“Te Kau Fai Faka Mafola Faʼafai ʼo Te Puleʼaga”—ʼE Nātou Fakatahi Fakafiafia
KUA maveueu te malamanei ʼuhi ko te ʼu lakilisi faka ekonomika, mo faka politike pea mo te ʼu aga heʼeʼaoga. ʼI te ʼu maveuveu ʼaia, neʼe fakatahi te kau Fakamoʼoni ʼa Sehova ʼi te tokalelei lolotoga ʼaho e tolu ʼi te ʼu Fakatahi Faka Tisitilike “Te Kau Fai Faka Mafola Faʼafai ʼo Te Puleʼaga.” Ko te ʼu fakatahi ʼaia ʼaē neʼe fai ʼi te malamanei katoa neʼe kamata ʼi Maio ʼo te taʼu 2002.
Ko te ʼu fakatahi ʼaia neʼe ko he ʼu ʼaluʼaga fakafiafia. Tou vakaʼi fakanounou te polokalama ʼaia neʼe fakatafito ki te Tohi-Tapu pea neʼe fakaloto mālohi.
Neʼe Faka Maʼuhigaʼi e Te ʼUluaki ʼAho Ia Te Faʼafai ʼa Sesu
Koʼeni te kupu tāfito ʼo te ʼuluaki ʼaho ʼo te fakatahi, “Tou Faʼifaʼitaki Te Faʼafai ʼo Totatou ʼAliki, Ko Sesu.” (Soane 2:17) Ko te akonaki “Ko Te Kau Fai Faka Mafola ʼo Te Puleʼaga ʼe Nātou Fiafia ʼi Tanatou Fakatahi,” neʼe ina fakaafe ia nātou fuli ʼo te fakatahi ke nātou vaevae ʼi te fiafia ia te meʼa ʼaē neʼe ina fakaʼiloga tuʼumaʼu te ʼu fakatahi lalahi ʼa te hahaʼi ʼa te ʼAtua. (Teutalonome 16:15) Neʼe hoa ki te akonaki ia te ʼu fakafehuʼi ʼo te kau fai faka mafola faʼafai ʼo te logo lelei.
Ko te akonaki “Tou Fakafiafia Ia Sehova” neʼe ina toʼo ia Pesalemo 37:1-11 ʼo fakamatalatala te ʼu vaega fuli. Neʼe tokoniʼi tatou ke ʼaua tatatou “ ʼiʼita” ʼi te hage ʼe maʼuli manuʼia te tagata agakovi. Logope ʼe lagi laukoviʼi tatou e ʼihi hahaʼi agakovi, kae ʼe hoki fakahā moʼoni anai e Sehova peʼe ko ai tana hahaʼi agatonu. Neʼe talanoa te akonaki “Koutou Loto Fakafetaʼi” ki tatatou faʼahiga fakahā ʼo tatatou fakafetaʼi ki te ʼAtua. ʼE tonu ke foaki e te kau Kilisitiano fuli ia “he sakilifisio o te fakavikiviki” kia Sehova. (Hepeleo 13:15) ʼE mahino ia, ʼe fakalogo te lahi ʼo te temi ʼaē ʼe tou foaki ki te gāue ʼa Sehova ki totatou loto fakafetaʼi pea mo totatou ʼaluʼaga.
