1996 “Te Kau ʼAve Logo ʼo Te Tokalelei Fakaʼatua” Ko Te Fakatahi Faka Tisitilike

ʼI TE temi muʼa neʼe fai e te hahaʼi ʼa Sehova te ʼu lafeti lalahi e tolu ʼi te taʼu fuli. ʼO toe feiā aipe, ʼi totatou temi ko te hahaʼi ʼaē ʼe fakahigoaʼi ʼaki te huafa ʼo Sehova ʼe nātou fakatahi tuʼa tolu ʼi te taʼu ki te ʼu lakaga fakafiafia. ʼE nātou fakatahitahi ʼi te fakatahi makehe ʼaē ʼe ʼaho tahi, ʼi te fakatahi faka silikosikilipisio ʼaē e ʼaho lua, pea mo te fakatahi faka tisitilike ʼaē e ʼaho tolu peʼe fā. ʼI te taʼu ʼaenī, ko te kupu tāfito ʼo te fakatahi faka tisitilike ʼe ko “Te Kau ʼAve Logo ʼo Te Tokalelei Fakaʼatua.”

ʼE tau mo feʼauga te kupu tāfito ʼaia! Ko totatou ʼAtua, ko Sehova, ʼe ko “te ʼAtua ʼo te tokalelei,” ʼio, ko “te ʼAtua ʼaē ʼe ina foaki te tokalelei.” Ko totatou Takitaki, ko Sesu Kilisito, ʼe ko te “ ʼAliki ʼo Te Tokalelei,” pea ko te logo ʼaē ʼe faka mafola e te ʼu kaugana ʼa Sehova ʼe ko te logo ʼo te tokalelei fakaʼatua. (Filipe 4:9; Loma 15:33; Isaia 9:6; Naomi 1:​15) Ko te polokalama ʼo te fakatahi ʼe lelei ʼaupito, pea ʼe tokoni anai ki te hahaʼi fuli ke fakatuputupu tanatou mahino ki te maʼuhiga ʼo te tokalelei fakaʼatua.

ʼI te taʼu ʼaenī, ʼi te ʼAtu Fenua ʼo Amelika tokotahi, ʼe fai ai anai te ʼu fakatahi e 198. ʼE mahino ia, ʼe hoko anai he fakatahi ʼi tokotou fenua. He koʼe ʼe mole koutou fehuʼi ki te kau Fakamoʼoni ʼa Sehova ʼo tokotou telituale pe ko ʼafea pea ko te potu fea ʼaē ka fai ai te fakatahi ʼaia, pea mo koutou fakatuʼutuʼu ke koutou kau kiai? Ko nātou fuli ʼaē ʼe nātou ʼofa ki te tokalelei moʼoni mo heʼegata ʼe fai anai kia nātou he fakatalitali lelei.