Tou Haʼele ʼi Te Ala ʼo Te Mālama ʼAē ʼe Tuputupu Tuʼumaʼu Tona Gigila
“Ko te ala ʼo te kau faitotonu ʼe hage ko te mālama gigila ʼaē ʼe fakahaʼuhaʼu tona mālama ʼo aʼu ki te mafoa lelei ʼo te ʼaho.”—Tāʼaga Lea 4:18.
1, 2. Koteā ʼaē neʼe hoko ʼi te hahaʼi ʼa te ʼAtua, ʼi te tuputupu ʼo te mālama fakalaumālie ʼaē ʼe haʼu mai ia Sehova?
KO SEHOVA ʼATUA tokotahi pe ʼaē ʼe feala ke ina fakamatalatala te meʼa ʼaē ʼe hoko mokā hake ake te laʼā ʼi te ʼosi ʼo te pōʼuli, heʼe ko ia te Matapuna ʼo te mālama. (Pesalemo 36:9) ʼE ʼui e te ʼAtua ‘ka aʼu te mālama ʼo te laʼā ki te ʼu potu taupotu ʼo te kele, ʼe fetogi te kele ohage he kele kula neʼe fakaʼiloga, pea ʼe tuʼu ia meʼa fuli ʼi tona tuʼuga ohage ko he kofu.’ (Sopo 38:12-14) Ka hakehake ake ia te laʼā, ʼe hā lelei ai te agaaga ʼo te kele, ohage ko te kele ʼaē ʼe fakaʼiloga ʼaki te meʼa lomi fakamoʼoni.
2 Tahi ʼaē meʼa, ʼe ko Sehova te Matapuna ʼo te mālama fakalaumālie. (Pesalemo 43:3) Logola te nofo ʼa te malamanei ʼi te fakapōʼuli ʼaoʼao, kae ʼe haga fakamālamaʼi e te ʼAtua moʼoni tana hahaʼi. Koteā tona fua? ʼE tali fēnei ʼi te Tohi-Tapu: “Ko te ala ʼo te kau faitotonu ʼe hage ko te mālama gigila ʼaē ʼe fakahaʼuhaʼu tona mālama ʼo aʼu ki te mafoa lelei ʼo te ʼaho.” (Tāʼaga Lea 4:18) Ko te mālama ʼaē ʼe haʼu mai ia Sehova ʼe ina haga fakamālamaʼi ia te ala ʼo tana hahaʼi. ʼE fakahoko iā nātou he ʼu fetogi ʼi te kautahi, mo tanatou ʼu akonaki faka lotu, pea mo te ʼu aga ʼaē ʼe tonu ke fai.
Te ʼu Fetogi ʼi Te Kautahi
3. Koteā ʼaē neʼe fakakikite iā Isaia 60:17?
3 ʼAki te polofeta ko Isaia, neʼe fakakikite fēnei e Sehova: “ ʼE mole au ʼaumai anai te kapa, kae ko te aulo, ʼe mole au ʼaumai anai te ukamea kae ko te siliva, ʼe mole au ʼaumai anai te ʼakau kae ko te kapa, ʼe mole au ʼaumai anai te maka, kae ko te ukamea.” (Isaia 60:17) Ohage ko te fetogi ʼa te ukamea ʼaki he meʼa ʼe mālohi age, neʼe hoko ki te kau Fakamoʼoni ʼa Sehova he ʼu fetogi ʼi tanatou kautahi ʼi te “fakaʼosi ʼo te tuʼu ʼo te ʼu faʼahiga meʼa ʼaenī” peʼe ko “te u aho fakamuli.”—Mateo 24:3, MN; 2 Timoteo 3:1.
