Watchtower TANAKIʼAGA TOHI ʼI TE NETI
Watchtower
TANAKIʼAGA TOHI ʼI TE NETI
Faka'uvea
  • TOHI-TAPU
  • TOHI
  • FONO
  • w92 1/8 p. 4-7
  • Ko He Fakaʼaoga Lelei ʼo Te Meʼa ʼOfa ʼAē Ko Te Maʼuli

Aucune vidéo n'est disponible pour cette sélection.

Il y a eu un problème lors du chargement de la vidéo.

  • Ko He Fakaʼaoga Lelei ʼo Te Meʼa ʼOfa ʼAē Ko Te Maʼuli
  • Te Tule Leʼo—1992
  • Manatu Tafito
  • He Tahi ʼu Alatike
  • ʼE feala te fetogi!
  • Te meʼa ʼofa ʼa te ʼAtua ʼaē ko te maʼuli heʼegata
  • Te Meʼa ʼOfa Lahi Tokotahi ʼa Te ʼAtua​—He Koʼe ʼe Maʼuhiga?
    Te Tule Leʼo (Tufa)—2017
  • Ke Maʼuhiga Kia Tatou Te Maʼuli
    Ke Ke Fiafia ʼo Heʼe Gata: Faipalalau Ki Te Tohi-Tapu
  • Fakamaʼuhigaʼi Te Maʼuli, Te Meʼa ʼOfa ʼo Te ʼAtua
    Ko Te Tule Leʼo ʼe Ina Kalagaʼi Te PuleʼAga ʼo Sehova (Ako) (2023)
  • ʼE Koutou Fia Māʼuʼuli Koa ʼo Heʼegata?
    Te Tule Leʼo—2004
Hoko Atu
Te Tule Leʼo—1992
w92 1/8 p. 4-7

Ko He Fakaʼaoga Lelei ʼo Te Meʼa ʼOfa ʼAē Ko Te Maʼuli

TE MAʼULI: ko he koloā maʼuhiga ia! Kapau neʼe mole ʼi ai te maʼuli ʼe molemo fai he meʼa. Pea ka puli, pea ʼe mole pe feala ki he tagata ke ina toe fakatuʼu. Kapau ko tototau maʼuli ʼe tuʼutāmaki, ʼe tou fai meʼa fuli ʼe feala mo ʼona taupau. Koteā te tupuʼaga ʼo te haga ʼa ʼihi ʼo kumi he tokoni ʼe laka age ia ʼi te mālohi fakatagata mokā nātou nonofo ʼi te faigataʼaʼia!

ʼE tou manatuʼi ʼi te Tohi-Tapu ʼe ʼi ai te fakamatala ʼo te vaka neʼe maʼua ʼi te afā mālohi ʼi te tai. ʼI te kamata makape ʼo te vaka, “ko te kauvaka kua nātou kamata matataku pea mo nātou tahi pāuʼi ki he tokoni, ʼo tahi haga ki tona ʼatua”. Ki muli mai, neʼe nātou kalaga fakatahi ki te ʼAtua moʼoni: “E Sehova! Fakalelei siʼi ʼou loto, ke ʼaua naʼa mātou mamate.” Ko te Tohi-Tapu ʼe ina toe fakamatala foki: “Neʼe nātou fakamaʼamaʼa te vaka ʼo nātou laku te ʼu meʼa ʼo te vaka ki te tai.” — Sonasi 1:​4-6, 14; fakatatau mo Gāue 27:​18, 19.

Ko te kauvaka neʼe kua nātou tali lelei te laku ʼo te ʼu koloā fakasino ko he faigaʼi ke hāofaki tonatou maʼuli. ʼE feala pe ke tou fetogi te ʼu koloā, kae ki te maʼuli, kailoa. Pea ʼi tatatou fia fai ʼaē ki totatou maʼuli, ʼe tou fakamamaʼo mai te ʼu tuʼutāmaki. ʼE tou fafaga, ʼe tou fakakofuʼi, pea ʼe tou tokaga ki totatou sino. ʼE tou faiga ki he ʼu faitoʼo mo kapau ʼe tou mahahaki.

Kae, ko Ia ʼaē ʼe ina tufa te maʼuli ʼe mole gata pe tana fakatalitali kia tatou ke tou tokaga ki to kita hāofaki. Pea tahi ʼaē, ko te maʼuli, ko he meʼa ʼofa ʼe molemo totogi. Pea ʼe ko he meʼa ʼofa ia mai ia Ia ʼaē ʼe maʼuhiga ʼi te ʼatulaulau katoa. ʼAki tatatou leleiʼia ia Ia ʼaē neʼe ina foaki mai kia tatou te meʼa ʼofa ʼaia, ʼe mole koa la tonu ke tou leleiʼia te maʼuli? ʼE mole koa la tonu ke tou tokaga ki te maʼuli ʼo ʼihi?

