Ke ʼAoga Lahi Kia Tatou Te Fakatahi Faka Tisitilike “Te Kau Fai Faka Mafola Faiva ʼo Te Puleʼaga”
1 Ko He Polokalama Fakaloto Mālohi: Neʼe ko he polokalama fakaloto mālohi ʼaē neʼe tou kau kiai ʼi te fakatahi faka tisitilike fakamuli ʼaenī. Neʼe tou fakatahitahi koteʼuhi neʼe ʼi ai tona fakatuʼutuʼu tāfito, ke akoʼi lelei tatou ki te faka mafola mālohi ʼo te Puleʼaga ʼa te ʼAtua. ʼE kei koutou manatuʼi koa pe neʼe fakamahino feafeaʼi e te ʼuluaki tēhina te kupu “faka mafola”? ʼI te akonaki “Tou Lotomālohi ʼi Tatatou ʼIloʼi ʼAē ʼe Kau Sehova Mo Tatou,” ʼe kei koutou manatuʼi koa pe koteā ʼaē neʼe fakaloto mālohiʼi tatou ke tou kumi? Ko te ʼu fakamatala e fia kua tou lau ʼo ʼuhiga mo te ʼu meʼa neʼe hoko ki totatou ʼu tēhina mo tuagaʼane?
2 Ko te ʼu akonaki ʼaē ko tonatou kupu tāfito “ ʼE ʼAhiʼahiʼi Kehekehe Te Lelei ʼo Tatatou Tui,” neʼe nātou fakahā te ʼu tupuʼaga tāfito e tolu ʼo te fakagafua e Sehova te ʼu fakataga. ʼE feala koa hakotou fakamahino peʼe koteā te ʼu tupuʼaga ʼaia e tolu? Koteā te vaega faka Tohi-Tapu ʼe fakatafito kiai tatatou mole kau ʼi te malamanei? Koteā ʼaē neʼe fakaloto mālohiʼi tatou ke tou fai ke tou teuteu ki te ʼu fihifihia ʼe feala ke hoko ʼuhi ko tatatou mole kau ʼi te malamanei? ʼE fakavikiviki feafeaʼi ia Sehova, mo kapau ʼe tou agatonu ʼo kātakiʼi te ʼu ʼahiʼahi?
3 ʼI te kiʼi gaoʼi ʼaē ko tona kupu tāfito “Tou Nonofo Mālohi ʼi Te ʼu Temi Maveuveu ʼAenī,” ko te ʼu faʼahi fea ʼaē neʼe fakaloto mālohiʼi ai koutou? ʼE lava feafeaʼi hatatou faʼifaʼitakiʼi ia Selemia?
4 ʼI te akonaki ki te kaugamālie, ko tona kupu tāfito “ ʼE Fetogi Te ʼAluʼaga ʼo Te Malamanei,” neʼe koteā te ʼu fetogi maʼuhiga ʼaē neʼe talanoa kiai, pea ka iku anai ki te ʼaho fakamataku ʼa te ʼAtua? ʼI takotou fakalogo ki te akonaki fakaʼosi, “Kau Fai Faka Mafola ʼo Te Puleʼaga Koutou Fakalahi Takotou ʼu Gāue Lelei,” neʼe koutou fakapipiki feafeaʼi te ʼu meʼa neʼe koutou logo kiai pea mo takotou minisitelio?
5 Te ʼu Manatu Tāfito ʼAē ʼe Tonu Ke Tou Maʼuliʼi: Ohage ko tona fakamahino ʼi te akonaki “Koutou Loto Fakafetaʼi,” ʼe lava feafeaʼi hatatou fakahā he loto fakafetaʼi lahi kia Sehova? ʼI te akonaki tāfito ʼaenī “ ʼE Gāue Mālohi Te Kau Fai Faka Mafola ʼo Te Puleʼaga,” ko ai ʼaē ʼe tonu ke tou faʼifaʼitakiʼi tana gāue mālohi? Koteā te sivisivi neʼe fakaafe tatou ke tou fai?
