ʼE Fiafia Ia Nātou ʼAē ʼe Nātou Maʼuliʼi Te Folafola ʼa Te ʼAtua

Neʼe ʼui fēnei e te tēhina fai akonaki ʼi te kamataʼaga ʼo te Fakatahi Faka Tisitilike ʼa te kau Fakamoʼoni ʼa Sehova, ʼaē ko tona kupu tāfito “Tou Maʼuliʼi Te Folafola ʼa Te ʼAtua”: “ ʼE tou ʼiloʼi ko te fakatahi, ʼe ko he tahi ʼaia fakatuʼutuʼu ʼofa ʼa Sehova moʼo teuteuʼi ʼo tatou ki te gāue fai faka mafola. Kua mātou teuteu ke akoʼi mātou ʼo ʼuhiga mo te maʼuli faka famili fīmālie, ke fakaloto mālohiʼi mātou ke mātou fakaōvi ki te kautahi ʼa Sehova, ke uga mātou ke mātou faʼafai ʼi te fai faka mafola, pea ke mātou manatuʼi ʼo nofo tokakaga.”

TALU mai te fakaʼosi ʼo te māhina ʼo Maio 2000, ko te lauʼi miliona hahaʼi ʼaē ʼe nātou maʼuliʼi te Folafola ʼa te ʼAtua pea mo tonatou ʼu kaumeʼa ʼe lauʼi afe, neʼe nātou maʼopoʼopo ʼi te ʼu koga meʼa kehekehe ʼo te malamanei moʼo akoʼi te Tohi-Tapu. Koteā te ʼu meʼa ʼaē neʼe nātou ako ʼi te fakatahi ʼaē neʼe fai ia ʼaho e tolu?

ʼUluaki ʼAho—ʼAua Naʼa Galo Kia Tatou Te ʼu Meʼa ʼAē Neʼe Fai e Sehova

ʼI te ʼuluaki akonaki, neʼe fakahā e te pelesita ki te hahaʼi ʼo te fakatahi ke nātou sio ki te ʼu tapuakina ʼaē ʼe haʼu mai te tauhi logo tahi kia Sehova ʼi te ʼu fakatahi. Ko nātou fuli ʼaē neʼe kau ʼi te fakatahi, neʼe nātou ʼiloʼi papau ʼe toe lahi age anai tanatou tui, pea ʼe toe mālohi age anai tanatou ʼu felogoi takitokotahi mo Sehova.

ʼE ʼiloʼi e te “ ʼAtua fiafia” te ʼu meʼa ʼaē ʼe ʼaoga ki totatou maʼuli fīmālie. (1 Timoteo 1:11, MN ) Koia neʼe fakahā lelei ʼi te akonaki ʼaē “Ko Te Fai ʼo Te Finegalo ʼo Te ʼAtua ʼe Kita Maʼu Ai Te Fiafia,” ko te Folafola ʼa Sehova, ia te Tohi-Tapu ʼe ina foaki te faʼahiga maʼuli ʼaē ʼe lelei tokotahi. (Soane 13:17) Neʼe fakahā e te kau Fakamoʼoni ʼa Sehova ʼaē kua fualoa ʼi te moʼoni, ʼe ʼi ai te ʼuhiga ʼo totatou maʼuli mokā ʼe tou fai te finegalo ʼo te ʼAtua ʼi he ʼu faʼahiga ʼaluʼaga pe. Ko te akonaki ʼaē neʼe hoa kiai “Tou Fiafia ʼi Te Lotoʼofa ʼo Sehova,” neʼe ina faka maʼuhigaʼi tonatou ʼuhiga kau “faʼifaʼitaki ʼo te ʼAtua,” ʼe fia fakahā e te kau Kilisitiano “te ʼu faʼahiga ʼofa fuape” ʼi tonatou maʼuli. (Efeso 5:1, 9, MN ) Ko te faʼahi ʼaē ʼe maʼuhiga moʼo fakahoko te potu ʼaia, ʼe ko te faka mafola ʼo te logo lelei pea mo te fai ʼo ni ʼu tisipulo.—Pesalemo 145:7.

