ʼE Lelei Hakotou Kau Ai
ʼE FOAKI atu anai ia ʼaho e fā he ʼu ako fakalaumālie ʼi te fakatahi faka tisitilike te “Akonaki fakaʼatua”, ʼaē ʼe fai hoholo anai ʼi te temi vela ʼi te ʼu kolo ʼi te malamanei katoa. ʼI te ʼAtu Fenua ʼo Amelika ʼāteaina pe, ko fakatahi feiā e 150 tupu ʼe fai anai ʼi te ʼu māhina ʼo sūnio, mo sūlio pea mo ʼaukusito. Ko tona fai māhani, ko te polokalama ʼe kamata anai ʼi te felianima ʼi te hola tahi ʼosi ʼuafulu ʼo te hili hoʼatā pea ʼe fakaʼosi anai ʼi te ʼahotapu ʼi te hola fā ʼosi kuata ʼo te hili hoʼatā. Ko te meʼa ʼe lelei ke fakatokagaʼi ko te ʼu fakamatala ʼe fai anai e te kau misionea, ʼaē neʼe nātou maʼu tokoni ke nātou liliu ki tonatou fenua ki te lakaga fakafiafia ʼaia.
Tatau aipe pe koutou matutuʼa peʼe tūpulaga — tagata ʼohoana, fafine ʼohoana, tāmai, faʼe, tūpulaga, peʼe tamasiʼi — ʼe tuku atu anai he akonaki ʼe fakahāhā lelei pea ʼe fai ʼi he ʼaluʼaga mālie ke koutou maʼu ai he ʼu lelei. Ohage la, tokolahi ʼi te temi nei ʼe nātou feʼekeʼaki pe koteā te ʼuhiga ʼo te maʼuli? ʼI te feliaono uhu, ʼe koutou fakafiafia anai ʼi te logo ki te fakamahinohino lelei ʼo ʼuhiga mo te fehuʼi ʼaia pea mo koutou fiafia ʼi te meʼa ʼaē ʼe koutou maʼu anai moʼo tokoni ki niʼihi ke nātou mahino ki te potu ʼaia.
ʼI te feliaono hili hoʼatā, ko te polokalama ʼe ina fakahā anai te maʼuhiga ʼo te ʼu koga ʼaenī “Tou fakaliliu te ʼohoana ko he fakatahi tologa”, “Koutou gāue kinakina ki te fakamaʼuli o tokotou loto fale”, pea mo te akonaki “ ʼU mātuʼa — ʼE ʼaoga ki ʼakotou ʼu tamaliki he tokaga makehe”. ʼOsi pe ʼaia ʼo te akonaki ʼaia, ko he tokaga makehe ʼe faka ʼuhiga tāfito anai ki te ʼu faigataʼaʼia ʼe felāveʼi mo te kau tūpulaga pea ʼe feafeaʼi hanatou fakaʼaluʼalu te ʼu faigataʼaʼia. ʼE fakaloto mālohiʼi anai nātou e te gaoʼi fakatā ʼo te temi nei ʼaē ko ʼona kupu tāfito ko Te kau tūpulaga ʼe nātou manatuʼi tonatou Tupuʼaga ʼi te temi nei.
ʼI te moeaki ko te polokalama ʼe ina fakamahinohino lelei anai te lea faka polofeta ʼa Sesu ʼo ʼuhiga mo te ʼu ʼaho fakamuli pea tāfito aipe ia tana ʼu palalau ʼaē: “Hili pe ʼaē ʼo te mamahi ʼo te ʼu ʼaho ʼaia, ko te laʼā ʼe fakapōʼuli anai.” (Mateo 24:29). ʼE koutou fia logo anai ki te fakamatala ʼo ʼuhiga mo te temi ʼaē ka hoko ai te mamahi lahi. ʼI te polokalama ʼo te moeaki, ʼe ʼi ai anai mo te fakamatala ʼo te kau Fakamoʼoni ʼa Sehova ʼo te temi nei pea ʼe fakahā anai mo te meʼa ʼaē neʼe nātou fai.
ʼI te ʼahotapu, ko te tahi gaoʼi fakatā ʼaē ʼe fēnei tona kupu tāfito ʼAua naʼa fakahalaʼi koutou peʼe ʼaua naʼa koutou kākāʼi te ʼAtua, ʼe ina fakahā anai te faigataʼaʼia ʼo te agatonu ʼo te kilisitiano takitokotahi ʼuhi ko te ʼu fime viteo ʼiloa pea mo te musika. Ko te akonaki ki te hahaʼi ʼi te hili hoʼatā ʼe ina fakahā te maʼuhiga ʼo te kupu tāfito “Te akonaki ʼaoga ki totatou ʼu temi maʼuhiga”. ʼE fakaʼosi anai te polokalama ʼaki te fakatokaga ʼaē “Tou haga pipiki maʼu ki te Akonaki fakaʼatua”.
ʼE moʼoni, ʼe koutou maʼu anai he ʼu lelei ʼi takotou kau ʼi te ʼu ʼaho ʼaia e fā! ʼE fakaafe atu koutou ke koutou kau ai. Ke koutou ʼiloʼi te faiʼaga ʼe ōvi ki tokotou ʼapi, koutou vakaʼi mo te kau Fakamoʼoni ʼa Sehova ʼo te koga meʼa ʼaē ʼe koutou nonofo ai peʼe koutou faitohi kia nātou ʼaē neʼe nātou tā te nusipepa ʼaenī peʼe koutou vakaʼi te Koutou ʼaʼala! ʼo te ʼaho 8 ʼo sūnio, ʼe koutou maʼu ai anai te ʼu tuʼasila ʼo te ʼu faiʼaga ʼo te ʼu fakatahi.