Te Fakatahi ʼo Te Kau ʼAve Logo ʼo Te Tokalelei Fakaʼatua
“NEʼE fakaloto mālohiʼi mātou e te ʼu fakatahi faka tisitilike fuli ʼaē neʼe mātou kau kiai,” ko te ʼui ʼaia ʼa te tagata ʼāfea ʼi Amelika. “Kae, neʼe makehe te taʼu ʼaenī. ʼI te ʼaho fuli neʼe mātou fia ʼiloʼi peʼe feafeaʼi anai te polokalama ʼo te ʼaho ake, pea neʼe mātou fiafia ʼi te ʼu polokalama ʼaia!”
Kapau neʼe koutou kau ki te Fakatahi Faka Tisitilike “Te Kau ʼAve Logo ʼo Te Tokalelei Fakaʼatua,” ʼe mahino papau ia neʼe koutou fiafia ohage ko te tēhina ʼaia. ʼI te ʼaho fuli ʼo te fakatahi ʼaia, neʼe fakatokagaʼi ai te ʼu faʼahiga puani kehekehe ʼo ʼuhiga mo te maʼua ʼo te kau Fakamoʼoni ʼa Sehova ʼaē ko te kau ʼave logo ʼa te ʼAtua. Tou toe vakaʼi te polokalama ʼo te ʼu ʼaho ʼaia e tolu.
“ ʼE Matalelei . . . Ia Ia ʼAē ʼe Ina Fakahā Te Tokalelei”
Neʼe ko te kupu tāfito ʼaia ʼo te ʼuluaki ʼaho ʼo te fakatahi. Neʼe fakatafito kia Isaia 52:7. ʼI te ʼu temi faigataʼa ʼaenī, tokolahi ʼe nātou tauhi kia Sehova ʼi te ʼu ʼaluʼaga faigataʼa. Ko te akonaki “Koutou Fagono Ki Te ʼu Kaugā Fai Faka Mafola Faiva ʼo Te Tokalelei,” neʼe kau kiai mo te ʼu fakafehuʼi ʼo ʼihi tēhina mo tuagaʼane. Neʼe fakaloto mālohi tatatou fagono ki tanatou ʼu palalau, pea ko nātou ʼaē neʼe kau ki te fakatahi ʼaia neʼe nātou fakamoʼoni ai ʼe toe feala foki ke fakamālohiʼi nātou e Sehova, ʼo ina foaki age kia nātou “te mālohi ʼaē ʼe laka age ʼi te mālohi māhani” ke tokoni kia nātou ke nātou faʼa kātaki.—2 Kolonito 4:7.
Ko te ʼu fakatotonu ʼa Sehova ʼe mole faka mafasia. (1 Soane 5:3) Neʼe fakahā lelei te faʼahi ʼaia ʼi te akonaki fakaʼosi ʼo te polokalama ʼo te uhu, ʼo fakahā ai mo te kaupepa ʼe pasina 32 ko tona kupu tāfito Koteā ʼAē ʼe Fakamaʼua Mai e Te ʼAtua Kia Tatou? Ko te kaupepa foʼou ʼaia moʼo ako ʼo te Tohi-Tapu, ʼe matalelei tona ʼu paki, pea ʼe mahino papau ia ʼe ko he tokoni maʼuhiga anai moʼo akoʼi ʼo te tokolahi ke nātou ako te ʼu fakatuʼutuʼu ʼa te ʼAtua. Ko te ʼu fakamatala ʼo ʼuhiga mo te fakaʼaogaʼi ʼo te kaupepa foʼou ʼaia, ʼe tou maʼu ʼi te alatike fakaʼosi ʼo te nusipepa ʼaenī ʼi te pasina 16 mo te 17.
Ko te akonaki “Tou Faʼa Kātaki ʼi Te Gāue ʼAē ʼe Lelei” neʼe fakahā tāfito ai ʼe ʼiloʼi lelei e Sehova totatou ʼu fihifihia. Ko te faʼa kātaki, ko tona faka ʼuhiga ke tou haga fai, pea ke ʼaua naʼa puli tatatou ʼamanaki. Neʼe foaki mai e Sehova tana Folafola, tona laumālie, pea mo tana kautahi ke tokoni kia tatou. ʼE tonu ke tou faʼa kātaki ʼo fai faka mafola, pea ko te fai faka mafola ʼe tokoni kia tatou ke tou faʼa kātaki, heʼe ina fakaloto mālohiʼi tatou ke tou taupau tatatou tui. ʼI tatatou kua fakaōvi ki te fakaʼosi, ʼe mole tonu ke tou tuku totatou ʼu fihifihia ke fakavaivai ai tatatou mālohi ʼi te fai faka mafola, heʼe ko nātou ʼaē ka faʼa kātaki anai ʼo aʼu ki te fakaʼosi ʼe nātou hāo anai.—Mateo 24:13.