Ko te akonaki “Koutou Nonofo Mālohi Ohage ʼe Koutou Sio Kia Ia ʼAē ʼe Fakapulipuli,” neʼe ina fakahā peʼe tokoni feafeaʼi te tui mālohi kia tatou ke tou “sio” ki te ʼAtua fakapulipuli. Neʼe fakamatala e te tēhina ko te hahaʼi ʼaē ʼe nātou leleiʼia te ʼu meʼa fakalaumālie, ʼe nātou mahino ki te ʼu kalitate ʼo te ʼAtua, ohage la ko tana lava ʼiloʼi te ʼu meʼa ʼaē ʼi tatatou fakakaukau. (Tāʼaga Lea 5:21) Neʼe fakahā ʼe nātou ʼaē neʼe fakafehufehuʼi, te ʼu meʼa ʼaē neʼe nātou fai moʼo lagalaga tanatou tui ke mālohi, pea ke nātou fakamuʼamuʼa ʼi tonatou maʼuli te ʼu meʼa fakalaumālie.

Neʼe fakaʼosi te polokalama ʼo te uhu ʼaki te akonaki ʼaenī, “Tou Fakavikiviki Kia Sehova, Te ʼAtua ʼAē ʼe Ina Fai Te ʼu Meʼa Fakaofoofo.” Neʼe tokoni te akonaki ki te hahaʼi ʼo te fakatahi, ke nātou mahino ka lahi te ʼu meʼa ʼaē ʼe tou ako ʼo ʼuhiga mo Sehova, pea ʼe toe lahi ai mo te ʼu tupuʼaga ke tou vikiʼi ia ia ʼi tona ʼuhiga Tupuʼaga ʼo te ʼu meʼa taulekaleka. Neʼe ʼui fēnei e te tēhina: “Ka tou mamata ki te ʼu gāue taulekaleka ʼa te ʼAtua pea mo te ʼu meʼa fuli ʼaē ʼe ina fai nei maʼa tatou, ʼe uga ai tatou e totatou loto fakafetaʼi ke tou fakavikiviki kia te ia. Ka tou metitasioʼi te ʼu meʼa taulekaleka ʼaē neʼe ina fai maʼa tana hahaʼi ʼi te temi muʼa, ʼe tou toe fia vikiʼi ia ia. Pea ka tou fakakaukauʼi te ʼu fakapapau ʼo ʼuhiga mo te ʼu meʼa taulekaleka ʼaē ka fai e Sehova, ʼe tou toe fia fakahā totatou loto fakafetaʼi.”

Neʼe kamata te polokalama ʼo te hili hoʼatā ʼaki te akonaki “Tou Haga Fai Te Meʼa ʼAē ʼe Lelei,” ko he akonaki neʼe toe fakamanatuʼi ai ki te hahaʼi fuli ʼo te fakatahi ko te ʼu fakahala ʼo te mālama ʼaenī, ʼe ko he fakamoʼoni ʼaia kua ōvi mai te fakaʼauha. (2 Timoteo 3:1) Kae kapau ʼe tou haga fai te meʼa ʼaē ʼe lelei, pea ʼe tou lava fakamoʼoni ai ʼe tou kau ia nātou ʼaē “ ʼe tui ki te hāofaki ʼo te nefesi.”—Hepeleo 10:39, MN.

Koteā te ʼu tokoni faka Tohi-Tapu ʼaē neʼe fai ʼo ʼuhiga mo te maʼuli faka famili? Ko te ʼuluaki akonaki koga tolu ʼo te fakatahi, ʼaē ko tona kupu tāfito “Koutou Fakalogo Ki Te Folafola ʼa Te ʼAtua,” neʼe kamata ʼaki te akonaki “Moʼo Filifili ʼo Hokotou ʼOhoana.” ʼE ko he meʼa faigataʼa ʼaupito maʼa te hahaʼi te fili ʼo honatou ʼohoana. Koia ʼe lelei age ki te kau Kilisitiano ke nātou fakatalitali muʼa ke nātou aʼu ki te temi ʼaē kua nātou aga fakapotopoto ai, pea hoki nātou ʼohoana leva “ ʼi te ʼAliki pe.” (1 Kolonito 7:39, MN ) Neʼe fakahā e te lua akonaki ko Sehova ʼe ina loto ke mālolohi te ʼu famili fuli ʼi te faʼahi fakalaumālie, pea neʼe ina foaki mai te ʼu tokoni lelei moʼo fakahoko te faʼahi ʼaia. Neʼe fakamanatuʼi e te tolu akonaki, ko te ʼu mātuʼa ʼaē ʼe nātou ako ki tanatou fānau ke nātou ʼoʼofa ki te ʼAtua, ʼe tonu muʼa ke nātou ʼuluaki ʼofa kia te ia.

