ʼE Nātou Fakatotonu Ke Nātou Haʼele ʼi Te Ala ʼa Te ʼAtua ʼAē ʼe Ina Taki Ki Te Maʼuli
ʼI te ʼu fakatahi “Te Faʼahiga Maʼuli ʼAē ʼe Fakamaʼua Mai e Te ʼAtua,” neʼe lahi te ʼu meʼa ʼaē neʼe foaki kia nātou ʼaē ʼe fia tauhi ki te ʼAtua! Ko te tuagaʼane neʼe ina ʼui ʼo ʼuhiga mo te fakatahi ʼaia, neʼe “ko he temi taulekaleka ʼaē neʼe akoʼi ai ia ia, mo fakaloto mālohiʼi, pea mo fakamālamaʼi.”
KO TE tēhina neʼe ina ʼui “neʼe lahi te ʼu meʼa neʼe feala ke kita fiafia ai, mo fakakaukauʼi, pea mo akoʼi.” Tou vakaʼi te polokalama ʼaia.
Ko Sesu Kilisito—Te Ala, Te Moʼoni, Pea Mo Te Maʼuli
Neʼe ko te kupu tāfito ʼaia ʼo te ʼuluaki ʼaho ʼo te fakatahi. (Soane 14:6) Neʼe fakahā ʼi te ʼuluaki akonaki te tupuʼaga ʼo tatatou maʼopoʼopo mai ki te fakatahi ʼaia: ke loloto te akoʼi ʼo tatou ʼo ʼuhiga mo te faʼahiga maʼuli ʼaē ʼe lelei tokotahi, te faʼahiga maʼuli ʼaē ʼe fakamaʼua mai e te ʼAtua. ʼE akoʼi e Sehova ki tana hahaʼi peʼe tonu ke feafeaʼi tanatou haʼele ʼi tona ʼu ala. ʼE ina fai te faʼahi ʼaia ʼaki te Tohi-Tapu, mo “te tagata kaugana agatonu mo poto,” pea mo te laumālie maʼoniʼoni. (Mateo 24:45-47; Luka 4:1; 2 Timoteo 3:16) ʼE ko he pilivilesio lahi te akoʼi ʼo tatou e te Tuʼi ʼAliki ʼo te ʼatulaulau!
ʼO mulimuli ki te kupu tāfito ʼo te ʼaho ʼaia, neʼe fai te akonaki tāfito ʼaenī, “Te Totogi ʼo Sesu—Ko Te Ala ʼAē Neʼe Tofa e Te ʼAtua Ki Te Fakamaʼuli.” ʼI tatatou mulimuli ki te ala ʼa te ʼAtua ʼaē ʼe ina taki ki te maʼuli, ʼe maʼuhiga ke tou fakamoʼoni ki te gāue ʼa Sesu ʼi te fakatuʼutuʼu ʼa Sehova. Neʼe ʼui fēnei e te tēhina faiakonaki: “Kanapaula neʼe mole foaki te sakilifisio faitotogi ʼo Sesu, kanaʼauala ʼe mole maʼu anai e he tahi te maʼuli heʼegata mai te ʼAtua, tatau aipe pe koteā te ʼu meʼa ʼaē ʼe tui kiai pe ko tana ʼu gāue.” Neʼe ina toʼo leva ia Soane 3:16, ʼaē ʼe ʼui fēnei ai: “Ko te ʼAtua, ʼi tona ʼofa lahi ki te malamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kia te ia, ke ʼaua naʼa fakaʼauha kaʼe ke ina maʼu te maʼuli heʼegata.” Ke feala hakita tui ki te sakilifisio faitotogi ʼo Kilisito, ʼe maʼua ke kita maʼu he ʼatamai mālama totonu ʼo ʼuhiga mo te moʼoni. ʼE toe maʼua foki ke kita foaki tokita maʼuli kia Sehova, ʼo kita fakahā ʼaki te papitema ʼi te vai, pea mo kita maʼuli ʼo mulimuli ki te faʼifaʼitaki ʼaē neʼe tuku mai e Sesu Kilisito.—1 Petelo 2:21.