4. Koteā te fakatuʼutuʼu ʼaē neʼe fai ʼi te taʼu 1919, pea he koʼe neʼe lelei te fakatuʼutuʼu ʼaia?
4 ʼI te kamata ʼo te ʼu ʼaho fakamuli, ʼi te ʼu kokelekasio ʼo te kau Ako ʼo te Tohi-Tapu, neʼe ko te higoa ʼaia ʼo te kau Fakamoʼoni ʼa Sehova ʼi te temi ʼaia, neʼe fai te ʼu vote moʼo fakanofo te ʼu tagata ʼāfea pea mo te ʼu tiakono. Kae ko ʼihi tagata ʼāfea neʼe mole nātou fia fai faka mafola. Ko ʼihi neʼe mole nātou leleiʼia te fai faka mafola pea neʼe nātou toe fakaloto vaivaiʼi ʼihi ke mole nātou kau kiai. Koia ʼi te taʼu 1919, neʼe fai te fakatuʼutuʼu foʼou ʼi te ʼu kokelekasio fuli ke hinoʼi he tagata takitaki gāue. Ko te tagata takitaki ʼaia neʼe mole fakanofo e te kokelekasio, kae neʼe hinoʼi faka teokalatike e te filiale ʼo te hahaʼi ʼa te ʼAtua ki tona tuʼulaga. Ko te tagata takitaki ʼaia ʼo te gāue neʼe tonu ke ina fakatuʼutuʼu te gāue fai faka mafola, mo hinoʼi te ʼu telituale, pea mo fakaloto mālohiʼi te fai faka mafola. ʼI te ʼu taʼu ʼaē neʼe hoa kiai, neʼe uga mālohi ai te gāue fai faka mafola ʼo te Puleʼaga.
5. Ko te fetogi fea ʼaē neʼe hoko ʼi te ʼu taʼu 1920?
5 ʼI te fakatahi ʼa te kau Ako ʼo te Tohi-Tapu ʼi Cedar Point, ʼi Ohio, ʼi Amelika, ʼi te taʼu 1922, neʼe lotomālohi te nofoʼaki kātoa ʼaki te ʼu palalau ʼaenī neʼe fai: “Koutou tala, koutou tala, koutou tala, te Hau pea mo tona Puleʼaga.” ʼI te taʼu 1927, neʼe fakatuʼutuʼu te gāue fai faka mafola ke fai ʼi te ʼAhotapu, heʼe ko te ʼaho lelei ʼaia moʼo fai faka mafola ʼi te ʼu ʼapi. He koʼe neʼe filifili te ʼaho ʼaia? Heʼe ko te ʼAhotapu ʼe ko te ʼaho ʼaē ʼe mole gāue ai te tokolahi. Iā ʼaho nei, ʼe toe maʼu e te kau Fakamoʼoni ʼa Sehova te manatu ʼaia, ʼo nātou faiga ke nātou maʼu atu te hahaʼi ʼi te ʼu temi ʼaē ʼe nātou nonofo ai ʼi tonatou ʼapi, ohage la ko te ʼu fakaʼosi vāhaʼa pea mo te ʼu afiafi.
6. ʼI te taʼu 1931, koteā te tonu ʼaē neʼe tali, pea neʼe malave feafeaʼi ki te gāue fai faka mafola ʼo te Puleʼaga?
6 Neʼe fai te fakaloto mālohi ʼo ʼuhiga mo te gāue fai faka mafola ʼo te Puleʼaga, ʼi te ʼAhotapu hili hoʼatā, ʼi te ʼaho 26 ʼo Sūlio 1931, ʼi te tali ʼo te tonu ʼaē neʼe tala ʼi te fakatahi ʼi Columbus, ʼi Ohio, ʼi Amelika, pea ki muli age ʼi te malamanei kātoa. Koʼenī te koga ʼo te tonu ʼaia: “Ko tatou ko te ʼu kaugana ʼa Sehova ʼAtua neʼe fekauʼi tatou ke tou fai he gāue ʼi tona huafa, pea moʼo fakalogo ki tana fakatotonu, ke tou fakamoʼoni ʼo ʼuhiga mo Sesu Kilisito, pea mo fakahā ki te hahaʼi ko Sehova ʼe ko te ʼAtua moʼoni pea mo Māfimāfi; koia ʼe tou fiafia ʼi te tali pea mo toʼo ia te huafa ʼaē neʼe fakahā totonu mai e te ʼAliki ʼAtua, pea ʼe tou loto ke ʼiloʼi tatou pea mo fakahigoaʼi tatou ko te kau Fakamoʼoni ʼa Sehova.” (Isaia 43:10) ʼE fakahā lelei ʼaki te higoa foʼou ʼaia ia te gāue maʼuhiga ʼo te hahaʼi ʼaē ʼe nātou toʼo te higoa feiā. Ei, ʼe foaki e Sehova he gāue ke kau kiai tana kau kaugana fuli. Neʼe tali fakafiafia te tonu ʼaia e te kau Ako Tohi-Tapu fuli!