Koʼeni te kupu tāfito ʼo te akonaki tāfito, “Ko Te Kau Fai Faka Mafola ʼo Te Puleʼaga ʼe Nātou Faʼafai ʼi Tanatou Gāue.” Neʼe fakahā e te akonaki ko Sesu Kilisito ʼe ko te faʼifaʼitaki lelei ʼo ʼuhiga mo te faʼafai. ʼI te ʼosi fakatuʼu ʼo te Puleʼaga ʼi selo ʼi te taʼu 1914, neʼe tonu ke faʼafai te kau Kilisitiano moʼoni ʼi te tala ʼo te logo lelei ʼaia. Neʼe palalau te tēhina faiakonaki ki te fakatahi lahi ʼaē neʼe hoko ʼi Cedar Point, ʼi Ohio, ʼi Amelika, ʼi te taʼu 1922 pea neʼe ina fakamanatuʼi mai te pāui faka hisitolia ʼaē neʼe fai ai: “Kalagaʼi te Hau mo tona Puleʼaga”! Ko te meʼa neʼe hoko ai, neʼe uga e te faʼafai ʼa te kau kaugana agatonu ʼa te ʼAtua ke nātou kalagaʼi ia te ʼu moʼoni taulekaleka ʼo ʼuhiga mo te Puleʼaga ki te ʼatu ʼu puleʼaga fuli.
Ko te akonaki ʼaē neʼe fai ʼi te hili hoʼatā, “ ʼAua Naʼa Tou Matataku Koteʼuhi ʼe Nofo Sehova Mo Tatou,” neʼe ina fakahā mai ia te fakafeagai tāfito ʼa Satana ki te hahaʼi ʼa te ʼAtua. Logope te fakafeagai ʼaē ʼe hoko mai kia tatou, kae ko tatatou tokagaʼi te ʼu faʼifaʼitaki mai te Tohi-Tapu pea mo te ʼu hahaʼi tui ʼo te temi nei, ʼe ina foaki mai te lotomālohi ʼaē ke ʼaua naʼa tou matataku kae ke tou tauʼi te ʼu ʼahiʼahi pea mo te ʼu fakahala.—Isaia 41:10.
ʼI te hoholo ʼo te polokalama neʼe fai te akonaki ʼe koga tolu, ko tona kupu tāfito “ ʼE Fakaloto Mālohiʼi Tatou e Te Lea Faka Polofeta ʼo Mikea Ke Tou Haʼele ʼi Te Huafa ʼo Sehova.” Ko te ʼuluaki tēhina ʼaē neʼe faiakonaki, neʼe ina fakatatau ia te ʼu aga heʼeʼaoga, mo te ʼapositasia, pea mo te mānumānu koloā ʼo te temi ʼo Mikea ki te ʼu aga ʼaenī ʼo totatou temi. Neʼe ina tala fēnei: “Ko tatatou ʼamanaki ki te ka haʼu ʼe hoki moʼoni papau mo kapau ʼe tou fakatuputupu he loto ʼe talagafua pea mo tou ʼiloʼi papau ʼe maʼoniʼoni tatatou aga, pea ʼe fonu ʼi totatou maʼuli ia he ʼu aga ʼe fakahā ai tatatou pipiki ki te ʼAtua—pea mo kapau ʼe mole galo ia tatou ʼe hoko mai anai ia te ʼaho ʼo Sehova.”—2 Petelo 3:11, 12.
Neʼe talanoa te lua tēhina faiakonaki ki te faka lākahalaʼi e Mikea ia te kau takitaki ʼo Suta. Neʼe nātou kākāʼi te hahaʼi māsisiva pea mo te hahaʼi ʼaē ʼe mole ʼi ai honatou puipuiʼaga. Kae neʼe toe fakakikite pe foki e Mikea ʼe mālo anai te tauhi moʼoni. (Mikea 4:1-5) ʼAki te mālohi ʼo te laumālie maʼoniʼoni ʼo Sehova, kua tou loto papau ke tou kalagaʼi te logo fakamokomoko ʼaia ʼo te ʼamanaki. Kae koteā la he meʼa ʼe tonu ke tou fai mo kapau ʼe tou logoʼi ʼe mole tou faʼafai ʼuhi ko te mahaki peʼe ko he tahi age ʼaluʼaga? Neʼe ʼui fēnei e te tolu tēhina faiakonaki: “ ʼE mole faigataʼa te ʼu meʼa ʼaē ʼe fakamaʼua mai e Sehova pea ʼe feala hatatou fakahoko.” Neʼe hoko atu tana fakamatalatala ia te ʼu koga kehekehe ʼo Mikea 6:8, ʼaē ʼe tou lau fēnei ai: “Koteā ʼaē ʼe kole atu e Sehova kia te koe, ʼe mole koa la ko te maʼuliʼi ʼo te faitotonu, mo te manako ki te finegaloʼofa, pea mo te haʼele mo tou ʼAtua ʼaki he fia mālalo?”