Neʼe kamata te polokalama ʼo te hili hoʼatā ʼaki te akonaki ko tona kupu tāfito ʼaenī, “ ʼE Mole Puli ʼi He Temi Te Ala ʼo Te ʼOfa.” Neʼe vakaʼi fuli ai te ʼu vaega ʼo 1 Kolonito 13:4-8, ʼaē neʼe fakamatala fakalelei ai e Paulo te ʼu agaaga ʼo te ʼofa. Neʼe fakamanatuʼi kia nātou fuli ʼo te fakatahi, ko te ʼofa ʼaē ʼe fai ʼaki he loto faka sakilifisio, ʼe ko he fakaʼiloga ʼaia ʼo te lotu Kilisitiano, pea ko te ʼofa ki te ʼAtua pea ki te kāiga ʼe ko he ʼu faʼahi maʼuhiga ʼaia ʼo te tauhi ʼaē ʼe leleiʼia e Sehova.
ʼOsi ʼaia, pea neʼe fai ai te akonaki e koga tolu pea ko tona kupu tāfito ʼaenī, “ ʼU Mātuʼa—Koutou Akoʼi Te Ala ʼa Te ʼAtua Ki Takotou Fānau.” ʼE feala ke tokoni te ʼu mātuʼa ki tanatou fānau ke nātou tauhi ki te ʼAtua, mo kapau ʼe nātou tuku he faʼifaʼitaki lelei ʼo nātou lau pea mo ako tana Folafola. ʼE feala ke nātou akoʼi te moʼoni ki tanatou fānau ʼaki he ako faka famili ʼe fai tuʼumaʼu, ʼo faka ʼalutahi mo te ʼu meʼa ʼaē ʼe ʼaoga ki te famili. ʼE toe maʼuhiga foki ke nātou tokoni ki tanatou fānau ke nātou kau ki te ʼu gāue ʼo te kokelekasio pea mo te fai faka mafola. Logope ʼe faigataʼa ʼaupito te taupau ʼo he ʼu fānau ʼe nātou manavasiʼi ki te ʼAtua ʼi te mālama agakovi ʼaenī, kae ʼe feala ke maʼu ai he ʼu fakapale lahi.
ʼOsi te akonaki koga tolu ʼaia, pea fai leva te akonaki ʼaenī “Tou Tuku Ke Gaohi Tatou e Sehova Ki He Gāue ʼe Fakaʼapaʼapaʼia.” Ohage pe ko te tagata faʼu ipu ʼaē ʼe ina faʼu he ipu kele, ʼe faʼu e te ʼAtua ia nātou ʼaē ʼe nātou fia tauhi kia te ia. (Loma 9:20, 21) ʼE ina fai te faʼahi ʼaia ʼo ina foaki he ʼu tokoni ʼaki tana Folafola pea mo tana kautahi. ʼE tokoni mai anai ia Sehova ke tou fakaʼaogaʼi katoa totatou poto mo kapau ʼe mole tou manatu pe kia tatou totonu, mo tou fakaʼaogaʼi te ʼu faigamālie ʼaē ʼe ina foaki mai kia tatou, pea mo tou tali ke ina takitaki tatou.
Neʼe hoa kiai te koga fakafiafia ʼo te polokalama, neʼe ko te akonaki “Te Selevisi Misionea.” ʼI te ʼu fenua e 148 ʼi te malamanei katoa, ko te kau minisi Kilisitiano e toko 2 390 ʼe tuku age kia nātou te pilivilesio ʼaē ke nātou gāue faka misionea. ʼE nātou tuku he faʼifaʼitaki lelei ʼo ʼuhiga mo te agatonu pea mo te fakamalotoloto, pea ʼe nātou loto fakafetaʼi ʼaupito ki te pilivilesio ʼaē ke nātou gāue ʼi te ʼu fenua matāpule. Lolotoga te akonaki ʼaia ʼaē neʼe fai ʼi te ʼu fakatahi faka malamanei, neʼe talanoa ai te kau misionea ki te ʼu fihifihia pea mo te ʼu fiafia ʼaē ʼe maʼu ʼi te selevisi misionea.
