“Koutou Fakaovi Ki Te Atua Pea e Fakaovi Atu Anai Kia Koutou”
Tona Maʼuli ʼi Muʼa Pea Ki Muli Age—Neʼe Ina Maʼu Te Mālohi Ke Fetogi
KO SANDRA, ko he fafine mai Mekesike, pea ʼe ina fakamatala mai neʼe mole ʼofainaʼi ʼi tona famili. ʼI tona temi tūpulaga, neʼe līʼakina ia ia, pea neʼe mole ʼofainaʼi. ʼE ina ʼui fēnei: “Lolotoga toku temi mātala, neʼe hage kia ʼau neʼe mole ʼi ai hoku ʼuhiga pea neʼe ʼau feʼekeʼaki peʼe koʼe ʼe ʼau maʼuli, pea koteā te ʼuhiga totonu ʼo te maʼuli.”
ʼI tana ako ʼi te ʼu faleako lalahi, neʼe kamata ʼinu e Sandra te ʼu foʼi vino ʼaē neʼe tuku e tana tāmai ʼi fale. ʼAki te temi, neʼe ina kamata toʼo tana ʼu foʼi kava pea neʼe liliu ko he tahi ʼe lahi tana ʼinu kava. ʼE ina ʼui fakahagatonu mai: “Neʼe mole kei ʼau fia maʼuli.” ʼI tana lotomamahi, neʼe kamata toloke ia Sandra. ʼE ina ʼui fēnei: “Ko te meʼa e tahi neʼe tokoni mai kia ʼau ke ʼau galoʼi toku ʼu fihifihia, ʼe ko te meʼa ʼaē neʼe tuku ʼi taku kato: ko te foʼi kava, mo te ʼu foʼi ʼakau folo, peʼe ko he kiʼi moʼi marijuana.”
ʼI te ʼosi ʼo te ako ʼa Sandra ʼi te faleako tōketā, neʼe lēsili tana inu kava. Neʼe fia fakamate. Kae neʼe hāo ia.
Neʼe feʼaluʼaki ia Sandra ʼi te ʼu lotu kehekehe, he neʼe ina fia maʼu he tokoni ʼi te faʼahi fakalaumālie pea mo he fakaloto mālohi, kae neʼe mole ʼi ai hona fua. ʼI tana mole kei falala ki he meʼa pea mo tana kua tō ki te heʼe ʼamanaki, neʼe tau tagi fēnei ki te ʼAtua: “ ʼE ke ʼifea? He koʼe koa ʼe mole ke tokoni mai?” Neʼe kua ina meʼa noaʼi ia ia totonu, pea mo te ʼalu age ʼa te fafine ko te Fakamoʼoni ʼa Sehova ʼo nā fai palalau. Neʼe fai tana ako Tohi-Tapu, pea neʼe malave ʼaupito kia Sandra tana ako ʼaē “ko Sehova ʼe ōvi kia nātou ʼaē ʼe loto lavea.”—Pesalemo 34:18.
Neʼe tokoni age tana fafine faiako Tohi-Tapu ke mahino ko Sehova ʼAtua ʼe ina ʼiloʼi ko tatou ʼe tou vaivai gafua, ʼuhi ko te agahala pea mo te heʼe haohaoa ʼaē neʼe tou maʼu mai ia Atama. Neʼe ʼiloʼi ai e Sandra ko te ʼAtua ʼe mahino ko tatou ʼe mole tou lava muliʼi fakalelei katoa te ʼu pelesepeto faitotonu. (Pesalemo 51:5; Loma 3:23; 5:12, 18) Neʼe fiafia ʼi tana ako ko Sehova ʼe mole ina tokagaʼi totatou ʼu vaivaiʼaga, pea ʼe mole ina fakamaʼua mai he ʼu meʼa ʼe mole tou lavaʼi. Neʼe fehuʼi fēnei e te tagata fai pesalemo: “Kapau neʼe ke sivi te ʼu hala, Ê Sah, Ê Sehova, ko ai koa ʼaē ʼe feala anai ke tuʼu?”—Pesalemo 130:3.
Ko te akonaki ʼo te sakilifisio faitotogi ʼa Sesu Kilisito, neʼe ko he akonaki faka Tohi-Tapu maʼuhiga neʼe malave ʼi te loto ʼo Sandra. ʼAki te puleʼaki ʼaia, ʼe faka fealagia ai e Sehova ʼaki tona manavaʼofa, ke faitotonu te hahaʼi fakalogo logope tanatou heʼe haohaoa. (1 Soane 2:2; 4:9, 10) Ei, ʼe tou lava maʼu “te fakamolemole ʼo tatatou ʼu hala,” pea mo tou maʼu he tokoni ke mole tou manatu ʼe mole hotatou ʼuhiga.—Efeso 1:7, MN.
