Tou Falala Kia Sehova Pea Mo Tana Folafola
“Ko nātou ʼaē ʼe nātou ʼiloʼi tou huafa ʼe nātou falala anai kia te koe.”—Pesalemo 9:10.
1. He koʼe ʼe kei feala ke koutou falala ia ʼaho nei kia Sehova pea mo tana Folafola?
ʼI TE mālama ʼaenī, ko te fakaafe ʼaē ke tou falala ki te ʼAtua pea mo tana Folafola, te Tohi-Tapu, ʼe hage ko he meʼa ʼe mole hona ʼaoga. Kae, ko te poto ʼo te ʼAtua, neʼe moʼoni pea mo ʼaoga ʼi te ʼu temi loaloaga. Ko te Tupuʼaga ʼa te tagata pea mo te fafine ʼe ko ia ʼaē neʼe ina fakatupu te nofo ʼohoana pea mo te famili, pea ʼe ina ʼiloʼi lelei age te ʼu meʼa ʼaē ʼe ʼaoga kia tatou ʼi he tahi kehe. Ohage pe ko te mole fetogi ʼo te ʼu meʼa ʼaē ʼe ʼaoga tāfito ki te tagata, ʼo toe feiā pe, ʼe mole heʼeki fetogi foki mo te ʼu faʼahiga fai moʼo fakahoko te ʼu meʼa ʼaia. Ko te ʼu tokoni poto ʼo te Tohi-Tapu, logope neʼe tohi kua hili ki ai ni ʼu sēkulō, ʼe kei ina foaki mai pe te takitaki ʼaē ʼe lelei tokotahi, ke fua lelei ʼi totatou maʼuli pea mo fakatokatoka ʼo te ʼu fihifihia. Ko te tokagaʼi ʼo te Tohi-Tapu, ʼe iku ai ki he fiafia lahi—logope la tatatou maʼuʼuli ʼi he mālama kua haʼele ki muʼa ʼi te ʼu meʼa fakapopoto lalahi!
2. (a) Koteā te ʼu fua lelei ʼe tupu ʼi te maʼuli ʼa te hahaʼi ʼa Sehova, ʼi tanatou fakalogo ki te ʼu fakatotonu ʼa te ʼAtua? (b) Koteā te tahi meʼa ʼaē ʼe fakapapau e Sehova kia nātou ʼaē ʼe fakalogo kia te ia pea mo tana Folafola?
2 Ko te falala kia Sehova pea mo maʼuliʼi te ʼu pelesepeto ʼo te Tohi-Tapu, ʼe ina foaki mai he tokoni ʼe ʼaoga ʼi te ʼaho fuli. ʼE hā moʼoni te ʼu meʼa ʼaia ʼi te maʼuli ʼo te toko lauʼi miliona kau Fakamoʼoni ʼa Sehova ʼi te malamanei katoa, kua nātou tui mālohi pea mo nātou lototoʼa ʼo maʼuliʼi te ʼu tokoni ʼa te Tohi-Tapu. Maʼa nātou, ko tanatou falala ki te Tupuʼaga pea mo tana Folafola kua liliu ia ko he meʼa lelei. (Pesalemo 9:9, 10) ʼI tanatou fakalogo ki te ʼu fakatotonu ʼa te ʼAtua, kua nātou liliu ko he ʼu hahaʼi ʼe lelei age, ʼo ʼuhiga mo te maʼa, mo te agatonu, mo te faiva ʼi te gāue, mo tanatou fakaʼapaʼapa ki te maʼuli pea mo te ʼu meʼa ʼa ʼihi, pea mo tanatou fakapotopoto ʼi te kai pea mo te ʼinu. Kua maʼu ʼi te loto famili te ʼofa moʼoni pea mo te ako ʼaē ʼe ʼaoga—ʼe nātou tali kāiga, mo kātaki fualoa, mo loto manavaʼofa, pea mo loto fakamolemole—ʼo kau kiai mo te tahi ʼatu ʼu meʼa. ʼE kua nātou lavaʼi te līaki ʼo te ʼu fua kovi ʼo te ʼita, ʼo te fehiʼa, te fai fakapō, te loto maheka, te mataku, te piko, te fialahi, te loi, te fai fatufatu, te ʼu felāveʼi fakasino mo te ʼu hahaʼi kehekehe, pea mo te aga heʼemaʼa. (Pesalemo 32:10) ʼE laka age te meʼa ʼaē ka fai e te ʼAtua kia nātou ʼaē ʼe nātou taupau tana ʼu lao, kae ʼe mole gata ʼaki pe te fakapapau ʼaē kia nātou he ikuʼaga lelei. Neʼe ʼui e Sesu ko nātou ʼaē ʼe nātou muliʼi te ala faka Kilisitiano, ʼe nātou maʼu anai “ ʼo liuga teau, ʼi te temi ʼaenī, . . . te ʼu faʼe, te ʼu fānau, te ʼu gāueʼaga, ʼaki te ʼu fakataga, pea ʼi te tuʼu ʼo te ʼu faʼahiga meʼa ka haʼu, te maʼuli heʼegata.”—Maleko 10:29, 30.
