ʼE Koutou Maʼuliʼi Koa Te Moʼoni?

“Koutou fetogi aki te fakafoou o toutou atamai, ke koutou iloi, pe kotea te finegalo o te Atua, te mea e lelei mo taau mo ia pea mo te mea ae e katoa.”—Loma 12:2.

1, 2. He koʼe ʼe mole ko he meʼa faigafua hatatou liliu ko he Kilisitiano ʼi te temi nei?

ʼE MOLE faigafua hakita liliu ko he Kilisitiano moʼoni ʼi te ʼu ʼaho fakamuli ʼaenī—koteʼuhi ʼe ko “he u temi faigataa.” (2 Timoteo 3:1) ʼE moʼoni, ʼe tonu ke tou mālo ʼi te malamanei ke feala hatatou muliʼi te faʼifaʼitaki ʼa Kilisito. (1 Soane 5:4) Koutou manatuʼi te palalau ʼa Sesu ʼo ʼuhiga mo te ala ʼaē ʼe haʼele ai te kau Kilisitiano: “Koutou hū ʼi te matapā fāveliveli; heʼe laulahi pea mo ʼātea ia te ala ʼaē ʼe fakatau ki te fakaʼauha, pea e tokolahi ia nātou ʼe hū ai; kaʼe fāveliveli ia te matapā pea mo lauveliveli ia te ala ʼaē ʼe fakatau ki te maʼuli, pea e tokosiʼi ia nātou ʼe nātou maʼu.” Neʼe ina toe ʼui fēnei: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi ʼi te ʼaho fuli pe, pea ke muli tuʼumaʼu ia te ʼau.”—Mateo 7:13, 14, MN; Luka 9:23, MN.

² ʼE faigataʼa ki he Kilisitiano ke haga haʼele ʼi te ala fāveliveli ʼaē ʼe iku ki te maʼuli. He koʼe ʼe faigataʼa? Heʼe kua tou foaki totatou maʼuli pea kua tou papitema, pea ko Satana ʼe faiga mālohi ke ina fakahalaʼi tatou ʼaki tana ʼu kākā. (Efeso 6:11, MN; kiʼi nota ʼi te lalo pasina) ʼE ina ʼiloʼi totatou ʼu vaivaiʼaga pea ʼe ina faigaʼi ke ina maumauʼi totatou maʼuli fakalaumālie. Kapau neʼe ina faigaʼi ke ina fakahalaʼi ia Sesu, pea ʼe ina toe fai feiā pe anai kia tatou.—Mateo 4:1-11.

Te ʼu Kākā ʼa Satana

3. Neʼe fakatupu feafeaʼi e Satana ia te lotolotolua ʼi te ʼatamai ʼo Eva?

³ ʼE fakaʼaogaʼi e Satana te lotolotolua. ʼE ina kumi te ʼu vaivaiʼaga ʼo totatou teu tau fakalaumālie. ʼI te kamataʼaga, neʼe ina fakaʼaogaʼi te kākā ʼaia kia Eva, ʼo ina fehuʼi age: “ ʼE moʼoni koa neʼe ʼui atu e te ʼAtua ke ʼaua naʼa koulua kai ki te ʼakau fuli pe ʼaē ʼi te ʼōloto?” (Senesi 3:1) Ko tona faka ʼuhiga, neʼe ʼui fēnei age e Satana, ‘ ʼE feala moʼoni koa ke tapuʼi atu te faʼahi ʼaia e te ʼAtua? ʼE ina fufū koa he meʼa lelei ke mole koulua ʼiloʼi? ʼE ʼiloʼi e te ʼAtua ko te ʼaho ʼaē ka koulua kai anai ki te fuaʼi ʼakau, ʼe ava anai ʼokoulua ʼu mata pea ʼe koulua hage anai ko ia, ʼo ʼiloʼi te meʼa ʼaē ʼe lelei pea mo te meʼa ʼaē ʼe kovi!’ Koia neʼe fakatupu ai e Satana ia te lotolotolua ʼi te ʼatamai ʼo Eva, ohage ko he pulapula neʼe ina to pea neʼe fakatalitali ke homo ake.—Senesi 3:5.

