Tou Haga Haʼele Mo Te Kautahi ʼa Sehova
“Ke ofa te Atua o te tokalelei . . . o teuteu koutou aki te mea lelei fuape ki tautou fai tona finegalo.”—Hepeleo 13:20, 21.
1. Kua tokofia ia te hahaʼi ʼaē ʼi te kele katoa, pea ko te tokofia ʼaē ʼe nātou kau ki te ʼu lotu?
ʼI TE taʼu 1999, neʼe kaku ki te toko ono miliale te hahaʼi ʼaē ʼe nonofo ʼi te kele katoa! Ko te The World Almanac ʼe ina fakahā mai ko hahaʼi e toko 1 165 000 000 Mahometa, ko te toko 1 030 000 000 Katolika, ko te toko 762 000 000 Inituisi, ko te toko 354 000 000 Putisi, ko te toko 316 000 000 Polotesita, pea ko te toko 214 000 000 ʼo te Lotu Orthodoxe.
2. Koteā ʼaē ʼe feala ke tou ʼui ʼo ʼuhiga mo te ʼaluʼaga ʼo te ʼu lotu ia ʼaho nei?
2 ʼI te mavetevete pea mo te mole felogoi ʼa te ʼu lotu ia ʼaho nei, ʼe feala koa ki te lauʼi miliona hahaʼi fuli ʼaia ke nātou fai te finegalo ʼo te ʼAtua? Kailoa, “koteuhi ko te Atua e mole ko te Atua o te maveuveu, kae o te tokalelei.” (1 Kolonito 14:33) Kae ʼi te tahi faʼahi, e feafeaʼi ʼo ʼuhiga mo te fale tautēhina faka malamanei ʼa te kau kaugana ʼa Sehova? (1 Petelo 2:17) Neʼe fai fakalelei te ʼu kumi, pea ʼe nātou fakamoʼoni ko ‘te ʼAtua ʼo te tokalelei ʼe ina teuteuʼi nātou ʼaki te meʼa lelei fuape ki tanatou fai tona finegalo.’—Hepeleo 13:20, 21.
3. Koteā ʼaē neʼe hoko ʼi Selusalemi ʼi te Penikosite ʼo te taʼu 33 ʼo totatou temi pea koteā tona tupuʼaga?
3 ʼE mahino ia, ko te lahi ʼa te kau Fakamoʼoni ʼa Sehova ʼe mole ko he tafitoʼaga ʼaia moʼo fakamoʼoni ʼe tapuakina nātou e te ʼAtua, pea ʼe mole ko te kaugamālie ʼa te hahaʼi ʼaē ʼe tokagaʼi e te ʼAtua. Neʼe mole ina fili te kau Iselaele he neʼe nātou “kaugamālie age” ʼi te hahaʼi fuli ʼaē. ʼI tona ʼaluʼaga moʼoni, neʼe ko nātou ʼaē neʼe “tokosiʼi” ʼaupito ʼi te hahaʼi. (Teutalonome 7:7) Kae ʼi te heʼe agatonu ʼa Iselaele, ʼi te Penikosite ʼo te taʼu 33 ʼo totatou temi, neʼe tuku e Sehova tona ʼofa ki he kokelekasio foʼou, ʼaē neʼe faʼufaʼu e te kau tisipulo ʼa Sesu Kilisito. Neʼe fakanofo nātou e te laumālie maʼoniʼoni ʼa Sehova, pea ʼaki he loto faʼafai, neʼe nātou ʼolo ʼo tala ki te hahaʼi te moʼoni ʼo ʼuhiga mo te ʼAtua pea mo Kilisito.—Gaue 2:41, 42.
Tou Haʼele Tuʼumaʼu Ki Muʼa
4. He koʼe ʼe feala ke koutou ʼui neʼe haga haʼele tuʼumaʼu ki muʼa ia te kokelekasio faka Kilisitiano ʼo te ʼuluaki sēkulō?