ʼAua Naʼa Koutou Falala Ki Te Poto ʼo Te Mālama
3. ʼI tanatou haga tuku tanatou falala kia Sehova pea mo tana Folafola, koteā te ʼu fihifihia ʼe tautau felāveʼi mo te kau Kilisitiano?
3 Ko te koviʼaga ʼa te tagata heʼe haohaoa, ʼe ko te fakatō laloʼi peʼe ko te galoʼi ia te ʼu meʼa ʼaē ʼe fakamaʼua mai e te ʼAtua. ʼE faigafua hanatou kamata manatu ʼe lahi age tonatou popoto peʼe lahi age te poto ʼa ʼihi tagata ʼo te mālama ʼaenī ʼi te poto ʼa te ʼAtua, heʼe ko te poto ʼaia ʼe mulimuli ki te ʼu meʼa ʼo totatou temi. E lagi feala pe foki ke tuputupu ʼi te ʼu kaugana ʼa Sehova te taʼi manatu ʼaia, koteʼuhi ʼe nātou maʼuʼuli ʼi te lotolotoiga ʼo te mālama ʼaenī. Koia, ʼo hilifaki ki tana fakaafe fakaʼofa, ʼaē ke fakalogo ki tana ʼu tokoni, neʼe toe fai foki e tatatou Tāmai ʼaē ʼe ʼi selo te ʼu fakatokaga ʼaoga ʼaenī: “E toku foha, ʼaua naʼa galo ia kia koe taku lao, pea ke taupau e tou loto taku ʼu fakatotonu, heʼe hilifaki atu anai kia te koe te loaloaga ʼo te ʼu ʼaho pea mo te ʼu taʼu ʼo te maʼuli pea mo te tokalelei. Tuku tau falala kia Sehova ʼaki tou loto katoa, pea ʼaua naʼa ke falala ki tou ʼatamai ʼo koe totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou. ʼAua naʼa ke ʼui kia koe totonu kua ke poto. Manavasiʼi kia Sehova pea ke ke lītuʼa mai te kovi.”—Tāʼaga Lea 3:1, 2, 5-7.
4. ʼE lahi feafeaʼi “te poto ʼo te malamanei,” pea he koʼe ʼe “matavale ia, ia mata ʼo te ʼAtua”?
4 ʼE mahu te poto ʼo te mālama ʼaenī, pea ʼe lahi te ʼu potu ʼaē ʼe haʼu mai ai. ʼE lahi te ʼu faleako, pea “ko te faʼu ʼo te ʼu tuʼuga tohi, ʼe mole hona gataʼaga.” (Tagata Tānaki 12:12) ʼI te temi nei, ko te ʼu fealagia ʼaē ke maʼu he ʼu logo ʼi te olotinatea, ʼe ina fakapapau ke ina foaki tuʼumaʼu he ʼu logo ʼo ʼuhiga mo te ʼu faʼahiga meʼa kehekehe. Kae, ko te maʼu ʼo te ʼatamai ʼaia ʼe mole ina fakaliliu te malamanei ke poto peʼe ina fakatokatoka tona ʼu fihifihia. Kailoa ia, ʼe fakaʼāʼāsili kovi age ia te ʼaluʼaga ʼo te malamanei ʼi te ʼaho fuli pe. Ko te tupuʼaga la ʼaia ʼo te ʼui ʼaē e te Tohi-Tapu ko “te poto ʼo te mālama ʼaenī ʼe matavale ia, ia mata ʼo te ʼAtua.”—1 Kolonito 3:19, 20.