4. Koteā te ʼu lotolotolua ʼaē ʼe feala ke maʼu e ʼihi ia ʼaho nei?

⁴ ʼE fakaʼaogaʼi feafeaʼi e Satana te kākā ʼaia ʼi te temi nei? Kapau ʼe tou meʼa noaʼi tatatou lau ia te Tohi-Tapu, tatatou ako takitokotahi, tatatou faikole, pea mo tatatou minisitelio faka Kilisitiano pea mo te ʼu fono, pea ʼe faigafua te kākāʼi ʼo tatou. Ohage la: “ ʼE tou ʼiloʼi feafeaʼi ʼe ko te moʼoni ʼaenī ʼaē neʼe akoʼi e Sesu?” “ ʼE tou maʼuʼuli moʼoni koa ʼi te ʼu ʼaho fakamuli? Tahi ʼaē meʼa, kua tou lolotoga maʼuli nei ʼi te 21 sēkulō.” “Kua tou ōvi koa ki Halamaketone, peʼe kei tuai mai?” Kapau ʼe malaga ia tatou te taʼi lotolotolua ʼaia, koteā te meʼa ʼaē ʼe feala ke tou fai moʼo pulihi ʼo te ʼu manatu ʼaia?

5, 6. Koteā te meʼa ʼaē ʼe tonu ke tou fai mo kapau ʼe tou lotolotolua?

⁵ Neʼe foaki mai e Sakopo te tokoni ʼaoga ʼi tana tohi te manatu ʼaenī: “Kapau ko he tahi ia koutou e ina fia mau te poto, ke ina kole ki te Atua, e ina foaki mo te ofa ki te tagata fuape pea e mole ina valoki, e ina foakiʼage anai kia te ia. Kae ke ina kole mo tui, aua naa lotolotolua i he mea, koteuhi ko ae e lotolotolua, e hage ia ko te galu o te moana e lagai e te matagi o fakahou. Pea naa amanaki te tagata aia e ina tali anai he mea mai te Aliki: ko he tagata e lotolotolua pea e lotomaveu i ana gaue fuape.”—Sakopo 1:5-8.

⁶ Pea koteā te meʼa ʼe tonu ke tou fai? ʼE tonu ‘ke tou haga kole ki te ʼAtua’ ke ina foaki mai te tui, mo te mahino, pea ke tokoni mai ki tatatou ako takitokotahi ʼo ʼuhiga mo ni fehuʼi peʼe ko ni ʼu manatu fakatupu lotolotolua. ʼE tou lava kumi tokoni kia nātou ʼaē ʼe mālolohi ʼi te tui, pea ʼe mole tou lotolotolua heʼe ko Sehova ʼe tokoni mai anai kia tatou mo kapau ʼe ʼaoga. Neʼe toe ʼui fēnei e Sakopo: “Koutou fakalogo ki te Atua, pea koutou fakafehagai ki te temonio pea e hola mamao anai maià koutou. Koutou fakaovi ki te Atua pea e fakaovi atu anai kia koutou.” Ei, ʼe puli anai tatatou ʼu lotolotolua mo kapau ʼe tou fakaōvi ki te ʼAtua ʼaki te ako pea mo te faikole.—Sakopo 4:7, 8.

7, 8. Ko te ʼu fakatuʼutuʼu fea ʼaē ʼe fakaʼiloga ai te faʼahiga tauhi ʼaē neʼe akoʼi mai e Sesu, pea ko ai ʼaē ʼe ina fakahoko ia te faʼahi ʼaia?

⁷ Ohage la, ko te fehuʼi ʼaenī: E feafeaʼi hatatou ʼiloʼi ko te tauhi ʼaē ʼe tou maʼuliʼi ʼe ko ia ʼaē neʼe akoʼi mai e Sesu? Moʼo tali ki te fehuʼi ʼaia, ko te puani fea ʼaē ʼe tonu ke tou vakaʼi? ʼE fakahā mai e te Tohi-Tapu, ko te kau Kilisitiano moʼoni ʼe tonu ke nātou femaʼuʼaki te ʼofa moʼoni. (Soane 13:34, 35) ʼE tonu ke nātou tāpuhā te huafa ʼo te ʼAtua, ia Sehova. (Isaia 12:4, 5; Mateo 6:9) Pea ʼe tonu ke nātou faka mafola te huafa ʼaia.—Ekesote 3:15; Soane 17:26.