Ko te kupu tāfito ʼaenī ʼo te akonaki fakaʼosi ʼo te ʼuluaki ʼaho, “ ʼE ʼi ai koa he maʼuli ʼi te hili ʼo te mate?” Talu mai ni ʼu sēkulō, neʼe fakakaukauʼi e te hahaʼi te fehuʼi ʼaia. Ko te hahaʼi ʼi te ʼu sosiete kehekehe neʼe nātou faiga ke nātou maʼu he puleʼaki kiai. Pea ʼe lahi ʼaupito te ʼu tali ʼaē neʼe fai ki te fehuʼi ʼaia. ʼE kehekehe te ʼu tali ʼaia ohage ko te kehekehe ʼo te ʼu agaʼi fenua pea mo te ʼu lotu ʼo te hahaʼi ʼaē neʼe nātou fai te ʼu tali ʼaia. Kae ʼe ʼaoga ke ʼiloʼi e te hahaʼi te moʼoni ʼo ʼuhiga mo te faʼahi ʼaia.
Ki muli age, neʼe fakahā e te tēhina faiakonaki te kaupepa foʼou e pasina 32 ko tona kupu tāfito ʼaenī, Koteā ʼAē ʼe Hoko Kia Tatou Mokā Tou Mamate? ʼE fakamahino mai e te kaupepa ʼaia peʼe haʼu maifea te akonaki ʼo ʼuhiga mo te maʼuli tuputupua ʼo te nefesi, pea neʼe hū feafeaʼi ki te teitei lotu fuli ʼo te malamanei ia ʼaho nei. ʼE mahino gafua te kaupepa ʼaia pea ʼe ina fakahā lelei mai te meʼa ʼaē ʼe ʼui e te Tohi-Tapu ʼo ʼuhiga mo te nefesi, pe koʼe ʼe tou mamate, pea koteā te meʼa ʼaē ʼe hoko kia tatou mokā tou mamate. ʼE toe fakamahino foki e te kaupepa pe koteā te ʼamanaki ʼa te kau mate pea mo te hahaʼi maʼuli. Ko te kaupepa ʼaia ʼe ko he tapuakina moʼoni kia nātou fuli ʼaē ʼe nātou kumi te moʼoni!
Koutou Haga Vakaʼi Peʼe Feafeaʼi Takotou Faʼahiga Haʼele
Neʼe lelei te kupu tāfito ʼo te lua ʼaho ʼo te fakatahi! (Efesi 5:15) ʼI te polokalama ʼo te uhu, neʼe talanoa tāfito ai ki te gāue fai faka mafola pea mo te fai ʼo ni ʼu tisipulo. ʼI te ʼosi vakaʼi ʼo te vaega Tohi-Tapu ki te ʼaho, neʼe hoko atu te polokalama ʼaki te akonaki “Tou Tokoni Ki Te Hahaʼi Ke Nātou Haʼele ʼi Te Ala ʼAē ʼe Ina Taki Ki Te Maʼuli.” ʼI tatatou fakahoko te gāue maʼuhiga ʼaia, ʼe maʼuhiga ke tou maʼu he faʼahiga manatu lelei, ʼi tatatou ʼiloʼi ʼaē ko te fakahā ʼo te moʼoni ki te hahaʼi ʼe ko he pilivilesio pea mo he maʼua. ʼI te ʼuluaki sēkulō ʼo totatou temi, ko te tokolahi ʼo te hahaʼi neʼe nātou fakafisi ki te Folafola ʼa te ʼAtua. Kae logope la te ʼu fakafeagai, neʼe ʼi ai te ʼu hahaʼi ‘neʼe nātou tali lelei te maʼuli heʼegata pea neʼe nātou liliu ko te hahaʼi tui.’ (Gāue 13:48, 50; 14:1-5) ʼE toe feiā aipe ia ʼaho nei. Logope la ko te tokolahi ʼe nātou fakafisi ki te moʼoni faka Tohi-Tapu, kae ʼe tou haga kumi te hahaʼi ʼaē ka nātou tali lelei anai.—Mateo 10:11-13.