5. Koteā te ʼu fakatokaga ʼaē ʼe foaki mai e te Tohi-Tapu ʼo ʼuhiga mo te “poto ʼo te mālama ʼaenī”?
5 ʼI te koga fakaʼosi ʼaia ʼo te ʼu ʼaho fakamuli, ʼe mahino ia ko Satana te Tevolo, ʼe ina fai anai he ʼu tuʼuga loi moʼo maumauʼi tatatou falala ʼaē ki te ʼu moʼoni ʼo te Tohi-Tapu. Ko te hahaʼi ʼaē ʼe nātou sivi te ʼu tohi faka Tohi-Tapu moʼo vakaʼi peʼe moʼoni, neʼe nātou fakatupu te mafola ʼaupito ʼo te ʼu tohi ʼe fakamatala ai te ʼu meʼa ʼe mole moʼoni, pea ʼe fakafeagai ki te ʼui ʼaē ʼe moʼoni te Tohi-Tapu pea mo te ʼui ʼaē ʼe tau mo feʼauga ke tou falala kiai. Neʼe fakatokagaʼi fēnei e Paulo tona kaumeʼa Kilisitiano: “Ê Timoteo, taupau te koloā ʼaē neʼe tuku atu kia te koe, ʼo ke lītuʼa ki te ʼu akonaki gaʼasi ʼaē ʼe nātou fakafeagai ki te ʼu meʼa ʼaē ʼe maʼoniʼoni, pea mo te ʼu fefakafeagai ʼo te meʼa ʼaē ʼe higoaʼi hala ‘ko te ʼatamai mālama.’ Ko ʼihi ʼi tanatou fia hā ʼaki te taʼi ʼatamai mālama ʼaia neʼe nātou hēhē mai te tui.” (1 Timoteo 6:20, 21) ʼE toe fakatokagaʼi fēnei mai e te Tohi-Tapu: “Koutou tokakaga ke ʼaua naʼa ʼi ai he tahi ʼe ina ʼave koutou ohage ko he meʼa ʼe faʼao ʼaki te filosofia pea mo te ʼu kākā ʼe vaʼiganoa, ʼo mulimuli ki te talatisio ʼa te tagata, ʼo mulimuli ki te ʼu meʼa noa ʼo te malamanei, kae mole mulimuli kia Kilisito.”—Kolose 2:8.
Koutou Tauʼi Te Lotolotolua
6. He koʼe ʼe ʼaoga ke tou nonofo tokaga ke mole aka he ʼu manatu fakatupu lotolotolua ʼi totatou loto?
6 Ko te tahi kākā ʼaē ʼe fakaʼaogaʼi e te Tevolo ʼe ko te ʼai ʼo he ʼu manatu ʼe fakatupu lotolotolua ki te ʼatamai ʼa te hahaʼi. ʼE nofo tuʼumaʼu ʼo lamalama ia ia ʼaē kua vaivai tana tui ʼo ina fakahalaʼi. Ko he tahi ʼe lotolotolua, ʼe tonu anai ke ina manatuʼi ko ia ʼaē ʼe ina fakatupu te ʼu taʼi manatu ʼaia, ʼe ko ia ʼaē neʼe ina ʼui kia Eva: “ ʼE moʼoni koa la neʼe ʼui atu e te ʼAtua ke ʼaua naʼa koulua kai ki te ʼakau fuli pe ʼo te ʼōloto?” ʼI te ʼosi fakahū e te Fakahala te lotolotolua ki tona ʼatamai, neʼe ina loiʼi ia ia pea neʼe tui ki ai ia Eva. (Senesi 3:1, 4, 5) Ke mole maumauʼi tatatou tui e te lotolotolua, ohage ko tona hoko kia Eva, ʼe tonu ke tou nonofo tokakaga. Kapau ko he kiʼi manatu fakatupu lotolotolua ʼo ʼuhiga mo Sehova, mo tana Folafola, peʼe ʼo ʼuhiga mo tana kautahi, kua kamata hū ki tokotou loto, koutou foimo fai he ʼu fakatuʼutuʼu moʼo pulihi te manatu ʼaia, ke ʼaua naʼa liliu ko he meʼa ʼe ina maumauʼi takotou tui.—Vakaʼi ia 1 Kolonito 10:12.