4 ʼI te ʼuluaki sēkulō, neʼe haʼele tuʼumaʼu ki muʼa te kokelekasio faka Kilisitiano, ʼo nātou gāue ʼi he ʼu telituale foʼou, mo fai he ʼu tisipulo, pea neʼe tuputupu ai mo tanatou mālama ki te ʼu fakatuʼutuʼu ʼa te ʼAtua. Ko te ʼu ʼuluaki Kilisitiano neʼe nātou mulimuli ki te ʼu mahino fakalaumālie ʼaē neʼe foaki kia nātou, ʼi te ʼu tohi ʼaē neʼe fai ʼaki te takitaki fakaʼatua. ʼAki te ʼu ʼaʼahi ʼo nātou e te kau ʼapositolo pea mo ʼihi, neʼe nātou lotomālohi ai moʼo fakahoko tonatou minisitelio. ʼE fakamatala lelei te faʼahi ʼaia ʼi te ʼu Tohi Faka Keleka ʼo te Tohi-Tapu.—Gaue 10:21, 22; 13:46, 47; 2 Timoteo 1:13; 4:5; Hepeleo 6:1-3; 2 Petelo 3:17, 18.
5. He koʼe ʼe tuputupu te kautahi ʼa te ʼAtua ia ʼaho nei, pea he koʼe ʼe tonu ke tou haga haʼele mo ia?
5 Ohage ko te ʼu ʼuluaki Kilisitiano, kua tuputupu te kau Fakamoʼoni ʼa Sehova ʼo te temi nei ʼaē neʼe nātou tokosiʼi ʼi te kamata. (Sakalia 4:8-10) Talu mai te fakaʼosi ʼo te 19 sēkulō, neʼe fakahā lelei ʼe takitaki e te laumālie ʼo te ʼAtua tana kautahi. ʼUhi ko tatatou falala ki te takitaki ʼo te laumālie maʼoniʼoni kae mole ki te mālohi ʼa te tagata, koia neʼe tou haga tuputupu ai ʼi tatatou mahino ki te Tohi-Tapu pea mo tatatou fai ia te finegalo ʼa te ʼAtua. (Sakalia 4:6) ʼE tou ʼi “te u aho fakamuli,” koia ʼe maʼuhiga ke tou haga haʼele mo te kautahi ʼa Sehova ʼaē ʼe haʼele ki muʼa. (2 Timoteo 3:1-5) Kapau ʼe tou fai te faʼahi ʼaia, pea ʼe tou taupau tuʼumaʼu anai tatatou ʼamanaki pea mo tou tala kua fakatuʼu ia te Puleʼaga ʼo te ʼAtua, ʼi muʼa ʼo te hoko mai ʼo te fakaʼosi ʼo te tuʼu ʼo te ʼu faʼahiga meʼa ʼaenī.—Mateo 24:3-14.
6, 7. Koteā te ʼu faʼahi e tolu ʼaē ka tou vakaʼi neʼe haʼele ai ki muʼa te kautahi ʼa Sehova?
6 ʼE kau mo tatou ʼihi neʼe nātou fakatahi mo te kautahi ʼa Sehova ʼi te ʼu taʼu 1920, 1930, pea mo te ʼu taʼu 1940. Lolotoga te ʼu ʼuluaki taʼu ʼaia, ko ai ia tatou neʼe feala ke ina ʼiloʼi ʼe hoko anai he tuputupu fakaofoofo feiā pea mo te mafola ʼo te kautahi ʼo aʼu kia ʼaho nei? Koutou fakakaukauʼi age muʼa te ʼu meʼa lahi ʼaē neʼe hoko ʼi totatou temi! Koia ʼe ko he tapuakina fakalaumālie mokā tou fakakaukauʼi ia te ʼu meʼa ʼaē neʼe fai e Sehova ʼaki tana hahaʼi ʼaē ʼe nātou mulimuli ki te teokalasia.
7 ʼI te temi muʼa, ko Tavite neʼe ōfo lahi ʼi tana sio ki te ʼu gāue taulekaleka ʼa Sehova. Neʼe ina ʼui fēnei: “Neʼe ʼau fia palalau pea mo talanoa ʼo ʼuhiga mo te ʼu meʼa ʼaia, kae ʼe lahi ʼaupito age ʼi te ʼu meʼa ʼaē ʼe feala ke ʼau fakamatala.” (Pesalemo 40:5) ʼE toe feiā mo tatou, ʼe mole feala ke tou fakamatala te ʼu tuʼuga gāue lahi ʼaē neʼe fai e Sehova ʼi totatou temi ʼaē ʼe tuha mo te fakavikiviki. Kae tou vakaʼi te ʼu faʼahi e tolu ʼaē neʼe haʼele ai ki muʼa ia te kautahi ʼa Sehova: (1) te tuputupu ʼo tatatou mahino fakalaumālie, (2) te fakahoko lelei pea mo te mafola ʼo totatou minisitelio, pea (3) te ʼu fetogi ʼi te ʼu fakatuʼutuʼu ʼa te kautahi.
