Te ʼu Fehuʼi ʼa Te Kau Lautohi
Koteā te ‘mālōlō’ ʼaē ʼe palalau kiai ia Hepeleo 4:9-11, pea e feafeaʼi ki he tahi hana ‘hū ki te mālōlō ʼaia’?
Neʼe tohi fēnei e te ʼapositolo ko Paulo ki te kau Kilisitiano Hepeleo ʼo te ʼuluaki sēkulō: “ ʼE kei toe ai foki te mālōlō faka sapato ki te hahaʼi ʼa te ʼAtua. Ko ʼaē kua hū ki te mālōlō ʼa te ʼAtua kua toe mālōlō mo ia mai tana ʼu gāue ohage pe ko te mālōlō ʼa te ʼAtua mai tana ʼu gāue. Koia ke tou faigaʼi foki te meʼa fuli ʼe tou lavaʼi ke tou hū ki te mālōlō ʼaia.”—Hepeleo 4:9-11, MN.
ʼI te palalau ʼaē ʼa Paulo ki te mālōlō ʼa te ʼAtua mai Tana gāue, ʼe lagi neʼe fia talanoa ki te ʼu meʼa ʼaē neʼe tuʼu ia Senesi 2:2, ʼaē ʼe tou lau fēnei ai: “ ʼI te fitu ʼaho neʼe fakaʼosi e te ʼAtua tana gāue ʼaē neʼe ina fai; pea neʼe mālōlō ia ʼi te fitu ʼaho mai tana gāue fuli ʼaē neʼe ina fai.” He koʼe neʼe “mālōlō [Sehova] ʼi te fitu ʼaho”? Neʼe mole mālōlō ia ʼuhi he neʼe kua gaʼegaʼe “mai tana gāue fuli ʼaē neʼe ina fai.” Heʼe tou lau fēnei ʼi te vahe 3: “Neʼe tapuakina e te ʼAtua te fitu ʼaho pea neʼe ina fakaliliu ko he ʼaho taputapu, heʼe ko te ʼaho ʼaia neʼe mālōlō ai mai tana gāue fuli ʼaē neʼe fai e te ʼAtua moʼo fakatupu.”—Senesi 2:3; Isaia 40:26, 28.
Neʼe kehe te “fitu ʼaho” ʼi te ʼu ʼaho e ono ʼaē kua hili, he ko te ʼaho ʼaia neʼe tapuakina e te ʼAtua pea neʼe ina fakaliliu ʼo taputapu, ko he ʼaho kua ina tuku keheʼi, kua ina tuku ki he fakatuʼutuʼu makehe. Neʼe koteā te fakatuʼutuʼu ʼaia? ʼI te kamata, neʼe fakahā e te ʼAtua tana fakatuʼutuʼu ʼo ʼuhiga mo te malamanei pea mo te kele. Neʼe ʼui fēnei age e te ʼAtua ki te ʼuluaki tagata pea mo tona ʼohoana: “ Koulua fanaunau, pea koulua liliu ʼo hahaʼi, pea koulua fakafonu te kele, pea koulua puleʼi, pea koulua pule ki te ʼu ika ʼo te tai, pea mo te ʼu manulele ʼo te lagi pea mo te ʼu meʼa maʼuli fuli ʼe gaūgaūe ʼi te kele.” (Senesi 1:28) Logola neʼe foaki e te ʼAtua te kamataʼaga haohaoa ki te malamanei pea mo te kele, kae neʼe toe fakamaʼua kiai te temi loaloaga ke liliu ai te kele katoa ko te palatiso, pea ke maʼuli ai he foʼi famili haohaoa ohage ko te meʼa ʼaē neʼe loto kiai te ʼAtua. Koia ʼi te “fitu ʼaho” neʼe mālōlō ai te ʼAtua ʼi tana ʼu gāue fuli ʼaē neʼe ina fai ʼo ʼuhiga mo te kele, ke feala ai ki te ʼu meʼa ʼaē neʼe kua ina fakatupu ke nātou fakahoko tona finegalo. Pea ʼi te fakaʼosi leva ʼo te “ ʼaho” ʼaia, ʼe hoko anai ia meʼa fuli ʼaē neʼe fakatuʼutuʼu kiai te ʼAtua. ʼE loaloaga feafeaʼi anai te temi mālōlō ʼaia?
ʼO ʼuhiga mo te palalau ʼa Paulo ki te kau Hepeleo, ʼe tou fakatokagaʼi neʼe ina ʼui “ ʼe kei toe ai foki te mālōlō faka sapato ki te hahaʼi ʼa te ʼAtua,” pea neʼe ina fakaloto mālohiʼi tona ʼu kaugā fagona Kilisitiano ke nātou faiga ke nātou “hū ki te mālōlō ʼaia.” ʼO hā ʼaki ai, ko te “fitu ʼaho” ʼo te mālōlō ʼa te ʼAtua, ʼaē neʼe talanoa kiai ia Paulo, neʼe kamata kua hili nei kiai taʼu e 4 000, pea ʼe kei lolotoga hoko nei te ʼaho mālōlō ʼaia. ʼE hoki ʼosi anai te ʼaho ʼaia mokā hoko katoa te fakatuʼutuʼu ʼa te ʼAtua ʼo ʼuhiga mo te malamanei pea mo te kele, ʼi te fakaʼosi ʼo te ʼu Taʼu e Afe ʼo Te ʼAfio ʼa Sesu Kilisito, ia te “ ʼAliki ʼo te sapato.”—Mateo 12:8, MN; Apokalipesi 20:1-6; 21:1-4.