ʼE mole ko he meʼa foʼou kia tatou, ʼi te Lao ʼa Sehova ʼAtua ʼaē neʼe ina foaki ki te hahaʼi ʼo Iselaele, ʼe maʼu ai te ʼu fakatotonu ʼo ʼuhiga mo te taupau ʼo te maʼuli pea mo te maʼuli haohaoa ʼo ʼihi (Ekesote 21:29; Teutalonome 22:8). ʼE toe feiā pe mo te temi nei, ko te kau kilisitiano ʼe tokaga ki tonatou maʼuli. Ohage la, mo kapau ʼe ʼi ai he kau tamaliki ʼi tokotou ʼapi, ʼe koutou fakaleta haʼele anai he ʼu meʼa ohage ko te ʼu tegaʼi meʼa pe ʼe ko he ʼu pine, pe ʼe ko he ʼu meʼa māsila ʼe feala ai ke lāvea he tamasiʼi mokā ʼe gaoʼi mo ia pe ʼe ina folo? Ko te ʼu meʼa faka chimique feiā mo te ʼu meʼa faitoʼo ʼe tuku koa ʼi he fahaʼi ʼe mole kaku ki ai te kau tamaliki? Pea ka mafola te vai ʼi lalo, ʼe koutou fakavilivili ʼo foimo po naʼa hoko he tuʼutāmaki? ʼE koutou foimo gaohi ke lelei te ʼu masini hila? Pea ko takotou motokā ʼe koutou tautau gaohi koa ke lelei? Pea ko koutou ʼe ko he ʼu tagata taki motokā lelei koa? Kapau ʼe koutou leleiʼia moʼoni te maʼuhiga ʼo te maʼuli, ʼe koutou haga tokaga anai ʼo fai he ʼu fakatuʼutuʼu lelei ʼi te ʼu faʼahi ʼaenī feiā pea mo ʼihi faʼahi ʼe tatau.

Ko ʼihi ʼe nātou fakavale ki tonatou maʼuli. Ohage la, ko ai ia ʼaho nei ʼe mole ina ʼiloʼi ko te suluka ʼe kovi ki te maʼuli? Kae lauʼi miliona te hahaʼi ʼe nātou popūla ki tonatou holi māhani, pea logope te hifo mamalie ʼo tanatou maʼuli ʼe hoko atu pe tanatou folo te kohu kona. Ko ʼihi ʼe nātou fakavale ʼi te toloke, pea ko ʼihi ko te kava, pea ko te ʼu meʼa fuli ʼaia ʼe ʼi ai tona ʼu ikuʼaga kovi kia nātou. Ko te SIDA ko he mahaki fakatupu mate pea ʼe mole heʼeki maʼu hona faitoʼo. Kae tokolahi ʼe feala ke ʼaua naʼa nātou maʼu te mahaki ʼaia mo kapau ʼe nātou fakamamaʼo ʼi te ʼu felāveʼi fakasino heʼeʼaoga, ko ʼihi ʼe nātou fakavale ʼi te ʼu faʼahiga toloke, pea mo te ʼu ʼai toto. ʼE ko he fakaʼaoga kovi ia ʼo te maʼuli! — Loma 1:​26, 27; 2 Kolonito 7:1.

ʼE feala te fetogi!

Ko nātou ʼaē ʼe nātou ʼoʼofa ʼi tonatou Tupuʼaga Lahi, ʼaē ko Sehova, ʼe nātou maʼu te tupuʼaga mālohi ʼo te leleiʼia ʼo te maʼuli. Ko te maʼuli ko he meʼa ʼofa taputapu. Koia ko nātou, ʼe nātou faiga aipe ke nātou fetogi ʼi te faʼahi ʼaē ʼe tonu ke fai ki ai ʼohage ko he meʼa ʼofa ʼa te ʼAtua. Tou vakaʼi muʼa te meʼa neʼe hoko kia Kwaku, te tagata faiako ʼi Ghana. Neʼe ko he tagata ʼinu kava lahi pea neʼe ina fakaʼalu noa tona maʼuli.

