Tou Taupau He Manatu Fakapotopoto ʼo ʼUhiga Mo Te Fakaʼaogaʼi ʼo Te Olotinatea
1 Neʼe fakaloto mālohiʼi e te ʼapositolo ko Paulo te kau Kilisitiano ʼo te ʼuluaki sēkulō ke ʼaua naʼa nātou hēʼia, koteʼuhi ko “te temi ʼaē ʼe kei toe kua nounou.” (1 Ko. 7:29) ʼI te fakaōvi mai ʼo te fakaʼosi ʼo te tuʼu ʼo te ʼu faʼahiga meʼa ʼaenī, ʼe maʼuhiga kia tatou ke tou ‘haga kumi muʼa te puleʼaga pea mo te faitotonu ʼa te ʼAtua’ pea ke tou ‘totogi te temi faigamālie! Ko te temi ʼe maʼuhiga.—Mat. 6:33; Ef. 5:15, 16.
2 Neʼe tali te olotinatea ohage ko he meʼa moʼo hāofaki tāfito ʼo te temi. Ohage la, ʼi te lomiʼi pe ʼo te olotinatea, ʼe feala ke maʼu e he tahi ʼi te moʼi temi pe ʼaia he ʼu manatu ʼe lahi ʼaupito. Ko te ʼu olotinatea ʼe nātou fai ʼi he ʼu sekonita te meʼa ʼaē ʼe tou fai anai ʼi he ʼu hola peʼe ko he ʼu vāhaʼa ʼaki he tahi age faʼahiga puleʼaki. Kapau ʼe fakaʼaogaʼi fakalelei, pea ʼe ko he ʼu meʼa gāue ʼe ʼaoga.
3 ʼE Faka Fealagia Moʼoni Koa e Te Olotinatea Ke Lahi Totatou Temi?: Kae, ko te olotinatea ʼe mole feala ke fakaʼaogaʼi mo kapau ʼe mole ʼi ai te ʼu meʼa tāfito—te falā pea mo te temi. ʼE fakamaʼuaʼi he ʼu hola moʼo ako peʼe feafeaʼi te fakatuʼutuʼu e te olotinatea ʼihi ʼu gāue. Kae, ko he tahi ʼe holi māhani ke ina ʼiloʼi te haʼele ʼo he olotinatea ʼe feala ke ina maumauʼi ai tona temi ʼaē ʼe feala ke ina fakaʼaogaʼi ki he meʼa ʼe lelei age. ʼE tonu ke tou taupau he manatu fakapotopoto, ʼo tou manatuʼi tuʼumaʼu te fakatuʼutuʼu ʼaē ʼi te fakatokaga ʼa te ʼapositolo ko Paulo ʼaē ke tou haʼele ohage ko ni kau popoto, ʼo tou totogi maʼa tatou te temi faigamālie.’—Vakaʼi ia 1 Kolonito 7:31.
4 ʼAki tanatou maʼu te manatu ʼe lelei tokolahi neʼe nātou fai te ʼu polokalama ʼi te olotinatea moʼo taupau ʼo te ʼu tosie ʼo te kokelekasio. ʼE mahino ia, ʼe kita fai pe te puleʼaki ʼo ʼuhiga mo te fakaʼaogaʼi ʼo tana olotinatea. Kae, ko te ʼu tosie ʼo te kokelekasio ʼaē neʼe fakatuʼutuʼu te ʼu (formulaires) ʼo ʼuhiga mo te faʼahi ʼaia, ʼe mole tonu anai ke taupau ʼi te olotinatea, koteʼuhi ko te tamaliki peʼe ko niʼihi ʼe mole gafua tanatou lau te ʼu tosie ʼaia ʼe feala ke nātou vakaʼi. Ko te ʼu tosie fuli ʼo te kokelekasio—te ʼu tānaki falā, te tānaki ʼo te kau fai faka mafola ʼo te kokelekasio, pea mo ʼihi age meʼa—ʼe tonu ke tohi ʼi te ʼu pepa (formulaires) ʼaē neʼe fakamomoli mai e te Sosiete, pea ko te ʼu meʼa ʼaē ʼe tuʼu ʼi te ʼu pepa ʼaia ʼo te kokelekasio ʼe mole tonu anai ke taupau ʼi te olotinatea. ʼAki tona fai ʼaia, ko te ʼu meʼa ʼaē ʼe mole tonu ke ʼiloʼi e te kokelekasio ʼe taupau leleiʼi anai.
