Te ʼu Fehuʼi ʼa Te Kau Lautohi

Neʼe ʼifea ia Taniela ʼi te temi ʼaē neʼe ʼahiʼahiʼi ai ia te toko tolu kau Hepeleo ia muʼa ʼo te fakatātā lahi ʼaē neʼe fakatuʼu e Nepukanesa ʼi te mafa ʼo Tula?

ʼE mole fakahā mai he meʼa ʼi te Tohi-Tapu, koia ʼe mole feala ki he tahi ke ina ʼui papau peʼe neʼe ʼifea ia Taniela lolotoga te ʼahiʼahi ʼaia.

Ko ʼihi ʼe nātou lau ʼuhi ko tona tuʼulaga maʼuhiga pea mo tona ʼofainaʼi e Nepukanesa, koia neʼe māʼoluga age ia ia Satalake, mo Mesake, pea mo Apeteneko pea koia neʼe mole fakamaʼua ai kia Taniela ke ʼalu ki te mafa ʼo Tula. ʼE fakahā e Taniela 2:49 neʼe ʼi ai te tahi temi neʼe māʼoluga age tona tuʼulaga ʼi tona ʼu kaumeʼa e tolu. Kae ʼe mole feala ke tou fakamoʼoni ʼaki te faʼahi ʼaia te tupuʼaga ʼo tana mole fakatahi mo te hahaʼi ia muʼa ʼo te fakatātā.

Ko ʼihi ʼi tanatou faigaʼi ke nātou fakamahino te puli ʼa Taniela, neʼe nātou ʼui neʼe lagi hinoʼi ia ia ki he gāue faka puleʼaga ʼi he tahi koga meʼa, peʼe nātou ʼui neʼe mole lava kau ki te fakatahi he neʼe mahaki. Kae ʼe mole fakahā mai he faʼahi feiā e te Tohi-Tapu. Kae ʼe tou ʼiloʼi papau, neʼe mole atolasio ia Taniela ki te fakatātā, koteʼuhi kanapaula neʼe koia ʼaia, kanaʼauala neʼe feala pe ke fakaʼaogaʼi te potu ʼaia e te kau pule maheka ʼo Papiloni moʼona tukugakoviʼi. (Taniela 3:8) ʼI muʼa atu pea mo te hili ʼo te fakamatala ʼaenī, neʼe fakamoʼoni e Taniela ko ia neʼe agatonu ki te ʼAtua logope he faʼahiga ʼaluʼaga neʼe tau mo ia. (Taniela 1:8; 5:17; 6:4, 10, 11) Pea tatau aipe peʼe mole tala mai e te Tohi-Tapu te tupuʼaga ʼo te puli ʼa Taniela ʼi te mafa ʼo Tula, kae ʼe tou falala neʼe mole ina fakatō laloʼi tana agatonu kia Sehova ʼAtua.—Esekiele 14:14; Hepeleo 11:33.