Ke Fakafetaʼi Ki Te Mahino Fakalaumālie
8. Ohage ko tona tuʼu ia Tāʼaga Lea 4:18, koteā te mālama fakalaumālie ʼaē neʼe feala ai ke tou mahino ʼo ʼuhiga mo te Puleʼaga?
8 ʼO ʼuhiga mo te fakamālamaʼi māmālie ʼo tatou ʼi te faʼahi fakalaumālie, neʼe hoko moʼoni te meʼa ʼaē ʼe tuʼu ia Tāʼaga Lea 4:18. ʼE ʼui fēnei ai: “Ko te ala ʼo te kau faitotonu ʼe hage ko te mālama gigila ʼaē ʼe ʼāsili tana mālama ʼo aʼu ki te mafoa lelei ʼo te ʼaho.” ʼE tou loto fakafetaʼi lahi ki te fakamālamaʼi māmālie ʼo tatou ʼi te faʼahi fakalaumālie. ʼI Cedar Point, ʼi Ohio, ʼi te fakatahi ʼi te 1919, neʼe talanoa tāfito ai ki te Puleʼaga ʼa te ʼAtua. ʼE fakaʼaogaʼi e Sehova ia te Puleʼaga moʼo tāpuhā tona huafa pea mo lagavaka ʼo ʼuhiga mo tona pule faʼifaʼitaliha. ʼI tona fakahagatonu, neʼe feala ʼaki te mālama fakalaumālie, ke tou mahino, mai ia Senesi kia Apokalipesi, ʼe fakamoʼoni e te Tohi-Tapu ko te fakatuʼutuʼu ʼa Sehova ʼe ko te tāpuhā ʼo tona huafa ʼaki tona Puleʼaga ʼaē ʼe pule ai tona ʼAlo. ʼE ko he ʼamanaki lahi kia nātou fuli ʼaē ʼe ʼoʼofa ki te faitotonu.—Mateo 12:18, 21.
9, 10. ʼI te ʼu taʼu 1920, koteā ʼaē neʼe tou ako ʼo ʼuhiga mo te Puleʼaga pea ʼo ʼuhiga mo te ʼu kautahi e lua ʼaē ʼe fefakafeagaiʼaki, pea neʼe tokoni feafeaʼi ia te faʼahi ʼaia kia tatou?
9 ʼI te fakatahi ʼi Cedar Point ʼi te 1922, ko te tēhina ʼaē neʼe fai akonaki tāfito, ia J. F. Rutherford, neʼe ina uga te hahaʼi ʼa te ʼAtua ke nātou “kalagaʼi, kalagaʼi, kalagaʼi ia te Hau pea mo tona puleʼaga.” ʼI te alatike “Te Tupu ʼa Te Fenua,” neʼe tā ʼi Te Tule Leʼo ʼo te ʼaho 1 ʼo Malesio 1925, neʼe fakahā ai ia te mālama fakalaumālie ʼaē neʼe maʼu ʼo ʼuhiga mo te ʼu lea faka polofeta ʼaē neʼe nātou tala fakatomuʼa te fakatuʼu ʼo te Puleʼaga ʼo te ʼAtua ʼi te 1914. Neʼe tou toe mahino ʼi te ʼu taʼu 1920, ʼe ʼi ai te ʼu kautahi e lua ʼe fefakafeagaiʼaki—te kautahi ʼa Sehova pea mo te kautahi ʼa Satana. ʼE nā fihi, pea ʼe tou kau anai ki te faʼahi ʼaē ka mālo mo kapau ʼe tou haga haʼele mo te kautahi ʼa Sehova.