5 Ko te ʼu tagata taupau ʼaē ʼe nātou fai te polokalama ʼo te Ako ʼo Te Minisitelio Faka Teokalatike pea mo te Fono Gāue, ʼe tonu ke nātou maʼu te fakasiosio poto mokā nātou foaki ki niʼihi he ʼu akonaki ke nātou fai. ʼE ʼaoga ke nātou manatuʼi te koga ʼe fakatafito kiai te akonaki. Ohage la ʼi te ako, ko ʼihi akonaki e lagi ʼe feala pe ke fai e he tokosiʼi. ʼE tonu ke tokagaʼi te fakatuʼutuʼu ʼo te akonaki ʼo feiā aipe ki te ʼu fealagia ʼo nātou takitokotahi pea mo te agaaga ʼo te manatu ʼe fakatafito kiai te akonaki. ʼE mole tonu anai ke tuku ia te olotinatea ke ina fai he puleʼaki ʼo ʼuhiga mo te faʼahi ʼaia.
6 Ko he tēhina neʼe hinoʼi ke ina fai he akonaki ʼi te fono ʼo te kokelekasio ʼe mole tonu anai ke falala ki he ʼu manatu neʼe teuteuʼi e he tahi, tāfito mokā ko he tahi ʼe mole ina ʼiloʼi, ʼuhi pe heʼe tuʼu te faʼahi ʼaia ʼi te olotinatea pea ko tona fakaʼaogaʼi ʼe faigafua ai tana gāue. Ko te kau Kilisitiano ʼaē ʼe aga fakapotopoto ʼe mole nātou fakatuʼutuʼu ke nātou teuteuʼi tanatou ʼu akonaki faka Tohi-Tapu peʼe ko te ʼu alatike ʼe nātou talanoa kiai ʼi te fono pea nātou tuku ʼi te olotinatea ke fakaʼaogaʼi e niʼihi. Kae, ko te olotinatea pea mo te Tānakiʼaga ʼo te ʼu tohi ʼa te Sosiete Watchtower ʼi te CD-ROM ʼe ko he ʼu meʼa gāue maʼuhiga ke fakaʼaogaʼi e he tēhina, moʼo kumi kiai ʼo he ʼu manatu ʼe lelei ʼi te temi ʼe faka tuʼakoi kiai tana akonaki.
7 Ohage ko te tohi pea mo te foaki ʼo te ʼu polokalama ʼo te olotinatea, te ʼu lisi, pea mo ʼihi age faʼahiga meʼa ʼi te ʼu tēhina, pea mo teuteuʼi pea mo feʼāveʼaki ʼo te ʼu akonaki ʼo te Fono Gāue pea mo te Ako ʼo Te Minisitelio Faka Teokalatike ʼaki he olotinatea peʼe ko he tahi age faʼahiga meʼa, ʼe lelei age ke teuteuʼi totonu e te ʼu tēhina tanatou ʼu akonaki, ʼo nātou fakakaukauʼi te meʼa ʼaē ʼe ʼaoga ki te kokelekasio. (1 Tim. 4:13, 15) ʼE mole tonu anai ke tou fakaʼaogaʼi hatatou ʼu felogoi ʼi te kokelekasio moʼo fakahoko ʼo he meʼa ʼe tou loto kiai.
8 E feafeaʼi koa te tufa ʼo te ʼu pepa ʼaē ʼe tuʼu ai te ʼu vaega faka Tohi-Tapu ʼaē neʼe fakaʼaogaʼi ʼi te ako ʼo Te Tule Leʼo peʼe ʼi te Ako Tohi ʼo Te Kokelekasio? E lagi lelei ki te kau fai faka mafola ke nātou vakaʼi ʼi te Tohi-Tapu pea mo te ʼu tohi ʼaē neʼe nātou akoʼi. ʼI te fono, ko te fakaʼaogaʼi ʼo te ʼu pepa ʼaia ʼe tuʼu ai te ʼu vaega faka Tohi-Tapu ʼe nātou lotovaivai ʼi te fakaʼaogaʼi ʼo te Tohi-Tapu moʼo kumi ʼo te ʼu vaega. Pea tahi ʼaē meʼa ko te vakaʼi ʼo te ʼu vaega ʼo te Tohi-Tapu lolotoga te Ako Tohi peʼe ko te fono ʼo te kokelekasio ʼe ko he faʼahi ʼe akoʼi ai tatou, mo tokoni kia tatou ke tou faiva ʼi te fakaʼaogaʼi ʼo te Tohi-Tapu ʼi te gāue faka minisitelio. ʼE lahi te ʼu ʼaluʼaga, pea tāfito te ʼu vaega ʼaē ʼe loaloaga, ʼe lelei age ia te lau fakahagatonu ʼi te Tohi-Tapu, ʼo fakaloto mālohiʼi ia nātou fuli ʼi te fono ke nātou mulimuli ʼi tanatou Tohi-Tapu.