Mai te ʼaluʼaga ʼaē ʼe feala ke malave ki te kau Kilisitiano ia te pulinoa ʼo te aga ʼaē ʼe tonu ke fai ʼi te malamanei, neʼe ʼaoga fuli kia tatou ia te akonaki mo tona kupu tāfito “Koutou Nonofo Maʼa ʼo Taupau Tokotou Loto.” Ohage la, ko tatatou nofo maʼa ʼe tokoni anai ki te taupau ʼo he nofo ʼohoana fiafia. ʼI totatou ʼuhiga Kilisitiano, ʼe mole tonu ʼi he temi ke tou manatu ke tou fai he felāveʼi fakasino heʼeʼaoga.—1 Kolonito 6:18.
Neʼe fakahā e te akonaki “Tou Fakamamaʼo Mai Te Aga Fakakākā,” ʼaki he aga fakapotopoto, ʼe tou faka ʼuhiga ʼe ko he meʼa kona te ʼu fakamatala loi, mo te ʼu moʼoni ʼe mole tala katoa, ʼaē ʼe faka mafola e te kau ʼaposita. (Kolose 2:8) ʼO toe feiā aipe, ʼaua naʼa tou faihala ʼo tou manatu ʼe tou lava fakafimālieʼi totatou ʼu holi ki te agahala, kae mole hoko mai anai he ʼu ikuʼaga fakatupu tuʼutāmaki.
“Koutou Atolasio Ki Te ʼAtua Moʼoni e Tahi,” neʼe ko te kupu tāfito ʼaia ʼo te akonaki ʼaē neʼe ina fakaʼosi te ʼuluaki ʼaho ʼo te fakatahi. ʼAki te lēsili kovi ʼo te ʼu ʼaluʼaga ʼo te malamanei, ko he meʼa fakaloto mālohi tatatou ʼiloʼi kua vave fakatuʼu e Sehova tana mālama foʼou! Ko ai anai ka maʼuʼuli ai? ʼE gata pe ki te hahaʼi ʼaē ʼe atolasio kia Sehova. Moʼo tokoni mai kia tatou, mo tatatou ʼu fānau, mo tatatou kau ako Tohi-Tapu ke tou fakakaku ki te faʼahi ʼaia, neʼe fakahā ifo e te tēhina faiakonaki kua tā te tohi ako foʼou Adorez le seul vrai Dieu. Neʼe tou fiafia ʼaupito ʼi tatatou maʼu ia te tohi ʼaia!
Neʼe Faka Maʼuhigaʼi e Te Lua ʼAho Ia Te Faʼafai Ki Te Meʼa ʼAē ʼe Lelei
Neʼe fēnei te kupu tāfito ʼo te lua ʼaho ʼo te fakatahi “Faʼafai Ki Te Meʼa ʼAē ʼe Lelei.” (1 Petelo 3:13) Neʼe palalau te ʼuluaki tēhina faiakonaki ki te koga tohi faka Tohi-Tapu ʼo te ʼaho. Neʼe talanoa ki te maʼuhiga ʼo te vakaʼi fakalelei pea mo tuʼumaʼu ʼo te koga tohi ʼo te ʼaho, koteʼuhi ʼe ina fakatuputupu ai tatatou faʼafai.