Ko te ʼu manatu ʼaē neʼe fakahā ʼi te akonaki “Koutou Tokakaga Ki Te ʼu Logo ʼAē ʼe Feʼāveʼaki Pea Mo Te Fai Fatufatu,” neʼe tokoni ki te hahaʼi fuli ke nātou mahino, tatau aipe peʼe nātou logo ki he ʼu meʼa fakatalakitupua neʼe hoko, kae ʼe tonu ke nātou fakapotopoto, ke ʼaua naʼa nātou hoko tui mokā ʼe nātou logo ki he ʼu meʼa feiā. ʼE palalau te kau Kilisitiano ki te ʼu meʼa ʼaē ʼe nātou ʼiloʼi ʼe moʼoni—te logo lelei ʼo te Puleʼaga. Tokolahi neʼe nātou maʼu te tokalelei pea mo te fakaloto mālohi ʼi te akonaki ʼaē neʼe hoa mai, “ ʼE Tou Lava Kātakiʼi Feafeaʼi ‘He Tala ʼi Te Kakano.’ ” Neʼe tokoni kia tatou, logola totatou ʼu fihifihia, kae ʼe feala kia Sehova ke ina fakamālohiʼi tatou ʼaki tona laumālie maʼoniʼoni, mo tana Folafola, pea mo totatou famili fakatautehina. Ki te faʼahi ʼaia, ʼe lahi ʼaupito te fakaloto mālohi ʼe tou maʼu mai te ʼu meʼa ʼaē neʼe hoko ki te ʼapositolo ko Paulo.—2 Kolonito 12:7-10; Filipe 4:11, 13.

Ko te polokalama ʼo te ʼuluaki ʼaho neʼe fakaʼosi ʼaki te akonaki “Tou Haʼele Tahi Mo Te Kautahi ʼa Sehova.” Neʼe fakatokagaʼi ia koga e tolu neʼe tuputupu ai te kautahi ʼa te ʼAtua: (1) te tuputupu ʼo tatatou mahino ki te mālama ʼo te moʼoni ʼaē mai ia Sehova, (2) te minisitelio ʼaē neʼe foaki mai e te ʼAtua pea (3) te ʼu fetogi ʼaē neʼe fai ʼi tona temi totonu ʼo ʼuhiga mo te ʼu fakatuʼutuʼu ʼo te kautahi. Pea ʼaki he loto falala, neʼe ʼui fēnei e te tēhina: “ ʼE tou fakafiafia ʼo ʼuhiga mo te ʼu fakatuʼutuʼu ki te ka haʼu.” Neʼe ina fehuʼi fēnei: “ ʼE feala koa ke tou lotolotolua logola te lahi ʼaē ʼo te ʼu tupuʼaga ke tou taupau te loto falala ʼaē neʼe tou maʼu ʼi te kamata ʼo aʼu ki te fakaʼosi?” (Hepeleo 3:14) Neʼe kua tou ʼiloʼi pe koteā te tali ki te faʼahi ʼaia. Pea neʼe fakahā ai te kaupepa foʼou ʼaē ko tona kupu tāfito ʼE Koutou Lava Kaumeʼa Mo Te ʼAtua! ʼE ʼaoga tāfito anai te kaupepa ʼaia moʼo tokoni ki te hahaʼi takitokotahi ʼaē ʼe mole faʼa popoto lelei peʼe mole faʼa lelei tanatou lautohi, ke feala hanatou ako pe ko ai ia Sehova.