9 Ko Te Tahi ʼu Hele Fakatupu Tuʼutāmaki: Ohage ko tona fakahā ʼi Te Tule Leʼo ʼo te ʼaho 1 ʼo ʼAukusito 1993 ʼi te pasina 17, ko te faiga ʼaē ke kita ʼiloʼi te tahi ʼu polokalama ʼi te olotinatea ʼe feala ke tou tō ai ki te ʼu tuʼutāmaki ʼi te faʼahi fakalaumālie. Ohage pe ko he tahi ʼe mole mataku ʼi te fakahū ʼo he virus—ko he polokalama neʼe fai moʼo fakatupu kovi pea mo maumauʼi ʼo te ʼatu ʼu meʼa ʼi te olotinatea—ko te kau ʼaposita, te kau takitaki lotu, pea mo te hahaʼi ʼaē ʼe faiga ke nātou fakatupu kovi ki niʼihi ʼi te faʼahi ʼo te fakakaukau peʼe ko niʼihi ʼe feala ke nātou fakahū faʼifaʼitaliha tanatou ʼu manatu kafokona ʼi te faʼahi ʼaia. Gata pe mokā ko he polokalama ʼe tuʼu ai “ ʼe fakatuʼutuʼu pe ki te kau Fakamoʼoni ʼa Sehova,” ʼe siosioʼi lelei, pea ʼe faka tuʼakoi ki te kau kaugana fakapotopoto ʼa Sehova, heʼe feala ke faka felogoi he kau Kilisitiano mo he “ ʼu fakakaugā kovi.” (1 Ko. 15:33) Neʼe maʼu e te Sosiete te ʼu tohi ʼe talanoa ai ki te réseau privé neʼe fakaʼaogaʼi moʼo fakahā ʼo he ʼu manatu hala ʼo ʼuhiga mo he ʼu fehuʼi fakalaumālie kae moʼo foaki foki ʼo te ʼu tokoni ʼe mole lelei, moʼo faka mafola ʼo he ʼu fatufatu pea mo he ʼu manatu hala, moʼo fakahā ʼo he ʼu manatu ʼe mole lelei, mo lagaʼi he ʼu fehuʼi pea mo he ʼu manatu fakatupu lotolotolua, ko te ʼu meʼa fuli ʼaia moʼo maumauʼi ʼo te tui ʼa ʼihi, pea mo fakahāhā ai he ʼu fakamatala fakatagata ʼo ʼuhiga mo te Tohi-Tapu. ʼE hage ʼe lelei pea mo ʼaoga te ʼu manatu ʼaia mokā tou lau, kae ʼe ko he ʼu manatu kafokona ia. Ko te kau Kilisitiano ʼe nātou falala ki “te tagata kaugana agatonu mo poto” ke ina foaki age tanatou meʼa kai ʼi te temi totonu pea mo te ʼu faka mālamagia. (Vakaʼi Te Tule Leʼo ʼo te ʼaho 1 ʼo Sūlio 1994, ʼi te ʼu pasina 9 ki te 11.) Ko te Kilisitiano ʼe ina maʼu te maʼua tāfito ko te hāofaki ʼo tana tui mai te ʼu manatu fakatupu kovi, pea ʼe tonu ke ina ʼiloʼi tuʼumaʼu ia ia ʼaē ʼe fakatahi mo ia.—Mat. 24:45-47; 2 Soane 10, 11.
10 Ko te alatike pe ʼaia ʼo Te Tule Leʼo neʼe ina fakahāhā te maʼuhiga ʼo te fakaʼapaʼapa ki te ʼu lao ʼo te ʼu fakagafua ʼaē ʼe ʼāteaina pe kia ia ʼaē ʼe ina fai. ʼE lahi te ʼu matani gāue ʼe nātou teuteuʼi pea mo fakatau te ʼu polokalama ʼe nātou tuku te ʼu fakagafua, pea ʼe nātou fai he pepa ʼe fakahā ai peʼe feafeaʼi te fakaʼaogaʼi fakalelei ʼo te ʼu polokalama ʼaia. ʼE fakahā ʼi te ʼu pepa ʼaia ko ia ʼaē ʼe ina fakaʼaogaʼi te polokalama ʼaia ʼe mole feala ke ina hiki ke feala hana foaki ki niʼihi te polokalama; koia ko te fai ʼo te faʼahi ʼaia ʼe ko he fakafeagai ki te fakatuʼutuʼu faka malamanei ʼaē ʼe fakagafua pe kia ia ʼaē neʼe ina fai. ʼE lahi ʼaupito te hahaʼi mānumānu ʼe mole nātou matataku ʼi te maumauʼi ʼo te lao ʼaia. Kae, ko te kau Kilisitiano, ʼe tonu ke nātou fakaʼapaʼapa fakalelei ki te ʼu lao ʼaē ʼe totonu, ʼo liufaki kia Sesale te meʼa ʼa Sesale.—Mat. 22:21; Loma 13:1.