⁸ Ko te tahi fakaʼiloga ʼo te tauhi moʼoni ʼe ko te fakaʼapaʼapa ʼaē ki te Folafola ʼa te ʼAtua, ia te Tohi-Tapu. ʼE ko te tohi pe ʼaia e tahi ʼe talanoa ki te ʼulugaaga ʼo te ʼAtua pea mo tana ʼu fakatuʼutuʼu. (Soane 17:17; 2 Timoteo 3:16, 17) Pea tahi ʼaē meʼa, ʼe faka mafola e te kau Kilisitiano moʼoni ia te Puleʼaga ʼo te ʼAtua, ʼe ko te falalaʼaga pe ʼaia e tahi maʼa te tagata ki he maʼuli heʼegata ʼi te palatiso fakakelekele. (Maleko 13:10; Apokalipesi 21:1-4) ʼE nātou fakamamaʼo mai te ʼu meʼa faka politike ʼo te mālama ʼaenī pea mo tona faʼahiga maʼuli fakalialia. (Soane 15:19; Sakopo 1:27; 4:4) Ko ai ʼi te temi nei ʼaē ʼe nātou fakahoko te ʼu fakatuʼutuʼu ʼaia? Ko te tali pe e tahi ki te faʼahi ʼaia—ko te kau Fakamoʼoni ʼa Sehova.

E Feafeaʼi Mo Kapau ʼe Tou Lotolotolua

9, 10. Koteā ʼaē ʼe tou lava fai moʼo tekeʼi ʼo te ʼu lotolotolua?

⁹ Koteā te meʼa ke tou fai mo kapau ʼe tou lotolotolua? Ia Tāʼaga Lea kapite 2, ʼe foaki mai e te Hau poto ko Salomone te tali ʼaenī: “Ê toku foha, kapau ʼe ke tali taku ʼu folafola pea mo ke taupau fakalelei ia te koe taku ʼu fakatotonu, ke feala ai hau tokaga ki te poto ʼaki tou taliga, ke ke fakafalele ai tou loto ki te fakasiosio tonu; kapau leva ʼe ke pāui ki te ʼatamai pea kapau ʼe ke kalaga ʼaki tou leʼo ki te fakasiosio tonu, kapau ʼe ke haga kumi te meʼa ʼaia ohage ko te siliva, pea kapau ʼe ke kumi tuʼumaʼu ohage ko he ʼu koloā maʼuhiga neʼe fufū, pea ʼe ke mahino ai anai ki te manavasiʼi kia Sehova pea ʼe ke maʼu ai anai te ʼatamai mālama ʼo ʼuhiga mo te ʼAtua.”—Tāʼaga Lea 2:1-5.

¹⁰ ʼE mole fakapunamaʼuli koa ia te manatu ʼaia? Kapau ʼe tou tali lelei ia te poto ʼo te ʼAtua, pea ʼe tou “maʼu ai anai te ʼatamai mālama ʼo ʼuhiga mo te ʼAtua.” Ei, ʼe tou lava ʼiloʼi te Tuʼi ʼAliki ʼo te ʼatulaulau mo kapau ʼe tou tali lelei pea mo faka maʼuhigaʼi tana ʼu folafola. Ko tona faka ʼuhiga ke tou haga kia Sehova ʼi te faikole pea mo te ako takitokotahi. Ko te ʼu koloā ʼaē neʼe fufū ʼo tana Folafola, ʼe feala ke nātou pulihi te ʼu meʼa fuli ʼaē ʼe tou lotolotolua ai pea mo tokoni mai ke tou sio ki te mālama ʼo te moʼoni.

