Te Fiafia Heʼegata—ʼE Maʼu ʼi Te Lagi Peʼe ʼi Te Kele?

KO TOKOTOU maʼuli fiafia ʼe fakalogo koa ki te koga meʼa ʼaē ʼe koutou maʼuʼuli ai? Tokolahi te hahaʼi ʼe nātou mahino lelei ko te maʼuli fiafia ʼe mole gata pe ki te mole mahaki, mo he maʼuli ʼe ʼi ai hona fakatuʼutuʼu, pea mo te ʼu felogoi lelei mo te hahaʼi. ʼE ʼui fēnei e te Tāʼaga Lea ʼi te Tohi-Tapu ʼo ʼuhiga mo te faʼahi ʼaia: “ ʼE lelei age he pa lauʼakau ʼe maʼu ai te ʼofa, ʼi he pipi gako neʼe fāgai ʼi te fale manu kae ʼe maʼu ai te loto fehiʼa.”​—⁠Tāʼaga Lea 15⁠:⁠17.

Kae meʼa fakaʼofaʼofa foki, heʼe talu mai fualoa, ʼe maʼu ʼi te kele te fehiʼa, mo te agamālohi, pea mo te tahi ʼatu ʼu faʼahiga meʼa kovi. Kae koteā te lagi peʼe ko te potu fakalaumālie ʼaē ʼe fakaʼamu te hahaʼi tokolahi ke nātou ʼolo kiai mokā nātou mamate? ʼE ko he koga meʼa koa neʼe maʼu tuʼumaʼu ai te tokalelei taulekaleka pea mo te fīmālie, ʼe mole maʼu ai he ʼu faʼahiga maveuveu ohage ko te manatu ʼa te tokolahi?

ʼE akoʼi mai e te Tohi-Tapu ko te ʼAtua ʼe nofo ʼi selo mo te lauʼi miliona laumālie ʼe fakahigoaʼi nātou ko te kau ʼaselo. (Mateo 18⁠:10; Apokalipesi 5⁠:11) ʼE faka ʼuhiga nātou, ʼe “ko te ʼu foha ʼo te ʼAtua.” (Sopo 38⁠:​4, 7) Ohage ko te hahaʼi, ʼe maʼu e te kau ʼaselo te loto faʼifaʼitaliha, kae ʼe mole ko he ʼu masini. Koia, ʼe feala ke nātou fili ke nātou fai ia te meʼa ʼaē ʼe lelei peʼe ko te meʼa ʼaē ʼe kovi. ʼE filifili anai koa e te kau ʼaselo ke nātou fai ia te meʼa ʼaē ʼe kovi? ʼE lagi feala ke punamaʼuli ʼihi ʼi hanatou ʼiloʼi kua hili nei kiai taʼu ʼe lauʼi afe, neʼe lahi te kau ʼaselo neʼe nātou agahala ki te ʼAtua​—⁠ei, neʼe nātou fakafeagai kia te ia!​—⁠Suta 6.

Te Kau Fakafeagai ʼi Selo

Neʼe ʼasi te agahala ʼi te koga meʼa fakalaumālie ʼuhi ko te talagataʼa ʼa te ʼaselo, ʼaē neʼe higoaʼi leva ko Satana (Te Fakafeagai) pea mo Tevolo (Te Fasituʼu). Ko te ʼaselo ʼaia neʼe fakalogo ʼi muʼa atu, kae ʼaki tona loto faʼifaʼitaliha neʼe ina filifili leva ke ina fai te meʼa ʼaē ʼe kovi. Pea neʼe ina fakahalaʼi te tahi ʼu ʼaselo, pea ʼi te temi ʼo Noe, ʼi muʼa ʼo te tō ʼo te Tulivio, neʼe lahi te ʼu ʼaselo neʼe lagolago ki te fakafeagai ʼaia ʼa Satana ki te ʼAtua.​—⁠Senesi 6⁠:​2, kiʼi nota ʼi te lalo pasina; 2 Petelo 2⁠:⁠4.