Ko te akonaki tāfito, “Ko Totatou Tuʼulaga ʼi Totatou ʼUhiga Kau ʼAve Logo ʼo Te Tokalelei Fakaʼatua,” neʼe ina fakatokagaʼi te faka ʼāteaina ʼo te kau Sutea mai Papiloni, pea mo te toe fakatuʼu ʼo te tauhi maʼa ʼi Selusalemi ʼi te taʼu 537 ʼi muʼa ʼo totatou temi. Neʼe fakamahino e te tēhina ʼaē neʼe ina fai te akonaki, ko te meʼa ʼaia neʼe hoko, neʼe ko he fakahā fakatomuʼa pe ia ʼo te meʼa ʼaē ka ʼamanaki fakahoko e te Puleʼaga ʼo te ʼAtua ʼi te malamanei katoa. (Pesalemo 72:7; Isaia 9:7) Ko tatatou gāue ʼi te temi ʼaenī ʼe ko te faka mafola ʼo te logo lelei ʼo te Puleʼaga ʼaia, pea mo tou faka ʼalutahi totatou maʼuli mo te logo ʼaia. Ko tatatou ʼofa ki te ʼAtua pea mo te kāiga, ʼe tonu ke ina uga tatou ke hoko atu tatatou gāue.—Gāue 5:42.
Ko te koga maʼuhiga ʼo te polokalama ʼo te Feliaono, neʼe ko te akonaki ʼe koga lua ʼaē neʼe fakatafito ki te kupu tāfito ʼaenī “Koutou Tokakaga Ki Te ʼu Hele Fakafūfū ʼo Te ʼu Temi Fakafiafia.” Ko te ʼu musika ʼo te temi ʼaenī, te ʼu ʼata, te ʼu fime viteo, te ʼu polokalama ʼo te televisio, te ʼu gaoʼi viteo, te ʼu tohi, te ʼu nusipepa, pea mo te ʼu ʼata fakakata ʼe hā tuʼumaʼu ai te ʼu manatu fakatemonio. Koia, ʼe tonu ai ke tou “fehiʼa ki te meʼa ʼaē ʼe kovi” kae ke tou “pipiki ki te meʼa ʼaē ʼe lelei.” (Loma 12:9) ʼIo, ʼe tonu ke tou faka ʼuhiga te ʼu fakafiafia heʼemaʼa ohage ko he meʼa fakalialia pea mo tou fakamamaʼo mai ai, ʼo tou fai te ʼu meʼa ʼaē ʼe maʼa, mo lelei, pea mo tau mo ʼaoga ke tou fai. (Filipe 4:8) Ko te ʼu tohi, te ʼu nusipepa, te ʼu kaupepa ʼaē neʼe fai e te kautahi ʼa Sehova, ʼe nātou uga totatou ʼatamai ke tou maʼu he ʼu manatu ʼe fakatupu mālohi, pea mo nātou akoʼi mai ke tou fakakeheʼi te ʼu meʼa ʼaē ʼe lelei mo te ʼu meʼa ʼaē ʼe kovi. (Hepeleo 5:14) ʼE tonu ke tou pipiki ki te ʼu fakatuʼutuʼu ʼaia ʼi tatatou fakalaka ʼi te mālama maveuveu ʼaenī.
