Neʼe Lotomālohi ʼIhi ʼUhi Ko Tana Tui
ʼI TE fānauʼi ʼo Silvia ʼi te māhina ʼo Tesepeli ʼo te taʼu 1992, neʼe hage pe ia ko he kiʼi taʼahine ʼe mole mahamahaki. Kae ʼi tona taʼu lua leva, neʼe maʼu tona mahaki, ʼe higoa ko te mucoviscidose, pea ko he mahaki ʼe mole heʼeki maʼu hona faitoʼo moʼona pulihi, ʼe ina faka faigataʼa ʼaupito te mānava pea mo fakatupu kovi ki te gāue ʼa te ʼu gākau. ʼI te ʼaho fuli, ʼe folo e Silvia te ʼu foʼi ʼakau e 36 moʼo faitoʼo tona mahaki, pea mo fakaʼaogaʼi te ʼu faitoʼo ʼe fana ki tona gutu peʼe ko tona ihu, pea mo fai tana kine. Ko te mālohi ʼo tona ʼu ʼatefēfē neʼe gata pe ʼi te 25 ʼi te teau, koia ʼe tonu ai ke mānava ʼaki te masini, māʼiape la mokā mavae ʼi tona ʼapi.
ʼE ʼui fēnei e tana faʼē ko Teresa: “ ʼE fakaofoofo ʼaupito ia te ʼutakiʼi e Silvia ia tona mahaki. ʼE mālohi tana tui ʼuhi ko te ʼu moʼoni ʼo te Tohi-Tapu. Koia ʼaki tana tui ʼaia, ʼe feala ai ke ina ʼutakiʼi tona ʼu mamahi pea mo tona ʼu lotovaivai. ʼE ina manatuʼi tuʼumaʼu te fakapapau ʼa Sehova ʼo ʼuhiga mo he mālama foʼou, ʼe mole toe ʼi ai anai te mahaki.” (Apokalipesi 21:4) ʼI ʼihi temi, ka lotovaivai tona famili, pea ka nātou sisio ki te loto falala ʼa Silvia, pea ʼe puli atu aipe tanatou lotomamahi. ʼE ʼui fēnei e Silvia ki tana ʼu mātuʼa pea mo tona tokolua: “Ko te maʼuli ʼaē ka tou maʼu anai ʼi te mālama foʼou ʼe ina toʼo anai te ʼu mamahi fuli ʼaē ʼe tau mo tatou ʼi te temi nei.”
ʼE kau tuʼumaʼu ia Silvia mo ʼihi ki te faka mafola ʼo te logo lelei ʼo te Folafola ʼa te ʼAtua, pea ko te hahaʼi ʼaē ʼe fai palalau mo ia ʼe nātou sisio ki tana fiafia. Ko te ʼu tēhina mo tuagaʼane ʼo te kokelekasio ʼaē ʼe kau kiai ʼi te Iles Canaries, ʼe toe fiafia ʼaupito mo nātou mokā nātou logo ki te ʼu tali ʼa Silvia pea mo tana ʼu kiʼi fai palalau ʼaē ʼi te ʼu fono. Pea ka hili te ʼu fono, ʼe fia nofo ia Silvia ʼi te fale fono ʼo fai palalau mo tona ʼu tēhina mo tuagaʼane fakalaumālie. ʼE ʼofainaʼi ia Silvia e te kokelekasio heʼe gutu palalau pea mo fiafia.
ʼE ʼui fēnei e tana tāmai ko Antonio: “ ʼE tuku mai e Silvia ia he ako maʼuhiga kiā tatou. Peʼe tou tau mo hotatou ʼu fihifihia, kae ko te maʼuli ʼe ko he meʼa ʼofa ia mai te ʼAtua, pea ʼe tonu ke tou fakafetaʼi kiai.” Ohage ko Silvia, ko te ʼu kaugana fuli ʼa te ʼAtua—tūpulaga pea mo mātutuʼa—ʼe nātou fakatalitali fakafiafia ki te temi ʼaē ka “mole he tahi ʼe ina ʼui anai: ‘ ʼE au mahaki.’ ”—Isaia 33:24.
[Paki ʼo te pasina 31]
ʼE lau e Silvia te vaega Tohi-Tapu kae ko tana faʼē ʼaē ʼe ina puke tana meʼa mānava