Ko Te Kau Kilisitiano Moʼoni Fuli ʼe Ko Te Kau Faka Mafola Evaselio

“Koutou hiva kia Sehova, koutou fakavikiviki tona huafa. ʼI te ʼaho fuli pe koutou fakahā te logo lelei ʼo tana hāofaki.”—Pesalemo 96:2.

1. Koteā te logo lelei ʼaē ʼe ʼaoga ke logo kiai te hahaʼi, pea koteā te faʼifaʼitaki lelei neʼe tuku e te kau Fakamoʼoni ʼa Sehova, ʼo ʼuhiga mo te faka mafola ʼo te logo lelei ʼaia?

ʼE TOU loto fīmālie moʼoni ʼi tatatou ʼiloʼi ʼaē ʼe fakahā ʼi te Tohi-Tapu kua vave molehi te tau, mo te fakapō, mo te hoge pea mo te mamahi ʼi te mālama ʼe hoko tuʼumaʼu ai te ʼu tuʼutāmaki. (Pesalemo 46:9; 72:3, 7, 8, 12, 16) ʼE mole koa la ʼaoga ki te hahaʼi fuli ke nātou logo ki he logo lelei? ʼE manatu feiā te kau Fakamoʼoni ʼa Sehova. ʼE ʼiloa nātou ʼi te ʼu potu fuli ko te kau fai faka mafola ʼo “te ʼu logo lelei ʼo he meʼa ʼe lelei age.” (Isaia 52:7) ʼE moʼoni neʼe gaohi koviʼi te kau Fakamoʼoni ʼuhi ko tanatou tala te logo lelei ʼaia. Kae ʼe nātou tokaga tāfito ki te ʼu meʼa ʼaē ʼe ʼaoga ki te hahaʼi. Pea ʼe faʼafai pea mo faʼa kātaki ia te kau Fakamoʼoni!

2. He koʼe ʼe faʼafai te kau Fakamoʼoni ʼa Sehova?

² Ko te faʼafai ʼa te kau Fakamoʼoni ʼa Sehova ʼo te temi nei ʼe hage ko te kau Kilisitiano ʼo te ʼuluaki sēkulō. ʼO ʼuhiga mo te kau Kilisitiano ʼaia, neʼe ʼui fēnei e te sulunale Katolika Loma LʼOsservatore Romano: “ ʼI te ʼosi pe ʼo te papitemaʼi ʼo te kau ʼuluaki Kilisitiano, pea nātou faka mafola te Evaselio. Neʼe faka mafola te Evaselio e te ʼu kaugana.” He koʼe ʼe tatau te faʼafai ʼa te kau Fakamoʼoni ʼa Sehova mo te kau ʼuluaki Kilisitiano ʼaia? ʼUluaki, he ko te logo lelei ʼaē ʼe nātou faka mafola ʼe haʼu mai ia Sehova ʼAtua. ʼE ʼi ai koa he tahi age tupuʼaga lelei ke kita faʼafai? ʼAki tanatou faka mafola ʼe nātou tali ki te ʼu palalau ʼaenī ʼa te tagata fai pesalemo: “Koutou hiva kia Sehova, koutou fakavikiviki tona huafa. ʼI te ʼaho fuli pe koutou fakahā te logo lelei ʼo tana hāofaki.”—Pesalemo 96:2.

3. (a) Koteā te lua tupuʼaga ʼo te faʼafai ʼa te kau Fakamoʼoni ʼa Sehova? (b) Koteā ʼaē ʼe fakamaʼua ki te “hāofaki ʼa te [ʼAtua]”?

³ ʼE tou toe maʼu ʼi te ʼu palalau ʼa te tagata fai pesalemo te lua tupuʼaga ʼo te faʼafai ʼa te kau Fakamoʼoni ʼa Sehova. Ko tanatou logo ʼe ina hāofaki. Ko ʼihi ʼe nātou gāue ʼi te faʼahi faka tōketā, mo te maʼuli faka sosiale pea mo faka ekonomika ʼo te hahaʼi, peʼe ko te tahi age ʼu ʼaluʼaga moʼo hikihiki te maʼuli ʼo te hahaʼi, pea ʼe tou fakafetaʼi ki te ʼu taʼi faiga ʼaia. Kae ʼe mole lava ke katoa te ʼu meʼa ʼaē ʼe fai e te tagata mo kapau ʼe fakatatau ki te “hāofaki [ʼa te ʼAtua].” ʼAki ia Sesu Kilisito, ʼe hāofaki anai e Sehova te kau agavaivai mai te agahala, mo te mahaki pea mo te mate. Ko nātou ʼaia ʼe nātou maʼuʼuli anai ʼo heʼegata! (Soane 3:16, 36; Apokalipesi 21:3, 4) Ia ʼaho nei, ko te fakamaʼuli ʼe kau ʼi te ʼu “gāue fakaofoofo” ʼaē ʼe fakahā e te kau Kilisitiano heʼe nātou mulimuli ki te ʼu palalau ʼaenī: “Koutou kalagaʼi [te] kolōlia [ʼa te ʼAtua] ʼi te lotolotoiga ʼo te ʼu puleʼaga, pea mo tana ʼu gāue fakaofoofo ʼi te lotolotoiga ʼo te hahaʼi fuli. ʼUhi ko Sehova ʼe lahi pea ʼe tonu ke tou vikiʼi tuʼumaʼu ia ia. ʼE fakatupu manavasiʼi ia ʼi te ʼu ʼatua fuli ʼaē.”—Pesalemo 96:3, 4.

Te Faʼifaʼitaki ʼa Te ʼAliki

4-6. (a) Koteā te tolu tupuʼaga ʼo te faʼafai ʼa te kau Fakamoʼoni ʼa Sehova? (b) Neʼe feafeaʼi te faʼafai ʼa Sesu ʼo ʼuhiga mo te faka mafola ʼo te logo lelei?