Lua ʼAho—Koutou Haga Tala Te ʼu Gāue Fakaofoofo ʼo Te ʼAtua

ʼI te ʼosi vakaʼi ʼo te vaega Tohi-Tapu ʼo te ʼaho, neʼe hoko atu te polokalama ʼaki te akonaki koga tolu, ʼe fēnei tona kupu tāfito “Te ʼu Minisi ʼo Te Folafola ʼa Te ʼAtua.” Neʼe fakatokagaʼi mai e te ʼuluaki akonaki ia te fua lelei ʼo tatatou gāue fai faka mafola ʼi te malamanei katoa. Kae ko totatou loto faʼa kātaki ʼi te gāue ʼaia, ʼe faka faigataʼa e te tokolahi, ʼaē ʼe mole nātou tali te logo ʼo te Puleʼaga. Neʼe fakamatala e te kau fai faka mafola kua nātou fualoa ʼi te moʼoni, pe neʼe koteā ʼaē neʼe tokoni kia nātou moʼo taupau tanatou loto fiafia ʼi te minisitelio: ko te fakamālohiʼi ʼo tonatou ʼatamai pea mo tonatou loto moʼo kātakiʼi te fakafeagai pea mo te mole fia logo ʼa te hahaʼi. Neʼe fakamanatuʼi e te lua akonaki, ʼe faiga te kau Fakamoʼoni ʼa Sehova ke nātou palalau ki te hahaʼi fuli, peʼe ʼi te fai faka mafola ʼi te ʼu ʼapi peʼe ko te fagonogono faigamālie. Pea ko te tolu akonaki leva, neʼe ina fakahāhā te ʼu faʼahiga ʼaluʼaga kehekehe ʼaē ʼe feala ke fakalahi ai e te kau Kilisitiano fuli tanatou minisitelio takitokotahi. Neʼe ʼui e te tēhina moʼo fakahoko te faʼahi ʼaia, ʼe tonu ke tou fakamuʼamuʼa te Puleʼaga ʼo te ʼAtua, tatau aipe peʼe tonu ke tou fai he ʼu meʼa ʼe mole tou leleiʼia pea mo tou fai he ʼu sakilifisio.—Mateo 6:19-21.

ʼUhi ʼaē ʼe tou maʼuʼuli nei ʼi te mālama ʼe fonu ai te hahaʼi aga heʼe lotu pea mo manako koloā, koia neʼe ʼaoga tāfito ai te akonaki “Tou Pipiki Maʼu Ki Te ʼAtua Pea Mo Tou Maʼuli Fakafeauga.” Neʼe fakatafito tana tahi ʼu fakamatala ki te koga tohi ʼo 1 Timoteo 6:6-10, 18, 19, pea neʼe fakahā e te tēhina peʼe tokoni feafeaʼi ki te kau Kilisitiano te pipiki ki te ʼAtua ke ʼaua naʼa nātou manako ki te paʼaga, ʼaē ʼe feala ke ina fakahēhē pea mo fakamamahiʼi nātou. Neʼe ina ʼui logola totatou ʼu ʼaluʼaga faka ekonomika, ʼe tou fiafia tāfito ʼuhi ko tatatou ʼu felogoi mo Sehova pea mo totatou maʼuli lelei ʼi te faʼahi fakalaumālie. Neʼe malave mālohi ki te tokolahi te ʼu puani ʼaē neʼe fakahā ʼi te akonaki “ ʼAua Naʼa Tou Fai He ʼu Meʼa Ke Ufiufi Ai Te ʼAtua.” Neʼe fakahā ai, ʼe mole he temi ʼe galoʼi ai e Sehova tana kau Fakamoʼoni agatonu. Ko te faʼifaʼitaki makehe ʼa Sesu Kilisito—“e ko ia’pe ae anafi, mo te aho-nei pea e ko ia’pe anai o heegata”—ʼe tokoni anai ki te tokolahi ke nātou hoko atu ʼaki te loto faʼa kātaki tanatou lele ʼaē ki te maʼuli.—Hepeleo 13:8.

Neʼe fakaʼosi te polokalama ʼo te uhu ʼaki te akonaki ʼo te papitema, ʼaē ko he koga maʼuhiga ʼi te ʼu fakatahi ʼa te kau Fakamoʼoni ʼa Sehova. ʼI meʼa fakafiafia hatatou sisio ki he ʼu hahaʼi ʼe nātou foaki tonatou maʼuli ʼo nātou papitema pea mo mulimuli ʼi te ʼu ala ʼo Sesu! (Mateo 3:13-17) Ko nātou fuli ʼaē ʼe nātou fakahoko te faʼahi ʼaia, kua lahi te ʼu meʼa kua nātou fakahoko ʼi tanatou maʼuliʼi te Folafola ʼa te ʼAtua. Pea tahi ʼaē, ʼi te temi ʼaē ʼe nātou papitema ai ʼe fakanofo nātou ko te ʼu minisi ʼo te logo lelei, pea ʼe nātou fiafia ʼaupito ʼi tanatou ʼiloʼi ʼaē ʼe nātou kau ki te tāpuhā ʼo te huafa ʼo Sehova.—Tāʼaga Lea 27:11.