Ko te akonaki ʼaē neʼe hoa kiai, neʼe talanoa ki te faigataʼa ʼo tatatou fakakaku te logo ʼo te fakamaʼuli ki te hahaʼi fuli. Mai tona ʼuhiga ʼaē kua liliu ʼo faigataʼa te maʼu ʼo te hahaʼi iō nātou, koia ʼe maʼua ai ke tou faiva pea mo maʼu he ʼu puleʼaki ke tou fakahā te logo ʼo te Puleʼaga ki te tokolahi. ʼE lahi te ʼu fenua ʼe maʼu ai e te kau fai faka mafola he ʼu fua lelei ʼi tanatou fai faka mafola ʼaki te telefoni, peʼe ʼi tanatou faka mafola ʼi te ʼu koloā, ʼo nātou maʼu ai he ʼu hahaʼi ʼe faigataʼa hatatou maʼu atu kiō nātou.
Ko te akonaki “Tou Akoʼi Ki Te Kau Tisipulo Te ʼu Meʼa Fuli ʼAē Neʼe Fakatotonu Mai e Kilisito,” neʼe talanoa tāfito ki te maʼuhiga ʼaē ke tou liliu ʼo faiva ʼi totatou minisitelio. ʼE tuputupu tatatou poto ʼi te faiakonaki mo kapau ʼe tou faʼifaʼitaki ki ʼihi, pea mo tou maʼuliʼi te ʼu tokoni ʼaē ʼe foaki mai ʼi te ʼu fono ʼo te kokelekasio. ʼI te tuputupu ʼo tatatou poto ʼi te faiakonaki, ʼe toe tuputupu foki mo totatou fiafia ʼi tatatou tokoni ki te hahaʼi ke nātou ʼiloʼi te moʼoni ʼo te Tohi-Tapu.
Neʼe fakaʼosi te polokalama ʼo te uhu ʼaki te akonaki neʼe talanoa ki te faka ʼuhiga ʼo takita foaki tokita maʼuli kia Sehova pea mo te papitema. Ko te tahi puani neʼe talanoa kiai te tēhina faiakonaki neʼe ina ʼui, kapau ʼe tou falala ki te ʼAtua pea mo tou faiga fakamalotoloto ke tou fai tona finegalo, pea ʼe ina tapuakina anai tatou pea mo lagolago anai kia tatou. Neʼe tohi fēnei e te tagata poto: “ ʼI tou ʼu ala fuli tokagaʼi ia [te ʼAtua], pea ko ia ʼe ina fakatonutonu anai tou ʼu ala foufou.” (Tāʼaga Lea 3:6) Ko te papitema fakafiafia neʼe ko he lakaga maʼuhiga ʼo te fakatahi, pea neʼe hā lelei ai, ko te tokolahi neʼe kua kamata mulimuli ki te ala ʼa te ʼAtua ʼaē ʼe ina taki ki te maʼuli.
ʼI te hili ʼo te temi kai, neʼe kamata te polokalama ʼo te hili hoʼatā ʼaki te akonaki ʼaenī “Tou Tauhi Ki Te ʼAtua ʼo Heʼegata.” ʼE fakahoko anai e te ʼAtua tana fakatuʼutuʼu ʼaē ke tauhi kia te ia te hahaʼi talagafua ʼo talu ai ʼi te kele. Koia la ʼaē, ʼe lelei ai ke tou fakatafito tatatou ʼu manatu, mo tatatou ʼu fakatuʼutuʼu, pea mo tatatou ʼamanaki, ki te tauhi kia Sehova ʼo heʼegata! Logope la ʼe tou fia taupau ʼi totatou ʼatamai te kua ōvi mai ʼo “te ʼaho ʼo Sehova,” kae ʼe maʼuhiga ʼaupito ke tou manatuʼi, ʼe tou fakatuʼutuʼu ke tou tauhi kia te ia ʼo talu ai. (2 Petelo 3:12) ʼI tatatou mole ʼiloʼi ʼaē pe ko te temi fea ʼaē ka fakahoko anai e Sesu te lagavaka ʼa Sehova, koia ʼe tou maʼu ai ʼi te ʼaho fuli te fealagia ʼaē ke tou fakahā tatatou tauhi fakamalotoloto kia Sehova.