7. Koteā ʼaē ʼe feala ke fai moʼo pulihi ʼo te ʼu manatu fakatupu lotolotolua?
7 Koteā te ʼu meʼa ʼaē ʼe feala ke fai? ʼO toe feiā aipe, ko te tali ʼe ko te falala kia Sehova pea mo tana Folafola. “Kapau ʼe ia koutou he tahi ʼe mole ina maʼu te poto, ke ina haga kole ki te ʼAtua, heʼe ina foaki ki te hahaʼi fuli ʼaki te manavaʼofa pea ʼe mole ina lau ia; pea ko te poto ʼe ina foaki age anai. Kae ke ina haga kole ʼaki te tui, ʼo mole lotolotolua ʼi he meʼa, heʼe ko ia ʼaē ʼe lotolotolua ʼe hage ia ko te peau ʼo te tai ʼaē ʼe agi pea mo feʼāveʼaki e te matagi.” (Sake 1:5, 6; 2 Petelo 3:17, 18) Ko te ʼuluaki meʼa ʼaē ʼe tonu ke fai ko te faikole fakamalotoloto kia Sehova. (Pesalemo 62:8) Pea tahi ʼaē, koutou kole te tokoni ʼa te ʼu tagata ʼofa ʼaē ʼe nātou taupau te kokelekasio. (Gāue 20:28; Sake 5:14, 15; Suta 22) ʼE nātou tokoni anai kia koutou ke koutou ʼiloʼi te tupuʼaga ʼo takotou lotolotolua, ʼaē e lagi tupu mai he fialahi peʼe mai he ʼu manatu hala.
8. ʼI te agamāhani, ʼe tupu feafeaʼi te ʼu manatu faka ʼaposita, pea koteā te faitoʼo ʼo ʼuhiga mo te faʼahi ʼaia?
8 Ko te lau ʼo te ʼu tohi faka ʼaposita peʼe ko te fagono ki tanatou ʼu akonaki peʼe ko te filosofia ʼo te malamanei, ʼe fakatupu ʼaki ai koa he ʼu manatu kovi ʼe fakatupu lotolotolua? ʼE tokoni fakapotopoto mai te Tohi-Tapu, ʼo ina ʼui fēnei: “Faiga fakamalotoloto ke ke hā ki te ʼAtua ohage ko he tagata ʼe leleiʼia, ko he tagata gāue ʼe mole ufiufi ʼi he meʼa, ʼe ina fakaʼaoga lelei te folafola ʼo te moʼoni. Kae ke ke tekeʼi te ʼu akonaki noa, ʼaē ʼe nātou ʼulihi te meʼa ʼaē ʼe maʼoniʼoni; heʼe nātou tuputupu tuʼumaʼu anai ki te heʼe aga faka lotu, pea ko tanatou ʼu palalau ʼe mafola anai ohage ko he meʼa ʼe pala ʼi te sino.” (2 Timoteo 2:15-17) Tou fakatokagaʼi ko te tokolahi ʼaē kua tō ki te ʼapositasia neʼe nātou kamata ʼolo ʼi te ala ʼaē ʼe mole lelei, ʼo nātou kamata meo ʼo ʼuhiga mo tonatou faʼahiga gaohi ʼi te kautahi ʼa Sehova. (Suta 16) Pea ki muli age, ʼe nātou talanoaʼi kovi te ʼu meʼa ʼaē neʼe nātou ako. Ohage pe ko he tōketā ʼe ina foimo toʼo te kovi ʼaē ʼe feala ia ke pala ai te sino katoa, ʼo toe feiā pe, tou foimo toʼo ʼi totatou ʼatamai he faʼahiga meo, te mole leleiʼia ʼo te faʼahiga fai ʼo te ʼu meʼa ʼo te kokelekasio faka Kilisitiano. (Kolose 3:13, 14) Tou pulihi te ʼu meʼa fuli ʼaē ʼe feala ke tupu ai te ʼu taʼi manatu lotolotolua ʼaia.—Maleko 9:43.
9. ʼE lava feafeaʼi ki he ʼu agamāhani faka teokalatike ʼe lelei, ke tokoni kia tatou ke tou maʼu he tui ʼe mālohi?
9 Koutou pipiki maʼu kia Sehova pea mo tana kautahi. Koutou faʼifaʼitaki lelei kia Petelo, ʼaē neʼe ina tala fēnei ʼaki he lotomālohi: “ ʼAliki, ke mātou ʼolo la kia ai? ʼE ke nofo mo te ʼu folafola ʼo te maʼuli heʼegata.” (Soane 6:52, 60, 66-68) Koutou fai he polokalama lelei ʼo te ako ʼa te Folafola ʼa Sehova ke koutou taupau takotou tui mālohi, ohage ko he meʼa tali tau, ʼe feala ai ke ina “matehi te ʼu nahau vela fuli ʼa te agakovi.” (Efesi 6:16) Koutou gāue tuʼumaʼu ʼi te minisitelio faka Kilisitiano, ʼo koutou vaevae ʼaki te ʼofa te logo ʼo te Puleʼaga ki ʼihi. ʼI te ʼaho fuli, koutou metitasioʼi te ʼu tapuakina ʼa Sehova ʼaē ʼe koutou maʼu. Koutou loto fakafetaʼi he kua koutou maʼu te ʼatamai mālama ʼo te moʼoni. Kapau ʼe koutou fai te ʼu meʼa ʼaia ke liliu ko hakotou agamāhani ʼi te faʼahi faka Kilisitiano, pea ʼe tokoni anai kia koutou ke koutou fiafia, pea mo koutou lotoʼutaki, pea mo koutou fakamamaʼo mai te ʼu manatu lotolotolua.—Pesalemo 40:4; Filipe 3:15, 16; Hepeleo 6:10-12.