Koʼeni te kupu tāfito ʼo te akonaki ʼaē neʼe hoa kiai “Koutou Fakafeagai Ki Te Tevolo—ʼAua Naʼa Koutou Tali He Fakataupiepie.” Ia muʼa ʼo tanatou hū ki te Kele ʼo te Fakapapau, neʼe tō te toko lauʼi afe Iselaelite ki te hele ʼo te aga heʼeʼaoga. Neʼe mole tali e Fineasi ke fai he meʼa ʼe fakafeagai ki te tauhi moʼoni. Neʼe ina matehi te ʼu hahaʼi māmio kovi, pea neʼe leleiʼia ia ia e Sehova ʼuhi ko tana pipiki ʼāteaina ʼaē kia te ia. (Faka au 25:1-13) Ko te fakatuʼutuʼu ʼa Satana, ko te fakatō ʼo tatou ke mole tou hū ki te mālama foʼou ʼa te ʼAtua. Koia la ʼaē, ohage ko Fineasi, ʼe tonu ke tou fakafeagai ki te ʼu faiga ʼa te Tevolo ke tou liliu ʼo heʼemaʼa. Tatau aipe peʼe kua tou ʼohoana peʼe tou selipatea, ʼe tonu ke tou “fakamamaʼo mai te folonikasio.”—1 Kolonito 6:18.
“Tou Lagolago Agatonu Ki Te Moʼoni ʼo Te Folafola ʼa Te ʼAtua,” neʼe ko te akonaki fakaʼosi ʼaia ʼo te ʼuluaki ʼaho ʼo te fakatahi. Tokolahi te kau fai fakaliliu Tohi-Tapu ʼe nātou fetogi peʼe nātou molehi he ʼu koga ʼo te Tohi-Tapu. Ohage la, moʼo fakafimālieʼi te ʼui ʼaē ʼa te hahaʼi fafine ʼe tatau te tuʼulaga ʼo te fafine mo te tagata, ko te kau fakaliliu ʼo te tohi The New Testament and Psalms: An Inclusive Version ʼe nātou talanoa ki te ʼAtua, ʼo mole nātou ʼui ʼe ko te Tāmai, kae ʼe nātou ʼui ʼe ko te Tāmai mo Faʼe pea ko Sesu ko “he Tagata” kae mole ko te “Foha ʼo te tagata.” ʼE kehekehe ia mo te Traduction du monde nouveau ʼaē ʼe pipiki tāfito ki te lea ʼaē neʼe ʼuluaki tohi ʼaki te Tohi-Tapu, koteʼuhi ʼe ina fakamahino lelei mai te ʼu vaega ʼo te Tohi-Tapu. Ohage la, neʼe ʼui fēnei e te tēhina ʼaē ʼe ina fai te akonaki: “Neʼe totonu te fakaliliu ʼo te Traduction du monde nouveau ʼaē neʼe ina foaki te tafitoʼaga ʼo te toe fakatuʼutuʼu ʼo te ʼu kokelekasio, ʼo fakanofo te ʼu kolesi ʼo te ʼu tagata ʼāfea, ʼo mulimuli lelei ki te faʼifaʼitaki ʼaē neʼe tuku e te kokelekasio faka Kilisitiano ʼo te ʼuluaki sēkulō.” ʼE tou fakahā tatatou agatonu ki te Folafola ʼa te ʼAtua, ʼaki tatatou lau ʼi te ʼaho fuli pea mo tatatou maʼuliʼi tana ʼu tokoni. Neʼe toe ʼui e te tēhina ʼaē neʼe ina fai te akonaki: “ ʼE tou fakahā ʼe tou agatonu ʼo lagolago ki te Folafola ʼa te ʼAtua, ʼo tou faiga mālohi ke tou faka mafola te Tohi-Tapu ki te hahaʼi, pea mo tou fakaʼaogaʼi fakalelei mokā tou akoʼi te hahaʼi, ʼo mole tou faiga ke tou fakahā tatatou ʼu manatu, ʼo tou fakamahino hala peʼe tou hilifaki kiai he tahi ʼu manatu.”
‘Ko Te Tokalelei ʼa Te ʼAtua ʼe Māʼoluga Age Ia ʼi Te ʼu Manatu Fuli’
Ko te kupu tāfito ʼaia ʼo te lua ʼaho ʼo te fakatahi, ʼo fakatafito kia Filipe 4:7. Neʼe lahi te ʼu akonaki ʼaē neʼe fai ʼi te ʼaho ʼaia, neʼe pipiki ki te manatu ʼaē ʼe tonu ke tou maʼu ʼo ʼuhiga mo te minisitelio, mo totatou famili, mo te foaki ʼo totatou maʼuli ki te ʼAtua, pea mo te tahi ʼu faʼahiga meʼa ʼo te maʼuli ʼo te ʼaho fuli.