7. Ko te fetogi fea ʼaē neʼe hoko ʼi te taʼu 1932, pea koteā tona tupuʼaga?
7 Tokolahi te kau tagata ʼāfea neʼe nātou agavaivai ʼo kau fakamalotoloto ki te gāue fai faka mafola ʼaia. Kae ʼi ʼihi potu, neʼe mole tali e te ʼu tagata ʼāfea ʼaē neʼe fakanofo ʼaki te vote, te manatu ʼaē ko te kokelekasio kātoa ʼaē ʼe tonu ke kau ki te fai faka mafola. Kae neʼe ʼi ai te tahi ʼu fetogi neʼe ʼamanaki hoko. ʼI te taʼu 1932, neʼe maʼu ʼi te ʼu kokelekasio he ʼu fakatotonu ʼi Te Tule Leʼo, ke fakagata te ʼu vote moʼo fakanofo te kau tagata ʼāfea pea mo te ʼu tiakono. Kae neʼe tonu ke nātou filifili he komite neʼe faʼufaʼu e te ʼu tagata ʼe nātou leleiʼia te ʼu meʼa fakalaumālie pea mo nātou kau ki te gāue fai faka mafola. ʼAki te fetogi ʼaia, neʼe hinoʼi ki te taupau ʼo te kokelekasio, he ʼu tēhina neʼe lahi tanatou gāue ʼi te fai faka mafola, pea neʼe haʼele ai ki muʼa te gāue.
Neʼe Fai He ʼu Fetogi ʼAki Te Tuputupu ʼo Te Mahino
8. Ko te fetogi fea ʼaē neʼe hoko ʼi te taʼu 1938?
8 Neʼe ‘fakahaʼuhaʼu te mū mālohi age’ ʼa te mālama. ʼI te taʼu 1938, neʼe mole kei fai he ʼu vote. Neʼe fakanofo te ʼu tēhina fuli ʼo mulimuli ki te teokalasia, ʼaki te takitaki ʼo “te tagata kaugana agatonu mo poto.” (Mateo 24:45-47, MN ) Neʼe tali te fetogi e te ʼu teitei kokelekasio fuli ʼa te kau Fakamoʼoni ʼa Sehova, pea neʼe hoko atu te fua lelei ʼo te gāue fai faka mafola.
9. ʼI te taʼu 1972, ko te fetogi fea ʼaē neʼe hoko, pea he koʼe neʼe ko he fetogi lelei ʼaia?
9 ʼO kamata ʼi te ʼaho 1 ʼo ʼOketopeli 1972, neʼe fai te tahi fetogi ʼo ʼuhiga mo te taupau ʼo te kokelekasio. Neʼe mole kei taupau te kokelekasio e he faifekau faka kokelekasio peʼe ko he taupau pe e tahi, kae ʼi te ʼu kokelekasio ʼi te malamanei kātoa kua taupau e he kolesi ʼa he ʼu tagata ʼāfea. Ko te fakatuʼutuʼu foʼou ʼaia neʼe ina fakaloto mālohiʼi ʼaupito te ʼu tēhina kua fotufotuʼa, ke nātou gāueʼi te ʼu kalitātē fakalaumālie ʼaē ka nātou faka fealagia anai ke nātou takitaki ia te kokelekasio. (1 Timoteo 3:1-7) Neʼe ako ai e te ʼu tēhina tokolahi ke nātou popoto ʼi te fakahoko ʼo te ʼu maʼua ʼi te kokelekasio. Neʼe maʼuhiga tanatou gāue moʼo tokoni ki te tokolahi ʼo te hahaʼi foʼou ʼaē neʼe nātou tali ia te moʼoni ʼo te Tohi-Tapu.