Koutou Mulimuli Ki Te Takitaki ʼa Sehova ʼi Te ʼOhoana
10. He koʼe ʼe maʼuhiga tāfito ke kumi te takitaki ʼa Sehova ʼi te nofo ʼohoana faka Kilisitiano?
10 ʼI tana fakatuʼutuʼu ʼaē ke nonofo fakatahi te tagata mo te fafine ohage ko he taumatuʼa, neʼe mole loto pe e Sehova ke nā fakafonu lelei te kele, ka neʼe toe loto pe foki ke lahi tonā fiafia. Kae, neʼe tupu ʼaki te agahala pea mo te heʼe haohaoa te ʼu fihifihia lahi ʼi te ʼu felogoi ʼo te nofo ʼohoana. ʼE mole hāo te kau Kilisitiano mai te ʼu meʼa ʼaia, heʼe nātou heʼe haohaoa foki mo nātou pea mo nātou felāveʼi mo te ʼu faigataʼa ʼo te maʼuli ʼi totatou temi. Kae mai tona ʼaluʼaga ʼaē ʼe nātou falala kia Sehova pea mo tana Folafola, ʼe feala ke maʼu e te kau Kilisitiano he ʼu fua lelei ʼi tanatou nofo ʼohoana pea mo te taupau ʼo tanatou fānau. ʼE mole tonu ke maʼu ʼi te nofo ʼohoana faka Kilisitiano he ʼu aga mai te mālama. ʼE fakatotonu fēnei mai e te Folafola ʼa te ʼAtua: “Ke faka maʼuhigaʼi e te hahaʼi fuli te nofo ʼohoana pea ke ʼaua naʼa ʼulihi te moeʼaga faka taumatuʼa, heʼe fakamāuʼi anai e te ʼAtua te kau fai folonikasio pea mo te kau tono.”—Hepeleo 13:4.
11. Moʼo fakatokatoka ʼo te ʼu fihifihia ʼi te nofo ʼohoana, koteā ʼaē ʼe tonu anai ke mahino kiai te taumatuʼa?
11 Ko te nofo ʼohoana ʼaē ʼe fakatuʼutuʼu ʼo mulimuli ki te ʼu tokoni faka Tohi-Tapu, ʼe ko he maʼuli ʼe maʼu ai te ʼofa, ʼaki he ʼu maʼua, pea mo te fīmālie. Ko te tagata ʼohoana pea mo te fafine ʼohoana ʼe nā mahino pea mo nā fakaʼapaʼapa ki te pelesepeto ʼo ʼuhiga mo te faipule. ʼI te temi ʼaē ʼe hoko ai he ʼu faigataʼaʼia, ʼe tau hoko ʼuhi ko tanā mole tokakaga ʼo maʼuliʼi te ʼu tokoni faka Tohi-Tapu. Kapau ʼe nā fakatokatoka honā fihifihia, ʼe maʼuhiga ki te taumatuʼa ke nā fakatokagaʼi lelei te ʼaluʼaga totonu ʼo te fihifihia pea mo nā tauʼi te ʼu tupuʼaga ʼo te faʼahi ʼaia, kae mole ko te ʼu fakaʼiloga ʼo te fihifihia. Kapau neʼe mole feala ke nā fakatokatoka, ʼe feala ke kole e te taumatuʼa he tokoni mai he tagata taupau ʼofa, ʼe mole fakapalatahi.
12. (a) Koteā te ʼu fihifihia māhani ʼi te nofo ʼohoana, ʼe foaki ai e te Tohi-Tapu te ʼatu ʼu tokoni? (b) He koʼe ʼe ʼaoga ki te taumatuʼa ke nā fai te ʼu meʼa ʼaē ʼe loto ki ai ia Sehova?