ʼI te ʼosi ʼo te fai palalau ki te koga tohi ʼo te ʼaho, neʼe fai te ʼu akonaki ʼe koga tolu ʼe fakatafito ki te kupu tāfito ʼaenī “Te Kau ʼAve Logo ʼAē ʼe Nātou ʼAve Te Logo Lelei ʼo Te Tokalelei.” Ko tatatou logo ʼe ko he logo ʼo te tokalelei, pea ʼe tonu ke tou fakahā te logo ʼaia ʼaki te tokalelei. (Efesi 6:15) ʼE tou fakatuʼutuʼu ke tou fakaaʼu te logo ʼo te tokalelei ki te loto ʼo te hahaʼi, kae mole tou faiga ke tuʼu tatatou manatu. Ko te ako pea mo te ʼu tohi ʼaē ʼe tou maʼu mai te kautahi ʼa Sehova ʼe tokoni kia tatou ke tou fai te meʼa ʼaia. ʼE mole tonu ke tou lotovaivai mo kapau ʼe mole fia logo te hahaʼi ki te logo ʼaia. Kae ʼe tonu ke tou haga ‘faiga mālohi,’ ʼo fai hatatou ako ʼi te ʼaho fuli, mo tou kau ki te ʼu fono, pea mo tou kau ki te gāue fai faka mafola. (2 Timoteo 2:15) Ke ʼaua naʼa galo kia tatou te fai ʼo te meʼa ʼaē ʼe lelei ki te hahaʼi, tāfito kia nātou ʼaē ko totatou ʼu kāiga ʼi te tui. (Kalate 6:10) Kae, ko te ʼui ʼaē ke tou faiga mālohi, ʼe mole faka ʼuhiga leva ke tou gāue ke tou gaʼegaʼe. ʼE leleiʼia e Sehova te ʼu meʼa ʼaē ʼe feala ke tou fai takitokotahi, ʼo mulimuli ki totatou ʼu fealagia pea mo totatou ʼu ʼaluʼaga.
Ko te hahaʼi ʼa te ʼAtua ʼe nātou foaki tonatou temi, tonatou mālohi, pea mo tanatou falā moʼo fakahaʼele ki muʼa te ʼu meʼa ʼo te Puleʼaga. Ko te akonaki “Koutou Foaki ʼAki He Loto Fiafia ʼi Te Kautahi ʼa Sehova,” neʼe ina fakahā ai kapau ʼe fakaʼāsili hahaʼi ia nātou ʼaē ʼe hage ko ni ʼu ōvi, ʼo tali te logo ʼo te Puleʼaga, pea ʼe tonu anai ke lahi te ʼu tohi ʼaē ʼe tā, ke fai he tahi ʼu fale fono, pea mo he tahi ʼu filiale. Ko te falā ʼaē ʼe tou foaki, ʼe ina faka fealagia ki tatatou kautahi ke ina fakaʼaogaʼi ki te ʼu gāue ʼaē ʼe pipiki ki te faka mafola ʼaē ʼe fai ʼi te malamanei katoa. Tahi ʼaē meʼa, ko te foaki fakaʼofa ʼo te falā ʼe fakavikiviki ai ia Sehova pea ʼe fiafia ai ia ia ʼaē ʼe ina foaki te meʼa ʼofa ʼaia. Koia, ʼi totatou ʼuhiga Kilisitiano, ʼe mole tonu anai ke tou meʼa noaʼi te koga maʼuhiga ʼaia ʼo tatatou tauhi.—2 Kolonito 8:1-7.
Neʼe fakaʼosi te fakatahi ʼo te uhu ʼaki te akonaki ʼo te papitema—pea tuʼumaʼu ʼe ko he koga maʼuhiga ʼo te ʼu fakatahi ʼa te kau Fakamoʼoni ʼa Sehova. ʼE ko he meʼa fakafiafia tatatou sio ki he ʼu hahaʼi foʼou ʼe nātou foaki tonatou maʼuli ki te ʼAtua, ʼo nātou mulimuli ki te ʼu tafuga vaʼe ʼo Sesu ʼi tanatou papitema ʼi te vai! (Mateo 3:13-17) Ko nātou fuli ʼaē neʼe nātou fai te faʼahi ʼaia neʼe akoʼi nātou ʼaki te matapuna ʼo te poto lahi—ia te Tohi-Tapu. Pea tahi ʼaē meʼa, kua nātou maʼu te fakatuʼutuʼu moʼoni ʼo te maʼuli, pea ʼe tapuakina nātou ʼaki te tokalelei ʼaē kua nātou maʼu ʼi tanatou ʼiloʼi ʼaē ʼe nātou fai te meʼa ʼaē ʼe totonu.—Tagata Tānaki 12:13.