Neʼe ʼiloʼi ai e Sandra te ako maʼuhiga mai te faʼifaʼitaki ʼa te ʼapositolo ko Paulo. Kua ina leleiʼia ʼaupito ia te agalelei ʼo te ʼAtua ʼi tana fakamolemole tana ʼu hala ʼo te ʼu temi kua hili, pea mo tokoni age ki ai ki tana tau mālohi ke mālo ʼi tona ʼu vaivaiʼaga ʼaē ʼe malaga ia ia. (Loma 7:15-25; 1 Kolonito 15:9, 10) Neʼe fakatonutonuʼi e Paulo tona faʼahiga maʼuli, ‘ ʼo tukipalaʼi tona sino pea mo taki ohage ko he tahi ʼe popūla’ ke nofo maʼu ʼi te ala ʼaē ʼe tali lelei e te ʼAtua. (1 Kolonito 9:27) Neʼe mole ina faka fealagia ki tana ʼu holi ki te agahala, ke nātou taki ia ia ohage ko he tahi ʼe popūla.
Neʼe maʼuli kinakina ia Sandra ʼi tona ʼu vaivaiʼaga, kae neʼe kātaki aipe ʼo tauʼi. Neʼe faikole fakamalotoloto ke tokoni age ia Sehova moʼo tauʼi tona ʼu vaivaiʼaga, pea mo kumi tona manavaʼofa. (Pesalemo 55:22; Sakopo 4:8) ʼI tana mahino ki te tokaga age ʼa te ʼAtua kia ia, neʼe lava fetogi katoa ai e Sandra tona faʼahiga maʼuli. ʼE ina ʼui fēnei: “ ʼE ʼau fiafia ʼi te gāue temi katoa moʼo akoʼi te Tohi-Tapu ki te hahaʼi.” Neʼe maʼu e Sandra te pilivilesio fakafiafia ʼaē ko te tokoni ki tona taʼokete pea mo tona tēhina veliveli ke nā ʼiloʼi ia Sehova. Moʼo ‘fai te meʼa ʼaē ʼe lelei,’ ʼe toe tokoni foki ʼi te ʼu fakatahi lalahi ʼa te kau Fakamoʼoni ʼa Sehova, ʼo gāue ʼi te faʼahi faka tōketā.—Kalate 6:10.
Kua feafeaʼi ki te ʼu agamāhani kovi ʼa Sandra? ʼE ina ʼui fēnei ʼaki he lotomālohi: “ ʼE mālama lelei toku ʼatamai. ʼE mole kei ʼau inu, ʼe mole kei ʼau suluka, pea ʼe mole kei ʼau toloke. ʼE mole kei ʼi ai he ʼaoga ʼo te ʼu meʼa ʼaia kia ʼau. Kua ʼau maʼu te meʼa ʼaē neʼe ʼau kumi.”
[Talanoa ʼo te pasina 9]
Te ʼu Pelesepeto Faka Tohi-Tapu ʼe Nātou Fetogi Te Maʼuli
Ko te ʼu pelesepeto faka Tohi-Tapu ʼaenī neʼe tokoni ki te tokolahi ke nātou faka ʼāteaina mai te ʼu agamāhani ʼaē ʼe nātou ʼulihi ai te sino:
“Tou fakamaʼa ia tatou mai te meʼa ʼuli fuli pe ʼo te kakano pea mo te laumālie, ʼo fakakatoa te maʼoniʼoni ʼi te manavasiʼi ki te ʼAtua.” (2 Kolonito 7:1, MN) ʼE tapuakina e te ʼAtua ia nātou ʼaē kua nātou fakamaʼa ia nātou mai te ʼulihi ʼo tonatou sino, ʼo nātou līaki te ʼu aga heʼemaʼa.
“Ko te manavasiʼi kia Sehova ko tona faka ʼuhiga ko te fehiʼa ki te kovi.” (Tāʼaga Lea 8:13) Ko te manavasiʼi ki te ʼAtua ʼe tokoni ki he tahi ke ina faka ʼāteaina ia ia mai he ʼu agamāhani ʼe kovi, ʼo kau ai ia te fakaʼaogaʼi ʼo te toloke. ʼI tuʼa atu ʼo tana fakafiafia ia Sehova, ko ia ʼaē kua ina fetogi tona maʼuli, ʼe hāofaki mai he ʼu mahaki fakamataku.
“Ke nātou fakalogo pea mo talagafua ki te ʼu puleʼaga pea mo te kau takitaki ohage ko he ʼu pule.” (Tito 3:1, MN ) ʼE lahi te ʼu fenua, ko te nofo mo he faʼahiga toloke peʼe ko tona fakaʼaogaʼi, ʼe ko he maumauʼi ʼo te lao. ʼE mole nofo te kau Kilisitiano moʼoni mo he toloke, pea ʼe mole nātou fakaʼaogaʼi.
[Paki ʼo te pasina 9]
“Kua ʼau maʼu te meʼa ʼaē neʼe ʼau kumi”