Te ʼu Fehuʼi ʼa Te Kau Lautohi

Koteā te manatu ʼa te kau Kilisitiano moʼoni ʼo ʼuhiga mo te aga kua fai māhani ko te fefoakiʼaki ʼo he polokalama olotinatea?

Ko ʼihi ʼe nātou faihala heʼe nātou faigaʼi ke nātou takuʼaki te fai ʼaia ʼo nātou fakaʼaogaʼi te ʼu palalau ʼaenī ʼa Sesu: “Neʼe koutou maʼu noa, koutou foaki noa.” ʼE mahino ia, neʼe mole fakapipiki e Sesu te foaki noa ki he ʼu meʼa neʼe hiki mai he ʼu tohi peʼe ko he polokalama olotinatea, pea ʼe ʼi ai te ʼu lao ki te faʼahiga fakaʼaogaʼi ʼo te ʼu meʼa ʼaia. Neʼe ina fakaʼaogaʼi tana ʼu palalau ʼaia ki te minisitelio. Neʼe ʼui e Sesu ki tana kau ʼapositolo ke nātou ʼolo ki te ʼu kolo lalahi kehekehe pea mo te ʼu kolo liliki ʼo faka mafola te Puleʼaga, mo fakamālōlō te kau mahaki, pea mo kapu te kau temonio. Neʼe mole tonu ki te kau ʼapositolo ke nātou fakatotogi ki te hahaʼi te ʼu faʼahi ʼaia, kae neʼe tonu ke nātou “foaki noa.”—Mateo 10:7, 8, MN.

ʼAki te lahi ʼo te ʼu olotinatea ki te gāue pea mo te ʼu olotinatea ʼe fakaʼaogaʼi e te hahaʼi takitokotahi, ʼe ʼaoga ki te hahaʼi tokolahi ke ʼi ai hanatou polokalama olotinatea. ʼI te agamāhani ʼe maʼua ia ke totogi. ʼE moʼoni, ʼe ʼi ai te ʼu hahaʼi ʼe nātou faʼu te ʼu polokalama ʼo foaki noa, pea mo nātou ʼui ʼe feala pe ke tā liuliuga te polokalama ʼaia pea mo fakatoʼo ki niʼihi. Kae ʼe lahi te ʼu polokalama ki te ʼu olotinatea ʼe fakatau. Peʼe fakaʼaogaʼi ʼi tonatou ʼapi peʼe fakaʼaogaʼi ʼi te gāue, kae ʼe tonu kia nātou ʼaē ʼe nātou fakaʼaogaʼi he faʼahiga polokalama ke nātou totogi. Kapau ʼe toʼo e he tahi peʼe ina fai he hiki ʼo he polokalama kae mole ina totogi, pea ʼe hage ia ko hana agatuʼu ki te lao, ohage pe ko he hiki katoa ʼo he ʼu tohi, tatau aipe peʼe kita foaki noa.

ʼE lahi te ʼu polokalama ki te olotinatea (ʼo kau ai mo te ʼu gaoʼi) ʼe puipui e te copyright (ko he fakagafua ʼe ʼāteaina pe maʼa nātou ʼaē neʼe nātou faʼu te polokalama ʼaia), pea ʼe fakamaʼua kia ia ʼaē neʼe ina totogi te polokalama ʼaia pea mo ina fakaʼaogaʼi, ke fakaʼapaʼapa ki te ʼu meʼa ʼaē ʼe tuʼu ai pea mo te ʼu tuʼakoi ʼo te polokalama ʼaia. ʼE lahi te ʼu fakagafua ʼe nātou fakamaʼua ki he tokotahi pe ke ina fakaʼaogaʼi te polokalama ʼaia—ʼo ina fakaʼaogaʼi ʼi he olotinatea pe e tahi, peʼe ʼi tona ʼapi peʼe ʼi te fale gāue peʼe ʼi te fale ako. ʼE ʼui e ʼihi fakagafua ʼe feala kia ia ʼaē ʼe ina fakaʼaogaʼi ke ina fai he hiki maʼa ia totonu, kae ʼe mole feala ia ke ina fai maʼa ʼihi. Kapau ko ia ʼaē neʼe ina totogi te polokalama ʼaia ʼe ina fia foaki katoa maʼa he tahi (te fakagafua pea mo te ʼu tohi fuli ʼa te polokalama), ʼe feala ke ina fai te potu ʼaia. Kae ʼe mole kei feala kia ia ke ina toe fakaʼaogaʼi. ʼE tahi ʼalu pe te fakagafua mo tona ʼu lao, koia kapau ʼe totogi e he tahi peʼe fakatoʼo noa age ki ai he polokalama, pea ʼe tonu ke ina laulau fakalelei te ʼu meʼa ʼaē ʼe fakamaʼua e te fakagafua ʼaia.

ʼE lahi te ʼu puleʼaga ʼe nātou tokoni ki te foaki ʼo he ʼu fakagafua ki te copyright moʼo puipui ʼo te “propriété intellectuelle,” ohage ko te ʼu polokalama ki te olotinatea, pea ʼe nātou faigaʼi ke mulimuli te hahaʼi ki te ʼu lao ʼo ʼuhiga mo te copyright. Ohage la, neʼe fakamatala e te nusipepa The New York Times ʼo te ʼaho 14 ʼo Sanualio 2000, “neʼe puke e te kau polisi ʼo Siamani pea mo Danemark te ʼu hahaʼi ʼo te kūtuga neʼe ʼiloa ʼi te piratage de logiciel” neʼe nātou fai puleʼaki ki te ʼu polokalama ʼo te olotinatea pea mo te ʼu gaoʼi, pea neʼe nātou fakaʼaogaʼi te Internet moʼo fakatau ʼihi ʼo te ʼu meʼa ʼaia.