Neʼe fakahā te tokoni mālohi ʼi te akonaki “Ke Hāofaki Koutou e Te Fakasiosio Tonu.” Ko te fakasiosio tonu ʼe maʼuhiga ʼaupito ʼi te ʼu felogoi ʼo ʼuhiga mo he gāue. ʼE mole tonu ke tou palalau ki te ʼu gāue fakamālama ʼi te Fale ʼo te Puleʼaga, pea ʼe mole tonu ke tou kākāʼi ʼotatou ʼu kaumeʼa Kilisitiano ke tou maʼu ai he falā. (Vakaʼi ia Soane 2:15, 16.) Ko te fakasiosio tonu ʼe toe ʼaoga foki mokā tou fakatuʼutuʼu ke tou fai he gāue, peʼe tou toʼo maʼua peʼe tou foaki he falā. Neʼe ʼui e te tēhina ʼaē neʼe ina fai te akonaki: “Ko te mole hoko ʼo he gāue neʼe fakatuʼutuʼu e he ʼu Kilisitiano, neʼe tupu ʼaki ai tanatou lotomamahi pea mo tanatou vaivai ʼi te faʼahi fakalaumālie, he neʼe nātou fai te ʼu fakatuʼutuʼu gāue neʼe feala ke nātou tuʼutāmaki ai ʼo ʼuhiga mo te falā.” Logope la ʼe mole kovi te fai e he ʼu Kilisitiano he ʼu fakatuʼutuʼu mo he tahi Kilisitiano ʼo ʼuhiga mo he gāue, kae ʼe mahino ia ʼe tonu anai ke nātou tokakaga ʼo fai he fakatuʼutuʼu fakapotopoto. Pea kapau ko he toko lua ʼe nā fai he fakatuʼutuʼu ʼo fakaʼaogaʼi ai he falā, pea ʼe tonu anai ke nā tohi fakalelei te faʼahi ʼaia ki he pepa.
Ko te fakatuʼutuʼu ʼa te ʼAtua ʼo ʼuhiga mo nātou tagata pea mo nātou fafine neʼe talanoa kiai ʼi te akonaki “Neʼe Ina Fakatupu Te Tagata Pea Mo Te Fafine.” Ko te tuʼulaga ʼo te tagata pea mo te fafine neʼe fakafihiʼi lolotoga te hisitolia. Neʼe ʼui e te tēhina ʼaē neʼe ina fai te akonaki: “Ko te tokolahi ʼe nātou manatu hala, ʼi tanatou ʼui ʼaē ko te tagata ʼe tonu ke pule mālohi, mo aga fefeka, pea mo fiatuʼu. ʼI te tahi ʼu agaʼi fenua, ʼe tahitahiga pea ʼe ko he meʼa fakaufiufi te tagi ʼa he tagata ia muʼa ʼo te kaugamālie peʼe ʼi tona loto fale. Kae ia Soane 11:35 ʼe fakamatala ai ko ‘Sesu neʼe tagi’ ʼi muʼa ʼo te hahaʼi ʼaē neʼe fakapupu ʼi te muʼa faitoka ʼo Lasalo.” Kae e feafeaʼi ia te ʼu hahaʼi fafine? Ko te fafine ʼe fakatatau tuʼumaʼu ki te matalelei ʼo te sino. Kae neʼe fai e te tēhina ʼaē neʼe ina fai te akonaki te fehuʼi ʼaenī: “Kapau ʼe finemui he fafine kae ʼe vale pea mo loto fakafifihi, mo fai fakahuahua kovi, peʼe fiatuʼu, ʼe feala koa ke ʼui ʼe finemui ʼi te faka ʼuhiga totonu ʼo te kupu ʼaia, ke ʼui papau ʼe ko he fafine?” (Vakaʼi ia Tāʼaga Lea 11:22; 31:26.) ʼI tanatou faʼahiga palalau, ʼi tanatou aga, pea mo tanatou faʼahiga gaohi ʼo tonatou ʼulu, ko te ʼu tagata pea mo te ʼu fafine Kilisitiano ʼe nātou faiga ke nātou mulimuli ki te ʼu lekula ʼo te Tohi-Tapu. Neʼe ʼui e te tēhina ʼaē neʼe ina fai te akonaki: “Ko he tagata ʼe ina fakahā te ʼu fua ʼo te laumālie ʼe faigafua te fakaʼapaʼapa ki ai, pea ko te fafine ʼaē ʼe ina fai te faʼahi ʼaia ʼe faigafua te ʼofa ki ai.”—Kalate 5:22, 23.
