Koutou ’Ōmai Ki Te Fakatahi Faka Tisitilike “Te Tui Ki Te Folafola ʼa Te ʼAtua”!
KO TE toko lauʼi miliona hahaʼi ʼe nātou kau anai kiai ʼi te ʼu lauʼi teau potu kehekehe ʼo te malamanei katoa. ʼI Amelika pe, kua fakatuʼutuʼu ke fai ai te ʼu fakatahi e 193. ʼE fai anai te ʼuluaki fakatahi ʼi te ʼaho 23 ki te 25 ʼo Maio, pea ʼe fai anai te fakatahi fakamuli ʼi te ʼaho 12 ki te 14 ʼo Sepetepeli. ʼE lagi hoko anai te fakatahi ʼaia ʼe ʼaho tolu—mai te Feliaono ki te ʼAhotapu—ʼi he kolo ʼe ōvi atu kiō koutou.
ʼE koutou maʼu anai he ʼu fua lelei ʼaki te ʼu tuʼuga akonaki faka Tohi-Tapu. ʼI te ʼu potu kehekehe ʼaē ka fai ai te ʼu fakatahi ʼaia, ʼe kamata anai ʼi te uhu fuli ʼaki te polokalama musika ʼi te hola hiva vaelua. ʼI te Feliaono uhu, ʼe fai anai ia minuta e 25 te ʼu fakafehuʼi ʼo te hahaʼi ʼaē neʼe malave ʼaupito ki tonatou maʼuli tanatou tui ki te Folafola ʼa te ʼAtua. ʼE fakaʼosi anai ʼaki te akonaki tāfito ʼaenī, “Tou Haʼele ʼAki Te Tui, Ka Mole ʼAki Te Sio.”
Ko te ʼuluaki akonaki ʼi te Feliaono hili hoʼatā, ʼe ina faka maʼuhigaʼi anai te tuʼulaga maʼuhiga ʼo te kau tūpulaga ʼi te kokelekasio faka Kilisitiano. Pea ki muli age, ʼe talanoa anai te akonaki e koga tolu ki te ʼu pelesepeto faka Tohi-Tapu ʼo ʼuhiga mo te aga faka Kilisitiano ʼi tatatou ʼu palalau, ʼi te ʼu aga ʼaē ʼe tou fai, pea mo tatatou faʼahiga teuteu. Pea ʼe hoa anai kiai te ʼu akonaki ʼaenī “Koutou Tokakaga Ki Te Vaivai ʼo Te Tui” pea “ ʼE Maʼuli Te Folafola ʼa Te ʼAtua,” ʼaē ʼe nā talanoa anai ki te fakatokaga lelei ʼaē ʼe tuʼu ia Hepeleo kapite 3 mo te 4. ʼE ʼosi anai te polokalama ʼo te Feliaono ʼaki te akonaki ʼaenī “Ko He Tohi Maʼa Te Hahaʼi Fuli.”
Koʼeni te kupu tāfito ʼo te ʼuluaki akonaki ʼo te Moeaki uhu, “Te Tui Kapau ʼe Mole Hana ʼu Gāue Pea ʼe Mate Ia.” “Koutou Pipiki Maʼu Pea Mo Tuʼu Mālohi ʼi Te Moʼoni,” ʼe ko te tahi akonaki maʼuhiga ʼe fai anai ʼi te uhu ʼaia, pea ʼe ina fakamahino anai peʼe lava feafeaʼi ke tou tuputupu ʼi te faʼahi fakalaumālie. ʼE fakaʼosi anai te uhu ʼaia ʼaki te akonaki ʼe fai māhani ʼi te ʼu fakatahi, ko tona kupu tāfito ʼaenī “Te Tui Ki Te Folafola ʼa Te ʼAtua ʼe Ina Taki Ki Te Papitema,” pea ʼe feala anai ke papitemaʼi te tahi ʼu tisipulo foʼou.
Ko te ʼuluaki akonaki ʼo te Moeaki hili hoʼatā, ʼaē ko tona kupu tāfito “Koutou Tau Mālohi Maʼa Te Tui,” ʼe ina fakamahino mai anai te tokoni ʼo te tohi ʼa Suta. Ko te akonaki ʼaenī “Tou ʼOlo Ki Te Fale ʼo Sehova,” ʼe ina fakahā mai anai lolotoga he hola katoa te ʼu fua lelei ʼo tatatou kau ki te ʼu fono faka Kilisitiano. ʼE fakaʼosi anai te polokalama ʼo te ʼaho ʼaia ʼaki te akonaki ʼaenī “Te Mālohi ʼo Takotou Tui—ʼE ʼAhiʼahiʼi ʼi Te Temi Nei.”
ʼE kau anai ki te polokalama ʼo te ʼAhotapu uhu, te akonaki e koga tolu ʼo ʼuhiga mo te tohi ʼa Soele pea mo tona faka ʼuhiga ki te temi nei. Pea ʼe hoa kiai te kiʼi faigaoʼi faka Tohi-Tapu ʼaē ko tona kupu tāfito “Ke Lelei Tokotou Mata.” Ko he potu maʼuhiga ʼo te fakatahi ʼe ko te akonaki ki te kaugamālie ʼaē ka fai ʼi te hili hoʼatā, ʼaē ko tona kupu tāfito ʼaenī “Te Tui Pea Mo Tokotou Ka Haʼu.”
ʼE mātou ʼiloʼi papau, ʼe koutou maʼu anai te ʼu fua lelei ʼi te faʼahi fakalaumālie, mo kapau ʼe koutou kau anai kiai. ʼE tali lelei anai koutou ʼi te ʼu ʼaho fuli ʼaia ʼo te fakatahi. Koutou fakatuʼutuʼu ʼi te temi nei ke koutou kau kiai. Kapau ʼe koutou fia ʼiloʼi pe kofea te fakatahi ʼaē ka fai ʼo ōvi atu kiō koutou, koutou fehuʼi ki te kau Fakamoʼoni ʼa Sehova ʼo tokotou kolo peʼe koutou faitohi kia nātou ʼaē ʼe nātou tā te nusipepa ʼaenī. ʼE toe feala foki ke koutou maʼu te ʼu tuʼasila ʼo te ʼu potu kehekehe ʼaē ka fai ai te ʼu fakatahi ʼi te Réveillez-vous! ʼo te ʼaho 8 ʼo Sūnio.