10. Koteā te fakatuʼutuʼu ʼaē neʼe fai ʼi te taʼu 1976?
10 Ko nātou ʼaē neʼe kau ʼi te Kolesi Pule neʼe ko te ʼu komite e ono, pea ʼo kamata ʼi te ʼaho 1 ʼo Sānualio 1976, neʼe vakavakaʼi e te ʼu komite ʼaia te ʼu gāue fuli ʼo te kautahi pea mo te ʼu kokelekasio ʼi te malamanei kātoa. Neʼe ko he tapuakina lahi te takitaki ʼo te ʼu faʼahi fuli ʼo te gāue ʼo te Puleʼaga e te “tokolahi ʼo te ʼu hahaʼi fai tokoni.”—Tāʼaga Lea 15:22; 24:6.
11. Ko te fetogi fea ʼaē neʼe hoko ʼi te taʼu 1992, pea koteā tona tupuʼaga?
11 ʼI te taʼu 1992 neʼe hoko ai te tahi fetogi, ohage ko te fetogi ʼaē neʼe fai ʼi te ʼosi liliu ʼa te kau Iselaele pea mo te tahi ʼu hahaʼi mai tanatou ʼaunofo ʼi Papiloni. ʼI te temi ʼaia, neʼe mole feʼauga te kau Levite moʼo fai ia te ʼu gāue ʼi te fale lotu. Koia neʼe lahi age te ʼu gāue ʼaē neʼe tuku age ki te tahi kau Netinime, ʼaē neʼe mole ko he kau Iselaele, moʼo tokoni ki te kau Levite. ʼO toe feiā pe, ʼi te taʼu 1992, moʼo lagolago ki te kalasi ʼo te tagata kaugana agatonu mo poto ʼi tana leʼoleʼo ia te tuputupu ʼo te ʼu gāue ʼi te kele, neʼe lahi te tahi ʼu gāue neʼe tuku age ke fai e ʼihi ʼo te “tahi ʼu ōvi.” Neʼe fakanofo nātou ʼe ko he ʼu tēhina ʼe nātou tokoni ki te ʼu komite ʼo te Kolesi Pule.—Soane 10:16, MN.
12. Neʼe fakatuʼu feafeaʼi e Sehova te tokalelei ohage ko hatatou ʼu tagata taupau?
12 Koteā tona fua ʼo te ʼu fetogi ʼaia? ʼE ʼui fēnei e Sehova: “ ʼE au fakatuʼu anai te tokalelei ohage ko hau ʼu tagata taupau, pea ko te faitotonu ohage ko hau ʼu hahaʼi tufa gāue.” (Isaia 60:17) ʼE maʼu te tokalelei ʼi te lotolotoiga ʼo te kau kaugana ʼa Sehova iā ʼaho nei, pea ko tanatou ʼoʼofa ki te “faitotonu” ʼe hage ko he ‘gāue neʼe tufa’ kiā nātou—ko te mālohi ʼaia ʼaē ʼe ina uga nātou ke nātou tauhi ki te ʼAtua. ʼE lelei tanatou ʼu fai fakatuʼutuʼu moʼo fakahoko ia te gāue fai faka mafola ʼo te Puleʼaga pea mo tanatou fai ʼo ni ʼu tisipulo.—Mateo 24:14; 28:19, 20.