11. Neʼe feafeaʼi te lotolotolua ʼa te kaugana ʼa Eliseo?

¹¹ ʼE tou maʼu te faʼifaʼitaki lelei ia 2 Hau 6:11-18, pe neʼe tokoni feafeaʼi ia te faikole ki te tagata kaugana ʼa te ʼAtua neʼe mataku pea mo lotolotolua. Neʼe mole maʼu e te kaugana ʼa Eliseo ia te fakasiosio fakalaumālie. Neʼe mole sio ia ki te ʼu foʼi kautau ʼo selo ʼaē neʼe tokoni ki te polofeta ʼa te ʼAtua, ʼaē neʼe ʼamanaki ke ʼohofiʼi e te kautau ʼo Silia. ʼI te mataku ʼa te kaugana, neʼe kalaga fēnei: “ ʼAliki! Koteā ʼaē ka tā fai?” Neʼe koteā te tali ʼa Eliseo? “ ʼAua naʼa ke mataku, heʼe tokolahi age ia nātou ʼaē ʼe kau mo tāua ia nātou ʼaē ʼe kau mo nātou.” Kae neʼe feafeaʼi he fakalotoʼi ʼo te kaugana koteʼuhi neʼe mole feala ke sio ki te ʼu kautau ʼo selo?

12. (a) Neʼe pulihi feafeaʼi ia te ʼu lotolotolua ʼa te kaugana? (b) ʼE tou lava pulihi feafeaʼi tatatou ʼu lotolotolua?

¹² “Neʼe faikole ia Eliseo pea mo ʼui maʼana: ‘Ê Sehova, fakalelei ʼo avahi ʼona mata, ke feala hana sio.’ Neʼe avahi atu aipe e Sehova te ʼu mata ʼo te kaugana, ʼo feala ai ke sio; pea koʼeni, ko te koga meʼa moʼugaʼia neʼe lahi ai te ʼu hōsi pea mo te ʼu saliote tau afi neʼe nātou takatakai ia Eliseo.” ʼI te temi ʼaia neʼe avahi e Sehova te ʼu mata ʼo te kaugana ke sio ki te ʼu kautau ʼo selo ʼaē neʼe nātou puipui ia Eliseo. ʼAua naʼa tou ʼamanaki ke hoko te taʼi tokoni fakaʼatua ʼaia ʼi te temi nei. Tou manatuʼi, ko te tagata kaugana ʼa te polofeta, neʼe mole ina maʼu ia te Tohi-Tapu katoa ke feala hana ako moʼo fakamālohiʼi tana tui. Kae ko tatou ʼe tou maʼu ia te Tohi-Tapu. Kapau ʼe tou fakaʼaogaʼi lahi ia te Tohi-Tapu, pea ʼe toe feala pe ke fakamālohiʼi feiā mo tatatou tui. Ohage la, ʼe feala ke tou fakakaukauʼi te ʼu fakamatala ʼaē ʼe talanoa ʼo ʼuhiga mo Sehova ʼi tona malaʼe ʼaē ʼi selo. ʼE hā lelei ʼi te ʼu fakamatala ʼaia ko Sehova ʼe ʼi ai tana kautahi ʼi selo, ʼe lagolago ki tana ʼu kaugana ʼi te gāue faka malamanei ʼi te temi nei.—Isaia 6:1-4; Esekiele 1:4-28; Taniela 7: 9, 10; Apokalipesi 4:1-11; 14:6, 7.

Koutou Tokaga Ki Te ʼu Kākā ʼa Satana!

13. ʼE faigaʼi feafeaʼi e Satana ke ina fakavaivaiʼi tatatou tapiki ki te moʼoni?

¹³ Koteā te tahi ʼu kākā ʼa Satana moʼo fakavaivaiʼi totatou maʼuli fakalaumālie pea mo tatatou tapiki ki te moʼoni? ʼE kau ai te ʼu aga heʼeʼaoga, ʼi tona ʼu faʼahiga ʼaluʼaga kehekehe. ʼI te mālama ʼaenī ʼaē ʼe holi mālohi ki te ʼu felāveʼi fakasino: ko he tahi ʼe tono peʼe fai folonikasio ʼi he po pe e tahi, kua liliu ia te ʼu aga ʼaia ko he meʼa ʼe fai māhani e he taʼiake ʼe holi ki te ʼu fakafiafia. ʼE fakaneke e te sinema, mo te televisio pea mo te ʼata viteo te faʼahiga maʼuli ʼaia. ʼE mafola te ʼu felāveʼi fakasino heʼeʼaoga ʼi te ʼu tala logo, kae tāfito ʼi te Internet. ʼE lave gafua te fakahala ʼaia kia nātou ʼaē ʼe fia ʼiloʼi meʼa fuli.—1 Tesalonika 4:3-5; Sakopo 1:13-15.