Neʼe mole kapu atu aipe te kau ʼaselo talagataʼa ʼaia mai te lagi. Kae lolotoga ia taʼu ʼe lauʼi afea​—⁠lagi neʼe ʼi ai tona ʼu tuʼakoi—​neʼe mole tapuʼi tanatou feʼoloʼaki. Kae ʼi te temi ʼaē neʼe kua ʼosi ai leva te fakagafua e te ʼAtua ke nātou fai te meʼa ʼaē ʼe kovi, neʼe “li ifo” nātou mai te lagi, pea ʼe fakaʼauha anai nātou. Pea neʼe ʼui fēnei e te leʼo ʼi te lagi: “Koia, koutou fiafia, ia koutou e i selo pea mo koutou e mau nofoaga i ai!” (Apokalipesi 12⁠:​7-12) ʼE mahino ia, ko te kau ʼaselo agatonu neʼe nātou fiafia lahi ʼi te pulihi ʼo te kau ʼaselo ʼaia ʼaē neʼe nātou fakatupu maveuveu ʼi te lagi!

ʼI tatatou vakaʼi fakatahi te ʼu fakamatala ʼaē neʼe mole tou ʼiloʼi, ʼe tou mahino ai ʼe mole lava maʼu he tokalelei moʼoni mo kapau ʼe kei ʼi ai he ʼu ʼaselo ʼe nātou manukinuki ki te ʼu lao pea mo te ʼu pelesepeto ʼa te ʼAtua. (Isaia 57⁠:​20, 21; Selemia 14⁠:​19, 20) Pea ʼi te tahi faʼahi, kapau ʼe tou fakalogo fuli ki te lao ʼa te ʼAtua, pea ʼe maʼu ai te tokalelei pea mo te fīmālie. (Pesalemo 119⁠:165; Isaia 48⁠:​17, 18) Koia kapau ko te hahaʼi fuli ʼe nātou ʼoʼofa pea mo fakalogo ki te ʼAtua, pea mo nātou feʼofaʼaki, ʼe mole liliu ai koa la te kele ko he koga meʼa matalelei pea mo fakafiafia? ʼE fakamoʼoni te Tohi-Tapu ki te faʼahi ʼaia!

Koteā ʼapē te meʼa ka hoko kia nātou ʼaē ʼe mole nātou fia fetogi tonatou ʼu ala ʼaē ʼe kovi? ʼE nātou fakatupu kovi anai koa ʼo talu ai, ki te tokalelei ʼa te hahaʼi ʼaē ʼe nātou fia fai moʼoni ki te finegalo ʼo te ʼAtua? Kailoa, he neʼe fakatūʼa e te ʼAtua te kau ʼaselo agakovi ʼaē neʼe maʼuʼuli ʼi selo, pea ʼe toe feiā pe anai, ʼe ina fakatūʼa anai te hahaʼi agakovi ʼaē ʼe maʼuʼuli ʼi te kele.

Ko Te Kele Kua Fakamaʼa

Neʼe ʼui fēnei e te ʼAtua: “Ko te lagi ʼe ko toku hekaʼaga faka hau, pea ko te kele ʼe ko toku hiliʼaga vaʼe.” (Isaia 66⁠:⁠1) Ko te ʼAtua ʼi tona ʼuhiga maʼoniʼoni ʼaupito, ʼe mole ina tuku anai tona “hiliʼaga vaʼe” ke ʼulihi ʼo talu ai e te ʼu meʼa ʼaē ʼe kovi. (Isaia 6⁠:​1-3; Apokalipesi 4⁠:⁠8) Ohage pe ko tana fakamaʼa te lagi mai te ʼu laumālie agakovi, ʼo toe feiā pe ʼe ina molehi anai ʼi te kele ia te hahaʼi agakovi fuli, ohage ko tona fakahā e te ʼu koga tohi ʼaenī ʼo te Tohi-Tapu:

“ ʼE molehi anai te hahaʼi agakovi, kae ko nātou ʼaē ʼe falala kia Sehova ʼe nātou maʼu anai te kele.”​—⁠Pesalemo 37⁠:⁠9.

“Ko te hahaʼi agatonu ʼe nātou nonofo anai ʼi te kele, pea ko nātou ʼaē ʼe mole hanatou lākahala ʼe nātou nonofo ai anai. ʼO ʼuhiga mo te hahaʼi agakovi, ʼe toʼo anai ia nātou ʼi te kele; pea ki te hahaʼi kākā ʼe taʼaki anai nātou mai ai.”​—⁠Tāʼaga Lea 2:21, 22.