ʼE Fakamahino Lelei e Sehova Te ʼu Akonaki Faka Lotu
13. ʼI te ʼu taʼu 1920, neʼe fakamahino lelei feafeaʼi e Sehova ia te ʼu akonaki faka lotu ki tana hahaʼi?
13 ʼE toe fakamālamaʼi māmālie e Sehova te mahino ʼo tana ʼu hahaʼi ki te ʼu akonaki faka lotu. Ohage la ko Apokalipesi 12:1-9, MN, ʼaē ʼe talanoa ai ki te ʼu ʼaluʼaga fakatātā e tolu—ko “te fafine” faitama ʼe fānau, mo “te talakone,” pea mo “te tama, te tamasiʼi tagata.” ʼE koutou ʼiloʼi peʼe ko ai ʼaē ʼe fakatātā e nātou takitahi ʼaia? Neʼe fakamahino te faʼahi ʼaia ʼi te alatike neʼe ko tona kupu tāfito “Te Tupu Ake ʼo Te Fenua,” ʼi Te Tule Leʼo ʼo te ʼaho 1 ʼo Malesio, 1925 (Faka Pilitania). Neʼe maʼu ʼi te alatike ʼaia he fakamahino ʼe lelei age ʼo te ʼu lea faka polofeta ʼo ʼuhiga mo te fakatuʼu ʼo te Puleʼaga, ʼo tou mahino lelei ai ko kautahi kehekehe e lua—te kautahi ʼa Sehova pea mo te kautahi ʼa Satana. Pea ʼi te taʼu 1927 pea mo te taʼu 1928, neʼe mahino ai te hahaʼi ʼa te ʼAtua ko te Po Tapu pea mo te fakamanatu ʼo te ʼu ʼaho tupu, ʼe mole tuʼu ia ʼi te Tohi-Tapu, pea neʼe nātou fakagata ai tanatou fai ia te ʼu fakafiafia ʼaia.
14. ʼI te ʼu taʼu 1930, koteā te ʼu fakamahino ʼaē neʼe fai ʼo ʼuhiga mo ʼihi akonaki faka lotu?
14 ʼI te ʼu taʼu 1930, neʼe mahino lelei age te hahaʼi ʼa te ʼAtua ki te tahi ʼu moʼoni faka lotu e tolu. Lolotoga ni ʼu taʼu, ko te kau Ako ʼo te Tohi-Tapu, neʼe nātou ʼiloʼi ko te hahaʼi kaugamālie, peʼe ko te “toe hahaʼi tokolahi,” ʼaē ʼe talanoa ki ai iā Apokalipesi 7:9-17, MN, neʼe kehe ia mo te toko 144 000, ʼaē ka nātou kaugā hau pea mo pelepitelo mo Kilisito. (Apokalipesi 5:9, 10; 14:1-5) Kae neʼe mole heʼeki mahino lelei peʼe ko ai te hahaʼi kaugamālie ʼaia. Ohage pe ko tatatou lava sio lelei ki te ʼu meʼa pea mo tonatou lanu ʼaki te mafoa ake ʼo te laʼā, ʼi te taʼu 1935, neʼe fakamahino ai ko te hahaʼi kaugamālie ʼe ko nātou ʼaē ka hāo anai ʼi “te mamahi lahi,” pea mo nātou maʼu ia te ʼamanaki ʼaē ko te māʼuʼuli ʼo heʼegata ʼi te kele. Ki muli age, ʼi te taʼu pe ʼaia, neʼe lahi te ʼu fenua neʼe fai ai te fakamahinohino lelei ʼo ʼuhiga mo te fānau ʼa te kau Fakamoʼoni ʼa Sehova ʼaē ʼe kei nātou ako ʼi te ʼu faleako. ʼI te malamanei kātoa, neʼe kua ʼāsili mālohi te fia tauhi ʼa te hahaʼi ki tonatou puleʼaga, kae neʼe mahino ki te kau Fakamoʼoni ʼe mole feala ke nātou tauhi ki te fuka ʼo tonatou puleʼaga. ʼI te taʼu ʼaē neʼe hoa kiai, neʼe fakamahino e te Sosiete te tahi moʼoni faka lotu: ko Sesu neʼe mole mate ʼi te koluse kae neʼe mate ʼi te pou.—Gaue 10:39.
