ʼE Vakaʼi e Te ʼu Tōketā Te Tahi ʼu Faitoʼo ʼe Mole Fakaʼaogaʼi Ai Te Toto

ʼI AMELIKA neʼe teitei ke toko 200 te ʼu tōketā ʼaē neʼe fakatahitahi ʼi Cleveland, ʼi Ohio, ʼi te Moeaki, ʼaho 7 ʼo ʼOketopeli 1995, ʼo nātou palalau ki te faʼahi ʼe tokaga tāfito kiai te kau tōketā: ko te faitoʼo pea mo te fai tafa ʼaē ʼe mole fakaʼaogaʼi ai te toto.

ʼE lahi te ʼu ʼaluʼaga faigataʼa neʼe nātou talanoa kiai. Ohage la, koteā anai te meʼa ke fai mo kapau ʼe maʼu e he tahi te mahaki kovi ʼaē ko te anémie? ʼE lava feafeaʼi anai te faitoʼo ʼo he kiʼi tamasiʼi neʼe tupu ʼi muʼa ʼo tona māhina fānauʼi, ʼo mole fakaʼaogaʼi ai te toto? ʼE lava koa ke tafa he mafu ʼo mole fakaʼaogaʼi ai te foʼi huki toto? ʼE lelei hatatou fakatokagaʼi, ko te fai tafa ʼaē ʼe mole fakaʼaogaʼi ai te toto, kua ʼosi fai ia pea neʼe fua lelei​—kae ʼe fakaʼaogaʼi te ʼu faʼahiga faitoʼo, ʼe nātou tokoni ki te sino ke ina toe fakatupu hona toto.a

He koʼe ʼe tonu ke mole fakaʼaogaʼi te toto? ʼE ʼui fēnei e te fafine ko Sharon Vernon, ko te pule ʼo te Fale ʼo te ʼu faitoʼo pea mo te fai tafa ʼaē ʼe mole fakaʼaogaʼi ai te toto, ʼo te Lopitali ʼo St. Vincent ʼi Cleveland: “ ʼE mātou ʼiloʼi ko te ʼu foʼi huki toto ʼe tautau maʼu ai te ʼu mahaki, tāfito la te mahaki ʼate.” Neʼe toe hoko atu tana palalau ʼo ina ʼui fēnei: “Tatau aipe peʼe mole feala ke fakatupu mahaki te toto, kae ʼe feala ke ina maumauʼi te faʼahiga meʼa ʼaē ʼe ina puipui te sino mai te faʼahiga mahaki.” Logope la kua siʼisiʼi te maʼu ʼo te SITA ʼuhi ko te sivi lelei ʼo te toto, kae ʼe kei ʼi ai te ʼu mahaki ʼe feala ke mole hā ʼi te taʼi sivi ʼaia ʼo te toto. Pea logope la te teuteu lahi ʼaē ʼe tonu ke fai ki te taʼi faʼahiga faitoʼo ʼaia, kae ko te fai tafa ʼaē ʼe mole fakaʼaogaʼi ai te toto, ʼe mole totogi kovi ki te ʼu lopitali, koteʼuhi ʼe ina pulihi te fihifihia ʼaē ʼe feala ke hoko mokā foaki he toto kovi ki te kau mahaki.

Ki te kau Fakamoʼoni ʼa Sehova, ʼe lahi age te tupuʼaga ʼo tanatou fakafisi ki te toto: ʼe tapuʼi te fakaʼaogaʼi ʼo te toto e te lao ʼa te ʼAtua. (Gāue 15:29) Kae, ʼe nātou loto ke nātou maʼu he faitoʼo ʼe lelei age. Koia, ʼe nātou gāue tahi mo te ʼu tōketā ʼaē ʼe nātou fai te ʼu kumi ʼo ʼuhiga mo te faitoʼo ʼaē ʼe mole fakaʼaogaʼi ai te toto. Ko te faitoʼo ʼaia ʼe mole ʼaoga ʼāteaina pe ki te kau Fakamoʼoni ʼa Sehova, kae ʼe toe ʼaoga pe foki ki te tokolahi ʼo te hahaʼi ʼaē ʼe nātou ʼiloʼi te ʼu tuʼutāmaki ʼo te ʼu foʼi huki toto.

[Nota ʼi te lalo pasina]

[Haʼuʼaga ʼo te paki pasina 32]

WHO photo by P. Almasy