Ko Ai Koa Te Kau ʼAve Logo Moʼoni ʼo Te Tokalelei?
ʼI TE ʼaho 31 ʼo Maio 1996, neʼe fakahā e te lātio pea mo te ʼu sulunale, te meʼa ʼaē neʼe hage ko he logo ʼo ʼuhiga mo te tokalelei. ʼI te ʼaho ki muʼa atu, neʼe fakahā ai ko Benjamin Netanyahu, ʼaē neʼe tonu ke liliu ko te ʼuluaki minisi ʼo Iselaele, neʼe “ina fai he ʼu fakatuʼutuʼu moʼo fakahoko ʼo te tokalelei, ko te tokalelei mo te fīmālie ʼi te fenua ʼo Iselaele pea mo te ʼu fenua ʼi tona ʼu tafaʼaki, ʼo kau ai mo Palesitina.”
Neʼe feʼekeʼaki e te hahaʼi pe ko te vote ʼaē ke ʼuluaki minisi ia Netanyahu, ʼe ko he faka fealagia anai koa ʼaia ke hoko moʼoni te tokalelei ʼi te Potu Hahake. Kapau koia ʼaia, ʼe feala anai koa ke mulimuli he tahi ʼu fenua ki te faʼahi ʼaia, ʼo nātou galoʼi te ʼu meʼa ʼaē ʼe mole nātou felogoi ai?
ʼE mahino papau ia, ʼe faigafua te fakapapau ʼo te tokalelei, kae ʼe mole ko he meʼa faigafua tona fakahoko. Neʼe mole tui te tokolahi ʼe hoko anai te faʼahi ʼaia. Ohage ko te meʼa ʼaē neʼe ʼui e te tagata fai sulunale ko Hemi Shalev, ko te “vaelua ʼo te hahaʼi ʼo Iselaele ʼi te temi nei ʼe nātou tui kua ʼamanaki hoko te tokalelei, kae ko ʼihi ʼe nātou faka tui ʼe nofo ia Iselaele ʼi he ʼaluʼaga fakamataku.” Moʼo fakanounou, neʼe ina ʼui fēnei: “Ko ʼihi ʼe fiafia; kae ko ʼihi ʼe fetāgihi.”
Koia ko te meʼa ʼaia ʼe hoko ʼi te faiga ʼa te tagata ke ina fakatuʼu te tokalelei. Ko te mālo ʼa he tagata takitaki pea mo te hahaʼi ʼaē neʼe lagolago kia ia, ko tona faka ʼuhiga ko te tō ʼo te kūtuga ʼaē ʼe fakafeagai. Ko te mole fiafia ʼe iku ai ki te lotovaivai, pea ko te lotovaivai, ʼe iku ai ki te talagataʼa. Tatau aipe pe ko te Potu Hahake, pe ko Amelika Latina, pe ko te Potu Hahake ʼo te Eulopa, pe ko he tahi age faʼahi—ko te ʼu faiga ʼa te hahaʼi moʼo fakatuʼu ʼo te tokalelei ʼe hage ia ʼe ko he moemisi.
Ko Te Tokalelei Moʼoni Kua Ōvi Mai!
Lolotoga te temi ʼaē neʼe talanoa tāfito ai te Potu Hahake ki te tokalelei ʼaia, neʼe fakahā te tahi logo ʼo ʼuhiga mo te tokalelei. Ko te logo ʼaia neʼe mole ko he akonaki faka politike; peʼe ko he fuakava ʼo te ʼu puleʼaga ʼo ʼuhiga mo te tokalelei. Kae neʼe fakahā e te logo ʼaia ko te tokalelei ʼe fakahoko anai e te Puleʼaga ʼo te ʼAtua. Neʼe fakahā koa te logo ʼaia ʼifea? ʼI te ʼu Fakatahi Faka Tisitilike e 1 900 ʼo “Te Kau ʼAve Logo ʼo Te Tokalelei Fakaʼatua,” ʼaē neʼe fai e te kau Fakamoʼoni ʼa Sehova ʼi te malamanei katoa ʼi te taʼu 1996 mo te taʼu 1997.
ʼI te ʼu fakatahi ʼaia neʼe hā lelei ai ʼe mole feala anai ki he puleʼaga fakatagata ke ina fakatuʼu te tokalelei pea mo te fīmālie moʼoni. Koteā koa tona tupuʼaga? Koteʼuhi ko te faʼahi ʼaia ʼe fakamaʼua kiai ke pulihi te ʼu meʼa ʼaē ʼe hoko ʼi te ʼaho fuli, ʼo faigataʼa ai te fakatuʼu ʼo te tokalelei. Ko te tokalelei moʼoni ko tona faka ʼuhiga ko tatatou ʼaʼala ake ʼi te uhu fuli, ʼo mole tou tuʼania naʼa hoko he tau peʼe ko he agamālohi. Ko tona faka ʼuhiga ʼe mole toe ʼi ai anai he fakapō, ʼe mole toe kalavi anai te ʼu matapā, ʼe mole toe mataku anai he tahi ʼi te haʼele ʼi te ʼu ala, ʼe mole toe mavetevete anai te ʼu famili. Ko te puleʼaga fea koa ʼaē ʼi te kele ʼe feala ke ina fakahoko te ʼu meʼa fuli ʼaia? ʼI tona fakahagatonu, ko te puleʼaga fea ʼi te kele ʼaē ʼe feala anai ke ina fai te fakapapau ʼaia?
