Kei Koutou Manatuʼi Koa?

Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:

• ʼO ʼuhiga mo te lotu, ko te mālo fea ʼaē neʼe kau ai te Tribunal Constitutionnel Fédéral ʼo Siamani?

Neʼe molehi e te telepinale ʼaia te tonu kovi ʼa te tahi telepinale ʼo ʼuhiga mo te kau Fakamoʼoni ʼa Sehova pea mo te fakagafua ʼo tanatou lotu. Neʼe fakatokagaʼi e te telepinale ʼaia, ʼi te ʼāteaina faka lotu ʼe feala ki he tahi ke lahi age tana ‘fakalogo ki te ʼu akonaki faka lotu’ ʼi te ʼu meʼa ʼaē ʼe kole age kia ia e te puleʼaga.—15/8, pasina 8.

• Ko temi ʼe fia neʼe mamahi ai Sopo?

ʼE mole fakahā e te tohi ʼo Sopo neʼe lauʼi taʼu te mamahi ʼo Sopo. Neʼe lagi hoko te mamahi ʼo Sopo ʼo feiā mo tana nofo agatonu lolotoga te ʼu māhina, kae neʼe mole lagi hoko ʼi he taʼu katoa.—15/8, pasina 31.

• He koʼe ʼe tou tui papau ko te Tevolo ʼe mole ko he meʼa pe moʼo fakamatakuʼi?

Neʼe tui e Sesu Kilisito neʼe maʼuli moʼoni te Tevolo. Neʼe mole ʼahiʼahiʼi Sesu e he meʼa kovi neʼe ʼi tona sino. Neʼe ko he tahi moʼoni ʼaē neʼe ina fia fakahalaʼi ia ia. (Mateo 4:1-11; Soane 8:44; 14:30)—1/9, pasina 5 ki te 6.

• ʼE ʼui fēnei e Tāʼaga Lea 10:15: “Ko te ʼu koloā ʼa te tagata maʼu meʼa ʼe ko hona kolo mālohi. Ko te meʼa ʼaē ʼe ina maumauʼi te hahaʼi liliki ʼe ko tanatou masiva.” ʼE lava hoko feafeaʼi te potu ʼaia?

ʼE feala ki te ʼu koloā ke ina puipui tatou, mokā hoko mai he ʼu meʼa fakapunamaʼuli ʼi totatou maʼuli, ohage ko he kolo mo hona ʼu kaupā, ʼe ina lava puipui te hahaʼi ʼaē ʼe nonofo ai. Pea ko te masiva ʼe feala ke iku ki he ʼaluʼaga fakaʼofaʼofa mokā hoko he ʼu tuʼutāmaki.—15/9, pasina 24.

• ʼE faka ʼuhiga feafeaʼi te ʼui ʼaē neʼe kamata “fetapā te hahaʼi ki te huafa ʼo Sehova” ʼi te temi ʼo Enosi? (Senesi 4:26)

Neʼe kua fakaʼaogaʼi te huafa ʼo te ʼAtua talu mai te kamataʼaga ʼo te maʼuli ʼo te tagata; koia, ko te meʼa ʼaē neʼe kamata ʼi te kei maʼuli ʼa Enosi, neʼe mole ko he fetapā kia Sehova ʼaki te tui. Neʼe lagi fakaʼaogaʼi te huafa ʼo Sehova e ʼihi tagata kia nātou totonu, peʼe ki ʼihi tagata neʼe nātou lau ʼe nātou tauhi ki te ʼAtua.—15/9, pasina 29.

• Koteā te faka ʼuhiga ʼo te kupu “fakatonutonu” ʼi te Tohi-Tapu?

Ko te kupu ʼaia ʼe mole faka ʼuhiga pe ki he faʼahiga gaohi koviʼi peʼe ko he agakovi. (Tāʼaga Lea 4:13; 22:15) Ko te kupu “fakatonutonu” ʼi te faka Keleka, ʼe pipiki tāfito ia ki te ako, mo te akonakiʼi, pea ʼi ʼihi temi, ki te fakatūʼa ʼaē ʼe fai ʼaki te ʼofa. Ko he faʼahi maʼuhiga ʼe feala ke faʼifaʼitakiʼi e te ʼu mātuʼa mai ia Sehova, ʼe ko te faigaʼi ke nātou fai palalau tuʼumaʼu mo tanatou ʼu fānau. (Hepeleo 12:7-10)—1/10, pasina 8, 10.

• ʼE fakahā feafeaʼi e te kau Kilisitiano moʼoni ʼe nātou lagolago ki te takitaki ʼa te ʼAtua?