Ko te ʼu akonaki e lua ʼaē neʼe hoa kiai, neʼe vakaʼi ai te kapite 4 ʼo te tohi ʼa Paulo ki te kau Efesi. ʼI te ʼu puani ʼaē neʼe vakaʼi ai, neʼe talanoa ki te ʼu ‘tagata ʼaē neʼe foaki mai,’ ʼaē ko he ʼu tagata popoto ʼi te faʼahi fakalaumālie pea neʼe hinoʼi ʼaki te laumālie maʼoniʼoni. Ko te ʼu tagata ʼāfea ʼaia ʼe nātou foaki mai he ʼu tokoni pea mo te takitaki ʼaē ʼe ʼaoga kia tatou ʼi te faʼahi fakalaumālie. Ko te tohi ʼaia ʼa Paulo ʼaē neʼe fai ʼaki te laumālie maʼoniʼoni, ʼe ina toe fakaloto mālohiʼi te kau Kilisitiano ke nātou kofuʼi te “ ʼulugaaga foʼou.” (Efesi 4:8, 24) ʼE kau ʼi te ʼulugaaga faka Kilisitiano ʼaia te ʼu kalitate ohage ko te loto mahino, te agalelei, te fia mālalo, te agamālū, te loto faʼa kātaki, pea mo te ʼofa.—Kolose 3:12-14.
Kapau ʼe tou fia vakaʼi peʼe feafeaʼi tatatou faʼahiga haʼele, pea ʼe tonu ke tou ʼāteaina mai te mele fuli pe ʼo te mālama ʼaenī, pea neʼe ko te faʼahi ʼaia ʼaē neʼe talanoa kiai ʼi te akonaki neʼe hoa mai kiai. ʼE maʼuhiga ke tou fakapotopoto mokā tou filifili totatou ʼu fakafiafia, mo tatatou gāue, pea mo te ʼu koloā ʼaē ʼe tou fia maʼu. Kapau ʼe tou maʼuliʼi te tokoni ʼaē ʼe tuku mai ia Sake 1:27 ke tou ʼāteaina mai te mele fuli pe ʼo te malamanei, pea ʼe leleiʼia anai tatou e te ʼAtua pea ʼe maʼa anai totatou leʼo ʼo loto. ʼE feala anai ke ʼi ai he ʼuhiga ʼo totatou maʼuli, pea ʼe tou maʼu anai te tokalelei, mo te fīmālie ʼi te faʼahi fakalaumālie, pea mo hotatou ʼu kaumeʼa lelei.