Kae, ko te Puleʼaga ʼo te ʼAtua ʼe feala anai tana fakahoko te ʼu meʼa ʼaia. ʼE fakapapau fēnei mai e te Tohi-Tapu: “Koʼeni! Ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai mo nātou, pea ʼe nātou liliu anai ko hana hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.” (Fakahā 21:3, 4) ʼE ko he meʼa fakafimālie anai ki te hahaʼi ʼaē ʼe tau mo te ʼu mamahi!
Ko te fakapapau ʼa Sehova ʼAtua ʼe hoko moʼoni anai. ʼE fakamoʼoni fēnei mai e te Tohi-Tapu kia tatou: “Ko te ʼAtua ʼe mole ko he tagata ke loi, peʼe ko he foha ʼo te tagata ke ina logoʼi te fakahemala. Neʼe ina ʼui koa la te meʼa ʼaia, pea ʼe mole ina fakahoko anai ia? Pea neʼe palalau koa ia pea ʼe mole ina fakahoko [te meʼa ʼaē neʼe palalau kiai]?” (Faka au 23:19) ʼIo, ko te meʼa ʼaē neʼe fakapapau e te ʼAtua ʼe hoko moʼoni anai—ʼo ina foaki anai te ʼu tapuakina kia nātou fuli ʼaē ʼe kau kia te ia.
Ko Te Kau ʼAve Logo ʼo Te Tokalelei ʼa Te ʼAtua
Kua ʼiloʼi lelei te kau Fakamoʼoni ʼa Sehova e te hahaʼi, ʼuhi ko tanatou faka mafola mālohi te Puleʼaga ʼo te ʼAtua. ʼI te taʼu fuli, ʼe nātou fakaʼaogaʼi te ʼu hola ʼe lauʼi miliale ʼi tanatou fakahā te logo fakaloto mālohi ʼa te Tohi-Tapu ki te hahaʼi. ʼE ko he fakahoko ʼaia ʼo te ʼu palalau ʼaenī ʼa Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14) ʼE moʼoni ko te logo ʼaē ʼe fakahā e te kau Fakamoʼoni ʼa Sehova ʼe ko he “logo lelei,” heʼe ina kalagaʼi ko te Puleʼaga ʼo te ʼAtua ʼaē ʼe ʼi selo ʼe ko te falalaʼaga pe ʼaia e tahi ʼa te malamanei. Pea ʼe ko he ʼamanaki mālohi ki te temi ka haʼu!
Koia ʼi te temi nei ko te Puleʼaga ʼo te ʼAtua ʼe ina fakatupu te hahaʼi ʼe faifaitahi moʼoni pea mo feʼofaʼofani. Neʼe ʼui fēnei e Sesu: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe koutou femaʼuʼaki te ʼofa.” (Soane 13:35) ʼE faiga te kau Fakamoʼoni ʼa Sehova ke nātou mulimuli ki te ʼu meʼa ʼaē ʼe fakamaʼuaʼi ki te Lotu Faka Kilisitiano moʼoni. ʼAki te meʼa ʼaia, ʼe tupu ai te logo tahi fakatautehina ʼo te kau Sutea pea mo te kau Alape, te kau Croates pea mo te kau Serbes, te kau Hutu pea mo te kau Tutsi. Ko te tokalelei ʼaia ʼaē ʼe moemisi kiai te tokolahi ʼo te hahaʼi ʼi te temi nei, kua maʼu ia e te lauʼi miliona Fakamoʼoni ʼa Sehova ʼi te malamanei katoa.
Neʼe fakaloto mālohiʼi tatou e te polokalama ʼo te Fakatahi Faka Tisitilike ʼo “Te Kau ʼAve Logo ʼo Te Tokalelei Fakaʼatua” ke tou maʼuliʼi te ʼu pelesepeto faka Tohi-Tapu pea mo tou haga faka mafola te logo lelei ʼo te Puleʼaga ʼo te ʼAtua. ʼE mātou fakaafe atu koutou ke koutou lau te tānaki ʼaē ʼe hoa mai, ʼo te ʼu ʼaho e tolu ʼo te fakatahi ʼaē neʼe kau kiai te lauʼi miliona hahaʼi.