Neʼe manatuʼi e Kwaku: “Neʼe ʼau faiga fakakinau ki toku ʼohoana ke fakaʼapaʼapa kia ʼau, pea neʼe tau hoko ai te ʼu fihi, tāfito la mo kapau neʼe ʼau ʼinu. ʼUhi ʼaē ko taku fakavale ʼi te kava, neʼe ʼau tau ʼāhua mo foʼi falā, pea neʼe ʼau tautau hāla ʼi toku maʼua ʼaē ko te kumi ʼo te falā moʼo taupau ʼo te famili. Pea ʼe mahino ia, ko te meʼa ʼaia neʼe fakalahi ai te ʼita ʼo toku ʼohoana. Pea kapau ʼe faka au ʼe mole kei ʼi ai he falā (ko te meʼa ia neʼe tau lahi tona hoko), pea ʼe ʼau hoko fai he meʼa ke ʼau faʼa kātakiʼi toku holi māhani ʼaē ki te ʼinu. ʼI te tahi lakaga neʼe kua mamafa leva taku fai ʼi taku fakaʼaoga te falā he neʼe ʼau tae te falā mai taku kau toe ʼo ʼau fakapapau age ʼe ʼau tohi ʼonatou higoa ki te sivi faka puleʼaga. Neʼe ʼau ʼalu ʼo hoko taku ʼinu pea mo ʼau toʼo ai te ʼu meʼa ʼinu ki ʼoku kaumeʼa ʼinu. Hoko leva foki te ʼaho ʼaē ʼo te utu ʼo te fua ʼo te ʼu gāue kua hili. Ka neʼe mole tokoni mai kia ʼau te pule ʼo te faleako ka na ʼaua la neʼe ʼau mavae ʼi taku gāue.”

“Ko toku ʼohoana neʼe nofo ʼi te faigataʼaʼia. Neʼe mole kei ʼau ʼiloʼi he puleʼaki, ka neʼe ʼau foimo situʼa ki te fahaʼi ʼaia. Koia neʼe ʼau kamata fakatuputupu ia ʼau te ʼu manatu fakamate koteʼuhi neʼe ʼau logoʼi ʼe ʼi ai te meʼa ʼe puli ʼi toku maʼuli. Ka, neʼe mole feala haku faka ʼāteaina mai te kava. ʼI te tahi ʼaho ʼi te fale kava neʼe ʼau kau ʼi te fuhu ʼa te kau ʼinu pea neʼe hukiʼi ʼau, pea neʼe ʼau ʼui ai ʼuhi ko taku manako ki te kava ʼe feala aipe ʼi he ʼaho ke ʼau mate ai.”

“Lolotoga te temi ʼaia, ko te kau Fakamoʼoni ʼa Sehova neʼe tau ʼomai ʼo ʼaʼahi toku ʼapi, ʼo nātou faiga ke mā fia mahino ki te Tohi-Tapu, ia ʼau pea mo toku ʼohoana. Tuʼumaʼu aipe ko toku ʼohoana pea mo ʼau neʼe ma feholahola ʼaki ia nātou ʼuhi ko tamā manatu ʼaē ko te ʼu hahaʼi kovi. Pea hoko ʼi te tahi lakaga, neʼe ʼau fakatotonu ke ʼau fakalogo fakaleleiʼi ia nātou. Ko te ako faka tohi-tapu neʼe ina kamata fakahāhā mai te fealagia fakatalakitupua ʼaē ki te maʼuli heʼegata ʼi te fakatuʼu foʼou ʼa te ʼAtua. Ka lahi pe taku ako te Tohi-Tapu ʼaki te tokoni ʼa te kau Fakamoʼoni ʼa Sehova, pea loloto pea mo tuputupu toku ʼofa kia Sehova ʼaē ko te Tufa ʼo te maʼuli pea mo tona meʼa ʼofa ʼaē ko te maʼuli, pea neʼe lahi tona fakaʼiloga ʼi taku fakaʼaoga ʼaē ʼo te ʼu tokoni ʼa te Tohi-Tapu. Pea ʼi te hikihiki ʼo taku ako neʼe tokoniʼi ʼau ke ʼau fakamaʼa toku maʼuli. Neʼe mole ko he meʼa faigafua ia, pea neʼe hoko atu pe taku fakamamaʼo mai te kava feiā mo toku ʼu kaumeʼa ʼāfea. Ko Sehova, ʼaē ʼe ina fakalogo te faikole, neʼe sio ki taku faiga ʼaē ʼi toku loto pea neʼe ina tali taku faikolea.”