Ko te kau Fakamoʼoni ʼa Sehova ʼe nātou lagolago ki te Puleʼaga ʼo te ʼAtua, koia ʼe mole nātou kau ai ki te ʼu meʼa faka politike peʼe agatuʼu ki te ʼu puleʼaga fakatagata, māʼiape la mo te ʼu fenua ʼaē ʼe tapuʼi ai tanatou gāue. (Tito 3:1) ʼE nātou fai he ʼu meʼa ʼe nātou ʼaoga ai ʼo nātou mulimuli pe ki tona fai e Sesu pea mo tana kau tisipulo ʼo te ʼuluaki sēkulō, pea ʼe nātou faiga ke nātou tokoni ki te hahaʼi ke nātou maʼuliʼi te ʼu lekula maʼuhiga ʼo te Tohi-Tapu, ohage ko te agatonu, te aga maʼa ʼo ʼuhiga mo te ʼu aga ʼaē ʼe tonu ke fai, pea mo te agatonu ʼi te gāue.—15/10, pasina 6.

• ʼE tafe feafeaʼi te ʼu vai ʼo te maʼuli ʼi te ʼu Andes?

ʼE faiga mālohi te kau Fakamoʼoni ʼa Sehova ke nātou fakakaku te ʼu moʼoni ʼa te Tohi-Tapu ki te hahaʼi, ʼo nātou fai ki te ʼu lea tāfito e lua ʼaē ko te faka Quechua pea mo te faka Aymara. Ko te kau Fakamoʼoni ʼe nātou ʼaʼahi te hahaʼi ʼe maʼuʼuli ʼi te ʼu motu ʼo te vai ʼo Titicaca, ʼo kau mo te ʼu nofoʼaga ʼe “maʼanu” neʼe fai ʼaki te ʼu kaho ʼe homo ake ai.—15/10, pasina 8 ki te 10.

• Koteā ʼaē neʼe foaki e te ʼAtua ki te tagata ʼe feala ke fakatatau ki te olotinatea ʼaē ʼe nātou takitaki te ʼu vakalele ʼi te lagi?

Neʼe foaki e te ʼAtua ki te tagata he fealagia moʼona takitaki ʼo ʼuhiga mo te aga ʼaē ʼe tonu ke ina fai. Ko te meʼa ʼaia ʼe ko totatou leʼo ʼo loto ʼaē neʼe tou tutupu ake mo ia. (Loma 2:14, 15)—1/11, pasina 3 ki te 4

• He koʼe koa ʼe maʼuhiga ʼaupito te mate ʼo Sesu?

ʼI te agahala ʼa te tagata haohaoa ko Atama, neʼe ina pulihi te maʼuli maʼa ia totonu pea mo tona hākoga. (Loma 5:12) ʼI tona ʼuhiga tagata haohaoa, neʼe sakilifisioʼi e Sesu tona maʼuli, ʼo foaki ai te totogi ʼe ina faka fealagia ai ki te hahaʼi agatonu ke nātou maʼu te maʼuli heʼegata.—15/11, pasina 5 ki te 6.

• Ko ai koa te kau Site ʼaē ʼe tuʼu ia Kolose 3:11?

Ko te kau Site neʼe ko he hahaʼi feʼoloʼaki mai te ʼu fenua ʼo Eurasie, ʼo nātou pule lagi mai te ʼu taʼu 700 ki te taʼu 300 ʼi muʼa ʼo totatou temi. Neʼe nātou faiva ʼi te heka hōsi pea mo te tau. ʼE lagi faka ʼuhiga ia Kolose 3:11 ki he ʼu hahaʼi agamālohi ʼaupito, kae mole faka ʼuhiga ki he puleʼaga.—15/11, pasina 24 ki te 25.

• He koʼe ʼe feala ke tou ʼui ko te Lekula Aulo ʼe ko he akonaki ʼe tonu ia ke tou tokagaʼi?

Ko te tākuga ʼaia neʼe toe toʼo e te lotu faka Sutea, mo te Putisi, mo te filosofia faka Keleka pea mo te Confucianisme. Kae ko te ʼu palalau ʼa Sesu ʼi te Akonaki ʼi te Moʼuga ʼe ina fakamaʼua mai ke kita fai te ʼu meʼa ʼaē ʼe lelei, pea ʼe malave ki te maʼuli ʼo te hahaʼi ʼi te ʼu koga meʼa fuli pe pea mo te ʼu temi fuli pe. (Mateo 7:12)—1/12, pasina 3.