ʼE Feafeaʼi Ia Te Maʼuli ʼi Selō?
ʼE MANATU ʼihi ʼe mole feala ke tou ʼiloʼi he meʼa ʼo ʼuhiga mo selō, he neʼe mole he tahi neʼe hifo mai ai ʼo fakamatala mai ia te agaaga ʼo selō. ʼE lagi galo kiā nātou neʼe ʼui fēnei e Sesu: “Neʼe au hifo mai te lagi.” (Soane 6:38) ʼI tana palalau ki ʼihi takitaki lotu, neʼe ina toe ʼui fēnei: “Ko koutou ko te hahaʼi ʼo te ʼu fenua ʼo lalo nei; ko au ʼe au kau ʼi te ʼu fenua ʼo ʼoluga.” (Soane 8:23) Koteā ʼaē neʼe ʼui e Sesu ʼo ʼuhiga mo selō?
Neʼe fakamoʼoni e Sesu ʼe nofo Sehova ʼi selō. Neʼe ina pāui ia te ʼAtua “taku Tamai ʼaē ʼe ʼi selō.” (Mateo 12:50) Kae neʼe mole fakaʼaogaʼi e Sesu ia te kupu “selō” ki he faʼahi pē e tahi. Ohagē lā, neʼe talanoa ki te lagi ʼi tana ʼui fēnei: “Kotou vakavakaʼi lelei te ʼu manulele ʼo te lagi.” (Mateo 6:26) Kae ko Sehova ʼe maʼuli ia ʼi ʼoluga atu ʼo te lagi. ʼE ʼui fēnei ʼi te Tohi-Tapu: “ ʼE ʼi ai te Tahi ʼe maʼuli ʼi ʼoluga ʼo te fuga takafuafua ʼo te kele.”—Isaia 40:22.
Ko te “Tamai ʼaē ʼe ʼi selō” ʼe maʼuli koa ʼi te lotolotoiga ʼo te ʼu fetuʼu? ʼI te Tohi-Tapu, ʼe toe fakahigoaʼi ia te ʼatulaulau ko te “lagi.” Ohagē lā, neʼe tohi fēnei e te tagata fai pesalemo: “Mokā au sio ki tau ʼu lagi, te ʼu gāue ʼo tou ʼu nima, te māhina pea mo te ʼu fetuʼu ʼaē neʼe ke teuteuʼi, koteā te ʼuhiga ʼo te tagata ʼaē kā mate ke ke manatuʼi ia ia?”—Pesalemo 8:3, 4.
Kailoa, ʼe mole maʼuli Sehova ʼAtua ʼi te lagi ʼaē neʼe ina fakatupu, ohagē pē ko te mole maʼuli ʼa te tagata tufuga ʼakau ʼi he puha neʼe ina faʼu. Koia, ʼi te temi ʼaē neʼe fakatapuʼi ai e te Hau ko Salomone ia te fale lotu ʼi Selusalemi maʼa Sehova, neʼe ina ʼui fēnei: “ ʼE nofo moʼoni anai koa te ʼAtua ʼi te kele? Koʼenī! Ko te ʼu lagi, ʼeī, te lagi ʼo te ʼu lagi, ʼe mole feʼauga ke ke nofo ai; ʼo feafeaʼi age lā te ʼapi ʼaenī ʼaē neʼe au laga!” (1 Hau 8:27) Kapau ʼe mole nofo Sehova ʼi te lagi, ʼe feafeaʼi ia te ʼu selō ʼaē ʼe nofo ai?
Logolā te ako ʼaē e te tagata ia te lagi, ʼo ina fakaʼaogaʼi ia te ʼu meʼa fakaʼaʼata mālohi pea mo hake ʼihi tagata ki te lagi, kae ʼe kei moʼoni pē ia te ʼu palalau ʼaenī ʼi te Tohi-Tapu: “ ʼE mole heʼeki ʼi ai he tagata kua sio ki te ʼAtua.” (Soane 1:18) Neʼe fakamahino e Sesu ia tona tupuʼaga, ʼi tana ʼui fēnei: “Ko te ʼAtua ʼe ko te Laumālie.”—Soane 4:24.
Ko te laumālie ʼe ko he faʼahiga maʼuli ʼe māʼoluga age ʼi te maʼuli ʼo te tagata. ʼE mole tatau te laumālie mo te ʼu agaaga ʼo te sinoʼi tagata, ohagē ko te kakano pea mo te toto, ʼaē ʼe feala ke tou sio kiai pea mo maʼu te ʼu logoʼaga sino. Koia ʼi te ʼui ʼaē ʼe Sesu neʼe nofo iā tafa ʼo tana Tamai ʼi “selō,” ko tona fakaʼuhiga neʼe ina maʼu ia te faʼahiga maʼuli ʼaē ʼe fakakolōlia age ʼi he faʼahiga maʼuli fakakakano. (Soane 17:5; Filipe 3:20, 21) Ko te koga meʼa fakalaumālie ʼaia ʼaē neʼe maʼuli ai Sesu mo tana Tamai, ʼe ko te koga meʼa ʼaia ʼe fakahigoa ʼi te Tohi-Tapu ko “selō.” ʼE feafeaʼi tona agaaga? Koteā te ʼu gāue ʼaē ʼe fai ai?