15. Ko te temi fea ʼaē neʼe fakahā ai te maʼuhiga ʼo te taputapu ʼo te toto pea koteā te fakamahino ʼaē neʼe fai?
15 ʼI te hili ʼo te Lua Tau Faka Malamanei, ʼaē neʼe fakaʼaogaʼi lahi ai te ʼu foʼi huki toto maʼa te kau solia ʼaē neʼe lāvevea, neʼe fai te fakamahino lelei ʼo ʼuhiga mo te taputapu ʼo te toto. ʼI Te Tule Leʼo Fakapilitānia ʼo te ʼaho 1 ʼo Sūlio 1945, neʼe fakaloto mālohiʼi ai “te kau atolasio fuli ʼo Sehova ʼaē ʼe nātou fia maʼu ia te maʼuli heʼegata ʼi tona mālama foʼou faitotonu, ke nātou fakaʼapaʼapa ki te taputapu ʼo te toto pea mo nātou mulimuli ki te ʼu lēkula faitotonu ʼa te ʼAtua ʼo ʼuhiga mo te faʼahi maʼuhiga ʼaia.”
16. Ko te temi fea ʼaē neʼe tā ai te Tohi-Tapu Faka Pilitania Les Saintes Écritures — Traduction du monde nouveau, pea koteā te ʼu faʼahi maʼuhiga e lua ʼo te Tohi-Tapu ʼaia?
16 ʼI te taʼu 1946, neʼe ʼaoga ke fai he fakaliliu foʼou ʼo te Tohi-Tapu ʼaki te ʼu kumi ʼaē neʼe fai ki muʼa atu pea neʼe mole fakapipiki kiai he ʼu talatisio ʼo te Keletiate. Neʼe kamata te fai fakaliliu ʼaia ʼi Tesepeli 1947. ʼI te taʼu 1950, neʼe tā ʼi te Fakapilitānia ia te Tohi-Tapu ʼaē ko te Les Écritures grecques chrétiennes — Traduction du monde nouveau (te Tauhi Foʼou). ʼO kamata ʼi te taʼu 1953, neʼe tā tohi e nima ʼo te ʼu Koga Tohi-Tapu Faka Hepeleo (te Tauhi Āfea) ʼi te Faka Pilitania. Ko te tohi fakaʼosi neʼe tā ʼi te taʼu 1960, hili teitei taʼu e 12 ʼi te fakatuʼutuʼu ʼaē ke fai he fakaliliu foʼou. Ko te Tohi-Tapu kātoa Les Saintes Écritures — Traduction du monde nouveau neʼe tā ʼi te taʼu 1961. Kua maʼu ʼi te temi nei te Tohi-Tapu ʼaia ʼi te ʼu tuʼuga lea pea ʼe maʼu ai te ʼu faʼahi maʼuhiga. ʼE maʼu ai te huafa ʼo te ʼAtua, ko Sehova. Pea ko te fai fakaliliu ʼo te Tohi-Tapu ʼaia ʼo mulimuli ki te lea ʼāfea, neʼe ko he tafitoʼaga ʼaia ki te haga tuputupu ʼa te mahino ʼo ʼuhiga mo te ʼu moʼoni ʼa te ʼAtua.
