Te ʼu Fafine e Lua Kua Maʼuli Vitua

KO SANDRA ʼe ko te fafine vitua ʼe maʼuli ʼi Ositalalia. ʼI te mate ʼo tona ʼohoana kua hili nei kiai te ʼu taʼu, neʼe mole kei ʼi ai he meʼa neʼe lelei kia Sandra. “Neʼe ʼau lotomamahi ʼaupito heʼe kua mate toku ʼohoana ʼaē neʼe ma kaumeʼa lelei. ʼE mole kei ʼau manatuʼi fakalelei pe neʼe feafeaʼi taku liliu mai te lopitali ki toku ʼapi, peʼe koteā te meʼa ʼaē neʼe ʼau fai ʼi te ʼaho ʼaia. ʼI te ʼu vāhaʼa ʼaē neʼe hoa mai kiai, neʼe liliu taku ʼu tuʼania ko he meʼa fakatupu lotomamahi.”

Neʼe ʼi ai te kaumeʼa ʼo Sandra ko Elaine, kua mate tona ʼohoana kua hili kiai taʼu e ono. Neʼe taupau e Elaine tona ʼohoana ko Tavite, ia māhina e ono ʼi muʼa ʼo tana mate ʼi te kosea. Pea ʼi te lahi fau ʼo tona mamahi ʼi te ʼosi mate ʼo tona ʼohoana, neʼe kivi faka temi. Hili taʼu e lua neʼe pogia ia muʼa ʼo te kaugamālie. Neʼe mole maʼu e te tōketā hona mahaki. Kae neʼe ina fakatokagaʼi ko Elaine neʼe mole ina fakaʼasi ki tuʼa tona mamahi, koia neʼe ina ʼui age ai kia ia ke ʼalu ki tona ʼapi pea ke ʼaua naʼa ina fakamaʼumaʼu tana tagi. “ ʼE ko he meʼa neʼe mole fakapuli vave ai toku mamahi,” ko te ʼui ʼaia ʼa Elaine, pea tahi ʼaē ka “ ʼau tokotahi, ʼe ʼau tau ʼalu ki te kogafale pea ʼe ʼau ʼuʼufi ai toku ulu ʼi te ʼu mutuʼi meʼa ʼo Tavite.”

Ei, ʼe kehekehe te ʼu aga mokā mate hokita ʼohoana neʼe kita ʼofa mamahi ai, koteʼuhi ʼe mole gata pe ʼi te maʼuli tokotahi ʼa he tahi kua mate tona hoa. Ohage la ko Sandra, ʼi te kiʼi moʼi temi neʼe hage kia ia neʼe mole kei ʼi ai hona ʼuhiga. Ohage ko te tokolahi, ko te ʼu fafine vitua ʼaē ʼe mole heʼeki faʼa fualoa te kua mate ʼo tonatou ʼu ʼohoana, neʼe hage kia ia ʼe lava tuʼutāmaki gafua, pea ʼe mole he tahi moʼo puipui ia ia. ʼE manatuʼi fēnei e Sandra: “ ʼI te agamāhani neʼe ko toku ʼohoana ʼaē neʼe ina fai te ʼu tonu fakamuli, pea ʼi te temi nei kua ʼau tokotahi moʼo fai te ʼu tonu ʼaia. ʼE mole ʼau mamoe. Neʼe ʼau gaʼegaʼe pea mo vaivai. Neʼe faigataʼa haku mahino ki te meʼa ʼaē neʼe tonu ke ʼau fai.”

Ohage ko te meʼa ʼaē neʼe hoko kia Sandra pea mo Elaine, ʼe lahi te ʼu meʼa feiā ʼe hoko ʼi te malamanei katoa. Kua ʼāsili te hahaʼi ʼo te kau fafine vitua, ʼuhi ko te mahaki, te ʼu fakaʼī, te ʼu tau, te fakapogi ʼo te hahaʼi ʼo he faʼahiga lanu, pea mo te agamālohi.a Tokolahi ʼi te ʼu fafine ʼaia ʼe nātou ʼutaki tonatou mamahi, ka mole nātou ʼiloʼi he meʼa ke nātou fai. Koteā koa te meʼa ʼaē ʼe lava fai e he ʼu kaumeʼa pea mo ni ʼu kāiga, moʼo tokoni ki te ʼu fafine vitua ʼaia ke nātou maʼu he fakasiosio poto ʼi te kua ʼosi mate ʼo tonatou ʼu hoa? ʼE maʼu anai te ʼu tokoni ki te faʼahi ʼaia ʼi te alatike ʼaē ka hoa mai.

[Kiʼi nota]