Pea neʼe hoko mai leva te akonaki koga tolu ko tona kupu tāfito ʼaenī “Ko Te Kau Fai Faka Mafola ʼo Te Puleʼaga ʼe Nātou Vikiʼi Tanatou Minisitelio.” Neʼe faka maʼuhigaʼi e te ʼuluaki koga ʼo te akonaki ia te ʼaoga ke tou ʼave fakahagatonu ia te Folafola ʼa te ʼAtua. (2 Timoteo 2:15) Ko tatatou fakaʼaogaʼi fakalelei ia te Tohi-Tapu ʼe ina faka fealagia ai ke “gaue” ʼi te maʼuli ʼo te hahaʼi. (Hepeleo 4:12) ʼE tonu ke tou fakahā age te Tohi-Tapu ki te hahaʼi pea mo tou tui papau ki te ʼu fakamatala ʼaē ʼe tou fai age kia nātou ʼaki te tohi ʼaia. Neʼe fakaloto mālohiʼi tatou e te lua koga ʼo te akonaki ke tou toe liliu ʼo ʼaʼahi te hahaʼi ʼaē neʼe fia logo. (1 Kolonito 3:6) ʼE tonu ke tou teuteu pea mo tou lotomālohi ʼo foimo liliu ki te hahaʼi ʼaē neʼe fia logo. Neʼe tokoni mai te tolu koga ke tou faka ʼuhiga te hahaʼi fuli ʼaē ʼe tou felāveʼi mo nātou ʼi te gāue, ohage ko he ʼu hahaʼi ʼe feala ke nātou liliu ko he ʼu tisipulo, pea neʼe ina fakahā mai ko te ako Tohi-Tapu ʼi te ʼuluaki ʼaʼahi ʼe feala ke tou maʼu ai te fiafia he neʼe tou tokoni ki he ʼu hahaʼi ke nātou liliu ko he ʼu tisipulo.
“He Koʼe ʼe Tonu Ke tou ‘Faikole Tuʼumaʼu,’ ” neʼe ko te kupu tāfito ʼaia ʼo te akonaki ʼaē neʼe hoa mai kiai. ʼE fakaloto mālohiʼi te kau Kilisitiano e te Tohi-Tapu ke nātou haga ki te ʼAtua moʼo takitaki ʼo nātou ʼi te ʼu potu fuli ʼo te maʼuli. ʼE tonu ke tou maʼu he temi ke tou faikole ʼāteaina ai. Pea tahi ʼaē meʼa, ʼe tonu ke tou haga faikole, koteʼuhi ʼe lagi tuku mai anai e Sehova he temi ke tou haga faikole age, pea hoki tou sio ai leva ki tana tali tatatou faikole.—Sakopo 4:8.
Neʼe fakaloto mālohiʼi tatou e te akonaki “Te ʼu Felogoi Fakalaumālie ʼe Nātou Lagalaga” ke tou fakaʼaogaʼi tatatou fealagia ʼi te palalau, ke fua lelei kia tatou totonu pea mo ʼihi. (Filipe 4:8) ʼE ʼaoga ʼi te ʼaho fuli, ke palalau te ʼu taumatuʼa mo tanatou ʼu fānau ki he ʼu meʼa fakalaumālie. Moʼo fakahoko te faʼahi ʼaia, ʼe tonu ke faigaʼi e te ʼu famili ke feala hanatou kakai fakatahi tuʼa tahi ʼi te ʼaho kae ke fai ʼi te ʼaho fuli, ke feala ai hanatou palalau ki he ʼu meʼa ʼe faka lagalagaʼi ai nātou.
Neʼe fakaʼosi te polokalama ʼo te uhu ʼaki te akonaki fakaloto mālohi “Ko Te Foaki ʼo Kita Pea Mo Te Papitema ʼe Ina Taki Tatou Ki Te Maʼuli.” Ko nātou ʼaē neʼe teuteu ki te papitema kua nātou maʼu ia te ʼatamai mālama, kua nātou tui, kua nātou fakahemala, kua nātou lītuʼa ki te ʼu aga ʼaē ʼe kovi, pea kua nātou foaki ia nātou totonu ki te ʼAtua. Hili tonatou papitema, neʼe fakatokaga age e te tēhina faiakonaki ʼe tonu ke nātou haga tuputupu ʼi te faʼahi fakalaumālie pea ke nātou taupau tanatou faʼafai pea mo te ʼu aga ʼaē ʼe lelei.—Filipe 2:15, 16.