11 Ko te ʼu matani gāue ʼe nātou fakatau te ʼu olotinatea mo te ʼu polokalama kua ʼosi teuteuʼi pea mo tona ʼu pepa moʼo fakagafua. Kae, ko ʼihi koloā ʼe nātou fakatau te ʼu olotinatea kae mole nātou foaki ia te pepa fakagafua koteʼuhi ko te ʼu polokalama ʼaē neʼe nātou ai ki te olotinatea ʼe mole totonu, ko tona faka ʼuhiga ʼe fakafeagai ki te lao mokā ʼe fakaʼaogaʼi te ʼu polokalama ʼaia. ʼO ʼuhiga mo te faʼahi ʼaia, ko te kau Kilisitiano ʼe mole tonu ke nātou hū ki he polokalama, peʼe ko te fakaʼaogaʼi ʼo he tahi age polokalama ʼaē ʼe ko he faʼahi ʼe fakagafua pe kia ia ʼaē ʼe feala ke ina fai (ohage ko te ʼu tohi ʼa te Sosiete) pea ʼe mole tonu tona hiki mo kapau ʼe mole fakagafua mai e ia ʼaē neʼe ina fai te polokalama.—Hep. 13:18.
12 Ko te maʼuhiga ʼo he faʼahiga olotinatea ʼe tonu ke ʼiloʼi lelei te ʼu tuʼutāmaki ʼe feala ke hoko ʼuhi ko tona fakaʼaogaʼi. Ohage la ʼe feala ke tou maʼu he fua lelei mai te televisio, ka ko tona ʼu ikuʼaga ki te malamanei ia ʼaho nei ʼe fakatupu ʼaki he tuʼania tāfito. Ko te ʼu olotinatea kua mafola ia ʼi te malamanei katoa pea ʼe feala ke aʼu ki te ʼapi peʼe ko te fale gāue he ʼu manatu ʼe ʼaoga. ʼE nātou faka fealagia ia te ʼu gāue kehekehe ki te ʼu sosiete ʼo feiā aipe ki te tagata takitokotahi ʼaē ʼe ʼaoga ke nātou ʼiloʼi te fakaʼaluʼalu ʼo tanatou gāue takitokotahi ʼi te temi fakatupu tuʼania ʼaē ʼe tou maʼuʼuli ai. ʼI te temi pe ʼaia, ko te ʼu olotinatea ʼe ʼulihi e te aga fakalialia, ʼe ina fakamavetevete te hahaʼi ʼaki te fehiʼa, pea mo te ʼu manatu ʼo ʼuhiga mo te faʼahiga fai ʼo te aga fakalialia pea mo te agakovi.
13 ʼE ʼi ai te ʼu tupuʼaga lahi ʼaupito ʼaē ʼe tonu ai ki te Kilisitiano ke ina taupau he manatu fakapotopoto ʼo ʼuhiga mo te fakaʼaogaʼi ʼo te olotinatea. Tokolahi ʼe nātou leleiʼia te Traduction du monde nouveau, te ʼu tohi e lua ʼo te tohi Insight, pea mo te polokalama GetVerse, ʼaē kua faka fealagia e te Sosiete ʼi te ʼu disquettes ʼo te olotinatea. Ko ʼihi neʼe nātou maʼu te fua lelei ʼi tanatou fakaʼaogaʼi te Tānakiʼaga ʼo te ʼu tohi ʼa te Sosiete Watchtower ʼi te CD-ROM, ʼaē ʼe faigafua ai te fai ʼo he ʼu kumi ki he ʼu manatu faka Tohi-Tapu. Logope tatatou ʼiloʼi te maʼuhiga ʼo te olotinatea, ko ia ʼaē ʼe ina fakaʼaogaʼi ʼaki he manatu ʼe lelei ʼe tonu ke nofo tokaga pea ke ina puipui ia ia pea mo ʼihi age mai te ʼu manatu fakatupu kovi. ʼE ʼaoga ke tou taupau te aga fakapotopoto ke ʼaua naʼa toʼo e te olotinatea totatou temi ʼaē neʼe kua tou foaki ki te ʼAtua, peʼe ke fakahēʼi tatou mai tatatou gāue pea mo tatatou ʼu fakatuʼutuʼu tāfito.—Mat. 6:22; 28:19, 20.