“ ʼE ko he meʼa ia ʼe totonu mai te ʼAtua ke ina tuku te mamahi kia nātou ʼaē ʼe nātou fakatupu mamahi kia koutou, kaʼe kia koutou ʼaē ʼe koutou tali mamahi, ko te fīmālie mo mātou, ʼi te fakahā ʼo te ʼAliki ko Sesu, mai te lagi, mo tana kau ʼaselo mālohi, ʼi he afi ulo, mokā ina tuku ifo anai te lagavaka kia nātou ʼaē ʼe mole nātou ʼiloʼi te ʼAtua, pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu. Ko nātou ʼaia ʼe nātou tali anai te fakatūʼa ʼaē neʼe fai ʼi te fakamāu, te fakaʼauha heʼegata ia muʼa ʼo te ʼAliki pea ia muʼa ʼo te kolōlia ʼo tona mālohi.”​—⁠2 Tesalonika 1⁠:​6-9, MN.

“E fakamole te malama-nei [te hahaʼi agakovi] mo tana u holi; kae kia ia ae e ina fai te finegalo o te Atua e mauli o talu ai.”​—⁠1 Soane 2⁠:⁠17.

ʼE Tologa Anai Koa Te Tokalelei ʼi Te Kele?

Logola ʼe fakamahino lelei mai e te Tohi-Tapu ko te fakagafua e te ʼAtua ia te agakovi ʼe ʼi ai tona ʼu tuʼakoi, kae e feafeaʼi hakita ʼiloʼi papau ʼe mole toe ʼi ai anai te agakovi? Heʼe tou manatuʼi, ʼi te ʼosi ʼo te Tulivio ʼi te temi ʼo Noe, neʼe mole tuai pea toe hoko te agakovi ʼi te kele, ʼo tupu ai te haga ʼa te ʼAtua ʼo fakafio te lea ʼa te hahaʼi, ke mole hoko tanatou ʼu fakatuʼutuʼu kovi.​—⁠Senesi 11⁠:​1-8.

ʼE tou falala tāfito ʼe mole toe ʼi ai anai te agakovi, heʼe ko te kele ʼe mole toe takitaki anai e he ʼu tagata ohage ko te meʼa ʼaē neʼe hoko ʼi te ʼosi ʼo te Tulivio. Kae ʼe takitaki anai e te Puleʼaga ʼo te ʼAtua. ʼI te takitaki mai te lagi, ko te Puleʼaga ʼaia ʼe ina puleʼi tokotahi anai te kele. (Taniela 2⁠:44; 7⁠:​13, 14) ʼE ina fakahoko vave anai tana ʼu fakamāu ki te hahaʼi ʼaē ka nātou faiga ke nātou toe fakahū te agakovi. (Isaia 65⁠:20) ʼIo, ʼe ina fakaʼauha anai ia ia tāfito ʼaē neʼe ina fakatupu te agakovi​—⁠ia Satana te Tevolo—​pea mo te kau temonio, te kau ʼaselo agakovi ʼaē neʼe nātou muli ia te ia.​—⁠Loma 16⁠:⁠20.

Pea tahi ʼaē meʼa, ʼe mole tuʼania anai te hahaʼi ʼo ʼuhiga mo te meʼa kai, te ʼu meʼa vala, te nofoʼaga pea mo te gāue​—⁠ʼaē ʼe tupu ai te agakovi ʼa ʼihi ia ʼaho nei, ʼuhi ko te mole maʼu ʼo te ʼu meʼa ʼaia. Ei, ʼe liliu anai te kele katoa ko he palatiso ʼe fua pea mo mahu ai ia meʼa fuli maʼa te hahaʼi fuli pe.​—⁠Isaia 65⁠:​21-23; Luka 23⁠:⁠43.