ʼI te hili hoʼatā ʼaia, neʼe faka maʼuhigaʼi te ʼu puani tāfito e lua ʼi te akonaki “Tou Agavaivai Pea Mo Tou Taupau He Sio ʼe Faigafua.” Ko te agavaivai ko tona faka ʼuhiga ʼe kita mahino ki totatou ʼu tuʼakoi, pea mo totatou tuʼulaga ia muʼa ʼo te ʼAtua. Ko te agavaivai ʼe tokoni mai kia tatou ke tou taupau he sio ʼe “faigafua”—ʼo tou sio maʼu ki te Puleʼaga ʼo te ʼAtua, kae mole tou sio ki te ʼu koloā. Kapau ʼe tou fai feiā, ʼe mole tonu ke tou tuʼania koteʼuhi ʼe foaki mai anai e Sehova ia te ʼu meʼa ʼaē ʼe ʼaoga kia tatou.—Mateo 6:22-24, 33, 34.
Neʼe fakahā e te tēhina faiakonaki ʼaē neʼe hoa mai kiai te tupuʼaga ʼo te maʼua ʼaē ke “Tou Falala Katoa Kia Sehova ʼi Te ʼu Temi Faigataʼa.” ʼE tou lava tauʼi feafeaʼi te ʼu taʼi meʼa ʼaia ohage ko te ʼu vaivaiʼaga takitokotahi, te ʼu fihifihia faka paʼaga peʼe ko he mahaki? Tou kole kia Sehova te poto ʼaē ʼe ʼaoga, pea mo tou kole tokoni ki ʼihi. ʼE mole tou matataku peʼe tou hēʼia, kae ʼe tonu ke tou fakamālohiʼi tatatou falala ki te ʼAtua ʼo tou lau tana Folafola.—Loma 8:35-39.
Koʼeni te kupu tāfito ʼo te akonaki koga tolu fakamuli ʼo te fakatahi, “Te Maʼuhiga ʼo Tatatou Tui ʼe ʼAhiʼahiʼi ʼi Te ʼu Faʼahiga ʼAluʼaga Kehekehe.” Neʼe fakamanatuʼi mai e te ʼuluaki koga ʼo te akonaki ʼe fakatagaʼi te kau Kilisitiano moʼoni fuli. ʼE ko he fakamoʼoni ia ki ʼihi, ʼe ina fakamālohiʼi tatatou tui, pea ʼe ina faka fealagia mai ke tou fakahā tatatou agatonu ki te ʼAtua. Logope ʼe mole tou hoʼi fakatupu tuʼutāmaki noa feiā ki totatou maʼuli, kae ʼe mole tou fakaʼaogaʼi anai ʼi he temi he ʼu puleʼaki ʼe mole ʼalutahi mo te Tohi-Tapu ke tou hāo mai te fakataga.—1 Petelo 3:16.
Neʼe lagaʼi e te lua tēhina faiakonaki te ʼu fehuʼi ʼo ʼuhiga mo tatatou mole pipiki ki te malamanei. Ko te ʼu ʼuluaki Kilisitiano neʼe mole gata ʼaki tanatou fia maʼuli tokalelei, kae neʼe nātou mahino ʼe tonu ke takimuʼa tanatou agatonu ki te ʼAtua. ʼO toe feiā pe mo te temi nei, ʼe pipiki maʼu te kau Fakamoʼoni ʼa Sehova ki te pelesepeto ʼaenī: “ ʼE mole koutou kau ʼi te malamanei.” (Soane 15:19, MN ) Mai te ʼaluʼaga ʼaē ʼe feala ke malaga vave he ʼu ʼahiʼahi ʼo tatatou mole pipiki ki te malamanei, ʼe tonu ke fakatuʼutuʼu e te ʼu famili ke nātou toʼo he temi moʼo vakaʼi te ʼu pelesepeto faka Tohi-Tapu ʼo ʼuhiga mo te faʼahi ʼaia. Ohage ko tona fakahā e te tolu akonaki, ʼe lagi mole faigaʼi tāfito e Satana ke ina matehi tatou, kae ʼe lagi ina fakaneke anai ke tou liliu ʼo heʼe agatonu. Kapau ʼe tou nofo agatonu ʼo kātakiʼi ke manukiʼi tatou, mo te ʼu fakaneke ki te ʼu aga heʼeʼaoga, peʼe tou tali he mamahi ʼo totatou loto peʼe ko te mahaki, ʼe tou fakavikiviki ai kia Sehova.