10 Neʼe tokoni feafeaʼi kia tatou te mālama fakalaumālie ʼaia? Mai tona ʼaluʼaga ʼaē ʼe mole kau te Puleʼaga ʼa te ʼAtua pea mo te Hau ko Sesu Kilisito ʼi te malamanei, koia ʼe mole feala ai kia tatou ke tou kau kiai. ʼI tatatou mavae mai te malamanei, ʼe tou fakahā ai ʼe tou kau ki te moʼoni. (Soane 17:16; 18:37) Ka tou vakaʼi te ʼu faigataʼaʼia lahi ʼaē ʼe hoko ki te mālama agakovi ʼaenī, pea ʼe tou loto fakafetaʼi lahi ʼi tatatou mole kau ki te kautahi ʼa Satana! Pea ʼe ko he pilivilesio tatatou nofo ʼi te fīmālie fakalaumālie ʼi te kautahi ʼa Sehova!
11. Koteā te higoa faka Tohi-Tapu ʼaē neʼe toʼo e te hahaʼi ʼa te ʼAtua ʼi te 1931?
11 ʼI te fakatahi ʼi Columbus, ʼi Ohio, ʼi te 1931, neʼe fakamahino lelei ai te faka ʼuhiga ʼo Isaia 43:10-12. Neʼe toʼo e te kau Ako ʼo te Tohi-Tapu te higoa makehe ʼaē ko te kau Fakamoʼoni ʼa Sehova. Ko he pilivilesio lahi te fakahā ʼo te huafa lahi ʼo te ʼAtua ke feala ki ʼihi ke nātou fetapā kiai ke hāofaki nātou!—Pesalemo 83:18; Loma 10:13.
12. Koteā te mālama fakalaumālie ʼaē neʼe maʼu ʼi te 1935 ʼo ʼuhiga mo te hahaʼi tokolahi?
12 ʼI muʼa ʼo te ʼu taʼu 1930, tokolahi ʼi te hahaʼi ʼa te ʼAtua neʼe nātou lotolotolua ʼo ʼuhiga mo te maʼuli ʼaē ʼe nātou ʼamanaki kiai ʼi te ka haʼu. Ko ʼihi neʼe nātou manatu ki te maʼuli ʼi selo kae neʼe nātou leleiʼia ʼaupito te ʼu akonaki ʼo te Tohi-Tapu ʼo ʼuhiga mo te palatiso ʼi te kele. ʼI te fakatahi ʼi Washington, ʼi te 1935, neʼe hoko ai te fiafia lahi ʼi te fakahā ʼaē ko te hahaʼi kaugamālie, peʼe ko te hahaʼi tokolahi, ia Apokalipesi kapite 7 ʼe ko te kalasi ʼo te ʼu hahaʼi ʼaē ʼe nātou ʼamanaki maʼuʼuli ʼi te kele. Talu mai ai, ko te fakatahi ʼo te hahaʼi tokolahi neʼe haʼele vave ki muʼa. ʼE mole tou fakamālo lahi koa ki tatatou mahino pe ko ai te hahaʼi tokolahi ʼaia? Ko te hoko moʼoni ʼo te fakatahi ʼa te hahaʼi kaugamālie mai te ʼu fenua pea mo te ʼu lea fuli, ʼe ina uga tatou ke tou gāue mālohi ʼo mulimuli ki te haʼele ʼa te kautahi ʼa Sehova.
13. Koteā te fehuʼi maʼuhiga ʼaē neʼe talanoa tāfito kiai ʼi te fakatahi ʼi St. Louis ʼi te 1941?
13 Ko te fehuʼi maʼuhiga ʼaē ʼe kau kiai te hahaʼi fuli, neʼe fakahā lelei ʼi te fakatahi ʼi St. Louis, ʼi Missouri ʼi te 1941. ʼE faka ʼuhiga ki te pule ʼo te ʼatulaulau, peʼe ko te pule faʼifaʼitaliha. Ko te fehuʼi ʼaia kua vave fai kiai hona tali, pea ʼe haʼu fakavilivili te ʼaho lahi pea mo fakamataku ʼaē ka hoko ai te faʼahi ʼaia! Neʼe toe talanoa ʼi te 1941 ʼo ʼuhiga mo tatatou nofo agatonu, ʼaē ʼe feala ai ke tou fakahā takitokotahi peʼe tou lagolago ki te pule faʼifaʼitaliha ʼa te ʼAtua.
