Koteā Te Moʼoni ʼo ʼUhiga Mo Selō?

KO TE ʼalu ʼaē ki selō ʼe ko he ʼamanaki ʼe feala ke leleiʼia e te hahaʼi! Ko te ʼamanaki ʼaē ʼe ʼi ai he maʼuli ʼi te hili ʼo te mate, ʼe tahi ʼalu pē tona fakamahino ʼi te Lotu Mahometa, te kau Inituisi, te kau Putisi, te hahaʼi ʼo te ʼu lotu ʼo te Keletiate, ʼo toe fēia pē ki te hahaʼi tokolahi ʼaē ʼe mole hanatou lotu. ʼI te agamāhani, ʼe manatu ia te hahaʼi ko selō ʼe ko he koga meʼa matalelei pea mo fakafiafia, ʼe maʼu ai e te hahaʼi te fīmālie mai te ʼu mamahi pea mo natou toe fakatahi ai mo “te hahaʼi neʼe natou ʼoʼofa ai ʼaē kua mamate.” Kae ʼe moʼoni ia te tāʼaga lea ʼaenī ʼo ʼuhiga mo te hahaʼi tokolahi ʼi te mālamanei: Ko te hahaʼi fuli ʼe natou fia ʼolo ki selō, kae ʼe mole he tahi ʼe fia mate ke feala ai hana ʼalu kiai. Koteā tona tupuʼaga?

Kapau neʼe fakatuʼutuʼu ke tou mamate pea mo tou ʼolo ki selō, ʼe mole tonu koa lā ke lahi age te hahaʼi ʼaē ʼe natou fakaʼamu lahi kiai, ohagē pē ko te fakaʼamu ʼa he tamasiʼi ke lahi ake lā, peʼe ohagē ko he tūpulaga ʼe fakaʼamu ke ʼohoana lā? Kae tokolahi ʼe mole natou fia mamate.

Kae ko te kau fai fakamafola lotu ʼe natou ʼui, hili tatatou nonofo fakatemi ʼi te kele, ʼe tou liliu ʼo māʼuʼuli ʼi selō. Ohagē lā ko Theodore Edgar McCarrick, te ʼēpikopō kua letelete ʼo Washington, D.C., neʼe ina ʼui fēnei: “ ʼE mole ko te maʼuli ʼaenī ʼaē neʼe fakatupu tātou kiai. Neʼe fakatupu tātou ke tou ʼolo ki selō.” ʼO toe fēia, ko te pelesitā ʼāfea ʼo te Kautahi Fakafenua Fai Evaselio ʼi Amelika, neʼe ina ʼui fēnei: “Ko te fakatuʼutuʼu ʼo te maʼuli ʼe ko te fakakolōliaʼi ia ʼo te ʼAtua pea ke tou ʼolo ki selō . . . heʼe ko selō ʼe ko totatou ʼapi.”

Ko nātou ʼaē ʼe tui ki he maʼuli ʼi selō ʼi te hili ʼo tonatou mate, ʼi te agamāhani ʼe natou fakatafito fuli ia tanatou tui ki he ʼu fakamoʼoni ʼe mole faʼa tuha mo te falala. ʼI te manatu ʼa George Barna, te pelesitā ʼo te kāpani ʼe faikumi ʼo ʼuhiga mo te ʼu manatu fakalotu, tokolahi te hahaʼi ʼaē ʼe natou tali “te ʼu manatu ʼo ʼuhiga mo te maʼuli pea mo te maʼuli ʼi te hili ʼo te mate, ʼe fakatafito [ia te ʼu manatu ʼaia] ki he ʼu akonaki neʼe natou toʼo mai te ʼu ʼata, te ʼu musika pea mo te ʼu tohi.” ʼI te fenua ʼo Floride, ko te pasitea Épiscopal, neʼe ina ʼui fēnei: “ ʼE mole tou ʼiloʼi he meʼa ʼo ʼuhiga mo selō gata pē [ia te manatu ʼaē] ʼe maʼuli ia te ʼAtua ʼi selō.”

Kae ʼi te Tohi-Tapu, ʼe talanoa tāfito ai ʼo ʼuhiga mo selō. ʼO mulimuli ki te Folafola ʼa te ʼAtua, ʼe feafeaʼi ia selō? Neʼe fakatupu koa te tagata ke maʼuli ʼi selō? Kapau ʼe ʼolo te hahaʼi ki selō, koteā ʼaē kā natou fai anai ʼi ai?

[Paki ʼo te pasina 3]

He koʼē ko te hahaʼi tokolahi ʼe natou fia ʼolo ki selō, kae tokosiʼi iā nātou ʼaē ʼe fia mamate ke feala ai hanatou ʼolo kiai?