Ko te fakaafe fakaloto māfana ʼaē “Koutou Fakaōvi Kia Sehova,” neʼe ko te kupu tāfito ʼo te akonaki fakaʼosi ʼo te lua ʼaho ʼo te fakatahi. Kapau ʼe tou mahino ki te ʼu kalitate tāfito ʼo Sehova pea ʼe tou fia fakaōvi ai anai kia te ia. ʼE ina fakaʼaogaʼi tona mālohi ʼaē ʼe mole ʼi ai hona gataʼaga moʼo puipui tana hahaʼi, tāfito ʼi te faʼahi fakalaumālie. ʼE mole fefeka tana faitotonu kae ko tona kalitate ʼaia ʼe ina uga ia ia ke ina foaki te maʼuli heʼegata kia ia ʼaē ʼe ina maʼuliʼi te faitotonu. ʼE ʼiloga lelei te poto ʼo te ʼAtua ʼi tana fakaʼaogaʼi te ʼu tagata heʼe haohaoa ke nātou tohi te Tohi-Tapu. Ko tona kalitate ʼaē ʼe maʼuhiga tāfito ʼe ko tona ʼofa, ʼaē neʼe ina uga ia ia ke ina fai he fakatuʼutuʼu moʼo hāofaki te malamanei ʼaki ia Sesu Kilisito. (Soane 3:16) Neʼe fakaʼosi e te tēhina faiakonaki ʼo ina fakahā kua tā ia te tohi foʼou fakaloto mālohi Approchez-vous de Jéhovah.
Neʼe Faka Maʼuhigaʼi e Te Tolu ʼAho Ia Te Faʼafai ʼo ʼUhiga Mo Te ʼu Gāue Lelei
Koʼeni te kupu tāfito ʼo te tolu ʼaho ʼo te fakatahi “Ko He Hahaʼi Faʼafai ʼo Te ʼu Gāue Lelei.” (Tito 2:14) Neʼe kamata lelei te uhu ʼaki te fai palalau faka famili ki te koga tohi ʼo te ʼaho. Neʼe hoa kiai te akonaki ko tona kupu tāfito “ ʼE Koutou Falala Koa Kia Sehova?” ʼE hala te falalaʼaga ʼo te ʼu puleʼaga, koteʼuhi ʼe nātou falala ki tonatou poto pea mo tonatou mālohi. Kae ki te kau kaugana ʼa Sehova, ʼaki he lotomālohi pea ʼaki he loto fiafia, ʼe nātou falala kia te ia logope te ʼu malaʼia.—Pesalemo 46:1-3, 7-11.