17. Ko te faʼahi fea ʼaē neʼe tou mahino lelei kiai ʼi te taʼu 1962?
17 ʼI te taʼu 1962, neʼe tou mahino lelei ai peʼe ko ai “te ʼu pule māʼoluga” ʼaē ʼe talanoa kiai iā Loma 13:1, MN, pea mo te tuʼakoi ʼo te fakalogo ʼa he Kilisitiano ki te ʼu pule ʼaia. Ko te ʼu kumi loloto ʼaē neʼe fai ki te kapite 13 ʼo Loma pea mo te tahi ʼu vaega ohage ko Tito 3:1, 2 pea mo 1 Petelo 2:13, 17, neʼe fakamahino lelei ai ko te kupuʼi palalau “pule māʼoluga” ʼe mole faka ʼuhiga kiā Sehova ʼAtua pea mo Sesu Kilisito, kae ʼe faka ʼuhiga ki te ʼu puleʼaga fakatagata.
18. Ko te ʼu faʼahi fea ʼaē neʼe tou mahino kiai ʼi te ʼu taʼu 1980?
18 ʼI te ʼu taʼu ki muli age, ko te mālama ʼo te ala ʼo te kau faitotonu, neʼe tuputupu tona gigila. ʼI te taʼu 1985, neʼe tou mahino lelei ai ʼo ʼuhiga mo he tahi ʼe lau ʼe faitotonu “ki te maʼuli,” pea mo he tahi ʼe faitotonu ʼi tona ʼuhiga kaumeʼa mo te ʼAtua. (Loma 5:18, MN; Sakopo 2:23) ʼI te taʼu 1987, neʼe fakamahino ai te faka ʼuhiga ʼo te Supileo Faka Kilisitiano.
19. ʼI te ʼu taʼu pe ʼaē neʼe hoki ʼosi atu, koteā te tahi ʼu fakamahino ʼaē neʼe foaki e Sehova ʼi te faʼahi fakalaumālie?
19 ʼI te taʼu 1995, neʼe tou mahino lelei ai ki te vaheʼi kehe ʼo “te u ovi” pea mo “te u tao.” ʼI te taʼu 1998, neʼe fakamahino lelei ai te fale lotu ʼaē neʼe hā kiā Esekiele, ʼaē neʼe kua lolotoga hoko. ʼI te taʼu 1999, neʼe tou mahino ai peʼe ko te temi fea ʼaē neʼe hoko ai ‘te tuʼu ʼo te meʼa fakalialia ʼi te koga meʼa tapu’ pea neʼe hoko feafeaʼi. (Mateo 24:15, 16; 25:32) Pea ʼi te taʼu 2002, neʼe tou mahino lelei age ai ʼo ʼuhiga mo te faka ʼuhiga ʼo te tauhi ki te ʼAtua “ ʼaki te laumālie pea mo te moʼoni.”—Soane 4:24, MN.
20. Koteā te tahi faʼahi ʼaē neʼe tuputupu ai te mahino ʼa te hahaʼi ʼa te ʼAtua?
20 ʼO hilifaki ki te ʼu fetogi ʼaē neʼe fai ʼo ʼuhiga mo te kautahi pea mo te ʼu akonaki faka lotu, neʼe ʼi ai mo te ʼu fetogi ʼo ʼuhiga mo te aga faka Kilisitiano. Ohage la ʼi te taʼu 1973, neʼe tou mahino ko te suluka ʼe ina “ ʼulihi te sino” pea neʼe ko he agahala mamafa. (2 Kolonito 7:1) Hili taʼu e hogofulu, ko Te Tule Leʼo ʼo te ʼaho 15 ʼo Sūlio 1983, neʼe fakahā lelei ai tatatou manatu ʼo ʼuhiga mo te fakaʼaogaʼi ʼo te ʼu mahafu. Ko te ʼu ʼaluʼaga ʼaenī, ʼe ko he ʼu faʼifaʼitaki ʼo te tuputupu ʼo te gigila ʼo te mālama ʼi totatou temi.