12 ʼE pipiki koa te fihifihia ki te felogoi faka taumatuʼa, ki te fefakaʼapaʼapaʼaki ʼo te ʼu meʼa ʼaē ʼe nā logoʼi ʼi tonā loto, ki te fakaʼapaʼapa ki te faipule, peʼe ki te fakahoko ʼo he ʼu tonu? ʼE pipiki koa ki te taupau ʼo te fānau, peʼe ki te fakafuafua lelei ʼo ʼuhiga mo te ʼu felāveʼi fakasino? Peʼe pipiki koa te fihifihia ʼaia ki te ʼaluʼaga ʼo te falā, peʼe ki te ʼu temi mālōlō, peʼe ki te ʼu hahaʼi ʼaē ʼe fakatahitahi mo nāua, peʼe lagi tonu koa ke gāue te fafine, peʼe ʼo ʼuhiga mo te potu ʼaē ʼe tonu ke nā nonofo ai? Tatau aipe pe koteā te fihifihia, ʼe foaki mai e te Tohi-Tapu te ʼu tokoni ʼe ʼaoga, ʼo ina fai fakahagatonu ʼaki te ʼu lao, peʼe mole ina fai fakahagatonu, kae ʼe ina fai ʼaki he ʼu pelesepeto. (Mateo 19:4, 5, 9; 1 Kolonito 7:1-40; Efesi 5:21-23, 28-33; 6:1-4; Kolose 3:18-21; Tito 2:4, 5; 1 Petelo 3:1-7) Kapau ʼe mole fai e te taumatuʼa he ʼu meʼa ʼe hā ʼaki ai tanā manatu pe ʼaē kia nāua, kae nā fakahā he ʼofa lahi ʼi tanā nofo faka taumatuʼa, ʼe mahino ia ʼe nā fiafia lahi anai. ʼE tonu ke lotomālohi te taumatuʼa ke nā fai te ʼu fetogi ʼaē ʼe ʼaoga, ke nā fai te ʼu meʼa ʼaē ʼe loto ki ai Sehova. “Ko ia ʼaē ʼe fakasiosio poto ʼi he meʼa, ʼe ina maʼu anai te lelei, pea manuʼia ia ia ʼaē ʼe falala kia Sehova.”—Tāʼaga Lea 16:20.
Kau Tūpulaga—Koutou Fakalogo Ki Te Folafola ʼa Te ʼAtua
13. He koʼe koa ʼe mole faigafua ki te kau tūpulaga Kilisitiano ke nātou fakamālohiʼi tanatou tui kia Sehova pea mo tana Folafola?
13 ʼE mole faigafua ki te kau tūpulaga Kilisitiano ke nātou fakamālohiʼi tanatou tui, heʼe nātou maʼuʼuli ʼi te lotolotoiga ʼo te mālama agakovi ʼaenī. Tahi ʼaē meʼa, “ko te malamanei katoa ʼe takoto ia ʼi te mālohi ʼo te agakovi,” ʼaē ko Satana te Tevolo. (1 Soane 5:19) ʼE tauʼi te kau tūpulaga e te fili ʼaē ʼe aga fakakākā, ʼo ina faka ʼuhiga te meʼa ʼaē ʼe kovi ʼe ko he meʼa lelei. Ko te manatu pe ʼaē kia kita, te holi ʼaē ki te ʼu meʼa ʼaē ʼe heʼemaʼa pea mo te aga fekai, pea mo te kumi fakavale ʼo te ʼu fakafiafia—ko te ʼu meʼa fuli ʼaia ʼe tupu mai te faʼahiga fakakaukau e tahi pea mo mālohi ʼaē ʼe talanoa kiai te Tohi-Tapu ohage ko “te laumālie ʼaē ʼe gāue nei ʼi te ʼu foha ʼo te talagataʼa.” (Efesi 2:1-3) ʼAki he faiva kākā, neʼe fakatuputupu e Satana te “laumālie” ʼaia ʼi te ʼu tohi ʼaē ʼe fakaʼaogaʼi ʼi te ʼu faleako, mo te ʼatu ʼu musika, mo te ʼu faigaoʼi, pea mo ʼihi ʼu faʼahiga fakafiafia. ʼE tonu ke nonofo tokakaga te ʼu mātuʼa ke nātou fakafeagai ki te ʼu taʼi meʼa ʼaia, ʼo nātou tokoniʼi tanatou ʼu fānau ke nātou fakatuputupu tanatou falala ʼaē kia Sehova pea mo tana Folafola.
14. ʼE lava feafeaʼi ki te kau tūpulaga ke nātou “hola mai te ʼu holi ʼo te temi tūpulaga”?