ʼI te akonaki “Kau Tūpulaga—Koutou Faʼu Fakatahi Tokotou Ka Haʼu Mo Te Kautahi ʼa Sehova,” neʼe lagaʼi ai te fehuʼi ʼaenī: ʼE lava feafeaʼi ki he tūpulaga hana maʼu he ʼu lelei ʼi tona maʼuli? ʼE mole ina maʼu anai ʼi tana faiga ki te paʼaga, mo te maʼu koloā, pea mo te faiga ke logona. ʼAki te ʼofa ʼe fakaloto mālohi e totatou Tupuʼaga ia te kau tūpulaga ke nātou manatuʼi ia ia ʼi te temi ʼaē ʼe kei nātou tūpulaga ai. Neʼe fakafehuʼi e te tēhina faiakonaki ʼihi tēhina mo tuagaʼane neʼe nātou kau ki te minisitelio faka Kilisitiano ʼi tonatou temi tūpulaga, pea ʼe mahino ia neʼe tou logoʼi tonatou fiafia. Pea neʼe fakatupu fiafia ia te maʼu ʼo te pepa lotu foʼou Jeunes gens — Quʼallez-vous faire de votre vie ?, neʼe fai moʼo tokoni ki te kau Fakamoʼoni ʼaē ʼe kei tūpulaga ke nātou fakatuʼu te fakatafito ki he maʼuli heʼegata mo te kautahi ʼa Sehova.
Neʼe hoa mai kiai te kiʼi gaoʼi lelei ʼaupito, neʼe ko tona kupu tāfito ʼaenī “Tou Tāʼofi Maʼu Lolotoga Te ʼu Temi Faigataʼa.” Neʼe ina fakamatalatala fakanounou ia te maʼuli ʼo Selemia talu mai tana kei tūpulaga ʼo aʼu ki te fakaʼauha ʼo Selusalemi, ʼaē neʼe ina fakakikite ʼaki he loto faʼafai. Neʼe manatu ia Selemia, ʼe mole ina lavaʼi anai te fekau ʼaia, kae neʼe ina fakahoko pe logola te fakafeagai, pea neʼe hāofaki ia ia e Sehova.—Selemia 1:8, 18, 19.
Hili te kiʼi gaoʼi, pea fai leva te akonaki “Tou Faʼifaʼitaki Kia Selemia—ʼO Kalagaʼi ʼAki He Lototoʼa Te Folafola ʼa Te ʼAtua.” ʼE tautau fai te ʼu loi pea mo te ʼu logo fakakākā ʼo ʼuhiga mo te kau fai faka mafola ʼo te Puleʼaga. (Pesalemo 109:1-3) Kae ohage ko Selemia, ʼe tou lava tauʼi te lotovaivai ʼaki tatatou fakafiafia ʼi te Folafola ʼa Sehova. Pea ʼe tou falala ko nātou ʼaē ʼe fakafeagai mai kia tatou ʼe mole nātou mālo anai.
Pea neʼe tō tonu leva te akonaki ki te kaugamālie ʼaki tona kupu tāfito “Ko Te ʼAluʼaga ʼo Te Mālama ʼAenī ʼe Lolotoga Fetogi.” Neʼe fakaʼiloga totatou temi ʼaki te ʼu fetogi fakamataku. Neʼe fakakikite e te Tohi-Tapu, ʼe iku anai te ʼu taʼi ʼaluʼaga ʼaia, ʼo kau ai mo te kalaga ʼaenī “ko te tokalelei mo te fīmālie,” ki te ʼaho fakamāu fakamanavahe ʼo te ʼAtua. (1 Tesalonika 5:3) ʼE ina ʼaumai anai he ʼu fetogi fakaofoofo—te fakagata ʼo te ʼu tau, mo te fai fakapō, mo te agamālohi, pea mo te mahaki. ʼE mole ko te temi ʼaenī ke tou falala ki te tuʼu ʼo te ʼu faʼahiga meʼa ʼaenī, kae ʼe ko te temi ke tou haga pipiki maʼu ki te ʼAtua pea mo tou taupau he aga maʼa.
ʼI te ʼosi ʼo te fakamatala fakanounou ʼo te alatike ako ʼo Te Tule Leʼo ʼo te vāhaʼa, neʼe hoa mai kiai ia te akonaki fakaʼosi ʼo te fakatahi mo tona kupu tāfito ʼaenī, “Kau Fai Faka Mafola Faʼafai ʼo Te Puleʼaga Ke Mahu Takotou ʼu Gāue Matalelei.” Neʼe fakahā e te tēhina faiakonaki pe neʼe feafeaʼi te fakaloto mālohiʼi ʼo tatou ʼi te faʼahi fakalaumālie pea mo uga tatou ke tou falala kia Sehova. Moʼo fakaʼosi, neʼe fakaloto mālohiʼi tatou ke tou liliu ko he kau fai faka mafola ʼo te Puleʼaga ʼe aga maʼa, ʼe agaʼofa, pea mo faʼafai.—1 Petelo 2:12.