ʼAki te fakatuʼutuʼu taulekaleka ʼaia, neʼe fakamahino ai e Paulo peʼe lava feafeaʼi ki he tahi hana hū ki te mālōlō ʼa te ʼAtua. Neʼe ina tohi fēnei: “Ko ʼaē kua hū ki te mālōlō ʼa te ʼatua kua toe mālōlō mo ia mai tana ʼu gāue.” ʼAki te ʼu palalau ʼaenī, ʼe mahino mai kia tatou logola neʼe haohaoa te kamataʼaga, kae ko te malamanei katoa neʼe heʼeki hū ki te mālōlō ʼa te ʼAtua. Koteʼuhi neʼe mole nofo fualoa ia Atama mo Eva ʼi te “fitu ʼaho” ʼo te mālōlō ʼa te ʼAtua he neʼe mole nā tali tana fakatuʼutuʼu. Kae neʼe nā agatuʼu pea mo loto faʼifaʼitaliha ki te ʼAtua. Koia, neʼe nā lagolago ai leva ki te ʼu fakatuʼutuʼu ʼa Satana kae mole nā muliʼi te takitaki ʼofa ʼa te ʼAtua. (Senesi 2:15-17) Koia, neʼe mole nā maʼu ai te ʼamanaki ʼo he maʼuli heʼegata ʼi te palatiso ʼi te kele. Talu mai te ʼaho ʼaia, kua liliu te malamanei katoa ʼo nofo popūla ki te agahala pea mo te mate.—Loma 5:12, 14.
Kae neʼe mole pulihi e te agatuʼu ʼa te malamanei ia te fakatuʼutuʼu ʼa te ʼAtua. ʼE kei hoholo pe tona ʼaho mālōlō, he neʼe fai e Sehova te fakatuʼutuʼu ʼofa, ko te totogi ʼaki tona ʼAlo ko Sesu Kilisito, ke feala ai kia nātou fuli ʼaē ʼe nātou tui ki te sakilifisio ʼaia ke nātou fakaʼamu ki he ʼāteaina pea mo he mālōlō mai te agahala pea mo te mate. (Loma 6:23) Koia la ʼaē neʼe fakaloto mālohiʼi ai e Paulo tona ʼu kaugā fagona ke nātou ‘mālōlō mai tanatou ʼu gāue.’ ʼE tonu ke nātou tali te fakatuʼutuʼu ʼa te ʼAtua ʼo ʼuhiga mo te hāofaki, pea ke ʼaua naʼa nātou fia faʼifaʼitaliha ohage ko tona fai ʼaē ʼe Atama mo Eva. ʼE tonu foki ke nātou toe tekeʼi tanatou fia tonuʼia ʼaē ʼi tanatou ʼu gāue.
Ko te tuku keheʼi ʼo he ʼu meʼa ʼe kita holi kiai ʼuhi heʼe tou fia fai te finegalo ʼo te ʼAtua, ʼe ko he meʼa ʼe fakatupu tokalelei pea mo faka fīmālie. Neʼe fai e Sesu te fakaafe ʼaenī: “Ke omai kia te au, ia natou fuape e mamahi pea mo natou e mafasia i te fua kavega, pea e au fakafimalieʼi anai koutou. Koutou ai kia koutou taku fakagutu pea koutou ako maia te au. Koteuhi, i toku loto, e au agamalu mo agavaivai, pea e koutou mau anai te fimalie ki outou laumalie. Koteuhi e lelei taku fakagutu pea e maamaa taku amoga.”—Mateo 11:28-30.
Ko te talanoa ʼa Paulo ʼo ʼuhiga mo te mālōlō ʼa te ʼAtua pea mo te hū ʼa he tahi ki te mālōlō ʼaia, ʼe lagi neʼe ko he meʼa fakatupu lotomālohi ki te kau Kilisitiano Hepeleo ʼi Selusalemi, ʼaē neʼe nātou ʼutakiʼi te ʼu fakataga pea mo te ʼu manuki ʼuhi ko tanatou tui. (Gaue 8:1; 12:1-5) ʼE toe fakaloto mālohiʼi e te ʼu palalau ʼa Paulo te kau Kilisitiano ia ʼaho nei. ʼI tatatou ʼiloʼi kua ōvi mai te fakahoko ʼo te fakapapau ʼa te ʼAtua ʼo ʼuhiga mo te palatiso ʼi te kele ʼaki tona Puleʼaga faitotonu, ʼe tonu ai ke tou mālōlō ʼi tatatou ʼu gāue pea mo tou faiga ke tou hū ki te mālōlō ʼa te ʼAtua.—Mateo 6:10, 33; 2 Petelo 3:13.
[Paki ʼo te pasina 31]
Ko te fakapapau ʼa te ʼAtua ʼo ʼuhiga mo he palatiso ʼi te kele ʼe hoko moʼoni anai ʼi te fakaʼosi ʼo tona ʼaho mālōlō