14 Neʼe foaki e Paulo te tokoni fakatāmai ki tona kaugā gāue tūpulaga ko Timoteo, ʼo ina ʼui fēnei: “Hola mai te ʼu holi ʼo te temi tūpulaga, kae ke haga kumi te faitotonu, te tui, te ʼofa, te tokalelei, mo nātou ʼaē ʼe nātou fetapā ki te ʼAliki ʼaki he loto ʼe maʼa.” (2 Timoteo 2:22) Logope la ʼe mole kovi fuli te ʼu “holi fuli ʼo te temi tūpulaga,” ʼe tonu ki te kau tūpulaga ke nātou “hola” mai te ʼu holi ʼaia, ke ʼaua naʼa nātou tuku te ʼu meʼa ʼaia ke liliu ko te ʼu meʼa ʼaē ʼe nātou tokakaga tāfito kiai, ʼo lagi fakaʼaogaʼi he kiʼi temi veliveli peʼe mole fakaʼaogaʼi pe la he temi ki te ʼu meʼa ʼa te ʼAtua. Ko te hiki meʼa mamafa, te faigaoʼi, te musika, te ʼu temi fakafiafia, te fakaʼaogaʼi ʼo te temi ki te ʼu meʼa ʼaē ʼe tou leleiʼia, pea mo te ʼu folau, logope la ʼe mole kovi, ʼe feala ke liliu ko he ʼu hele mo kapau ʼe liliu ko he ʼu meʼa ʼe tou faka maʼuhigaʼi ʼi totatou maʼuli. Koutou hola ʼosi mai te ʼu fai palalau ʼaē ʼe mole hona ʼuhiga, mai te hoʼi taka noa, mai te ʼu holi kovi ʼo ʼuhiga mo te ʼu felāveʼi fakasino, mai te nofo ʼaē ʼo mole fai he meʼa, pea ke koutou hola mai te meo ʼaē ʼe koutou ʼui ai ʼe mole mahino takotou ʼu mātuʼa.
15. Koteā te ʼu meʼa ʼaē ʼe feala ke hoko ʼi te ʼu loto fale, ʼaē ʼe feala ke ina fakaneke te kau tūpulaga ke nātou maʼuli malualoi?
15 Māʼiape la, ʼi tonatou ʼapi, ʼe feala pe ke tuʼutāmakiʼia te kau tūpulaga. Kapau ʼe nātou sioʼi te ʼu ʼata heʼeʼaoga peʼe agamālohi pea mo te ʼu foʼi fime viteo, ʼe feala ke hū kia nātou te holi ʼaē ke nātou fai he ʼu meʼa ʼe kovi. (Sake 1:14, 15) ʼE tokoni fēnei mai te Tohi-Tapu: “Ê, ia koutou ʼaē ʼe ʼoʼofa kia Sehova, koutou fehiʼa ki te meʼa ʼaē ʼe kovi.” (Pesalemo 97:10; 115:11) ʼE ʼiloʼi e Sehova mo kapau ʼe faiga he tahi ke maʼuli malualoi. (Tāʼaga Lea 15:3) Kau Kilisitiano tūpulaga, koutou fakasiosio tokotou koga fale. ʼE koutou fakamataleleiʼi koa ʼaki he ʼu paki ʼo he ʼu hahaʼi ʼiloa ʼo te faigaoʼi peʼe ʼo te hiva ʼi te mālama, ʼe nātou aga heʼeʼaoga, peʼe koutou fakamataleleiʼi koa ʼaki he ʼu meʼa ʼe lelei, ko he ʼu fakamanatu lelei? (Pesalemo 101:3) ʼI takotou puha, ʼe maʼu ai koa he ʼu mutuʼi meʼa ʼe aga fakapoipoi, peʼe maʼu ai koa he ʼu mutuʼi meʼa ʼe mulimuli ki te ʼu faʼahiga teuteu ʼo te mālama ʼaenī? ʼAki he ʼu aga fakakākā, ʼe feala ke fakahēʼi koutou e te Tevolo, mo kapau ʼe koutou tō ki te fakahala ʼaē ko te ʼahiʼahiʼi ʼo te meʼa ʼaē ʼe kovi. ʼE tokoni fakapotopoto mai te Tohi-Tapu, ʼo ina ʼui fēnei: “Koutou nonofo ʼaʼala, koutou nonofo tokakaga. Ko tokotou fili, ia te Tevolo, ʼe hage ko he laione ʼe gugulu, ʼe feʼaluʼaki ʼo ina kumi ke ina kai he tahi.”—1 Petelo 5:8.