Tou Haga Haʼele ʼi Te Ala ʼo Te Mālama ʼAē ʼe Tuputupu Tuʼumaʼu Tona Gigila
21. Ko te manatu fea ʼaē ka tokoni mai anai ke tou haga haʼele ʼi te ala ʼaē ʼe tuputupu tuʼumaʼu tona gigila?
21 ʼE ʼui fēnei e te tagata ʼāfea kua fualoa tana ʼi te moʼoni: “ ʼE feala ke faigataʼa te tali ʼo he fetogi pea mo hata mulimuli kiai.” Koteā ʼaē neʼe tokoni kiā ia ke ina tali te ʼu fetogi lahi ʼaia, ʼaē neʼe sio kiai ʼi te ʼu taʼu e 48 ʼaē neʼe ina faka mafola ai te Puleʼaga? ʼE ina tali fēnei: “Ko te faʼahi ʼaē ʼe maʼuhiga tāfito, ko tatatou faʼahiga tali ia te ʼu fetogi ʼaia. Kapau ʼe mole tou tali leleiʼi he fetogi, pea ʼe hage ʼe tou holomuli tatou kae haʼele te kautahi ki muʼa. ʼI te ʼu temi ʼaē neʼe faigataʼa ai haku tali ʼo he fetogi, neʼe au fakakaukauʼi te ʼu palalau ʼaē neʼe fai e Petelo kiā Sesu: ‘ ʼAliki, ke mātou ʼolo la kiā ʼai? ʼE ke maʼu koe te ʼu folafola ʼo te maʼuli heʼegata.’ Pea ʼe au ʼui fēnei ʼi toku loto: ‘ ʼE au ʼalu anai kifea—ke au ʼalu ki tuʼa, ki te fakapōʼuli ʼo te malamanei?’ ʼAki taku manatu ʼaia, neʼe feala taku tapiki maʼu ki te kautahi ʼa te ʼAtua.”—Soane 6:68, MN.
22. Koteā tona fua lelei kiā tatou ia te mālama ʼaē ʼe haʼu mai te ʼAtua?
22 ʼE mahino ia ʼe nofo te malamanei ʼi te fakapōʼuli ʼaoʼao. Kae ʼi te haga fakamālamaʼi e Sehova tana hahaʼi, kua ʼiloga lelei te kehekehe ʼo tana hahaʼi pea mo te malamanei. Koteā tona fua lelei ʼo te mālama ʼaia kiā tatou? ʼE moʼoni, ko te mālama ʼo te foʼi hila ʼe fakamū ki he ʼala ʼe fakapōʼuli ʼe mole ina pulihi anai te pū ʼaē ʼi te ala, ʼo toe feiā pe, ko te mālama ʼaē ʼe haʼu mai te Folafola ʼa te ʼAtua ʼe mole ina pulihi anai te ʼu hele. Kae ʼaki te mālama ʼaē ʼe haʼu mai te ʼAtua, ʼe feala anai kiā tatou ke tou tekeʼi te ʼu hele ʼaia, ke feala hatatou haga haʼele ʼi te ala ʼo te mālama ʼaē ʼe tuputupu tuʼumaʼu tona gigila. Koia, tou haga tokagaʼi te lea faka polofeta ʼa Sehova, “o hage he malama e mu i he faahi fakapouli.”—2 Petelo 1:19.
ʼE Kei Koutou Manatuʼi Koa?
• Ko te ʼu fetogi fea ʼaē neʼe fakahoko e Sehova ʼo ʼuhiga mo te kautahi ʼo tana hahaʼi?
• ʼAki te tuputupu ʼo te mālama ʼaē ʼe haʼu mai te ʼAtua, ko te ʼu fetogi fea ʼaē neʼe hoko ʼi te faʼahi ʼo te ʼu akonaki faka lotu?
• Ko te ʼu fetogi fea ʼaē neʼe koutou sio kiai, pea koteā ʼaē neʼe tupu ai takotou tali ia te ʼu fetogi ʼaia?
• He koʼe ʼe koutou fia haga haʼele ʼi te ala ʼo te mālama ʼaē ʼe tuputupu tona gigila?
[Paki ʼo te pasina 15]
ʼI te taʼu 1950, neʼe fakahā e N. H. Knorr ia te Tohi-Tapu Les Saintes Écritures— Traduction du monde nouveau