ʼE Mole Feala Anai Ke Koutou Tō Ai!

KE KOUTOU tō ʼi teā? ʼI te Fakatahi Faka Tisitilike ʼa te kau Fakamoʼoni ʼa Sehova ʼaenī kua fakaōvi mai, ko tona kupu tāfito “Te Kau ʼAve Logo ʼo Te Tokalelei Fakaʼatua”! ʼI ʼihi potu, ʼe kamata anai te fakatahi ʼi te Feliaono uhu ʼi te hola hiva vaelua, ʼaki te polokalama musika. Hili te fakalogo ki te ʼu fakafehuʼi fakaloto mālohi lolotoga te akonaki ʼaē “Koutou Fagono Ki Te ʼu Kaugā Fai Faka Mafola Faiva ʼo Te Tokalelei,” ʼe koutou fiafia anai ʼi te akonaki fakaloto mālohi ʼaē “Koteā ʼAē ʼe Fakamaʼua Mai e Te ʼAtua Kia Tatou?”

Ko te meʼa maʼuhiga ʼaē ka hoko anai ʼi te Feliaono hili hoʼatā, ko te akonaki tāfito fakaloto mālohi ʼaē ko tona kupu “Ko Totatou Tuʼulaga ʼi Totatou ʼUhiga Kau ʼAve Logo ʼo Te Tokalelei Fakaʼatua.” Pea ko te faʼahi ʼaē “Tou Tokoni Ki Te Hahaʼi Ke Nātou Ako Te ʼu Meʼa ʼAē ʼe Fakamaʼua Mai e Te ʼAtua” ʼe ina foaki mai anai he ʼu tokoni ʼo ʼuhiga mo te akoʼi ʼo te hahaʼi foʼofoʼou. ʼE hoa anai kiai te akonaki ʼe koga tolu ʼe tō lelei ʼi te temi nei, ko tona kupu tāfito ʼaē “Koutou Tokakaga Ki Te ʼu Hele Fakafūfū ʼo Te ʼu Temi Fakafiafia.” ʼE fakaʼosi anai te polokalama ʼo te Feliaono ʼaki te akonaki ʼaenī “Koutou Fakafeagai Ki Te Tevolo​—ʼAua Naʼa Koutou Tali He Fakataupiepie,” pea mo te akonaki ʼaenī “Tou Lagolago Agatonu Ki Te Moʼoni ʼo Te Folafola ʼa Te ʼAtua.”

ʼE fakahā lelei anai e te polokalama ʼo te Moeaki uhu te maʼuhiga ʼo te gāue ʼaē ko te fai ʼo ni ʼu tisipulo ʼi te akonaki e koga tolu, ʼaē ko tana kupu tāfito “Te Kau ʼAve Logo ʼAē ʼe Nātou ʼAve Te Logo Lelei ʼo Te Tokalelei.” ʼE fakaʼosi anai te polokalama ʼo te uhu ʼaki te ʼu akonaki ʼaenī “Koutou Foaki ʼAki He Loto Fiafia ʼi Te Kautahi ʼa Sehova” pea mo “Te Maʼuli Pea Mo Te Tokalelei ʼi Te Foaki ʼo Totatou Maʼuli Pea Mo Papitema,” pea mo te fealagia anai ʼo te kau tisipulo foʼofoʼou ke nātou papitema.

Ko te akonaki ʼo te Moeaki hili hoʼatā ʼaē ko tona kupu tāfito “Koutou Tokagaʼi Te ʼu Manatu ʼa Sehova” ʼe ina tali anai ki te ʼu fehuʼi, ohage ‘ ʼE kau koa te kau Kilisitiano ki te gāue fakavaevae ia ʼaho nei?’ pea ‘Koteā te manatu ʼa te Tohi-Tapu ʼo ʼuhiga mo te fakatūʼa ki te mate?’ ʼE koutou toe leleiʼia anai mo te akonaki koga lua ʼaē ko tona kupu tāfito “Ko Te ʼAtua ʼo Te Tokalelei ʼe Tokaga Kia Koutou” pea tāfito te akonaki fakaʼosi ʼaē ko tona kupu tāfito “Koutou Maʼuliʼi Te Tokalelei Fakaʼatua ʼi Te Maʼuli Faka Famili.”

ʼE kau anai ki te polokalama ʼo te ʼAhotapu uhu te akonaki koga tolu ʼaē ko tona kupu tāfito “Koutou ʼIloʼi Te Kau ʼAve Logo Moʼoni” pea mo te akonaki ʼaē “Koutou Fagono Pea Mo Fakalogo Ki Te Folafola ʼa Te ʼAtua.” ʼE fakaʼosi anai te polokalama ʼo te uhu ʼaki te faigaoʼi ʼe ina tuku mai anai te ʼu ako maʼuhiga ʼe tou maʼu mai te fakamatala faka Tohi-Tapu ʼo te hisitolia ʼo te Tuʼi Fakamāu ko Seteone.

Ko te polokalama fakaʼosi ʼo te fakatahi ʼi te ʼAhotapu hili hoʼatā, ʼe fai anai te akonaki ki te kaugamālie, ko tona kupu tāfito “Te Tokalelei Moʼoni!​—ʼE Haʼu Koa Maifea?” Moʼo fakaʼosi, ko te akonaki fakaloto mālohi ʼaē ko tona kupu tāfito “Koutou Haʼele Ki Muʼa Ohage Ko He Kau ʼAve Logo ʼo Te Tokalelei” ʼe ina fakaʼosi anai te fakatahi.

Koutou fai he ʼu fakatuʼutuʼu ʼi te temi nei ke koutou kau kiai. Ke koutou maʼu te fakatahi ʼaē ʼe ōvi atu kio koutou, koutou fehuʼi ki te kau Fakamoʼoni ʼa Sehova ʼaē ʼo tokotou koga meʼa, peʼe koutou faitohi ki te kau faʼu tohi ʼo te nusipepa ʼaenī. Peʼe koutou vakaʼi Te Tule Leʼo ʼo te ʼaho 15 ʼo Fepualio 1996 ʼe tuʼu ai te lisi ʼo te ʼu tuʼasila ʼo te ʼu fakatahi ʼo te Potu Toga ʼo te Pasifika.