keleka ko te anemos, ʼe toe ʼui e te tohi (International Critical Commentary) ʼe hage “ko te filifili ke felogoi ki te manatu ʼaē ke fetogi”. ʼE ʼiloga te meʼa ʼaia ʼi te talanoa ʼaenī ʼa Paulo, ʼo ʼuhiga mo “te kākā ʼa te tagata”. Ko te kupu ʼaē ko te “kākā” ʼi tona ʼuluaki kupu ko tona ʼuhiga ko te “gaoʼi pepa” ʼaē ʼe feala ke fakaliliu ko te gaoʼi ʼo te faigamalie. Ko te manatu ʼaenī ko tona ʼuhiga, ʼe tou felāveʼi tuʼumaʼu mo te ʼu manatu foʼou pea mo feala ke tou fai he ʼu meʼa ʼe lagi mole kovi, ʼe fakalalata, pea mo lagi maʼuhiga mai. Ko te talanoa ʼa Paulo ʼe faka ʼuhiga ʼuluaki muʼa ki te ʼu meʼa ʼaē ʼe feala ke pipiki ki tatatou tui: te ʼu gāue faka lotu, te ʼu meʼa faka sosiale mo faka politike, mo ʼihi age pe ʼu meʼa fēnei (vakaʼi ia 1 Soane 4:1). Kae ʼe toe lelei foki te fakatuʼutuʼu ʼaia ʼo ʼuhiga mo te ʼu agaaga fetofetogi tuʼumaʼu ʼo te malamanei: tona faʼahiga maʼuli, tana ʼu fakafiafia, te ʼu meʼa kai, te maʼuli haohaoa pe ʼe ko te gāue māhani fakasino pea mo ʼihi age pe ʼu meʼa. ʼUhi ko te mole māhani ki te ʼu meʼa ʼaia ʼo te maʼuli pea mo te mole maʼu ʼo te fakasiosio tonu, ko te tamasiʼi fakalaumālie ʼe feala ke hē gafua ki he ʼu faʼahiga meʼa feiā pea mo ina fakamuʼamuʼa ia ʼi tana ʼu tuputupu fakalaumālie ʼaē ko te fai ʼo tona ʼu maʼua faka kilisitiano. — Mateo 6:22-25.
12. Koteā koa ʼaē ʼe kehekehe ai te ʼu tamasiʼi ʼi te ʼu hahaʼi lalahi ʼo ʼuhiga mo te ʼu maʼua?
12 Ko te tahi agaaga ʼa te ʼu tamasiʼi, ko tanatou loto tuʼumaʼu ke tokoniʼi nātou pea mo tokaga kia nātou. ʼE mole nātou mālama ki he meʼa feiā aipe mo ʼonatou ʼu maʼua; ko te temi ʼaia kei nātou tamasiʼi ai ʼe hage pe kia nātou ko he temi gaoʼi pea mo fakafiafia. Ohage ko te ʼui ʼa Paulo, ʼe nātou “palalau ohage ko he tamasiʼi, manatu ohage ko he tamasiʼi, fakakaukau ohage ko he tamasiʼi”. ʼI tanatou manatu ko ʼihi ʼaē ʼe tonu ke tokaga tuʼuamʼu kia nātou. ʼE toe feala pe ke toe feiā mo te tamasiʼi fakalaumālie. Ka ko he tahi ʼe ina fai hana ʼuluaki akonaki pe ʼe ko hana ʼu ʼuluaki palalau ʼi te gāue faka minisitelio, ko te ʼu mātuʼa fakalaumālie ʼe nātou tokoniʼi fakafiafia ia nātou ʼo ʼuhiga mo te meʼa fuli. Koteā anai ka hoko mo kapau ko he kaugā fagona faka mafola foʼou ʼe loto ke tokoniʼi tuʼumaʼu ia ia pea mole ina faʼa fua hona maʼua tokotahi? ʼE ʼiloga fakalelei mai ʼe mole ina mau’liʼi te ʼu tokoni.