ʼOsi ʼaia, pea neʼe fai te akonaki koga tolu ko tona kupu tāfito ʼaenī, “ ʼU Tūpulaga, Koutou Muliʼi Te Ala ʼa Te ʼAtua.” ʼI te ʼiloʼi ʼa te kau tūpulaga, ʼe ʼofa te ʼAtua kia nātou pea mo ina leleiʼia tanatou faiga ʼaē ke nātou fakahoko he tauhi ʼe maʼa, koia ʼe tonu ai ke nātou fakatuputupu tanatou ʼu fealagia fakakaukau ke nātou tauhi agatonu kia te ia. Ke tuputupu hakita ʼu fealagia fakakaukau, ʼe feala ke kita lau te Folafola ʼa te ʼAtua ʼi te ʼaho fuli pea mo metitasioʼi. Kapau ʼe tou fai te faʼahi ʼaia, pea ʼe feala ai ke tou ʼiloʼi ai te ʼu ala ʼa Sehova. (Pesalemo 119:9-11) ʼE toe tuputupu foki tokita ʼu fealagia fakakaukau ʼaki te ʼu tokoni ʼaē ʼe foaki mai e takita ʼu mātuʼa, mo te kau tagata ʼāfea, pea mo te ʼu tohi ʼa te Sosiete. Kapau ʼe nātou fakaʼaogaʼi fakalelei tanatou ʼu fealagia fakakaukau, pea ʼe tauʼi anai e te kau tūpulaga te holi ʼaē ki te ʼu koloā, mo te ʼu palalau heʼeʼaoga, mo te ʼu fakafiafia fakavale ʼaē ʼe maʼu ʼi te mālama ʼaenī ʼaē ʼe mamaʼo ʼi te ʼAtua. Kapau ʼe nātou muliʼi te ala ʼa te ʼAtua ʼaē ʼe ina taki ki te maʼuli, pea ʼe lava lelei anai te maʼuli ʼo te kau tūpulaga ʼo feiā mo nātou matutuʼa.
Ko te akonaki fakaʼosi ʼo te Moeaki neʼe fēnei tona kupu tāfito, “Te Tupuʼaga—Tona ʼUlugaaga Pea Mo Tana ʼu Ala.” ʼI tana ʼosi fakatokagaʼi ko te toko lauʼi miliale hahaʼi ʼe mole nātou ʼiloʼi te Tupuʼaga, neʼe ʼui fēnei e te tēhina faiakonaki: “Kapau ʼe tou loto ke ʼi ai he ʼuhiga ʼo totatou maʼuli, pea ʼe tonu ke tou ʼiloʼi totatou Tupuʼaga, totatou ʼAtua; ʼo tou ʼiloʼi tona ʼulugaaga, pea mo tou mulimuli ki tana ʼu ala. . . . ʼE ʼi ai te ʼu moʼoni ʼo ʼuhiga mo te malamanei pea mo tatou, ʼe feala ke koutou fakaʼaogaʼi moʼo tokoni ki te hahaʼi ke nātou tali te Tupuʼaga pea mo nātou maʼu he ʼuhiga ʼo tonatou maʼuli ʼi tanatou felogoi mo ia.” ʼOsi ʼaia, pea neʼe ina fakahā te ʼu fakamoʼoni ʼe hā ʼaki ai, ʼe ʼi ai he Tupuʼaga ʼofa. Neʼe fakaʼosi te akonaki ʼaki te fakahā ʼo te tohi foʼou ko tona kupu tāfito Y a-t-il un Créateur qui se soucie de vous ?
“Koʼeni Te Ala. Koutou Haʼele Ai”
Neʼe ko te kupu tāfito ʼaia ʼo te tolu ʼaho ʼo te fakatahi. (Isaia 30:21) Neʼe kamata te polokalama ʼaki te akonaki koga tolu ʼo ʼuhiga mo te meʼa ʼaē neʼe hā kia Esekiele ʼo ʼuhiga mo te fale lotu. Ko te meʼa ʼaia neʼe hā, ʼe ʼi ai tona faka ʼuhiga maʼuhiga ki te hahaʼi ʼa te ʼAtua ia ʼaho nei, heʼe pipiki ki te tauhi maʼa ʼaē ʼe tou fai ʼi te temi ʼaenī. Koʼeni te puani ʼaē ʼe feala ai ke tou mahino ki te meʼa ʼaia neʼe hā: ko te fale lotu fakalaumālie lahi ʼo Sehova ʼe ina fakatātā tana ʼu fakatuʼutuʼu ʼo ʼuhiga mo te tauhi maʼa. ʼI te lolotoga vakaʼi ʼo te ʼu agaaga ʼo te meʼa ʼaia neʼe hā, neʼe fakakaukauʼi e nātou ʼaē neʼe fakalogo ki te akonaki ʼaia peʼe feafeaʼi tanatou lagolago ki te gāue ʼaē ʼe fai e te kau tagata ʼāfea agaʼofa ʼo te toe ʼa te kau fakanofo pea mo nātou ʼaē ka nātou kau anai ki te kalasi ʼo te pule.