Ohage ko te kau kaugana ʼa Sehova ʼi te temi ʼo Nehemia, ʼe mahino papau ia neʼe tou tahi liliu ki tona ʼapi kua tou fonu ʼaupito ʼi te ʼu tapuakina fakalaumālie neʼe tou maʼu mai te ʼu Fakatahi Faka Tisitilike “Te Kau Fai Faka Mafola Faʼafai ʼo Te Puleʼaga.” (Nehemia 8:12) ʼI te fakatahi fakaloto māfana ʼaia, neʼe mole koa la koutou fonu ʼi te fiafia pea mo te lotomālohi ke koutou haga kātaki ʼi tokotou ʼuhiga tagata fai faka mafola faʼafai ʼo te Puleʼaga?
[Talanoa/paki ʼo te pasina 23]
Ko He Tohi Ako Foʼou!
ʼI te hili ʼo te ʼuluaki ʼaho ʼo te fakatahi, neʼe fiafia ia te hahaʼi fuli ʼo te fakatahi, ki te tala ifo kua tā te tohi foʼou Adorez le seul vrai Dieu. Neʼe fakatuʼutuʼu te tohi ʼaia ke akoʼi e nātou ʼaē kua ʼosi tanatou ako katoa ia te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, pea ʼe mahino ia ʼe ina fakamālohiʼi anai te tui ʼo nātou ʼaē ʼe “lotolelei ki te maʼuli heʼegata.”—Gaue 13:48, MN.
[Haʼuʼaga ʼo te paki]
Image on book cover: U.S. Navy photo
[Talanoa/paki ʼo te pasina 24]
Ko He Tokoni Moʼo Fakaōvi Ki Te ʼAtua
Neʼe tala ifo e te tagata faiakonaki fakamuli ʼo te lua ʼaho ʼo te fakatahi, kua tā te tohi foʼou Approchez-vous de Jéhovah. ʼE tuʼu ai te ʼu koga tāfito e fā, ʼe takitahi pe mo te ʼu kalitate tāfito ʼo Sehova—ʼaē ko te mālohi, te faitotonu, te poto pea mo te ʼofa. ʼE takitahi pe te ʼu koga ʼaia mo te kapite ʼe fakahā ai te ʼu faʼifaʼitaki maʼuli neʼe tuku mai e Sesu Kilisito ʼo ʼuhiga mo te mālohi ʼo te kalitate ʼo te ʼAtua. Neʼe fakatuʼutuʼu tāfito te tohi foʼou ʼaia moʼo tokoni mai kia tatou ke tou fakatuputupu he ʼu felogoi ʼe lelei age pea mo mālohi mo Sehova ʼAtua.
[Talanoa/paki ʼo te pasina 26]
Ko He Takitaki Fakalaumālie Maʼa Te Kau Tūpulaga
Neʼe ʼiloga kehe te tolu ʼaho ʼo te fakatahi ʼi te fakahā ifo kua tā te pepa lotu makehe ko tona kupu tāfito Jeunes gens — Quʼallez-vous faire de votre vie ? Neʼe fakatuʼutuʼu moʼo tokoni ki te kau Fakamoʼoni ʼaē kei tūpulaga ke nātou fai he ʼu tonu fakapotopoto ʼo ʼuhiga mo tonatou ka haʼu, pea ʼe ina foaki mai te ʼu tokoni faka Tohi-Tapu ʼo ʼuhiga mo te fakatuʼutuʼu ʼo he maʼu tuʼulaga tologa ʼi te gāue kia Sehova.