14. ʼI te fakatahi faka malamanei ʼi te 1950, koteā ʼaē neʼe tou ako ʼo ʼuhiga mo te kau tama ʼaliki ʼaē ʼe tuʼu ia Isaia 32:1, 2?
14 ʼI te fakatahi faka malamanei ʼo te 1950 ʼi te Kolo ʼo New York, neʼe fakamahino lelei ai pe ko ai te ʼu tama ʼaliki ʼaē ʼe tuʼu ia Isaia 32:1, 2. Neʼe ko he lakaga fakafiafia ʼaupito ʼi te temi ʼaē neʼe palalau ai te Tēhina ko Frederick Franz ki te faʼahi ʼaia, pea mo tana fakamahino ʼaē ko te kau tama ʼaliki ʼaia ʼe ko he ʼu hahaʼi ʼe kau ia tatou. ʼI te fakatahi ʼaia pea mo te ʼu fakatahi ki muli age, neʼe fakahā ai te ʼu fakamahino lahi ʼi te faʼahi fakalaumālie. (Pesalemo 97:11) ʼE tou loto fakafetaʼi lahi he ko tatatou haʼele “ ʼe hage ko te mālama gigila ʼaē ʼe ʼāsili tana mālama”!
ʼE Tou Haʼele Ki Muʼa ʼi Totatou Minisitelio
15, 16. (a) Neʼe feafeaʼi tatatou haʼele ki muʼa ʼi tatatou minisitelio ʼi te ʼu taʼu 1920 pea mo 1930? (b) ʼI te ʼu taʼu ʼaenī, koteā te ʼu tohi ʼaē neʼe fakaloto mālohiʼi ai te minisitelio faka Kilisitiano?
15 Ko te lua faʼahi ʼaē neʼe haʼele ai ki muʼa te kautahi ʼa Sehova ʼe faka ʼuhiga ki te gāue tāfito ʼaē ʼe tou fai—te faka mafola ʼo te Puleʼaga pea mo te fai ʼo ni ʼu tisipulo. (Mateo 28:19, 20; Maleko 13:10) Moʼo fakahoko ia te gāue ʼaia, neʼe fakahā tuʼumaʼu mai kia tatou e te kautahi ia te maʼuhiga ʼaē ke tou faka fālahi totatou minisitelio. ʼI te 1922, neʼe uga te kau Kilisitiano fuli ke nātou kau ki te gāue fai faka mafola. Neʼe tonu ki te kau Kilisitiano takitokotahi ke nātou fakagigila tonatou mālama pea mo nātou tahi fakamoʼoni ki te moʼoni. (Mateo 5:14-16) ʼI te 1927, neʼe fakatuʼutuʼu ke fai te faka mafola ʼi te ʼAhotapu. ʼO kamata ʼi Fepualio 1940, kua māhani te hahaʼi ʼi te sio ki te kau Fakamoʼoni ʼi te ala ʼi te ʼu telituale ʼo te ʼu matani gāue, ʼe nātou tufa Te Tule Leʼo pea mo te Consolation (ʼi te temi nei ko te Réveillez-vous !).
16 ʼI te 1937, neʼe tā ai te kaupepa Étude modèle, neʼe fakahā lelei ai te maʼua ʼaē ke fai he ʼu ʼaʼahi moʼo akoʼi ki te hahaʼi ia te moʼoni ʼa te Tohi-Tapu. ʼI te ʼu taʼu ki muli age, neʼe faka maʼuhigaʼi ia te gāue ʼaē ko te fai ʼo he ʼu ako Tohi-Tapu. Neʼe fakaloto mālohiʼi te gāue ʼaia ʼo te minisitelio ʼaki te tā ʼo te tohi “Que Dieu soit reconnu pour vrai !” ʼi te 1941, pea mo te tohi La vérité qui conduit à la vie éternelle ʼi te 1968. ʼI te temi ʼaenī, ʼe tou fakaʼaogaʼi ia te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Ko te ako ʼo te tohi ʼaia ʼe ina tuku he tafitoʼaga faka Tohi-Tapu moʼo fai ʼo he ʼu tisipulo.