Ko te meʼa ʼaē ʼe maʼuhiga tāfito, heʼe akoʼi anai e te Puleʼaga tana ʼu hahaʼi fakalogo ke nātou maʼuʼuli ʼi te tokalelei, pea mo takitaki māmālie nātou ki te maʼuli haohaoa katoa. (Soane 17⁠:3; Loma 8⁠:21) ʼOsi ʼaia pea mole toe tau anai te hahaʼi mo tonatou ʼu vaivaiʼaga pea mo tonatou ʼu holi ki te agahala, heʼe kua feala pea mo fīmālie tanatou fakalogo katoa ki te ʼAtua, ohage ko te meʼa ʼaē neʼe lava fai e te tagata haohaoa ko Sesu. (Isaia 11⁠:⁠3) Ei, neʼe agatonu ia Sesu ki te ʼAtua, logola te ʼu fakahala lahi ʼaē neʼe fai kia te ia pea mo tona fakamamahiʼi​—⁠ʼaē ʼe ko he ʼu meʼa ʼe mole toe hoko anai ʼi te Palatiso.​—⁠Hepeleo 7⁠:⁠26.

He Koʼe ʼe ʼOlo ʼIhi Ki Te Lagi

Kae tokolahi ia nātou ʼaē ʼe nātou lau ia te Tohi-Tapu, ʼe nātou ʼiloʼi te ʼu palalau ʼaenī ʼa Sesu: “E lahi te u nofoʼaga i te api o taku Tamai; . . . e au alu pea e au teuteui mai anai he nofoaga kia koutou.” (Soane 14⁠:​2, 3) ʼAki te ʼu palalau ʼaia, ʼe mole fakafeagai koa ki te manatu ʼaē ʼo ʼuhiga mo te maʼuli heʼegata ʼi te palatiso fakakelekele?

ʼE mole fakafeagai te ʼu akonaki ʼaia, kae ʼe nā ʼalutahi. ʼO ʼuhiga mo te faʼahi ʼaia, ʼe fakahā mai e te Tohi-Tapu ʼe ʼi ai te kau Kilisitiano agatonu​—⁠ʼe nātou toko 144 000—​ʼe fakatuʼuake nātou ko te ʼu hahaʼi fakalaumālie ke nātou maʼuʼuli ʼi selo. He koʼe koa ʼe foaki age kia nātou te fakapale taulekaleka ʼaia? Koteʼuhi ʼe nātou faʼufaʼu te kūtuga ʼaē neʼe sio kiai Soane “nee natou mauli mo pule fakatahi mo Kilisito ia taù e afe.” (Apokalipesi 14⁠:​1, 3; 20⁠:​4-6) ʼE ko he “kiʼi fagaovi” te toko 144 000 ʼaia, mokā fakatatau ki te lauʼi miliona ʼaē ka maʼuʼuli ʼi te kele. (Luka 12⁠:32) Pea tahi ʼaē meʼa, ʼi tanatou kua tau mo te ʼu fihifihia ʼaē ʼe tau mo te hahaʼi fuli ʼo te kele, ohage ko Sesu ʼe feala anai ke nātou “tali mamahi mo tatou i otatou vaivai,” mokā nātou takitaki anai te maʼuli ʼo te hahaʼi pea mo te kele.​—⁠Hepeleo 4⁠:⁠15.

Te Kele​—⁠Ko Te Nofoʼaga Heʼegata ʼo Te Hahaʼi

ʼI tana foaki ia te sakilifisio faitotogi ʼa Sesu, neʼe kamata tānaki e te ʼAtua te toko 144 000 kua hili nei kiai teitei taʼu e 2 000, pea kua katoa te kūtuga ʼaia ʼi te temi nei. (Gaue 2⁠:​1-4; Kalate 4⁠:​4-7) Kae neʼe mole fakaʼaogaʼi pe te sakilifisio ʼo Sesu ki te toko 144 000, ‘kae ʼe toe fakaʼaogaʼi maʼa te ʼu agahala ʼo te malamanei katoa.’ (1 Soane 2⁠:⁠2) Koia la ʼaē, ko nātou fuli ʼaē ʼe nātou tui kia Sesu ʼe nātou maʼu anai te maʼuli heʼegata. (Soane 3⁠:16) Kia nātou ʼaē kua momoe ʼi te faitoka kae manatuʼi e te ʼAtua, ʼe fakatuʼuake anai nātou, ʼe mole nātou ʼolo anai ki selo, kae ʼe nātou maʼuʼuli anai ʼi te kele ʼaē kua fakamaʼa. (Tagata Tānaki 9⁠:5; Soane 11⁠:​11-13, 25; Gaue 24⁠:15) Koteā anai te meʼa ʼaē ka nātou maʼu ʼi te kele?