Neʼe hoa kiai te ʼu akonaki ʼe koga lua ʼaē neʼe fakatafito ki te kupu tāfito ʼaenī “Ko Te ʼAtua ʼo Te Tokalelei ʼe Tokaga Kia Koutou.” Tokolahi te kau Kilisitiano ʼe nātou tuʼania ʼi te faʼahi ʼo te paʼaga. Kae ʼe fakapapau fēnei mai e Sehova: “ ʼE mole ʼau mavae anai ia koe kailoa ʼe mole ʼau līaki anai koe.” (Hepeleo 13:5) Logope la te ʼu faigataʼaʼia faka ekonomike, ʼe fakahā e ʼihi tanatou falala ki te fakapapau ʼaia, ʼo nātou pionie vaeluaʼi temi peʼe nātou pionie katoa. Ko ʼihi ʼaē ʼe mole feala tanatou pionie ʼi te temi ʼaenī, ʼe nātou fakamuʼamuʼa te ʼu meʼa ʼo te Puleʼaga, ʼo nātou fakaʼaogaʼi te ʼu faigamālie fuli moʼo fai faka mafola ki te hahaʼi. (Mateo 6:33) ʼE feala ke tou vikiʼi te ʼu faiga fuli ʼaia! ʼE foaki mai e te kautahi ʼa Sehova te ʼu tohi ke tokoni kia tatou ʼi totatou minisitelio, pea mo tauʼi ʼotatou ʼu fihifihia. Kapau ʼe tou loto fakafetaʼi ki te ʼu fakatuʼutuʼu fakalaumālie ʼaia ʼa Sehova, pea ʼe ina tapuakina anai tatou ʼo ina foaki mai te tokalelei ʼi te ʼu temi faigataʼa ʼaenī ʼi te faʼahi ʼo te paʼaga.—Pesalemo 29:11.
ʼI te akonaki fakaʼosi, “Koutou Maʼuliʼi Te Tokalelei Fakaʼatua ʼi Te Maʼuli Faka Famili,” neʼe fiafia ia nātou ʼi te fakatahi ʼi te fakahā ʼo te tohi foʼou, Le secret du bonheur familial. Neʼe fai e te tēhina te fakaloto mālohi ʼaenī: “Koutou ako fakalelei te tohi ʼaenī, ʼo fai ʼi te ako takitokotahi peʼe ʼi te ako faka famili. Koutou faiga fakamalotoloto ke koutou maʼuliʼi te ʼu tokoni ʼaē ʼe fakatafito ki te Tohi-Tapu, pea ʼe mahino ia ʼe koutou fakatuputupu ai anai te tokalelei pea mo te fiafia ʼo tokotou famili.”
‘Tou Taupau Te Logo Tahi ʼi Te Noʼo Mālohi ʼo Te Tokalelei’
Neʼe ko te kupu tāfito ʼaia ʼaē neʼe tau mo feʼauga mo te ʼaho fakaʼosi ʼo te fakatahi, ʼo fakatafito kia Efesi 4:3. Ko te kau Fakamoʼoni ʼa Sehova, ʼaē ʼe ʼōmai mai te ʼu puleʼaga fuli ʼo te malamanei, ʼe akoʼi nātou e te ʼAtua. Koia, ʼe nātou manako ai ki te tokalelei. ʼE nātou mulimuli ki te faʼifaʼitaki ʼa Sesu, pea ʼe nātou faiga ke nātou “taupau te logo tahi ʼo te ʼatamai ʼi te noʼo mālohi ʼo te tokalelei.”