Tou Haʼele Ki Muʼa ʼi Te ʼu Fetogi Neʼe Fai ʼi Te Kautahi
17. Ohage ko tona tuʼu ia Isaia 60:17, neʼe haʼele feafeaʼi ki muʼa ia te kautahi ʼa Sehova?
17 Ko te tolu faʼahi ʼaē neʼe haʼele ai ki muʼa te kautahi ʼa Sehova ʼe ko te ʼu fetogi ʼaē neʼe fai. ʼO mulimuli kia Isaia 60:17, neʼe fakapapau fēnei e Sehova: “ ʼE mole ʼau ʼaumai anai te kapa, kae ko te aulo, ʼe mole ʼau ʼaumai anai te ukamea kae ko te siliva, ʼe mole ʼau ʼaumai anai te ʼakau kae ko te kapa, ʼe mole ʼau ʼaumai anai te maka, kae ko te ukamea; pea ʼe ʼau fakatuʼu anai te tokalelei ohage ko hau ʼu tagata taupau, pea ko te faitotonu ohage ko hau ʼu hahaʼi tufa gāue.” ʼO mulimuli ki te lea faka polofeta ʼaia, neʼe fai te ʼu fakatuʼutuʼu moʼo hikihiki te tokaga ki te gāue fai faka mafola ʼo te Puleʼaga pea mo te taupau ʼo te faga ōvi.
18, 19. Koteā te ʼu fetogi ʼi te kautahi neʼe fai lolotoga te ʼu taʼu?
18 ʼI te 1919, ko te tagata takitaki ʼo te gāue neʼe hinoʼi ki te ʼu kokelekasio ʼaē neʼe tonu ke fai ai he ʼu fakatuʼutuʼu ki te gāue fai faka mafola. Neʼe ko he fakaloto mālohi ʼaia ki tatatou minisitelio ʼi te telituale. Ko te vote ʼaē moʼo fakanofo ʼo he ʼu tagata ʼāfea pea mo he ʼu tiakono, neʼe fakagata ʼi te 1932, ʼo fakaʼiloga ai tatatou kehe mo te ʼu fakatuʼutuʼu faka temokalatike. Ko te tahi meʼa maʼuhiga neʼe hoko ʼi te 1938, he neʼe kamata fakanofo ai te kau tagata faifekau fuli ʼi te kokelekasio, ʼo mulimuli fakalelei ki te faʼahiga fakanofo faka teokalatike ʼaē neʼe fai ʼi te ʼuluaki kokelekasio faka Kilisitiano. (Gaue 14:23; 1 Timoteo 4:14) ʼI te 1972, neʼe fakanofo ia te kau tagata taupau pea mo te kau tagata faifekau faka minisitelio ke nātou tauhi, ohage ko tona fai e ʼihi tagata ʼi te kau ʼuluaki Kilisitiano. Neʼe mole kei taupau te kokelekasio e te tagata taupau pe e tahi, kae ia Filipe 1:1 pea mo te tahi ʼu vaega ʼe fakahā ai ko nātou ʼaē ʼe nātou mulimuli ki te ʼu meʼa ʼaē ʼe fakamaʼua e te Tohi-Tapu ki te kau tagata taupau, ʼe nātou faʼufaʼu ia te kolesi ʼo te kau tagata ʼāfea.—Gaue 20:28; Efeso 4:11, 12.
19 ʼI te 1975, neʼe fai te fakatuʼutuʼu maʼa te ʼu komite ʼo te Kolesi Pule ʼa te kau Fakamoʼoni ʼa Sehova, ke nātou tokakaga ki te ʼu gāue ʼa te kautahi ʼa te ʼAtua ʼi te malamanei katoa. Neʼe fakatuʼu te ʼu Komite ʼo te Filiale ke tahi tokaga ki te gāue ʼaē ʼe fai ʼi tanatou ʼu telituale. Talu mai ai, neʼe vakaʼi tāfito ke fakamaʼamaʼa ia te gāue ʼaē ʼe fai ʼi te ʼu pilō pea mo te ʼu filiale ʼa te Sosiete, ke “ ʼiloʼi [ai] te ʼu meʼa ʼaē ʼe maʼuhiga tāfito.” (Filipe 1:9, 10, MN ) Ko te ʼu maʼua ʼaē neʼe tuku ki te ʼu tagata tauhi ōvi ʼaē ʼe fakalogo kia Kilisito, ʼe ko te faka mafola ʼo te logo lelei, mo te fai akonaki ʼi te kokelekasio, pea mo te tokaga fakalelei ki te faga ōvi ʼa te ʼAtua.—1 Timoteo 4:16; Hepeleo 13:7, 17; 1 Petelo 5:2, 3.