Neʼe fai te ʼu tokoni mālohi ʼi te akonaki “Ko He Aga Fakapotopoto Moʼo ‘Fakakeheʼi Te Meʼa ʼAē ʼe Lelei Pea Mo Te Meʼa ʼAē ʼe Kovi.’ ” ʼE mole lelei te ʼu lekula ʼo te malamanei ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi. Koia ʼe ʼaoga ai ke tou falala ki te ʼu lekula ʼa Sehova. (Loma 12:2) Neʼe fakaloto mālohiʼi te hahaʼi fuli ʼo te fakatahi ke nātou gāue mālohi ke nātou mahino lelei ki te ʼu ala ʼo te ʼAtua, pea mo tuputupu ki te faʼahiga tagata fakapotopoto. Pea ʼaki te akoako ʼo tatatou ʼu fealagia fakakaukau, ʼe tou ako anai ke tou “iloi o te kehekehe o te lelei pea mo te kovi.”—Hepeleo 5:11-14.

ʼOsi ʼaia, pea neʼe fai te akonaki koga tolu ko tona kupu tāfito ʼaenī: “Koutou Gāue Mālohi Moʼo Fakamālohiʼi Tokotou Maʼuli Fakalaumālie.” ʼE ʼiloʼi e te kau Kilisitiano moʼoni te maʼuhiga ʼaē ke fakatuputupu pea mo taupau tonatou maʼuli fakalaumālie. Koia ʼe tonu ai ke tou gāue mālohi—ʼi te lautohi, ʼi te ako, pea mo te metitasio. (Mateo 7:13, 14; Luka 13:24) Ko te ʼu hahaʼi ʼaē ʼe nātou leleiʼia te ʼu meʼa fakalaumālie, ʼe nātou haga fai foki mo te ʼu “faahiga faikole pea mo kole fuape.” (Efeso 6:18) ʼE hā ʼi tatatou ʼu faikole te loloto ʼo tatatou tui pea mo tatatou pipiki ki te ʼAtua, pea mo te mālohi ʼo totatou maʼuli fakalaumālie, ʼo toe feiā mo tatatou faka ʼuhiga ia “te ʼu meʼa ʼaē ʼe maʼuhiga tāfito.” (Filipe 1:10, MN ) Neʼe toe fakatokagaʼi foki mo te maʼuhiga ʼaē ke fakatuputupu he loto māfana, he ʼu felogoi ʼofa mo Sehova ohage ko te ʼu felogoi ʼa he tamasiʼi fakalogo mo he tāmai ʼofa. ʼE mole tou ʼui pe ʼe ʼi ai tatatou lotu—tatau aipe peʼe ko te lotu moʼoni—kae ʼe tou fia laga he tui ʼe mālohi, ‘ohage ʼe tou sio ki te ʼAtua.’—Hepeleo 11:6, 27.

Neʼe toe hoko atu te talanoa ʼo ʼuhiga mo te tuputupu fakalaumālie ʼi te akonaki “Ke ʼIloga Takotou Tuputupu.” Neʼe tou vakaʼi te ʼu koga e tolu ʼo te tuputupu ʼaia: (1) ko te tuputupu ʼo te ʼatamai mālama, te mahino, pea mo te poto, (2) te tuputupu ʼo te fua ʼo te laumālie maʼoniʼoni ʼo te ʼAtua pea (3) te fakahoko ʼo totatou ʼu maʼua faka famili.

ʼI te akonaki fakaʼosi ʼo te polokalama, “Tou Haʼele ʼi Te Mālama ʼo Te Folafola ʼa Te ʼAtua ʼAē ʼe ʼĀsili Mū,” neʼe fiafia te hahaʼi ʼo te fakatahi ʼi te tufa ʼo te tohi foʼou, La prophétie dʼIsaïe, lumière pour tous les humains I. ʼE ko te ʼuluaki tohi ʼaia ʼi te ʼu tohi e lua ʼo Isaia, pea ʼe fakamahino ai tona ʼu kapite fuli. Neʼe ʼui fēnei e te tēhina: “ ʼE ʼi ai te logo maʼa tatou ia ʼaho nei mai te tohi ʼo Isaia. Ei, kua lahi te ʼu lea faka polofeta neʼe hoko ʼi te temi ʼo Isaia. . . . Kae kei lahi te ʼu lea faka polofeta ʼa Isaia ʼe lolotoga hoko nei, pea ko ʼihi ʼe hoko anai ʼi te mālama foʼou ʼaē neʼe fakapapau mai e te ʼAtua.”