Ko te tokalelei ʼaia ʼe maʼu ʼi te kautahi ʼa te ʼAtua, neʼe faka maʼuhigaʼi ʼi te akonaki ʼe koga tolu ʼaē neʼe fakatafito ki te kupu tāfito ʼaenī “Koutou ʼIloʼi Te Kau ʼAve Logo Moʼoni.” Neʼe ʼi ai te ʼu polofeta loi ʼi te Iselaele ʼāfea. Kae ko te kau ʼave logo moʼoni ʼa te ʼAtua—ohage ko te ʼu polofeta ko Isaia, mo Esekiele, pea mo Selemia—neʼe nātou fakakikite te tō ʼo Selusalemi, te nonofo popūla, mo te faka ʼāteaina ki muli age ʼo te hahaʼi ʼa te ʼAtua, pea neʼe hoko te ʼu meʼa ʼaia. Ko te meʼa ʼaia ʼe toe hoko pe ʼi te temi nei. ʼE tapuke te kau ʼave logo loi ʼi te ʼu meʼa faka politike pea mo te lotu hala. Kae, neʼe akoʼi e Sehova tana kau Fakamoʼoni ke nātou kalagaʼi tana fakatuʼutuʼu ʼo ʼuhiga mo te tuʼu ʼo te ʼu faʼahiga meʼa ʼaenī. Tāfito talu mai te taʼu 1919, neʼe fakaʼaogaʼi e Sehova tana kau kaugana ke nātou kalagaʼi te logo ʼa te ʼAtua. ʼE nātou kehekehe mo te kau ʼave logo loi ʼo te Keletiate! ʼOfa pe ke tou fai fakalelei totatou maʼua ʼi te gāue ʼaia, ʼo aʼu ki te temi ʼaē ka ʼui ai e Sehova ʼe kua ʼosi te gāue.
Ko te akonaki “Koutou Fagono Pea Mo Fakalogo Ki Te Folafola ʼa Te ʼAtua,” neʼe fakahā ai ko te Tohi-Tapu ʼe ko te matapuna lahi ʼo te ʼu tokoni, mo te fīmālie, pea mo te ʼamanaki. (Isaia 30:20, 21; Loma 15:4) ʼE lahi te ʼu meʼa ʼe fakagafua e te mālama ia ʼaho nei ke fai e te hahaʼi. ʼI te temi ʼaenī, ʼe tonu ke tou fakalogo ki te ʼu tokoni ʼaē ʼe haʼu mai te Folafola ʼa te ʼAtua pea mo tana kautahi. ʼE ʼiloʼi e Sehova totatou ʼu vaivaiʼaga, pea ʼe ina fakahā lelei mai ʼi tana Folafola te ʼu meʼa ʼaē ʼe lelei anai kia tatou. ʼE tou falala ʼo haga haʼele ki muʼa, ʼi tatatou ʼiloʼi ʼaē ʼe tokoni ia Sehova kia tatou, tatau aipe pe koteā te meʼa ʼaē ʼe ina kole mai kia tatou.
Ko te akonaki ʼaia neʼe ina teuteuʼi ai te hahaʼi ʼo te fakatahi ki te gaoʼi ʼaē neʼe hoa kiai. Neʼe ko tona kupu tāfito ʼaenī “He Koʼe ʼe Tonu Ke Tou Fakaʼapaʼapa Ki Te ʼu Fakatuʼutuʼu Faka Teokalatike?” Neʼe fakatafito te gaoʼi ki te hisitolia ʼa Seteone ʼaē ʼe tuʼu ʼi te Tohi-Tapu, pea ko te gaoʼi ʼaia neʼe ina faka maʼuhigaʼi te puani ʼaenī—ʼe tonu ke tou mulimuli ki te ʼu tokoni ʼa te ʼAtua, pea ke ʼaua naʼa tou fetogi ʼaki tatatou ʼu manatu fakatagata, peʼe tou faiga ke tou tuku keheʼi te ʼu tokoni faka teokalatike.