6 ʼI te ʼu akonaki ko tonatou kupu tāfito “ ʼE Fakaloto Mālohiʼi Tatou e Te Lea Faka Polofeta ʼo Mikea Ke Tou Haʼele ʼi Te Huafa ʼo Sehova,” neʼe fakahā lelei ai te ʼu faʼahi e tolu ʼe tonu ke tou fai ke tou maʼu ai te ʼofa ʼo Sehova. ʼE faigafua koa tona fai? (Mik. 6:8) ʼO mulimuli ki te akonaki “Tou Nonofo Maʼa ʼo Tou Hāofaki Totatou Loto,” ʼe lava feafeaʼi hatatou maʼa ʼi te faʼahi ʼo te aga ʼaē ʼe tonu ke fai? ʼI te akonaki “Tou Tokakaga Ki Te Aga Fakakākā,” koteā te ʼu faʼahi ʼaē neʼe fakatokagaʼi mai ke mole tou kākāʼi tatou pea ke mole tou kākāʼi te hahaʼi?
7 ʼI te ʼu akonaki ʼaē neʼe fakatafito ki te kupu tāfito ʼaenī, “Ko Te Kau Fai Faka Mafola ʼo te Puleʼaga ʼe Nātou Vikiʼi Tanatou Minisitelio,” koteā te ʼu manatu ʼaoga neʼe tou maʼu kua tou maʼuliʼi ʼi totatou minisitelio? ʼI te akonaki “Ko Te Fai Palalau Ki Te ʼu Manatu Fakalaumālie ʼe Fakaloto Mālohi,” neʼe tou vakaʼi ia Filipe 4:8. ʼE tokoni feafeaʼi mai te vaega ʼaia ke tou fakahaga tatatou ʼu palalau ki te ʼu manatu fakalaumālie, pea ko te temi fea ʼaē ʼe tonu ai ke tou fai te faʼahi ʼaia?
8 Ko te akonaki “Tou Falala Katoa Kia Sehova ʼi Te ʼu Temi Faigataʼa,” neʼe fakahā ai peʼe tou lava tauʼi feafeaʼi he ʼu ʼaluʼaga fakamamahi, he ʼu faigataʼaʼia ʼi te faʼahi ʼo te paʼaga, he mahaki, he ʼu fihifihia faka famili, pea mo he ʼu vaivaiʼaga ʼe kei tou maʼu. ʼE tou lava fakahā feafeaʼi tatatou falala kia Sehova mokā tou tau mo te ʼu ʼaluʼaga ʼaia?
9 He ʼu Koloā Foʼou ʼi Te Faʼahi Fakalaumālie: Neʼe tou fiafia ʼi tatatou maʼu te tohi foʼou Adorez le seul vrai Dieu. ʼI te fakamahino mai ʼaē tona ʼaoga kia tatou, neʼe malave feafeaʼi kia koutou? He koʼe ʼe fua lelei anai ki te fai ʼo he ʼu tisipulo, mo kapau ʼe tou fai te ʼu ako Tohi-Tapu ʼaki te tohi ʼaia?
10 Pea neʼe tou maʼu te tohi matalelei ʼaupito Approchez-vous de Jéhovah. ʼE feafeaʼi te tohi ʼaia? Ko te ʼu paki fea ʼe koutou leleiʼia tāfito? ʼI takotou ʼosi lau te tohi ʼaia, kua lahi age koa takotou fakaōvi kia Sehova? Ko ai ʼaē ʼe feala ke ʼaoga ki ai te tohi ʼaia?
11 ʼI te Fakatahi Faka Tisitilike “Te Kau Fai Faka Mafola Faiva ʼo Te Puleʼaga” ʼe tou maʼu ai te fakaloto mālohi fakalaumālie ʼaē ʼe ʼaoga kia tatou moʼo tauʼi te ʼu temi faigataʼa. Ke fua lelei ʼaupito kia tatou te fakatuʼutuʼu fakalaumālie makehe ʼaia, tou faiga lahi ke tou manatuʼi te ʼu akonaki ʼaē neʼe fai, mo tou fakafetaʼi pea mo tou maʼuliʼi te ʼu meʼa neʼe tou ako. (2 Pet. 3:14) Kapau ʼe tou fai feiā, pea ʼe fakaloto mālohiʼi anai tatou ke tou taupau tatatou agatonu pea mo tou liliu ko he kau fai faka mafola fakamalotoloto ʼo te Puleʼaga, ʼo tou faʼifaʼitaki ai ki totatou ʼAliki ko Sesu Kilisito, pea ko meʼa fuli ʼaia ki te kolōlia ʼo Sehova.—Filp. 1:9-11.