Koteā te manatu ʼa te kokelekasio faka Kilisitiano ʼo ʼuhiga mo te faʼahi ʼaia? Neʼe ʼui tonu e Sesu: “Koutou liufaki te ʼu meʼa ʼa Sesale kia Sesale, kae ko te ʼu meʼa ʼa te ʼAtua ki te ʼAtua.” (Maleko 12:17, MN ) ʼE fakamaʼua ai ki te kau Kilisitiano ke nātou mulimuli ki te ʼu lao ʼo te fenua ʼaē ʼe nātou nonofo ai mo kapau ʼe mole fakafeagai ki te lao ʼa te ʼAtua. ʼO ʼuhiga mo te ʼu puleʼaga, neʼe tohi fēnei e te ʼapositolo ko Paulo: “Ke fakalogo te nefesi fuli pe ki te ʼu pule māʼoluga . . . Ko ʼaē ʼe fakafeagai ki te pule ʼe fakafeagai ia ki te fakatuʼutuʼu ʼa te ʼAtua; ko nātou ʼaē kua fakafeagai ki ai ʼe nātou tali anai maʼa nātou totonu he fakamāu.”—Loma 13:1, 2, MN.

ʼE mole ʼa te kau tagata ʼāfea te vakavakaʼi ia te ʼu olotinatea ʼa te hahaʼi, ke nātou hage ko he ʼu hahaʼi ʼe nātou fakamahino pea mo fakamaʼua ki te hahaʼi ke nātou mulimuli ki te lao ʼo ʼuhiga mo te ʼu fakagafua. Kae ʼe nātou tui pea mo akoʼi ʼe tonu ki te kau Kilisitiano ke ʼaua naʼa nātou toʼo te meʼa ʼaē ʼe mole ʼa nātou pea mo faigaʼi ke nātou mulimuli ki te lao. Ko te potu ʼaia ʼe ina puipui te kau Kilisitiano naʼa fakatūʼa nātou ohage ko he ʼu hahaʼi ʼe nātou maumauʼi te lao, pea ʼe ina faka fealagia ke nātou maʼu he leʼo ʼo loto ʼe lelei ia muʼa ʼo te ʼAtua. Neʼe tohi fēnei e Paulo: “Koia ʼe ʼi ai te tupuʼaga maʼuhiga ke koutou fakalogo, ʼo mole tupu pe ko te hāūhāū ʼaia, kae ʼe toe tupu foki ko tokotou leʼo ʼo loto.” (Loma 13:5, MN ) Neʼe fakahā e Paulo he manatu ʼe tatau ʼo ʼuhiga mo te loto ʼo te kau Kilisitiano moʼoni ʼaki te ʼu palalau ʼaenī: “ ʼE mātou tui papau ʼe totonu tomatou leʼo ʼo loto, koteʼuhi ʼe mātou holi ke mātou agatonu ia meʼa fuli pe.”—Hepeleo 13:18, MN.

[Talanoa ʼo te pasina 29]

ʼE totogi e ʼihi sosiete pea mo te ʼu faleako te ʼu fakagafua ʼe ina faka fealagia ke lahi he kau fakaʼaogaʼi ʼo te polokalama ʼaia. ʼI te 1995, neʼe fai palalau te ʼu kokelekasio ʼo te kau Fakamoʼoni ʼa Sehova ki te alatike ʼe tuʼu ai te tokoni ʼaenī:

“ ʼE lahi te ʼu matani gāue ʼe nātou teuteuʼi pea mo fakatau te ʼu polokalama ʼe nātou tuku ai te ʼu fakagafua, pea ʼe nātou fai he pepa ʼe fakahā ai peʼe feafeaʼi te fakaʼaogaʼi fakalelei ʼo te ʼu polokalama ʼaia. ʼE fakahā ʼi te ʼu pepa ʼaia ko ia ʼaē ʼe ina fakaʼaogaʼi te polokalama ʼaia ʼe mole feala ke ina hiki ke feala hana foaki ki niʼihi te polokalama; koia ko te fai ʼo te faʼahi ʼaia ʼe ko he fakafeagai ki te fakatuʼutuʼu faka malamanei ʼaē ʼe fakagafua pe kia ia ʼaē neʼe ina fai. . . . Ko ʼihi matani gāue lalahi, ʼe nātou fakatau te ʼu olotinatea mo te ʼu polokalama kua ʼosi teuteuʼi pea mo tona ʼu pepa moʼo fakagafua. Kae ko ʼihi fale koloā ʼe nātou fakatau te ʼu olotinatea kae mole nātou foaki ia te pepa fakagafua, koteʼuhi ko te ʼu polokalama ʼaē neʼe nātou ai ki te olotinatea ʼe mole totonu, ko tona faka ʼuhiga ʼe fakafeagai ki te lao mokā ʼe fakaʼaogaʼi te ʼu polokalama ʼaia. ʼO ʼuhiga mo te faʼahi ʼaia, ko te kau Kilisitiano ʼe mole tonu ke nātou hū ki he polokalama, peʼe nātou fakaʼaogaʼi he tahi polokalama ʼe fakagafua pe kia ia ʼaē ʼe feala ke ina fai (ohage ko te ʼu tohi ʼa te Sosiete), pea ʼe mole tonu ke ina fai he hiki mo kapau ʼe mole fakagafua age e ia ʼaē neʼe ina fai te polokalama.”