Ko te akonaki ki te kaugamālie neʼe ko tona kupu tāfito ʼaenī “Te Tokalelei Moʼoni!—ʼE Haʼu Koa Maifea?” Ko te tokalelei ʼaē ʼe fakapapau mai e te ʼAtua ʼe fakalaka ia ʼi te ʼu meʼa ʼaē ʼe feala ke manatu kiai te mālama ʼaenī. Neʼe ʼui e te tēhina ʼaē neʼe ina fai te akonaki “Ko te tokalelei moʼoni, ko tona faka ʼuhiga ko te tokalelei ʼi te ʼaho fuli. Ko te tokalelei ʼa te ʼAtua ko tona faka ʼuhiga, ko he mālama ʼe mole maʼu ai anai te mahaki, te ʼu mamahi, pea mo te mate.” ʼE ʼui mai e te Tohi-Tapu kia tatou ko Sehova ʼe “ina fakagata [anai] te ʼu tau ʼo aʼu ki te potu taupotu ʼo te kele.” (Pesalemo 46:9) ʼE feafeaʼi anai tana fai te faʼahi ʼaia? ʼE ina pulihi anai ia ia ʼaē ʼe ina uga te hahaʼi ke nātou fetauʼaki, ia Satana te Tevolo. (Fakahā 20:1-3) Ko te faʼahi ʼaia ʼe ina faka fealagia anai ki te hahaʼi agavaivai ke nātou ‘maʼu te kele, pea ʼe nātou fiafia anai ʼi te mahu ʼo te tokalelei.’—Pesalemo 37:11.
Neʼe hoa kiai te fakamatala fakanounou ʼo te alatike ʼo Te Tule Leʼo ʼo te vāhaʼa, ʼosi ʼaia pea fai te akonaki fakaʼosi ʼo te fakatahi. Neʼe fēnei te kupu tāfito ʼo te akonaki “Koutou Haʼele Ki Muʼa Ohage Ko He Kau ʼAve Logo ʼo Te Tokalelei Fakaʼatua,” pea neʼe fakahā e te akonaki ʼaia, ko tatatou gāue fai faka mafola ʼe makehe pea mo maʼuhiga. ʼE mole ko he temi ʼaenī ke tou mālōlō ai, ke tou fakaʼaoʼaoganoa, peʼe ke tou toe liliu ki te ʼu manatu hala. ʼE tou maʼu te ʼu meʼa ʼaē ʼe ʼaoga kia tatou—te logo ʼa te ʼAtua, tona laumālie maʼoniʼoni, pea mo te ʼu fakatuʼutuʼu ʼaē ʼe haʼu mai tana kautahi faka teokalatike. ʼI totatou ʼuhiga kaugana ʼa Sehova, ʼofa pe ke tou haʼele ki muʼa ʼi totatou ʼuhiga kau ʼave logo ʼo te tokalelei fakaʼatua!
[Talanoa ʼo te pasina 9]
Ko He Fakatuʼutuʼu Manavaʼofa Maʼa Te ʼu Famili
Ko nātou ʼaē neʼe kau ki te lua ʼaho ʼo te Fakatahi Faka Tisitilike “Te Kau ʼAve Logo ʼo Te Tokalelei Fakaʼatua,” neʼe nātou fiafia ʼi tanatou maʼu te tohi foʼou Le secret du bonheur familial. Ko te tohi ʼaia ʼe maʼu ai te ʼu puani faka Tohi-Tapu ʼe ʼaoga anai ki te ʼu famili fuli ʼaē ʼe ʼoʼofa ki te ʼAtua.
ʼE ʼui fēnei e te tagata ʼāfea mai Connecticut, ʼi Amelika: “ ʼI te ʼaho 15 ʼo Sūnio, neʼe mātou maʼu te tohi Bonheur familial. ʼI te ʼaho 16 ʼo Sūnio, neʼe kua vaelua te tohi ʼaia ʼi taku lau. ʼI te ʼaho 17, neʼe kamata ai tamatou ako faka famili ki te tohi ʼaia, pea neʼe ko he meʼa fakaloto mālohi ʼaia kia mātou! ʼI te ʼaho pe ʼaia, neʼe ʼau lau katoa ai te tohi. ʼE mahino papau ia, ko te tohi lelei ʼaia ʼe lahi anai tona ʼaoga kia nātou fuli ʼaē ʼe nātou maʼu. Ko te fakahagatonu ʼo te tohi ʼaia pea mo tana ʼu tokoni ʼaē ʼe ʼaoga ki totatou temi, ʼe ko he tahi fakamoʼoni ʼaia, ko ‘te tagata kaugana agatonu mo poto’ ʼe ina foaki mai te ‘meʼa kai ʼi tona temi totonu’ pea ʼe ina ʼiloʼi te ʼu meʼa ʼe ʼaoga kia tatou ʼi te ʼu temi faigataʼa ʼaenī.”—Mateo 24:45-47.
[Paki ʼo te pasina 7]
ʼE fia ʼiloʼi e te kau tūpulaga mo te hahaʼi matutuʼa te meʼa ʼaē ʼe fakamaʼua mai e te ʼAtua