14. He koʼe neʼe to ʼihi Kilisitiano ki te ʼu kākā ʼa Satana?

¹⁴ ʼI te fia ʼiloʼi meʼa fuli ʼa ʼihi Kilisitiano, neʼe nātou leleiʼia te ʼu meʼa ʼaia pea neʼe nātou ʼulihi ai tonatou ʼatamai pea mo tonatou loto ʼaki tanatou sioʼi te ʼu paki fakalialia pea mo heʼeʼaoga. Neʼe nātou tuku ia nātou totonu ke nātou to ki te hele ʼa Satana. ʼI te agamāhani ko te fai tuʼumaʼu ʼo te faʼahi ʼaia ʼe ina taki ki te mate fakalaumālie. Ko nātou ʼaia neʼe mole nātou fia hage ko “he ʼu kiʼi tamaliki ʼi te meʼa ʼaē ʼe kovi.” Neʼe mole nātou liliu “ko he ʼu hahaʼi kua katoa ʼi te ʼuhigaʼi tagata.” (1 Kolonito 14:20, MN ) ʼI te taʼu fuli, ʼe hoko te ʼu mamahi ki te toko lauʼi afe heʼe mole nātou taupau te ʼu pelesepeto pea mo te ʼu lekula ʼo te Folafola ʼa te ʼAtua. Neʼe mole nātou tui pea mo taupau tonatou “teu tau katoa ʼo te ʼAtua.”—Efeso 6:10-13, MN; Kolose 3:5-10; 1 Timoteo 1:18, 19.

Tou Taupau Lelei Te ʼu Meʼa ʼAē ʼe Tou Maʼu

15. He koʼe ʼe feala ke faigataʼa ki ʼihi tanatou leleiʼia tonatou tofiʼa fakalaumālie?

¹⁵ Neʼe ʼui fēnei e Sesu: “E koutou iloi anai te mooni, pea e fakaateaina anai koutou e te mooni.” (Soane 8:32) Tokolahi te kau Fakamoʼoni kua nātou līaki tonatou faʼahiga maʼuli ʼāfea pea mo te ʼu kautahi faka lotu. Pea ʼe nātou leleiʼia ʼaupito te ʼāteaina ʼaē ʼe foaki e te moʼoni. ʼI te tahi faʼahi, ko ʼihi kau tūpulaga neʼe akoʼi nātou e tanatou ʼu mātuʼa ʼi te moʼoni, pea ʼe lagi faigataʼa kia nātou hanatou leleiʼia tonatou tofiʼa fakalaumālie. Neʼe heʼeki nātou kau ki te lotu hala peʼe ki te mālama ʼaē ʼe ina faka maʼuhigaʼi te kumi ʼo te ʼu fakafiafia, te toloke, pea mo te ʼu aga heʼeʼaoga. Koia la ʼaē, ʼe feala ke mole nātou sisio ki te kehekehe ʼaupito ʼo totatou palatiso fakalaumālie pea mo te mālama kākā ʼa Satana. ʼE feala ki ʼihi ke nātou fia ʼahiʼahiʼi te meʼa kona ʼo te malamanei ke nātou ʼiloʼi ai te ʼu meʼa ʼaē ʼe mole heʼeki nātou ʼahiʼahi!—1 Soane 2:15-17; Apokalipesi 18:1-5.

16. (a) Koteā te ʼu fehuʼi ʼaē ʼe tou lava fai? (b) Koteā ʼaē ʼe akoʼi mai kia tatou pea mo fakaloto mālohi ke tou fai?

