Koutou Kau Ki Te Fakatahi Faka Tisitilike “Ko Te Manavasiʼi Faka Lotu”
Neʼe kua koutou fai koa he ʼu puleʼaki ke koutou kau ki te Fakatahi Faka Tisitilike 1994 ʼa te kau Fakamoʼoni ʼa Sehova ʼe fēnei tona kupu tāfito “Ko te Manavasiʼi Faka Lotu?” ʼE mahino papau ia, ʼe fua manuʼia anai kia koutou takotou kau ki te ʼu ʼaho ʼaia e tolu! ʼI te ʼAtu ʼu Fenua ʼo Amelika ko te ʼu fakatahi e 165 kua ʼosi fakatuʼutuʼu, pea ʼe mahino ia ʼe fai anai he fakatahi ʼi he koga meʼa ʼe feōvi mo tokotou nofoʼaga.
Ko ʼihi tuʼania ʼe feala ke ina pulihi he lototoʼa pea mo maumauʼi he falala; kae ʼi te Feliaono uhu ko te akonaki tāfito ʼe talanoa anai ki te ʼuhiga ʼo te manavasiʼi faka lotu ʼo toe feiā aipe mo tona ʼu tuʼuga tapuakina. ʼIo, ko te polokalama katoa ʼo te fakatahi ʼe ina faka maʼuhigaʼi anai te ʼu tapuakina ʼaia.
ʼI te Feliaono hili hoʼatā ʼe koutou fagono anai peʼe feafeaʼi te haga ʼa te manavasiʼi faka lotu ʼo fakaloto mālohiʼi te nofo ʼohoana pea mo te maʼuli faka famili, ʼo toe feiā aipe peʼe feafeaʼi hana tokoni ki te kau tūpulaga ke nātou taupau maʼu tanatou agatonu ki te ʼAtua. Ko te akonaki ʼaē ʼi te hili hoʼatā ʼe ina fakaʼosi anai ʼaki te akonaki fakaloto māfana ko tona kupu tāfito e fēnei “Ko Te Fakafimālie Ki Te ʼu Famili ʼAē e Putu.” ʼE koutou loto fakafetaʼi anai ki te fakamatala maʼuhiga ʼaē ka fai lolotoga ʼo te akonaki ʼaia moʼo tokoni kia nātou ʼaē ʼe ʼi ai tonatou ʼu hahaʼi neʼe nātou ʼofa mamahi ki ai kae kua mamate.
ʼE fakahā anai e te polokalama ʼo te Moeaki peʼe feafeaʼi te haga ʼa te manavasiʼi faka lotu ʼo fakamālohiʼi tatatou agatonu ki te takitaki ʼa Sehova ʼo ʼuhiga mo te kokelekasio pea mo tatatou minisitelio. ʼI te akonaki ʼaenī “Lau Te Folafola ʼa Te ʼAtua, Te Tohi-Tapu, ʼi Te ʼAho Fuli Pe,” ko te hahaʼi ʼo te fakatahi ʼe nātou fagono anai ki te ʼu tokoni ʼe ʼaoga ki te lau pea mo te ako ʼaē ʼo te Tohi-Tapu. Ko te polokalama ʼo te Moeaki ʼe fakaʼosi anai ʼaki te akonaki ʼe fakatupu fia logo pea ko tona kupu tāfito e fēnei “Ko Te ʼAho Fakamataku ʼo Sehova Kua Ōvi Mai.”
Lolotoga ʼo te polokalama ʼo te ʼAhotapu ʼe ʼi ai te akonaki ʼe fēnei tona kupu tāfito “ ʼE ʼi Ai Anai Te Toe Fakatuʼuake ʼo Te Kau Faitotonu.” Ko te akonaki ka hoa mai kiai ʼe fēnei tona kupu, “Hāofaki lolotoga ʼo te Toe Mamahi Lahi,” ʼe ina foaki mai anai he fakamahino ʼo ʼuhiga mo te fakapapau taulekaleka ʼa Sesu ʼo ʼuhiga mo nātou ʼaē mole mamate anai ʼi he ʼaho.—Soane 11:26.
Ko te polokalama ʼo te ʼAhotapu uhu ʼe fakaʼosi anai ʼaki te gaoʼi ʼe ina uga anai te fakakaukau ia minuta e 40 ʼe fēnei tona kupu Ko Te ʼu Fealagia ʼe Tau Mo Koutou. ʼE toe fakamanatuʼi age anai ki te hahaʼi ʼo te fakatahi te temi ʼo Sosue pea mo nātou sio anai ki te fakahāhā lelei ʼo tana lotomālohi ʼaē ke kaugana kia Sehova. ʼE toe talanoa anai ki te ʼahiʼahi mālohi ʼaē neʼe hoko ʼi te temi ʼo Eliseo, pea ko te ʼu ako ʼaē ʼe maʼu mai te ʼu ʼaluʼaga ʼaia e lua neʼe hoko, ʼe tokoni anai ki te hahaʼi ʼo te fakatahi ke nātou fakahā he manavasiʼi faka lotu ia ʼaho nei. ʼI te hili hoʼatā, ko te akonaki ki te kaugamālie ʼe fēnei tona kupu tāfito, “He Koʼe Koa ʼe Tonu Ke Tou Manavasiʼi Ki Te ʼAtua Moʼoni ʼi Te Temi Nei.”
Koutou fai he ʼu fakatuʼutuʼu ke koutou kau kiai. Moʼo maʼu te faʼahi ʼaē ʼe ōvi mai ki tokotou ʼapi, koutou faka felogoi ki te Fale ʼo te Puleʼaga ʼa te kau Fakamoʼoni ʼa Sehova ʼo tokotou nofoʼaga peʼe koutou faitohi ki te hahaʼi ʼaē neʼe nātou tā te nusipepa ʼaenī. Ko te nusipepa Réveillez-vous! ʼo te ʼaho 8 ʼo Sūnio, ʼe koutou maʼu ai anai te ʼu tuʼasila ʼo te ʼu faiʼaga ʼo te ʼu fakatahi.
[Haʼuʼaga ʼo te paki pasina 32]
T. Rosenthal/SUPERSTOCK