ʼE Fakaafe Koutou Ki Te Fakatahi Faka Tisitilike “Manavasiʼi Faka Lotu”!
ʼIO, KUA ōvi mai te temi ʼaē ʼe fai ai te ʼu fakatahi faka tisitilike ʼa te kau Fakamoʼoni ʼa Sehova ʼo te taʼu 1994. ʼO kamata ʼi Sūnio ʼo te taʼu 1994 ʼo aʼu ki Sanualio ʼo te taʼu 1995, ko te fakatahi ʼaho tolu ʼe fai anai ʼi te ʼu kolo ʼe lauʼi teau ʼi te malamanei—ʼuluaki ʼi te Potu Tokelau ʼo Amelika, ʼosi ʼaia pea fai ʼi te Potu Hahake pea mo te Potu Hihifo ʼo te Eulopa, ʼi Asia, ʼi te lotolotoiga ʼo Amelika pea mo te Potu Toga ʼo Amelika, ʼi Afelika, ʼi Ositalalia, pea mo te ʼatu motu ʼo te tai.
Ko he kupu tāfito ʼe fakatupu fakakaukau—“Manavasiʼi Faka Lotu”! ʼE mole ko he mataku fakalikalika naʼa hoko he tuʼutāmaki ʼi te maʼuli kae ko te manavasiʼi ki te ʼAtua, ko he manavasiʼi ʼe ina foaki mai te tokalelei ʼi te fakakaukau pea mo te fiafia. ʼE ʼui fēnei e te tāʼaga lea ʼo te Tohi-Tapu: “Ko te ikuʼaga ʼo te agavaivai pea mo te manavasiʼi kia Sehova ko te ʼu koloā pea mo te kolōlia pea mo te maʼuli.” (Tāʼaga Lea 22:4) ʼI te manavasiʼi ki te ʼAtua e feafeaʼi te maʼu ai ʼo “te ʼu koloā pea mo te kolōlia pea mo te maʼuli”? ʼE ʼasi anai te faʼahi ʼaia ʼi te fakamatala ʼo te kupu tāfito ʼo te fakatahi lolotoga te ʼu ʼaho ʼaia e tolu ʼaki te ʼu akonaki, te ʼu fai palalau, te ʼu faʼifaʼitaki, pea mo he ʼu gaoʼi.
Neʼe tohi e te ʼapositolo ko Paulo ke ʼaua naʼa tou ‘lituʼa ki te fakatahiʼi ʼo tatou totonu, ohage ko te agamāhani ʼa ʼihi.’ (Hepeleo 10:25) ʼE ʼiloʼi papau e te kau Fakamoʼoni ʼa Sehova ʼe maʼuhiga ʼaupito te fakatahitahi, ʼi te ʼu fono ʼo tuʼa tolu ʼi te vāhaʼa ʼi te ako tohi pea mo te fono ʼi te kokelekasio. Kae, ko te fakatahi faka tisitilike ʼi te taʼu ʼe makehe ia. ʼE talitali fakafiafia te kau Fakamoʼoni ʼa Sehova ki te fakatahi ʼaia pea mo te ʼu akonaki ʼo ʼuhiga mo te faʼahi ʼaia ʼe fai ʼi he ʼu māhina ki ʼamuli. ʼE mātou fiafia ʼo fakaafe atu koutou, tatau aipe peʼe koutou lotu, ke koutou fakatahi mo nātou ʼi tanatou fakatahi pea mo koutou fakafiafia ʼi te fakatahi mo te kau Kilisitiano pea mo te manatu fakalaumālie maʼuhiga. ʼE fiafia anai he tahi ʼi te kokelekasio ʼo te kau Fakamoʼoni ʼa Sehova ʼo fakahā atu te koga meʼa pea mo te temi ʼaē ʼe fai ai anai te fakatahi ʼaē ʼe ōvi atu ki tokotou ʼapi.