¹⁶ ʼE tonu koa ke tou fai te ʼu meʼa ʼaē ʼe kovi ke tou ʼiloʼi ai ʼe fakatupu lotomamahi? ʼE mole feʼauga koa la ʼi tatatou sio ki te maʼuli ʼo ʼihi? ʼE tonu koa ke tou ʼolo ki “te pela” ʼo te malamanei moʼo vakaʼi peʼe ʼi ai he meʼa lelei? (2 Petelo 2:20-22) Neʼe fakamanatuʼi fēnei e Petelo ki te kau Kilisitiano ʼo te ʼuluaki sēkulō ʼaē neʼe kau ki muʼa atu ʼi te mālama ʼo Satana: “Kua feʼauga kia koutou takotou fai ʼi te temi ʼaē kua hili te finegalo ʼo te ʼu puleʼaga, ʼi takotou mulimuli ki te ʼu aga ʼe mole tonu ke fai, ki te ʼu mānumānu, ki te ʼu ʼinu fakavalevale ʼo te vino, ki te ʼu fakafiafia fakavalevale, ki te ʼu konahihia pea mo te ʼu tauhi tamapua ʼaē ʼe tauteaʼi e te lao.” ʼE mahino papau ia, ʼe mole tonu ke tou ʼahiʼahi te ‘pela ʼaē ʼe fai ai te ʼu aga fakalialia’ ke tou ʼiloʼi ai ʼe kovi te taʼi maʼuli ʼaia. (1 Petelo 4:3, 4, MN ) Kae ʼe akoʼi mai te ʼu lekula māʼoluga ʼa Sehova ʼi totatou ʼu Fale ʼo te Puleʼaga, ʼaē ko he ʼu fale moʼo ako ʼo te Tohi-Tapu. Pea neʼe fakaloto mālohiʼi tatou ke tou fakaʼaogaʼi totatou fealagia fakakaukau moʼo fakamoʼoni ʼe tou nofo mo te moʼoni, pea ke tou maʼuliʼi te moʼoni.—Sosue 1:8; Loma 12:1, 2; 2 Timoteo 3:14-17.

Ko Totatou Higoa ʼe Mole Ko He Fakaʼiloga Pe

17. ʼE lava feafeaʼi hatatou liliu ko he kau Fakamoʼoni faiva ʼa Sehova?

¹⁷ Kapau kua tou tali te moʼoni, pea ʼe tou faiga anai ke tou fakahā ki ʼihi ʼi te ʼu temi faigamālie fuli. ʼE mole faka ʼuhiga leva ʼe tou fakamālohiʼi anai ia nātou ʼaē ʼe mole nātou loto ki te faʼahi ʼaia. (Mateo 7:6) Kae ʼe mole tou ufiufi anai ʼi te fakahā ko tatou ko te kau Fakamoʼoni ʼa Sehova. Kapau ʼe fia logo moʼoni he tahi he neʼe ina lagaʼi he fehuʼi peʼe neʼe ina toʼo he tohi faka Tohi-Tapu, ʼe tou faiga mālohi anai ke tou fakahā tatatou ʼamanaki. ʼIo, ʼe maʼua anai ke tou ʼave tuʼumaʼu mo tatou he ʼu tohi ʼi te ʼu potu fuli ʼaē ʼe tou taka ai—ʼi te ʼu ʼapi, ʼi te fale gāue, ʼi te faleako, ʼi te ʼu fale koloā, peʼe ʼi te ʼu koga meʼa mālōlō.—1 Petelo 3:15.

18. He koʼe ʼe ko he mālohi ki totatou maʼuli, mokā tou fakahā lelei ko tatou ko te ʼu Kilisitiano?

¹⁸ Ka tou fakahā lelei ko tatou ko te kau Kilisitiano, ʼe tou lotomālohi ai moʼo tauʼi ʼo te ʼu kākā ʼa Satana. Kapau ʼe ʼi ai he ʼaho tupu peʼe ko te Po Tapu peʼe ko he loteli, ʼe lagi ʼui anai e tatatou ʼu kaugā gāue, “Tuku noaʼi ia ia. ʼE ko te Fakamoʼoni ʼa Sehova.” Tahi ʼaē meʼa, ʼe mole fai mai anai e te hahaʼi he ʼu fakahuahua heʼeʼaoga. Koia kapau ʼe ʼiloʼi ko tatou ko he kau Kilisitiano, pea ʼe ko he meʼa lelei ki totatou maʼuli, ohage ko tona ʼui e te ʼapositolo ko Petelo: “ ʼIo, ko ai te tagata ʼaē ka ina fai atu anai he meʼa kovi kia koutou mo kapau ʼe koutou fai fakamalotoloto te aga ʼaē ʼe lelei? Kae tatau aipe mokā ʼe koutou mamahi ʼuhi ko te faitotonu, manuʼia ia koutou.”—1 Petelo 3:13, 14, MN.