16. ʼE lava tokoni feafeaʼi te Tohi-Tapu ki he tūpulaga ke ina fakafiafia ia nātou ʼaē ʼe nātou ʼoʼofa kia ia?
16 ʼE ʼui atu e te Tohi-Tapu ke koutou tokakaga ki takotou ʼu fakakaugā. (1 Kolonito 15:33) ʼE tonu ke koutou fakakaumeʼa mo nātou ʼaē ʼe manavasiʼi kia Sehova. ʼAua naʼa koutou tuku ke fakahalaʼi koutou. (Pesalemo 56:11; Tāʼaga Lea 29:25) Koutou fakalogo ki takotou ʼu mātuʼa ʼaē ʼe manavasiʼi ki te ʼAtua. (Tāʼaga Lea 6:20-22; Efesi 6:1-3) Koutou kumi te tokoni pea mo te fakaloto mālohi ki te kau tagata ʼāfea. (Isaia 32:1, 2) Koutou taupau tuʼumaʼu tokotou ʼatamai pea mo takotou sio ki te ʼu meʼa maʼuhiga ʼi te faʼahi fakalaumālie pea mo te ʼu fakatuʼutuʼu fakalaumālie. Koutou kumi te ʼu fealagia fuli ke koutou tuputupu ʼi te faʼahi fakalaumālie, pea mo koutou kau ki te ʼu gāue ʼo te kokelekasio. Koutou ako peʼe feafeaʼi te fakaʼaogaʼi ʼokotou ʼu nima ki te ʼu gāue. Koutou liliu ʼo mālohi ʼi te tui, pea ʼe koutou fakahā moʼoni anai ʼe ʼi ai tokotou ʼuhiga—ʼe tau mo koutou ke koutou maʼu te maʼuli ʼi te mālama foʼou ʼa Sehova! ʼE fiafia anai tatatou Tāmai ʼaē ʼe ʼi selo ʼuhi ko koutou, ʼe toe fiafia anai mo takotou ʼu mātuʼa ʼuhi ko koutou, pea ʼe koutou fakaloto mālohiʼi anai tokotou ʼu tēhina mo tuagaʼane. ʼE maʼuhiga te faʼahi ʼaia!—Tāʼaga Lea 4:1, 2, 7, 8.
17. Koteā te ʼu tapuakina ʼe maʼu anai e nātou ʼaē ʼe falala kia Sehova pea mo tana Folafola?
17 ʼAki he palalau fakatuketuke, neʼe tohi fēnei ʼaki te laumālie ʼo te ʼAtua e te tagata fai pesalemo: “Ko Sehova ʼe mole ina fakafisi anai he meʼa lelei kia nātou ʼaē ʼe haʼele fakahagatonu. Ê Sehova ʼo te ʼatu kautau, ʼe manuʼia te tagata ʼaē ʼe falala kia te koe.” (Pesalemo 84:11, 12) Ei, ʼe ko te fiafia pea mo te fua manuʼia ʼaē ka maʼu anai e nātou fuli ʼaē ʼe falala kia Sehova pea mo tana Folafola, te Tohi-Tapu, kae mole ko te lotomamahi pea mo te mole hoko ʼo te ʼu fakatuʼutuʼu ʼaē neʼe fai.—2 Timoteo 3:14, 16, 17.
ʼE Feafeaʼi Anai Hakotou Tali?
◻ He koʼe ʼe mole tonu anai ke falala te kau Kilisitiano ki te “poto ʼo te mālama ʼaenī”?
◻ Koteā ʼaē ʼe tonu anai ke fai mo kapau ʼe tupu ʼi he tahi he ʼu manatu ʼe fakatupu lotolotolua?
◻ ʼE lava feafeaʼi, ke fua lelei pea mo maʼuli fiafia te nofo ʼohoana mo kapau ʼe tou mulimuli ki te ʼu meʼa ʼaē ʼe loto kiai ia Sehova?
◻ ʼE tokoni feafeaʼi te Tohi-Tapu ki te kau tūpulaga ke nātou “hola mai te ʼu holi ʼo te temi tūpulaga”?
[Paki ʼo te pasina 23]
ʼE haga te kau Kilisitiano kia Sehova pea mo tana Folafola, ʼo nātou tekeʼi “te poto ʼo te mālama ʼaenī” ohage ko he meʼa vale
[Paki ʼo te pasina 25]
Ko te ʼu famili ʼaē ʼe nātou falala kia Sehova pea mo tana Folafola, ʼe nātou fua manuʼia pea mo maʼuli fiafia