Tolu ʼAho—Tou Maʼuliʼi Te Folafola ʼa Sehova

Ko te ʼaho fakaʼosi ʼo te fakatahi neʼe kamata ʼaki te koga tohi faka Tohi-Tapu ʼo te ʼaho. Pea neʼe hoa kiai te akonaki koga tolu ko tona kupu tāfito ʼaenī: “Ko Te Lea Faka Polofeta ʼa Sofonia ʼe ʼAoga Kia Nātou ʼAē ʼe Nātou Fai Te Finegalo ʼo Te ʼAtua.” Neʼe fakahā e te ʼu koga e tolu ʼo te akonaki ʼaia, ohage ko te meʼa ʼaē neʼe ina fai ʼi te temi ʼo te puleʼaga agatuʼu ko Suta, ʼe fakaʼauha anai e Sehova te hahaʼi ʼaē ʼe mole nātou tokagaʼi tana fakatokaga ʼi te temi nei. Koteʼuhi neʼe nātou agahala ki te ʼAtua, ʼe nātou haʼele anai ohage ko he ʼu tagata kivi ʼe mole honatou tokoni, ʼe mole nātou lava maʼu honatou hāofakiʼaga. Kae ko te kau Kilisitiano moʼoni, ʼe nātou kumi fakalelei ia Sehova, pea ʼe fufū anai nātou ʼi te ʼaho hāūhāū ʼo te ʼAtua. Pea tahi ʼaē, ʼe nātou maʼu te ʼu tuʼuga tapuakina ʼi te temi nei. ʼE nātou maʼu te tapuakina ʼaē ko te palalau ʼi te “lea maʼa” ʼo te moʼoni ʼo te Tohi-Tapu. (Sofonia 3:9) Neʼe ʼui fēnei e te tēhina: “ ʼE faka ʼuhiga te palalau ʼi te lea maʼa, ki te tui ʼaē ki te moʼoni pea mo tona akoʼi ki te hahaʼi, pea toe faka ʼuhiga foki ki tatatou maʼuliʼi te ʼu lao pea mo te ʼu pelesepeto ʼo te ʼAtua.”

Neʼe fakatalitali te hahaʼi ʼo te fakatahi ki te kiʼi gaoʼi “Ko He ʼu Faʼifaʼitaki Moʼo Fakatokagaʼi ʼo Tatou.” Neʼe fakahā e te gaoʼi ʼaia neʼe mamate te toko lauʼi afe Iselaele ʼi te tuʼakoi ʼo te Kele ʼo Te Fakapapau, koteʼuhi neʼe mole kei nātou manatuʼi ia Sehova pea neʼe fakahalaʼi nātou e te ʼu fafine pagani ke nātou fai folonikasio pea mo mulimuli ki te tauhi hala. Ko te tahi ia nātou ʼaia—ko Samini—neʼe lotolotolua he neʼe manako ki te ʼu fafine matalelei ʼo Moape pea mo fia tauhi kia Sehova. Ko te manatu hala pea mo kākā ʼaē ʼa Simeli neʼe mole ʼalutahi mo te finegalo ʼo te ʼAtua pea neʼe ʼasi lelei ʼi te moʼi lakaga ʼaia, pea neʼe hā lelei te tui pea mo te tauhi ʼa Finease. Neʼe hā lelei te tuʼutāmaki ʼaē ʼe feala ke hoko mokā ʼe tou fakatahi mo nātou ʼaē ʼe mole nātou ʼoʼofa kia Sehova.

Neʼe ʼalutahi mo te kiʼi gaoʼi ia te akonaki ʼaē neʼe hoa kiai, “ ʼAua Naʼa Koutou Logoʼi Pea Koutou Galoʼi.” Neʼe hā ʼi te fakamahinohino ʼo 1 Kolonito 10:1-10, ʼe ʼahiʼahiʼi e Sehova tatatou fakalogo moʼo fakafuafua peʼe tāu mo tatou ke tou maʼu te tofiʼa ʼaē ke tou maʼuʼuli ʼi te mālama foʼou. Ki ʼihi ʼi te temi nei ʼe mālohi age tonatou ʼu holi ki te kakano ʼi tanatou ʼu holi ki te ʼu meʼa fakalaumālie, logola kua tou vave hū ki te mālama foʼou. Neʼe fakaloto mālohiʼi ia nātou fuli ʼaē ʼi te fakatahi ke ʼaua naʼa nātou galoʼi te fealagia ʼaē ke nātou ‘hū ki te mālōlōʼaga ʼo Sehova.’—Hepeleo 4:1.