Neʼe hoa kiai te gaoʼi faka Tohi-Tapu neʼe fai e te ʼu tēhina mo tuagaʼane neʼe nātou kofuʼi te ʼu teu ʼo te temi ʼāfea. Koʼeni te kupu tāfito ʼo te gaoʼi ʼaia “ ʼU Famili—Koutou Fakamāmāhani ʼi Te Lau ʼo Te Tohi-Tapu ʼi Te ʼAho Fuli.” Neʼe hā ai te tui pea mo te lototoʼa ʼa te ʼu hepeleo e toko tolu he neʼe mole nātou fia tulolo ia muʼa ʼo te fakatātā aulo ʼaē neʼe fakatuʼu e te hau ko Nepukanesa ʼo Papiloni. Neʼe fia fakahā e te gaoʼi ʼaia, ko te Tohi-Tapu ʼe mole ko he tohi ʼe maʼu ai pe he ʼu fakamatala ʼāfea, kae ʼe ʼaoga ia ʼaho nei tana ʼu tokoni ki te kau tūpulaga ʼo feiā mo nātou lalahi.
ʼI te polokalama ʼo te hili hoʼatā, neʼe fai ai te akonaki ki te kaugamālie ko tona kupu tāfito ʼaenī, “Ko Te Ala Pe e Tahi ʼAē ʼe Ina Taki Ki Te Maʼuli Heʼegata.” ʼI tana ʼosi fakamatala te higa ʼa te malamanei ki te agahala pea mo te mate, neʼe fakaʼosi e te tēhina faiakonaki ʼaki te ʼu palalau mālohi ʼaenī: “Ko te vaega Tohi-Tapu ʼaē neʼe fakatafito kiai te tolu ʼaho ʼaenī ʼo te fakatahi ʼe ko Isaia kapite 30, ʼi te vaega 21, ʼaē ʼe ʼui fēnei ai: ‘Pea ʼe logo anai tou ʼu taliga ki he leʼo mai muli, ʼe ina ʼui fēnei: “Koʼeni te ala. Koutou haʼele ai,” mo kapau ʼe tonu ke koutou ʼolo ki te faʼahi mataʼu peʼe tonu ke koutou ʼolo ki te faʼahi hema.’ ʼE tou logo feafeaʼi ki te leʼo ʼaia? ʼE feala ke tou logo kiai mokā tou fakalogo ki te Folafola ʼa te ʼAtua, te Tohi-Tapu, pea mo tou mulimuli ki te takitaki ʼaē ʼe foaki mai e tatatou Faiako Lahi, ia Sehova ʼAtua, ʼaki te tohi ʼaia pea mo tana kautahi faka Kilisitiano ia ʼaho nei. ʼE mahino papau ia, ko te fai ʼo te faʼahi ʼaia ʼe ko te ala pe ʼaia e tahi ʼaē ʼe ina taki ki te maʼuli heʼegata.”
ʼI te ʼosi fai ʼo te fakamanatu ʼo te alatike ako ʼo Te Tule Leʼo ʼo te vāhaʼa ʼaia, neʼe fai te akonaki fakaʼosi, ko tona kupu tāfito ʼaenī, “Koutou Haga Haʼele ʼi Te Ala ʼa Sehova.” ʼI tona ʼuluaki koga, neʼe fakamanatuʼi ai te ʼu puani tāfito ʼo te fakatahi. Pea neʼe fakahā ai e te tēhina faiakonaki te tonu ʼaē neʼe hā ai tatatou lotomālohi ʼaē ke tou haga nofo ʼi te ala ʼa te ʼAtua.