“Ko toku ʼohoana, ʼaē ʼe mole ko he Fakamoʼoni ʼa Sehova, ʼe ina hikihiki ʼau ʼo feiā mo taku lotu ʼuhi ʼaē ko tana sio ki tona fakaʼiloga lahi ʼaē ʼi toku maʼuli pea mo tomā maʼuli fakataumatuʼa. Ko te ʼu hahaʼi ʼo tomā vaʼe fale ʼe mole kei ʼomai ʼo kau ki tamā ʼu ke fakataumatuʼa. Ku ʼau fiafia ʼi te lāulelei ʼo toku ʼatamai ʼaē ku ʼau maʼu ʼi te temi nei. ʼE moʼoni ia, ko te ʼofa ʼaē kia Sehova ʼAtua koteʼuhi he ko Ia ʼe ina foaki te maʼuli, ko te taupau ʼo te manatu ʼaē ko te maʼuli ʼe ko he meʼa maʼuhiga ʼaupito ia pea mo te fakalogo ki tana ʼu fakatotonu ʼo ʼuhiga mo te fakaʼaluʼalu ʼo te maʼuli ʼe koʼena te meʼa maʼuhiga e tahi ki te maʼuli.”

Te meʼa ʼofa ʼa te ʼAtua ʼaē ko te maʼuli heʼegata

ʼE lauʼi afe te hahaʼi, ʼe hage ko Kwaku, neʼe tokoniʼi e te kau Fakamoʼoni ʼa Sehova ke nātou “fakafoóu toutou loto; ke koutou tagata foóu, ó hage ko ia kua tupu ake ki te ʼAtua i te susitisia mo te maónióni moóni”. (Efesi 4:​24, TTK.) ʼE mole gata ʼaki pe tanatou leleiʼia tonatou maʼuli ʼi te temi nei kae ʼe hoko atu ki te maʼuli heʼegata ʼi he palatiso fakakelekele. Ko te Tohi-Tapu ʼe ina toe fakapapau mai ko te palatiso ʼaē ka fakatuʼu anai e te ʼAtua, ʼe mole toe ʼi ai anai he tahi ʼi te kele ʼe toe sio ki te tuputupu ʼo te pakupaku, koteʼuhi “ko Sehova ʼo te kautau ʼe ina fai anai ki te ʼu fenua fuli, (...) he kātoaga meʼa kai kua loloʼi lelei”. — Isaia 25:6.

ʼI te temi nei, ko te maʼuli, logope ko he meʼa ʼofa fakatalakitupua, ʼe fai faka temi pe ia. ʼE tahi haga pe ki te mate, pea ko he meʼa fakamataku ia ko te mate! Ko te sio ʼaē ki he tahi neʼe koutou ʼoʼofa ai pea kua puli ʼi te hahaʼi maʼuli ʼe ko he meʼa fakamamahi ia, pea ki te palalau ki ai mole ko he meʼa fakahuahua. Kae ʼi te Puleʼaga ʼo te ʼAtua ʼaē ʼe taki e Kilisito, ko te fakapapau ʼa Sehova ʼe fakahoko anai ia: “Ko te mate ʼe puli anai; ʼe mole toe ʼi ai anai he putu, he tagi laulau, he mamahi. Ko te ʼu meʼa ʼāfea kua puli ia.” — Fakahā 21:4.

ʼE ʼi te temi ʼaia ko te meʼa ʼofa ʼo te maʼuli ʼe faka mafola fakatalakitupua anai. Ko te hahaʼi ʼaē ka hāo ʼi te mamahi lahi ʼi te kele ʼe maʼu anai nātou he fealagia ke nātou ulu katoa ki te maʼuli. Pea koia, ʼaki te fakatuʼuake, ʼaē ko he toe liliu ki te maʼuli, ko Sehova ʼAtua ʼe ina toe tuku anai tana meʼa ʼofa ʼaē ʼe mole hona totogi kia nātou ʼe takokoto ʼi te mate (Soane 5:​24, 28, 29). Ko tona faka ʼuhiga ko te fakatuʼuake ʼo te ʼu hahaʼi ʼaē neʼe kita ʼofa ai pea mo te ʼu hahaʼi ʼāfea ʼaē neʼe manavasiʼi ki te ʼAtua!

Kae ko te ʼu meʼa lelei fuli ʼaia ʼe feala ʼāpe ke moʼoni? Ei, koteʼuhi “heʼe ki te ʼAtua ʼe mole he meʼa ʼe faigataʼa kia te ia”. — Luka 1:37; fakatatau mo Sopo 42:2.

