Ko He Kumi Fualoa Neʼe Fakapale

“SEHOVA? Ko ai ia Sehova?” Ko Silvia, ko he taʼahine ʼe taʼu valu, pea neʼe sio ki te higoa ʼaia ʼi te Tohi-Tapu faka Alamea, ko he koloā faka famili neʼe fakahā age ki ai e te tahi kiʼi taʼahine. Neʼe fai fehuʼi ʼi tona ʼu tafaʼaki​—⁠ki tana ʼu mātuʼa, mo tana ʼu hahaʼi faiako, ʼo feiā mo te kau takitaki lotu ʼo te koga meʼa ʼaia​—⁠kae neʼe mole ʼi ai he tahi ʼi Yerevan, ʼi Arménie, ʼaē neʼe nofo ai, neʼe ina lava tali age pe ko ai ia Sehova.

Neʼe lahilahi ake ia Silvia, ʼo hoko ai mo te ʼosi ʼo tana ako pea maʼu mo tana gāue, kae neʼe mole heʼeki ina ʼiloʼi pe ko ai ia Sehova. ʼI tana lahilahi ake, neʼe hola mai Arménie, ʼo ʼalu ki Polonia, ʼo nofo ai ʼi te kiʼi kogafale mo ʼihi hahaʼi neʼe nātou feholaki mai tonatou fenua. Neʼe tau ʼōmai te ʼu hahaʼi ʼo ʼaʼahi te fafine ʼe kogafale tahi mo ia. Neʼe fehuʼi age e Silvia: “Ko ai te ʼu hahaʼi ʼaē ʼe nātou ʼōmai ʼo ʼaʼahi koe?” Pea tali age e te fafine ʼaia: “Ko te kau Fakamoʼoni ʼa Sehova, ʼe nātou ʼōmai ki henī moʼo fai taku ako Tohi-Tapu.”

Neʼe fiafia te loto ʼo Silvia ʼi tana logo ki te huafa ʼo Sehova. Neʼe ina kamata ʼiloʼi ai pe ko ai ia Sehova pea mo te ʼuhiga ʼo te ʼAtua ʼofa ʼaia. Kae neʼe tonu ia ke mavae ʼi Polonia. Neʼe fakalaka ʼi te Tai Baltique, moʼo kumi hona holaʼaga ʼi Danemark. Neʼe mole lahi te ʼu meʼa ʼaē neʼe ʼalu mo ia, kae neʼe ina ʼave ai te ʼu tohi ʼaē neʼe tā e te kau Fakamoʼoni ʼa Sehova. ʼI te pasina fakaʼosi ʼo te tahi tohi, neʼe maʼu ai e Silvia te lisi ʼo te ʼu tuʼasila ʼo te ʼu filiale ʼo te Sosiete Watch Tower. Neʼe kau te meʼa ʼaia ki te ʼu meʼa maʼuhiga ʼaē neʼe ina ʼave mo ia​—⁠neʼe ko tona takitaki ʼaia kia Sehova!

ʼI Danemark, neʼe ʼave ia Silvia ki te nofoʼaga ʼo nātou neʼe feholaki mai tonatou fenua, pea neʼe ina kumi atu aipe te kau Fakamoʼoni ʼa Sehova. ʼAki te lisi ʼo te ʼu tuʼasila, neʼe ina ʼiloʼi ai ko te filiale ʼo te Sosiete Watch Tower neʼe tuʼu ʼi te kolo ʼo Holbæk. Kae ʼe tuʼu ʼifea te kolo ʼaia? Neʼe fetogi nofoʼaga ia Silvia ʼo ʼalu saliote afi ki te tahi nofoʼaga, pea ʼi tana ʼalu ʼaia, neʼe fakalaka te saliote afi ʼi Holbæk! Neʼe toe loto fiafia ʼaupito ai.

ʼI te tahi ʼaho neʼe lāulelei ai, neʼe ʼalu saliote afi ia Silvia ki te kolo ʼo Holbæk pea neʼe haʼele ai mai te taulaga saliote afi ʼo aʼu ki te filiale. ʼE ina manatuʼi: “ ʼI taku hū ki te malaʼe, neʼe ʼau heka ʼi te hekaʼaga loa pea mo ʼui maʼaku, ‘Ko te palatiso ʼaenī!’ ” Neʼe tali fakafiafia ia ia ʼi te filiale pea neʼe hoki lava fai ai tana ako Tohi-Tapu.

Kae neʼe tuʼa lahi tana fetogi nofoʼaga. Mai te nofoʼaga ki te tahi nofoʼaga, neʼe ina kumi tuʼumaʼu aipe te kau Fakamoʼoni ʼa Sehova pea neʼe ina toe toʼo tana ako Tohi-Tapu. Kae hili kiai taʼu e lua, neʼe kua lelei tana mahino ki tana ako pea neʼe ina foaki ai tona maʼuli kia Sehova. Neʼe papitema pea hili pe ʼaia pea kamata gāue pionie. ʼI te taʼu 1998, neʼe fakagafua age leva e te puleʼaga ʼo Danemark ke nofo ʼi te fenua.

ʼI te temi nei kua taʼu 26 ia Silvia pea kua gāue ʼi te koga meʼa neʼe ina fakamanatuʼi age te palatiso, te filiale ʼa te kau Fakamoʼoni ʼa Sehova ʼi Danemark. ʼE ina ʼui fēnei ʼi te temi nei: “Koteā la he palalau ke ʼau ʼui? Neʼe ʼau kumi ia Sehova talu mai taku kei veliveli. Pea kua ʼau maʼu ʼi te temi nei. Neʼe ʼau moemisi neʼe ʼau foaki toku maʼuli moʼo tauhi kia te ia, pea koʼeni kua ʼau ʼi te Petele. ʼE ʼau faikole ke ʼau nofo ʼi he temi loaloaga ʼi te koga meʼa ʼaenī!”