Neʼe fakaʼosi te tonu ʼaia ʼaki te ʼu palalau fakaloto mālohi ʼaenī: “ ʼE tou ʼiloʼi papau, kapau ʼe tou maʼuliʼi te ʼu pelesepeto ʼa te Tohi-Tapu, mo tana ʼu tokoni, pea mo tana ʼu fakatokaga, pea ʼe lelei anai totatou maʼuli ʼi te temi nei pea ʼe tou tuku anai he fakatafito lelei ki te ka haʼu, ke tou maʼu ai te maʼuli moʼoni. Kae ko te meʼa ʼaē ʼe maʼuhiga tāfito, ʼe tou fai te tonu ʼaenī heʼe tou ʼofa kia Sehova ʼAtua ʼaki totatou loto, mo totatou nefesi, mo totatou ʼatamai, pea mo totatou mālohi katoa!” Pea ko nātou fuli ʼaē neʼe ʼi te fono neʼe nātou ʼio kiai ʼo nātou ʼui leʼo lahi “Ei”!
[Talanoa ʼo te pasina 8]
ʼE ʼi Ai Koa He Tupuʼaga ʼe Ina Tokagaʼi Koutou?
Ko te kupu tāfito ʼaia ʼo te tohi foʼou ʼe ina fakahā ai te ʼu fakamoʼoni lelei, ʼe ʼi ai moʼoni he Tupuʼaga, ia Sehova, pea ʼe fakahā ai tona ʼu kalitate. Neʼe fai tāfito maʼa te hahaʼi ʼaē neʼe lahi tanatou ako te ʼu meʼa fakapoto lalahi, kae mole nātou tui ki te ʼAtua. Ko te tohi ʼaia ʼe pasina 192, ʼe ina toe fakamālohiʼi anai te tui ʼo nātou ʼaē kua nātou tui ki te ʼAtua, ʼo fakaʼāsili ai tanatou leleiʼia tona ʼulugaaga pea mo tana ʼu ala.
Ko te tohi Y a-t-il un Créateur qui se soucie de vous ?, ʼe mole fai ai te ʼu palalau ʼaē ʼe fai māhani ki te hahaʼi ʼaē kua nātou tui ki te ʼAtua. Kae ʼe ina fakahā te ʼu meʼa fakapoto lalahi ʼaē neʼe hoki maʼu moʼo fakamoʼoni ʼaki, ʼe ʼi ai he Tupuʼaga. Koʼeni te ʼu kupu tāfito ʼo ʼihi kapite ʼo te tohi, “Koteā ʼAē ʼe Feala Ke Koutou Maʼu Ai He ʼUhiga ʼo Tokotou Maʼuli?” “Neʼe Tupu Feafeaʼi Te ʼAtulaulau?—Ko Te Fakafihi Lahi,” pea “ ʼE Mole He Tahi ʼe Tatau Mo Koutou!” ʼI te tahi ʼu kapite, ʼe fakahā ai pe koʼe ʼe feala ke tou ʼiloʼi papau, ko te Tohi-Tapu ʼe haʼu mai te ʼAtua. Ko te tohi foʼou ʼaia ʼe toe talanoa fakanounou foki ki te ʼu agaaga ʼo te Tohi-Tapu, ʼaē ʼe fakahā ai te ʼulugaaga ʼo te Tupuʼaga pea mo tana ʼu ala. ʼE mole gata pe te fakahā e te tohi peʼe koʼe neʼe fakagafua e te ʼAtua te ʼu mamahi, kae ʼe ina toe fakamahino mai foki peʼe feafeaʼi anai tana fakagata ʼo talu ai te ʼu mamahi ʼaia.
[Paki ʼo te pasina 7]
Neʼe papitema te tokolahi
[Paki ʼo te pasina 7]
Neʼe fakahā te kaupepa foʼou e te tēhina ko A. D. Schroeder, ʼaē ʼe kau ʼi te Kolesi Pule ʼa te kau Fakamoʼoni ʼa Sehova
[Paki ʼo te pasina 8, 9]
Ko te gaoʼi neʼe ina fakaloto mālohiʼi tatou ke tou lau te Tohi-Tapu ʼi te ʼaho fuli