Ko He Koga Meʼa ʼe Fai Ai Te ʼu Gāue Fakafiafia
ʼE fakamatala ʼi te Tohi-Tapu ʼe lahi ia te ʼu gāue ʼaē ʼe fai ʼi selō. ʼE talanoa ki te ʼu lauʼi teau miliona kau ʼāselo agatonu ʼaē ʼe māʼuʼuli ai. (Taniela 7:9, 10) ʼE tahi maʼu e te ʼāselo tona agaaga. ʼE tou lava ʼiloʼi feafeaʼi te faʼahi ʼaia? ʼI te ʼu meʼa ʼaē neʼe fakatupu ʼaē ʼe tou lava sio kiai, ʼe mole he ʼu meʼa ʼe lua ʼe nā tatau ʼosi, koia ʼe feala ai ke tou tui papau ʼi selō, ʼe toe lahi ai mo te ʼu meʼa ʼe natou kehekehe. Meʼa fakaofoofo, ko te ʼu ʼulugaaga kehekehe ʼaia ʼi selō ʼe natou gāue ʼi te logotahi, ʼo kehekehe lahi ai mo te kele iā ʼaho nei, ʼaē ʼe tahitahiga te gāue fakatahi lelei ʼa te hahaʼi.
Kotou tokagaʼi peʼe fakamatala feafeaʼi ʼi te Tohi-Tapu te ʼu gāue ʼaē ʼe fai ʼi selō. “Kotou tapuakiʼi ia Sehova, ia koutou ʼaē ko tana kau ʼāselo, ʼaē ʼe lahi ʼi te mālohi, ʼaē ʼe kotou fakahoko tana folafola, ʼo kotou fakalogo ki te leʼo ʼo tana folafola. Kotou tapuakiʼi ia Sehova, ia koutou fuli ko tana ʼu kautau, ia koutou ko tana ʼu minisi, ʼaē ʼe kotou fai tona finegalo.” (Pesalemo 103:20, 21) Koia ʼe lahi ai te ʼu gāue ʼaē ʼe fai ʼi selō. ʼE feala ke tou tui papau ʼe ko he ʼu gāue fakafiafia.
Kua fualoa ia te tauhi fakafiafia ʼa te kau ʼāselo, ʼi muʼa atu ia ʼo te faʼu ʼo te kele. Ohagē ko tona ʼui ʼi te Tohi-Tapu, ʼi te temi ʼaē neʼe faʼu ai e Sehova ia te kele, ko te ʼu foha ʼo te ʼAtua neʼe natou “kalaga fakafiafia fakatahi” pea mo “natou fakavikiviki.” (Sopo 38:4, 7) Ko te tahi foha ʼo te ʼAtua ʼi selō neʼe ina maʼu mo te pilivilēsio ke kaugā gāue mo te ʼAtua moʼo faʼu ia te tahi age ʼu meʼa. (Kolose 1:15-17) Ko te fakamatala matalelei ʼaia ʼo te ʼu gāue fakafiafia ʼi selō ʼe feala ke tou lagaʼi ai he ʼu fehuʼi, ʼo ʼuhiga mo selō pea mo te hahaʼi ʼi te mālamanei.
Neʼe Fakatuʼutuʼu Koa Ke ʼOlo Te Hahaʼi Ki Selō?
Mai tona ʼaluʼaga ʼaē neʼe tauhi ia te kau ʼāselo ki te ʼAtua ʼi selō ʼi muʼa atu ʼo te faʼu ʼo te kele, ʼe mahino ia, neʼe mole fakatupu ia te ʼuluaki tagata pea mo te ʼuluaki fafine ke nā fakahahaʼi ia selō. Kailoa, kae neʼe ʼui fēnei e te ʼAtua ki te ʼuluaki taumātuʼa: “Kolua fānaunau, pea kolua liliu ʼo hahaʼi, pea kolua fakafonu te kele.” (Senesi 1:28; Gāue 17:26) Ko Atama neʼe ko ia ʼuluaki ʼaē neʼe ina maʼu ia te faʼahiga maʼuli foʼou ʼi te kele, pea mo ina lava ʼiloʼi ia te ʼAtua pea mo tauhi agatonu kiā te ia. Neʼe ko ia te tamai ʼa te hahaʼi ʼaē kā māʼuʼuli ʼi te kele. “ ʼO ʼuhiga mo te lagi, ʼe ʼa Sehova te lagi, kae ko te kele neʼe ina foaki ki te ʼu foha ʼo te tagata.”—Pesalemo 115:16.
ʼI te agamāhani, ʼe mole fia mate te tagata; neʼe mole faʼu te tagata ke mate. Neʼe talanoa ia te ʼAtua ʼo ʼuhiga mo te mate kiā Atama, he neʼe ko te fakatūʼā ʼaia ʼo tana talagataʼa. Kanapau lā neʼe fakalogo ia Atama, kanaʼaua lā neʼe mole mate ia.—Senesi 2:17; Loma 5:12.
Koia, ʼe mole tou punamaʼuli ai ki te mole talanoa ʼa te ʼAtua kiā Atama ʼo ʼuhiga mo hana ʼalu ki selō. Koia ko te kele ʼe mole ko he potu ʼe ʼahiʼahiʼi ai te hahaʼi moʼo vakaʼi peʼe tuha ke natou ʼolo ki selō. Neʼe faʼu te tagata ke maʼuli ʼo talu ai ʼi te kele, pea ko te fakatuʼutuʼu ʼaia ʼa te ʼAtua kā hoko anai ʼi te kā haʼu. ʼE fakapapau fēnei ʼi te Tohi-Tapu: “ ʼE maʼu anai te kele e te kau faitotonu, pea ʼe natou nonofo ai anai ʼo talu ai.” (Pesalemo 37:29) ʼE mahino mai, ʼi te kamataʼaga, neʼe mole tonu ke ʼolo te hahaʼi ki selō. Kae he koʼē neʼe fakapapau e Sesu te maʼuli ʼi selō ki tana kau ʼapositolo? Neʼe ʼui koa e Sesu ʼe ko te hahaʼi agalelei fuli ʼaē kā ʼolo anai ki selō?