13. Heʼe koʼe koa ʼe tonu ke tahi ʼamo tana kavega?
13 ʼO ʼuhiga mo te meʼa ʼaia, ʼe fakaloto mālohiʼi tatou e te ʼapositolo ko Paulo ke tou “haga fefuaʼaki ʼatatou ʼu kavega (...) heʼe tahi ʼamo anai tana kavega”. (Kalate 6:2, 5.) ʼIo, ʼe fakamaʼua te temi pea mo te ʼu faiga ki he akoʼi ʼo he tahi ke ina ʼamo te ʼu maʼua faka kilisitiano, pea ko tona ʼuhiga ki ʼihi koga meʼa ko te ʼu sakilifisio. ʼIo, ko he manatu hāla ia hatatou kau ki he ʼu fakafiafia pea mo he ʼu gaoʼi ʼo te maʼuli ohage ko te ʼu mālōlō, te ʼu mamata fenua, te ʼu lelei, pe ʼe mo holi ki he gāue fakamālama, heʼe mole tou hikihiki anai tatatou kau ki te gāue faka mafola pe ʼe ko he ʼu tuputupu feiā aipe mo te ʼu maʼua fakalaumālie. Neʼe fēnei te fakaloto mālohi ʼa te tisipulo ko Sake: “Koutou liliu ko he hahaʼi ʼe maʼuliʼi te folafola, ʼo mole gata ʼaki pe he ʼu hahaʼi fagono, ʼo koutou kakaʼi pe koutou ʼi he ʼu fakakaukau hāla.” — Sake 1:22; 1 Kolonito 16:13.
14. He koʼe koa ʼe mole tonu ke tou faka fīfīmālie ohage ko he tamasiʼi fakalaumālie?
14 ʼIo, ʼe lahi te ʼu agaaga ʼe feala ke ʼiloʼi ai ia te tamasiʼi ʼi he tagata. Kae, ohage pe ko te ʼui ʼaē ʼa Paulo, ko te meʼa ʼaē ʼe maʼuhiga, ke tou līaki mamalie te ʼu agaaga ʼa te tamasiʼi pea mo tou tuputupu fakalaumālie (1 Kolonito 13:11; 14:20). Koia, ʼe feala hatatou veliveli ʼi te ʼaluʼaga fakalaumālie. Kae, ʼe feafeaʼi koa he taki ʼo he tahi ke tuputupu? Koteā koa ʼaē ʼe pipiki ʼo ʼuhiga mo te tuputupu fakalaumālie ki te poto?
ʼE feafeaʼi koa he fai ke hā te ʼu tuputupu?
15. Koteā koa te ʼu meʼa tāfito ʼo te tuputupu?
15 ʼE feafeaʼi koa te hoko ʼo te tuputupu ʼi te mālama ʼaenī? “Ko te maʼuli ʼo te hahaʼi fuli ʼe kamata ʼi te selule e tahi”, ko te fakamatala ʼaia ʼa te encyclopédie (The World Book Encyclopedia). “Ko te selule ʼaia ʼe tuputupu pea mo mavaevae. Pea ko te selule ʼaia e tahi ʼe tupu ʼi loto ʼo te fatu. ʼE feala ke liliu ʼo tapuke, pea mo femavaevaeʼaki moʼo faʼu niʼihi ʼu selule. Ko te faʼahiga fakatuʼutuʼu ʼaia, ke tapuke, pea mo te fevaevaeʼaki ʼe tuputupu ia.” Ko te meʼa maʼuhiga ʼi te meʼa ʼaenī ko te tuputupu ʼaē ʼe hoko ʼi loto ʼo te fatu. Kapau ʼe tou kai fakalelei pea mo fakaʼaoga lelei te meʼa kai, ʼe tou tuputupu ai leva. ʼE ʼiloga te faʼahi ʼaia, ʼi he fānauʼi ʼo he tamasiʼi. ʼE tou ʼiloʼi foki, ko te toe meamea ʼe kai ki te huʼa pipi lelei ʼuhi ʼe lahi ai te gako pea mo te ʼu meʼa ʼe ʼaoga kia ia, ko te ʼu meʼa maʼuhiga ʼaia ki te tuputupu. Koteā koa tona fua? Ko te mamafa pea mo te lahi ʼo te toe meamea ʼe fakalogo tāfito ki te ʼuluaki taʼu ʼo ʼuhiga mo te tuputupu lelei ʼo tona maʼuli.
16. Ko te faʼahiga tuputupu feafeaʼi koa neʼe ʼi te kau ako foʼou ʼo te Tohi-Tapu, pea he koʼe neʼe fealagia?
16 ʼE maʼuhiga hatatou akoʼi te ʼaluʼaga ʼo te tuputupu ʼaia ke tou mulimuli ki ai ʼo ʼuhiga mo tatatou haʼele fakalaumālie ki te poto. ʼUluaki, ko he polokalama meʼa kai ʼe maʼuhiga. Tou manatuʼi muʼa te temi ʼaē neʼe tou kamata ako ai te Tohi-Tapu. Ohage ko te tokolahi, lagi neʼe mole koutou mahino pe la ki he meʼa ʼo ʼuhiga mo te Folafola ʼa te ʼAtua. Kae ʼi te vāhaʼa fuli pe neʼe koutou teuteuʼi aipe takotou ʼu ako, pea mo fai takotou ako ʼo te Tohi-Tapu, pea neʼe mole tuai foki takotou mahino ki te ʼu akonaki tāfito fuli ʼo te Tohi-Tapu. ʼE koutou faka tui anai ko te tuputupu ʼaia neʼe taulekeleka ia, pea neʼe ko te fua ʼo te kai tuʼumaʼu ki te Folafola ʼa te ʼAtua!