Ko Sehova ʼAtua, neʼe ina foaki ki te hahaʼi fuli te fakamoʼoni ko te ʼu meʼa fuli ʼaia ʼe hoko anai ia. ʼO feafeaʼi? ʼO faka sakilifisioʼi ia ia ʼaē ʼe ʼofa mamahi ai, tona ʼAlo ʼofaina, ia Sesu Kilisito, ko he totogi maʼa tatou ki te agahala pea mo te mate. Ia Loma 8:32 ʼe fēnei te fakamoʼoni kia tatou: “Ia Ia [ia Sehova ʼAtua] ʼaē neʼe mole ina fakahāo tona ʼAlo totonu, ka neʼe ina haga ʼo tuku age maʼa tatou fuli, pea koteā anai te tupuʼaga ia ʼo tana mole tuku fuli mai ʼaki te loto katoa te tahi ʼu meʼa?” ʼE toe ʼui mai pe foki kia tatou ʼi te Tohi-Tapu ʼe fakahoko anai he fakamaʼa ʼo te tagata mai te fakakovikovi ʼo te ʼu aga pea ʼe fakamaʼa fuli anai te ʼu meʼa kehekehe ʼohage ko te heʼeagatonu, ko te fakapō feiā mo te aga fakamālohi (Isaia 11:9). Ko te maʼuli mole toe meʼa noaʼi anai.

Tatau aipe mo te temi nei, logope te ʼu fahaʼi heʼehaohaoa, ko te maʼuli ʼe feala pe ko he meʼa fakafiafia. Ko ai koa ʼaē ʼe mole fia mamanu ki he magoni ʼo he meʼa kai, feiā mo te agiagi ʼo he kiʼi matagi ʼi he ʼaho māfana, te mamata ki he moʼuga matamatalelei, te to ʼo te laʼā matamatalelei, te tafetafe ʼo he kiʼi vaitafe, te lanu kehekehe ʼo te ʼu fisiʼi teu, te tagi ʼo he kiʼi musika malie, pe ʼe ko te tagi ʼa te ʼu manu lele? Ai muʼa he kiʼi tuʼu. Koutou fakakaukauʼi, ʼe feiā anai ki te ʼu meʼa fuli ʼaē ka fakahoko ʼo heʼegata?

ʼE ʼi ai koa he ʼuhiga ʼo te līaki ʼo te pilivilesio matamatalelei ʼo te maʼuli heʼegata ʼuhi pe ko te ʼu fiafia faka temi ʼaē ʼe mole hona ʼuhiga, pea feiā mo te ʼu lelei ʼe foaki mai e te maʼuli? (fakatatau Hepeleo 11:25.) ʼAki he fakatokaga lelei, ko te Tohi-Tapu ʼe ina fakamālohiʼi tatou ‘ki te toega ʼo totatou maʼuli, ke mole tou mulimuli ki te holi ʼo te tagata kae ki te finegalo ʼo te ʼAtua’. (1 Petelo 4:2.) ʼE mātou tokoniʼi atu fakamalotoloto, ei, ʼe mātou tokoni atu, ke koutou fai ha kotou ako ʼo te Folafola ʼo te ʼAtua, te Tohi-Tapu, pea ke koutou maʼuliʼi te ʼu meʼa ʼaē ʼe koutou ako (Soane 13:17). ʼE koutou maʼu ai anai ha kotou felogoi lelei mo Sehova, te ʼAtua ʼaē ʼe lahi ʼi te ʼofa pea mo te manavaʼofa, ʼaē ʼe feala ke ina fakapale koutou ʼaki te maʼuli heʼegata!

[Nota ʼi te lalo pasina]

a Ko te līaki ʼo te kava ʼe ko he gāue lelei ia, pea ʼe tau ʼaoga ki ai te tokoni ʼa te ʼu hahaʼi faitokoni ʼi te faʼahi ʼaia. Vakaʼi te Koutou ʼaʼala! ʼo te ʼaho 22 ʼo maio 1992, ʼe maʼu ai anai te ʼu tokoni lelei ki te ʼu fahaʼi ʼaia.

[Paki ʼo te pasina 5]

ʼE fakaʼiloga koa ʼi tokotou faʼahiga maʼuli ʼe koutou leleiʼia te maʼuli?

[Paki ʼo te pasina 7]

ʼI te mālama foʼou ʼa te ʼAtua ʼe fakagafua atu anai ke koutou fiafia ʼi te ʼu fiafia ʼo te maʼuli heʼegata!

    Te ʼu Tohi Fakaʼuvea (1978-2025)
    Mavae
    Hu Ki Loto
    • Faka'uvea
    • Vaevae
    • Préférences
    • Copyright © 2025 Watch Tower Bible and Tract Society of Pennsylvania
    • Conditions d’utilisation
    • Règles de confidentialité
    • Paramètres de confidentialité
    • JW.ORG
    • Hu Ki Loto
    Vaevae