Ko He Tokoni ʼAoga Ki Te Fai Fakaliliu

KO TE Tupuʼaga ʼo te Tohi-Tapu, ia Sehova ʼAtua, ʼe ina loto ke tala te logo lelei ʼo te Puleʼaga “ki te u puleaga, mo te u hako, mo te u lea pea mo te hahai fuape.” (Apokalipesi 14:6) ʼE ina loto ke maʼu tana Folafola e te hahaʼi fuli. Koia ʼaē ko te Tohi-Tapu ʼe ko te tohi ʼaia ʼe lahi ʼaupito tona fakaliliu ʼi te malamanei kātoa. Ko te toko lauʼi afe kau fai fakaliliu neʼe nātou fakaʼaogaʼi tonatou temi mo tanatou faiga ke fakaliliu te ʼu manatu ʼa te ʼAtua ki te tahi lea.

Kae ko te Tohi-Tapu neʼe mole ko te tohi tāfito ʼaia ʼaē neʼe fakaliliu. Ko te Tohi-Tapu neʼe tau fakaʼaogaʼi moʼo tokoni ki te fakaliliu ʼo ʼihi tohi. Tokolahi te kau fai fakaliliu neʼe nātou fakatatau ia te ʼu fakaliliu ʼo te ʼu kupu ʼo te Tohi-Tapu ʼi te ʼu lea kehekehe ke feala ai hanatou maʼu te fakaliliu totonu ʼo he ʼu faʼahiga kupu. ʼI te temi nei, kua fakaʼaogaʼi te Tohi-Tapu ohage ko he meʼa gāue ki te ʼu fai fakaliliu ʼaē ʼe fai ʼaki te olotinatea.

ʼE faigataʼa ʼaupito ki he olotinatea hana fai fakaliliu. ʼI te fakafuafua ʼa ʼihi tagata popoto, ko te fai fakaliliu ʼe ko he gāue ʼe mole lava fai e he olotinatea. Koteā tona tupuʼaga? Ko te lea ʼe mole faʼufaʼu pe ʼaki he ʼu kupuʼi palalau. ʼE takitahi te lea mo te faʼu ʼo tona ʼu kupu, mo te fakahoahoa ʼo te ʼu kupuʼi palalau, mo te ʼu tākuga lea, pea mo te ʼu fakatatau. Neʼe mole maʼu he fua ʼo te akoʼi ki he olotinatea ia te ʼu meʼa fuli ʼaia. ʼE lahi te ʼu fai fakaliliu ʼaē neʼe fakahoko e te olotinatea ʼe mahino gataʼa.

Kae ʼe ʼui e te tagata ʼe pule ki te fai fakaliliu ʼaki te olotinatea ko Och Franz Josef, ʼe lolotoga ahiʼahiʼi nei e te kau potopoto ʼaē ʼe gāue ki te ʼu olotinatea ia te tahi ʼu puleʼaki ki te fai fakaliliu. Ohage la, ʼe koutou fia fakaliliu mai te lea faka Hindi ki te Fakapilitānia. ʼUluaki, ʼe tou toʼo muʼa he ʼu tohi ʼe maʼu ʼi te ʼu lea ʼaia e lua. ʼOsi ʼaia pea ʼe tou ʼai ki te olotinatea. ʼE fakatatau e te olotinatea ia te ʼu koga tohi ʼaia e lua. Pea ohage la, mokā tokagaʼi e te olotinatea ia he kupu faka Hindi ʼi te ʼu potu kehekehe pea ʼe tō tonu tuʼumaʼu mo te kupu Fakapilitānia “ ʼapi,” pea ʼe tukuʼaki e te masini ʼe ko te kupu ʼaia i te lea faka Hindi ʼaē ʼe fakaliliu ki te kupu “ ʼapi.” Pea ʼe ina fai feiā ki te ʼu kupu ʼaē ʼe pipiki kiai, ohage ko te “lahi,” “veliveli,” “ ʼāfea,” peʼe “foʼou.” ʼOsi ʼaia, pea ʼe fakatuʼu e te olotinatea ia he lisi ʼo he ʼu kupuʼi palalau pea ʼe ina fakaʼalutahi leva. ʼI te ʼosi fai ʼo te lisi ʼaia ʼaē neʼe lagi lauʼi ʼaho peʼe lauʼi vāhaʼa tona fai, pea hoki ʼahiʼahiʼi leva te masini ki he koga tohi foʼou. Logope ʼe mole faʼa lelei te fakahoahoa ʼo te ʼu kupu ʼaē neʼe fakaliliu, kae ʼi te agamāhani ʼe kua feala ke kita mahino ki te faka ʼuhiga ʼo te ʼu manatu pea mo te ʼu manatu maʼuhiga.

Ko te lelei ʼo te fai fakaliliu ʼe fakalogo ki te lahi ʼo te koga tohi ʼe ʼai ki te olotinatea, ʼo feiā mo te ʼu koga tohi lelei ʼe ʼai kiai. Pea ʼe ko te faʼahi la ʼaia ʼe maʼuhiga ai te Tohi-Tapu. Neʼe lelei tona fakaliliu ki te ʼu tuʼuga lea, pea ʼe faigafua tona maʼu, pea ʼe lahi ʼaupito te ʼu manatu ʼe tohi ai. Koia neʼe ʼuluaki filifili ai e te tagata fai kumi ia te Tohi-Tapu moʼo akoʼi ki te olotinatea ia he lea foʼou.