Te Takitaki ʼa Sesu
20. Kapau ʼe tou fia haga haʼele mo te kautahi ʼa Sehova, pea koteā ʼaē ʼe tonu ke tou fakamoʼoni kiai ʼo ʼuhiga mo te tuʼulaga ʼa Sesu?
20 Ke feala hatatou haga haʼele mo te kautahi ʼa Sehova ʼaē ʼe haʼele ki muʼa, ʼe tonu ke tou ʼiloʼi neʼe fakanofo e te ʼAtua ia Sesu Kilisito “ko te Pule o te [“kokelekasio,” MN ].” (Efeso 5:22, 23) Koutou toe fakatokagaʼi mo te vaega ʼo Isaia 55:4, ʼaē ʼe tou lau fēnei ai: “Koʼeni! Neʼe ʼau [Sehova] foaki ia ia ko he fakamoʼoni ki te ʼu kūtuga faka puleʼaga, ko te takitaki pea mo te pule ki te ʼu kūtuga faka puleʼaga.” ʼE mahino papau ia ʼe poto Sesu ʼi te takitaki. ʼE ina toe ʼiloʼi foki mo tana ʼu ōvi pea mo tanatou ʼu gāue. ʼI tona fakahagatonu, ʼi tana vakavakaʼi ia te ʼu kokelekasio e fitu ʼi Asie Mineure, neʼe tuʼa nima tana ʼui fēnei: “E au iloi tau u gaue.” (Apokalipesi 2:2, 19; 3:1, 8, 15) ʼE toe ʼiloʼi foki e Sesu te ʼu meʼa ʼaē ʼe ʼaoga kia tatou, ohage pe ko tana Tāmai, ia Sehova. ʼI muʼa ʼo tana foaki te Faikole ʼo te Tāmai ʼe ʼi selo, neʼe ʼui fēnei e Sesu: “[E] iloi e te Atua, tau Tamai, pe ko te mea fea e aoga ke ke mau, i mua o tau kole kia te ia.”—Mateo 6:8-13.
21. ʼE fakahoko feafeaʼi e Sesu te takitaki ʼo te ʼu ōvi ʼi te kokelekasio faka Kilisitiano?
21 ʼE fakahoko feafeaʼi e Sesu te takitaki ʼo tana ʼu ōvi? ʼE ina fai ʼaki te ʼu tagata taupau Kilisitiano, ko “he ʼu meʼa ʼofa ko he ʼu tagata.” (Efeso 4:8, MN ) Ia Apokalipesi 1:16, ʼe fakamatala ai ko te ʼu tagata taupau ʼaē neʼe fakanofo ʼe nātou nonofo ʼi te loto nima mataʼu ʼa Kilisito, ko tona faka ʼuhiga ʼe nātou fakalogo ki tana pule. Ia ʼaho nei, ʼe takitaki e Sesu te ʼu fakatuʼutuʼu ʼaē ʼe fai e te kau tagata ʼāfea, tatau aipe peʼe nātou ʼamanaki ʼolo ki selo peʼe nātou ʼamanaki maʼuʼuli ʼi te kele. Ohage ko tona fakamahino ʼi te ʼuluaki alatike, ʼe fakanofo nātou ʼaki te laumālie maʼoniʼoni ʼo mulimuli ki te ʼu meʼa ʼaē ʼe fakamaʼua e te Tohi-Tapu. (1 Timoteo 3:1-7; Tito 1:5-9) ʼI te ʼuluaki sēkulō, ʼi Selusalemi neʼe faʼufaʼu te kolesi pule e te ʼu tagata kua matutuʼa, neʼe tokakaga ki te ʼu kokelekasio pea mo te gāue fai faka mafola katoa ʼo te Puleʼaga. Ia ʼaho nei, ʼe faʼifaʼitakiʼi kiai te kautahi ʼa Sehova.
Tou Haga Haʼele!