Neʼe fēnei te kupu tāfito ʼo te akonaki ki te kaugamālie: “He Koʼe ʼe Tonu Ke Tou Tokagaʼi Te ʼu Gāue Fakaofoofo ʼa Te ʼAtua.” ʼE hā ʼi “te ʼu gāue fakaofoofo” ʼa Sehova tona poto pea mo tana pule ʼaē kia meʼa fuli ʼi te kele. (Sopo 37:14) Ko te ʼu tuʼuga fehuʼi ʼaē neʼe fai e Sehova kia Sopo, neʼe feʼauga moʼo fakamahino kia Sopo te mālohi ʼo te māfimāfi ʼo te Tupuʼaga. ʼE toe fai anai e Sehova ʼi te ka haʼu “te ʼu gāue fakaofoofo” maʼa tana ʼu kaugana agatonu. Neʼe fakaʼosi fēnei e te tēhina tana akonaki: “ ʼE lahi te ʼu tupuʼaga ke tou tokagaʼi ai te ʼu gāue fakaofoofo ʼa Sehova—te ʼu meʼa ʼaē neʼe ina fai ki muʼa atu, te ʼu meʼa ʼaē ʼe ina fai nei, pea mo te ʼu meʼa ʼaē ʼe ina fakapapau mai ka ina fai ʼi te ka haʼu.”

ʼI te ʼosi fakamatala fakanounou ʼo te alatike ako ʼo Te Tule Leʼo ʼo te vāhaʼa ʼaia, neʼe fai leva te akonaki fakaʼosi ʼo te fakatahi. Ko te akonaki ʼaia ʼaē ko tona kupu tāfito “Ko Te Maʼuliʼi ʼo Te Folafola ʼa Te ʼAtua, ʼe Ko He Pilivilesio Lahi,” neʼe ina fakahā ʼe ko he meʼa fakafiafia hatatou maʼuliʼi te Folafola ʼa te ʼAtua. (Sakopo 1:22) Neʼe fakamanatuʼi ki te hahaʼi ʼo te fakatahi ʼe ko hotatou pilivilesio lahi ia te maʼuliʼi ʼo te Folafola ʼa te ʼAtua, pea kapau ʼe tou maʼuliʼi tuʼumaʼu, pea ʼe ʼāsili age anai tatatou manako kiai. Neʼe fakaloto mālohiʼi ia nātou fuli ʼo te fakatahi ke nātou mulimuli ki te ʼekenaki ʼaoga ʼo te fakatahi ʼaia, ʼo nātou maʼuliʼi katoa te Folafola ʼa te ʼAtua. ʼE ko te ʼaluʼaga pe ʼaia e tahi ke tou maʼu ai te fiafia ʼaē ʼe lahi tokotahi.

[Talanoa ʼo te pasina 25]

ʼE Koutou Lava Kaumeʼa Mo Te ʼAtua!

ʼI te Feliaono hili hoʼatā neʼe fakahā te kaupepa foʼou, ʼe fēnei tona kupu tāfito ʼE Koutou Lava Kaumeʼa Mo Te ʼAtua! ʼE kei ʼaoga ʼaupito ke faka faigafua te ako ʼo te Tohi-tapu ʼi te ʼu potu kehekehe ʼo te malamanei, pea ʼe fakaʼaogaʼi anai te kaupepa ʼaia moʼo fakahoko te faʼahi ʼaia. ʼE ko he tapuakina lahi anai ki te hahaʼi ʼaē neʼe mole lelei tanatou ako peʼe ko tanatou lautohi.

[Talanoa ʼo te pasina 26]

Ko Te Lea Faka Polofeta ʼa Isaia: Ko He Mālama Maʼa Te Hahaʼi Fuli

Neʼe fiafia te hahaʼi ʼo te fakatahi ʼi te fakahā ʼo te ʼuluaki tohi ʼo te ʼu tohi e lua ʼo te La prophétie dʼIsaïe, lumière pour tous les humains. ʼE fakahā tāfito ʼi te tohi ʼaia te ʼaoga ʼo te lea faka polofeta ʼa Isaia ʼi totatou temi.