ʼE tali fēnei te Apokalipesi 21⁠:​1-4, MN: “Koʼeni! Ko te fale fehikitaki ʼo te ʼAtua ʼe nofo mo te hahaʼi. . . . Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.” Koutou fakakaukauʼi age muʼa​—⁠ko te hahaʼi ʼe nātou ʼāteaina anai mai te mate, mo te mamahi pea mo te kekē, heʼe kua pulihi ʼo talu ai! ʼI te fakaʼosi, ko te fakatuʼutuʼu ʼa Sehova talu mai te kamataʼaga ʼo ʼuhiga mo te kele pea mo te malamanei, ʼe kaku anai ki tona ikuʼaga faka kolōlia.​—⁠Senesi 1⁠:​27, 28.

ʼE Tou Filifili​—⁠Te Maʼuli Peʼe Ko Te Mate

Neʼe mole ʼui age kia Atama pea mo Eva ʼe nā lava filifili ke nā ʼolo ki selo. Kailoa, kae neʼe tonu ke nā filifili peʼe nā fakalogo ki te ʼAtua pea ʼe nā maʼuʼuli anai ʼo heʼegata ʼi te palatiso ʼi te kele, peʼe nā filifili ke nā talagataʼa kia te ia pea nā mamate ai. Meʼa fakaʼofaʼofa, he neʼe nā filifili ke nā talagataʼa pea neʼe nā toe liliu ki te “efu” ʼo te kele. (Senesi 2⁠:​16, 17; 3⁠:​2-5, 19) Neʼe mole he temi neʼe fakatuʼutuʼu ai e te ʼAtua ke mamate te hahaʼi fuli pea mo nātou ʼolo ʼo fakahahaʼi te lagi mokā nātou mamate. Neʼe fakatupu e te ʼAtua te ʼu lauʼi miliate ʼaselo ke nātou maʼuʼuli ʼi selo; ko te ʼu laumālie ʼaia ʼe mole ko he ʼu hahaʼi neʼe mamate pea mo fakatuʼuake ke nātou ʼolo ʼo maʼuʼuli ʼi te lagi.​—⁠Pesalemo 104⁠:​1, 4; Taniela 7⁠:⁠10.

Koteā ʼaē ʼe tonu ke tou fai ke tou maʼu te tapuakina ʼaē ke tou maʼuʼuli ʼo heʼegata ʼi te Palatiso ʼi te kele? ʼUluaki, tou ako te Folafola ʼa te ʼAtua, ia te Tohi-Tapu. Neʼe ʼui fēnei e Sesu ʼi tana faikole: “Ko te faka ʼuhiga ʼaenī ʼo te maʼuli heʼegata, ke nātou ako te ʼiloʼi ʼo koe, te ʼAtua moʼoni pe ʼaē e tahi, pea mo ia ʼaē neʼe ke fekauʼi mai, ia Sesu Kilisito.”​—⁠Soane 17⁠:​3, MN.

Mokā ʼe tou maʼuliʼi ia te ʼu meʼa ʼaē ʼe tou ako, ʼe ko he tahi ʼaia faʼahi ke tou aʼu ki te fiafia heʼegata ʼi te Palatiso. (Sakopo 1⁠:​22-24) Ko nātou ʼaē ʼe nātou maʼuliʼi te Folafola ʼa te ʼAtua, ʼe nātou lava sio anai ki te fakahoko ʼo te ʼu lea faka polofeta taulekaleka ʼaia, ohage ko tona fakahā mai ia Isaia 11⁠:9: “ ʼE mole nātou fai anai he meʼa ʼe kovi pea ʼe mole fakatupu anai he maumau ʼi toku moʼuga maʼoniʼoni katoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.”

[Kiʼi nota]

[Paki ʼo te pasina 7]

“ ʼE maʼu anai te kele e te kau faitotonu, pea ʼe nātou nonofo ai anai ʼo talu ai.”​—⁠Pesalemo 37⁠:⁠29