19. ʼE tou ʼiloʼi feafeaʼi ʼe tou maʼuʼuli nei ʼi te ʼu ʼaho fakamuli?

¹⁹ Ko te tahi meʼa lelei mokā tou tali te moʼoni, heʼe tou tui moʼoni ai ʼe tou maʼuʼuli ʼi te ʼu ʼaho fakamuli ʼo te tuʼu ʼo te ʼu faʼahiga meʼa ʼaenī. ʼE tou mahino anai, ʼe lahi te ʼu lea faka polofeta ʼo te Tohi-Tapu ʼe nātou lolotoga hoko ʼi totatou temi.a Ko te fakatokaga ʼaē ʼa Paulo “e mau anai he u temi faigataa i te u aho fakamuli,” ʼe fakamoʼoni ʼaki te ʼu meʼa fakamataku ʼaē neʼe hoko ʼi te sēkulō ʼaenī kua ʼosi. (2 Timoteo 3:1-5; Maleko 13:3-37) Mole heʼeki faʼa fualoa, ko te alatike ʼo te sulunale neʼe talanoa ʼo ʼuhiga mo te 20 sēkulō, neʼe fēnei tona kupu tāfito “ ʼE Tou Manatuʼi Anai Neʼe Ko He Temi ʼo Te Fai Fakapō.” Neʼe ʼui e te alatike: “Neʼe liliu ia te taʼu 1999, ko te taʼu ʼaē neʼe lahi ai te kau mātea ʼi te lua koga ʼo te sēkulō ʼaē neʼe lahi ai te kau mate.”

20. Koteā te meʼa ʼaē ʼe tonu ke tou fai ʼi te temi nei?

²⁰ ʼI te temi nei ʼe mole ko he temi ʼe tonu ke tou fakavaivai ai. Ko te tapuakina ʼa Sehova ʼe hā lelei ʼi te ako faka malamanei ʼo te Tohi-Tapu ʼaē kua fai ʼi te kele katoa moʼo faka mafola ki te ʼu puleʼaga. (Mateo 24:14) Koutou maʼuliʼi te moʼoni pea mo vaevae ki ʼihi. ʼE fakalogo totatou ka haʼu heʼegata ki te meʼa ʼaē ka tou fai ʼi te temi nei. ʼE mole tapuakina anai tatou e Sehova mo kapau ʼe tou fakaʼauʼauganoa. (Luka 9:62) Kae ʼe ko he temi ke “koutou liliu ʼo mālolohi, mo tāʼofi maʼu, ke lahi tuʼumaʼu takotou ʼu gāue ʼi te ʼAliki, ʼi takotou ʼiloʼi ʼaē ko takotou ʼu gāue ʼe mole vaʼiganoa ʼo ʼuhiga mo te ʼAliki.”—1 Kolonito 15:58, MN.

[Kiʼi nota]

ʼE Kei Koutou Manatuʼi Koa?

• ʼE lava feafeaʼi hatatou tekeʼi ia te lotolotolua?

• Koteā te ako ʼaē ʼe tou maʼu mai te faʼifaʼitaki ʼa te kaugana ʼa Eliseo?

• Ko te ʼu fakahala fea ʼaē ʼe tonu ke tou fakafeagai tuʼumaʼu kiai?

• He koʼe ʼe tonu ke tou fakahā lelei ko tatou ko te Fakamoʼoni ʼa Sehova?

[Paki ʼo te pasina 10]

Ko te ako tuʼumaʼu ʼo te Tohi-Tapu pea mo te faikole, ʼe lava tokoni mai ke tou pulihi he ʼu lotolotolua

[Paki ʼo te pasina 11]

Ko te kaugana ʼa Eliseo neʼe pulihi tona lotolotolua ʼaki te meʼa ʼaē neʼe sio kiai

[Paki ʼo te pasina 12]

ʼE akoʼi mai kia tatou te ʼu lekula māʼoluga ʼa Sehova ʼi te ʼu Fale ʼo te Puleʼaga ohage ko tona fai ʼaenī ʼi Bénin