“Tou Vikiviki Fakafiafia Ki Te ʼAtua”—Ko Te Fakatahi Faka Tisitilike ʼa Te Kau Fakamoʼoni ʼa Sehova
Ko te ʼu ʼaho fakaofoofo e tolu ʼo te ako ʼo te Tohi-Tapu ʼe fakatuʼutuʼu ke koutou kau kiai. Pea ʼe mahino ia ʼe fai anai he fakatahi ʼe ōvi mai ki te koga meʼa ʼaē ʼe koutou nonofo ai. ʼE tonu ke tou kau kiai ʼi te kamata ʼo te polokalama ʼaki te musika ʼi te hola 10 toe 20 ʼi te Feliaono.
ʼE tuʼu anai ʼi te polokalama ʼo te Feliaono uhu te ʼu fakamālo kia nātou ʼaē neʼe lava mai ki te fakatahi, pea mo te akonaki maʼuhiga ʼo te fakatahi ʼaē ʼe fēnei tona kupu tāfito, “Ko Te ʼu Hahaʼi ʼi Te Malamanei Katoa Kua Fakatuʼutuʼu Ke Nātou Vikiviki Fakafiafia Ki Te ʼAtua.” ʼE fai tāfito anai te polokalama ʼo te hili hoʼatā ki te kau tūpulaga, ki te ʼu mātuʼa, pea mo te akoʼi ʼo te fānau. ʼE mahino ia ʼe fia fagono anai te kau tūpulaga ki te akonaki ʼaenī “Kua Feala Koa Ke ʼAu ʼOhoana?” ʼE tonu anai ke fakalogo lelei te ʼu mātuʼa ki te akonaki ʼaenī “Ko Te ʼu Mātuʼa ʼe Nātou Fakafiafia ʼi Tanatou ʼu Fānau.” ʼE fakaʼosi anai te polokalama ʼo te hili hoʼatā ʼaki te akonaki ʼaenī “Ko Te Ako—ʼE ʼAoga Moʼo Fakavikiviki Kia Sehova.” Ko te ʼu akonaki ʼaē ka fai ʼe tokoni anai ki te kau tūpulaga ke fua lelei tanatou ako.
ʼE kau anai ki te polokalama ʼo te Moeaki uhu te papitema, pea ʼe faka fealagia anai kia nātou ʼaē kua feala ki te faʼahi ʼaia ke nātou papitema. ʼI te hili hoʼatā ʼe fai anai te akonaki fakahagatonu ʼo ʼuhiga mo te faʼahiga fakaʼaogaʼi e Satana talu mai muʼa te ʼu felāveʼi fakasino moʼo fakahēhē ʼo te hahaʼi. ʼE toe fai anai mo te akonaki mālohi ʼe fēnei tona kupu tāfito “Tou Tekeʼi Te ʼu Hele ʼa Te Tevolo.” ʼE fakaʼosi anai te polokalama ʼo te ʼaho ʼaia ʼaki te akonaki maʼuhiga ʼaenī “He Koʼe Koa ʼe ʼAoga Ki Te Malamanei Te ʼAtamai Mālama ʼo Te ʼAtua.”
ʼI te ʼAhotapu uhu, ʼe fai anai te ʼu akonaki ʼaki te kupu tāfito ʼaenī “Tou Vikiviki Fakafiafia Ki Te ʼAtua ʼi Te Lolotoga ʼo Te Tuʼu Fakaʼosi ʼo Te ʼu Faʼahiga Meʼa ʼAenī” pea ʼe talanoa tāfito anai ki te ʼu meʼa fakamataku ʼaē ka hoko anai kia tatou. ʼE ina fakahā anai te maʼuhiga ʼaē ke tou kumi te faʼahi ʼaē ʼe tonu ke tou hola kiai ʼi muʼa ʼo te kamata ʼo te “toe mamahi lahi” ʼaē neʼe talanoa kiai ia Sesu, ohage ko tona tuʼu ʼaē ia Mateo 24:21.
ʼE fakaʼosi anai te polokalama ʼo te ʼAhotapu uhu ʼaki te gaoʼi maʼuhiga ʼe fēnei tona kupu tāfito “Tou Fakaʼapaʼapa Kia Nātou ʼAē ʼe Tau Mo Te faʼahi ʼAia ʼi Tonatou ʼu Temi Matutuʼa.” Pea, ʼi te hili hoʼatā ʼe fai anai te akonaki ki te hahaʼi fuli ʼe fēnei tona kupu tāfito “Tou Fakavikiviki Ki Te Hau ʼo Te Heʼegata!” ʼE ko he temi maʼuhiga anai ʼaia ʼo te fakatahi.
Koutou fai he ʼu fakatuʼutuʼu ʼi te temi nei ke koutou kau kiai. Koutou fakalavelave ki te kau Fakamoʼoni ʼa Sehova ʼaē ʼo tokotou koga meʼa, peʼe koutou faitohi ki te kau fai faka mafola ʼo te nusipepa ʼaenī, ke koutou ʼiloʼi te koga meʼa ʼaē ʼe fai ai te fakatahi ʼe ōvi atu kio koutou.