22. Koteā te tokoni ʼaē ʼe foaki e te Kolesi Pule?
22 Ko te ʼu gāue fakakelekele ʼo te Puleʼaga neʼe tuku ke fai e “te kaugana agatonu mo fakapotopoto,” ʼaē ʼe fakafofoga e te Kolesi Pule ʼa te kau Fakamoʼoni ʼa Sehova. (Mateo 24:45-47) ʼE tokaga tāfito te Kolesi Pule ke ina foaki te ako fakalaumālie pea mo te takitaki ki te kokelekasio faka Kilisitiano. (Gaue 6:1-6) Kae ka hoko he ʼu tuʼutāmaki faka natula ki tonatou ʼu tēhina, pea ʼe kole e te Kolesi Pule ki te ʼu sosiete ke nātou foaki he fakaloto fīmālie, pea mo fakatokatoka peʼe toe gaohi te ʼu ʼapi pea mo te ʼu Fale ʼo Te Puleʼaga ʼaē neʼe maumau. Kapau ʼe felāveʼi ʼihi Kilisitiano mo ni ʼu faigataʼaʼia peʼe fakatagaʼi nātou, pea ʼe fai he ʼu fakatuʼutuʼu ke fakaloto mālohiʼi nātou ʼi te faʼahi fakalaumālie. Pea ʼi “te temi faigataʼa,” ʼe tou faiga ʼaupito ke tou hoko atu tatatou gāue fai faka mafola.—2 Timoteo 4:1, 2, MN.
23, 24. Tatau aipe pe koteā ʼaē ʼe feala ke hoko ki tana hahaʼi, kae koteā ʼaē ʼe foaki tuʼumaʼu e Sehova kia nātou, pea koteā ʼaē ʼe tonu ke tou fakatotonu ke tou fai?
23 Tatau aipe pe koteā te ʼu meʼa ʼaē ʼe feala ke hoko ki tana hahaʼi, kae ko Sehova ʼe ina foaki tuʼumaʼu te meʼa kai fakalaumālie pea mo te takitaki ʼaē ʼe ʼaoga. ʼE toe foaki e te ʼAtua te fakasiosio tonu pea mo loloto ki te ʼu tēhina takitaki ke nātou teuteu fakatomuʼa ki te tuputupu ʼaē ka hoko mai pea mo te ʼu fetogi faka teokalatike ʼi te kautahi. (Teutalonome 34:9; Efeso 1:16, 17) ʼE mahino ia ʼe foaki e Sehova te meʼa ʼaē ʼe ʼaoga kia tatou moʼo fakahoko te fekau ʼaē ke tou fai ni ʼu tisipulo pea mo fakahoko totatou minisitelio ʼi te malamanei katoa.—2 Timoteo 4:5.
24 ʼE tou falala katoa ʼe mole līaki anai e Sehova tana hahaʼi agatonu; ʼe ina fakahāo anai nātou ʼi te “ahiahi lahi” ʼaē ka hoko mai. (Apokalipesi 7:9-14; Pesalemo 94:14; 2 Petelo 2:9) ʼE lahi te ʼu tupuʼaga ke tou taupau mālohi te falala ʼaē neʼe tou maʼu ʼi te kamata ʼo aʼu ki te fakaʼosi. (Hepeleo 3:14) Koia tou fakatotonu ke tou haga haʼele mo te kautahi ʼa Sehova.
ʼE Koutou Tali Feafeaʼi Anai?
• He koʼe ʼe feala ke tou ʼui ʼe haga haʼele ki muʼa te kautahi ʼa Sehova?
• Koteā ʼaē ʼe fakahā ai neʼe fakamālamaʼi māmālie te hahaʼi ʼa te ʼAtua ʼi te faʼahi fakalaumālie?
• Neʼe hikihiki feafeaʼi te minisitelio faka Kilisitiano?
• Koteā te ʼu fetogi lelei ʼaē neʼe fai ʼi te ʼu fakatuʼutuʼu ʼo te gāue ʼo te ʼu kaugana ʼa Sehova?
[Paki ʼo te pasina 17]
Ohage ko Tavite, ʼe mole feala ke tou lau fuli te ʼu gāue taulekaleka ʼa Sehova
[Paki ʼo te pasina 18]
Neʼe fai ʼi te lotolotoiga ʼo te faga ōvi ʼa te ʼAtua te ʼu fetogi lelei ʼi te ʼu fakatuʼutuʼu ʼo te kautahi