17. He koʼe koa ko te polokalama meʼa kai fakalaumālie tuʼumaʼu ʼe maʼuhiga?
17 Koteā koa te ʼui ʼo ʼuhiga mo te temi nei? Kei koutou mulimuli tuʼumaʼu koa he polokalama meʼa kai? ʼAua naʼa manatu he tahi ʼuhi heʼe kua ʼosi papitema, ʼe mole kei ʼaoga kia ia he polokalama moʼo kai tuʼumaʼu ʼo te meʼa kai fakalaumālie. Logope ko Timoteo neʼe ko he tagata taupau kilisitiano poto, neʼe fakaloto mālohiʼi ia e Paulo fēnei: “Metitasio ki te ʼu meʼa ʼaia; nofo katoa ai, ke ʼiloga tau ʼu faiga ki te hahaʼi fuli.” (1 Timoteo 4:15). Koia ʼe maʼuhiga kia tatou takitokotahi ke tou fai te faʼahi ʼaia! Kapau ʼe koutou tokaga ʼo fai ke ʼiloga ʼa kotou ʼu faiga fakalaumālie, ko te ʼu faiga ʼaia ʼe maʼuhiga.
18. ʼE feafeaʼi koa he hā ʼa he ʼu faiga fakalaumālie ʼa he tahi?
18 Ko te ʼuhiga ʼo te tuputupu fakalaumālie ʼe mole ko he fai pe ʼo he faiga makehe ke hā hona poto pe ʼe mo fia nekenekea ki niʼihi. Neʼe fēnei ia tala ʼa Sesu: “Ko koutou ko te mālama ʼo te malamanei. ʼE mole feala ke ū he kolo mokā ʼe tuʼu ʼi he fuga moʼuga”, pea, “ ʼe palalau te gutu ʼi te mahu ʼo te loto”. (Mateo 5:14; 12:34). Kapau ʼe fonu ʼi totatou loto pea mo totatou ʼatamai te ʼu meʼa lelei ʼo te Folafola ʼo te ʼAtua, ʼe mole tou tokoni pe kae ʼe tou toe fakahā te faʼahi ʼaia ʼi tatou ʼu gāue pea mo ʼatatou ʼu lea.
19. Koteā koa ʼe tonu ke tou fai ʼo ʼuhiga mo ʼatatou ʼu tuputupu fakalaumālie, pea koteā tona fua ʼe tou ʼamanaki ki ai?
19 Koia, ʼe fai ai te fehuʼi ʼaenī: ʼE koutou ako tuʼumaʼu koa te Tohi-Tapu pea mo kau ki te ʼu fono faka kilisitiano ʼaē ʼe maʼu ai te meʼa kai ka ina uga ai tatou ki te tuputupu fakalaumālie? Pe ʼe koutou talitali faka fīfīmālie pe ki he tuputupu fakalaumālie. Koutou tokoga pe ʼe koutou fakaʼaoga katoa ia te tuʼuga meʼa kai fakalaumālie ʼaē ʼe foaki mai e Sehova. Kapau ko koutou ko he tahi ʼe ‘fiafia ʼi te ʼu lao ʼa Sehova, pea mo lau tana lao ʼi te ʼaho mo te po’, pea ʼe feala anai ke ʼui fēnei ʼo ʼuhiga mo koutou: “ ʼE liliu anai ko he fuʼu ʼakau ʼe to ōvi ki te vai tafe, ʼe fua ʼi tona temi tonu pea ʼe mole fefe tona ʼu lau, pea ko meʼa fuli ʼe ina fai ʼe fua anai.” (Pesalemo 1:2, 3). Koteā anai ka tou fai ke tou ʼiloʼi papau ai ʼe tou haga fai te ʼu fakatuʼutuʼu fakalaumālie? ʼE tou talanoa anai ki ai ʼi te alatike ka hoko mai.
ʼE feala koa ha kotou tali?
◻ He koʼe koa ko te temi lelei ʼaenī moʼo tokagaʼi ʼatatou ʼu tuputupu fakalaumālie?
◻ He koʼe koa ko te tuputupu fakalaumālie ʼe felogoi mo te fiakai fakalaumālie?
◻ Koteā koa te ʼuhiga ʼo te kupu ʼaē ko te “fetafeaʼaki ʼi te fugavai pea mo feʼāveʼaki e te matagi ʼo he akonaki”?
◻ He koʼe koa ʼe tonu ke tahi ʼamo tana kavega?
◻ ʼE feafeaʼi koa te fakahoko ʼo te ʼu tuputupu fakalaumālie?
[Paki ʼo te pasina 10]
ʼE koutou maʼu koa he temi moʼo lau te ʼu tohi faka tohi-tapu?