⁴ ʼE ʼi ai te tolu tupuʼaga ʼo te faʼafai ʼa te kau Fakamoʼoni ʼa Sehova. ʼE nātou muliʼi te faʼifaʼitaki ʼa Sesu Kilisito. (1 Petelo 2:21) Ko te tagata haohaoa ʼaia neʼe ina “fakahā ki te kau agavaivai [te] logo lelei.” (Isaia 61:1; Luka 4:17-21) Koia, neʼe liliu ia ko te tagata faka mafola evaselio, ko he tahi ʼe ina tala te logo lelei. Neʼe feʼaluʼaki ʼi te fenua katoa ʼo Kalilea pea mo Sutea ʼo “faka mafola te logo lelei ʼo te puleʼaga.” (Mateo 4:23, MN ) Pea ʼi tana ʼiloʼi ʼaē ʼe hahaʼi anai ia nātou ʼaē ka nātou tali te logo, neʼe ina ʼui fēnei ki tana kau tisipulo: “E lahi te taukai, kae e lavaki te kau gaue. Koia, koutou faikole ki te Aliki o te taukai, ke ina fekaui mai he kau gaue ki tana taukai.”—Mateo 9:37, 38.

⁵ Ohage ko te faikole ʼaē neʼe ina fai, neʼe akoʼi e Sesu ki te hahaʼi ke nātou liliu ko te kau faka mafola evaselio. ʼAki te temi, neʼe ina fekauʼi tana kau ʼapositolo ki tonatou fenua totonu pea mo ʼui maʼana kia nātou: “ ʼI takotou ʼalu ʼi ala, koutou faka mafola ʼo ʼui maʼa koutou: ‘Kua fakaōvi mai te puleʼaga ʼo selo.’ ” Neʼe ʼaoga koa ke nātou fai he ʼu fakatuʼutuʼu moʼo fakasiʼisiʼi te ʼu fihifihia faka sosiale ʼo tonatou temi? Pe neʼe tonu koa ke nātou kau ki te ʼu meʼa faka politike moʼo fakatokatoka te ʼu fihifihia lahi ʼo tonatou temi? Kailoa. Neʼe fakahā e Sesu te gāue maʼa te kau fai faka mafola evaselio fuli ʼi tana ʼui ʼaenī ki tana kau tisipulo: “ ʼI takotou ʼalu ʼi ala, koutou faka mafola.”—Mateo 10:5-7, MN.

⁶ Ki muli age, neʼe fekauʼi e Sesu te tahi kau tisipulo ke nātou tala: “Kua fakaovi mai kia koutou te Puleaga o te Atua.” ʼI tanatou fakamatala te maui mālie ʼo tanatou faka mafola te evaselio, neʼe fonu ia Sesu ʼi te fiafia, pea neʼe faikole fēnei: “E au fakavikiviki kia te koe, Tamai, te Aliki o Selo mo te kelekele koteuhi nee ke fufu ia mea aeni mai te kau poto mo te kau atamai pea nee ke fakaha ia ki te u fanau liliki.” (Luka 10:1, 8, 9, 21) ʼI muʼa atu ko te kau tisipulo ʼa Sesu neʼe nātou gāue kinakina he neʼe ko te kau tautai, mo te kau tauhi manu, pea mo te tahi age ʼu gāue, pea neʼe nātou hage ko he ʼu kiʼi tamaliki mokā ʼe fakatatau ki te ako māʼoluga ʼa te kau takitaki lotu ʼo te puleʼaga. Kae neʼe akoʼi te kau tisipulo ke nātou tala te logo ʼaē ʼe lelei age ʼi te ʼu logo fuli.

7. ʼI te ʼosi hake ʼa Sesu ki selo, neʼe ko ai ʼaē neʼe ʼuluaki fai faka mafola ki ai tana kau tisipulo?

⁷ ʼI te ʼosi hake ʼa Sesu ki selo, neʼe hoko atu te faka mafola ʼa tana kau tisipulo ia te logo lelei ʼo te maʼuli. (Gaue 2:21, 38-40) Ko ai koa ʼaē neʼe nātou ʼuluaki fai faka mafola ki ai? Neʼe nātou ʼolo koa ki te ʼu puleʼaga ʼaē neʼe mole nātou ʼiloʼi te ʼAtua? Kailoa, ko tanatou ʼuluaki telituale neʼe ko Iselaele, ko te hahaʼi neʼe kua nātou ʼiloʼi ia Sehova talu mai te ʼu taʼu e 1 500. Neʼe tonu koa ke nātou fai faka mafola ʼi he fenua neʼe kua tauhi kia Sehova? Ei. Neʼe ʼui fēnei e Sesu kia nātou: “ ʼE koutou liliu anai ko haku kau fakamoʼoni ʼi Selusalemi pea mo Sutea katoa pea mo Samalia ʼo kaku ki te potu taupotu ʼo te kele.” (Gaue 1:8, MN ) Ohage pe ko te ʼu puleʼaga kehe neʼe tonu mo Iselaele ke logo ki te logo lelei.

8. Ia ʼaho nei, ʼe faʼifaʼitakiʼi feafeaʼi e te kau Fakamoʼoni ʼa Sehova ia te kau tisipulo ʼa Sesu ʼo te ʼuluaki sēkulō?

⁸ ʼO toe feiā mo te kau Fakamoʼoni ʼa Sehova ia ʼaho nei, ʼe nātou fai faka mafola ʼi te kele katoa. ʼE nātou kaugā gāue mo te ʼaselo ʼaē neʼe sio ki ai ia Soane “neʼe ʼi ai tana logo lelei ʼe heʼegata ke ina kalagaʼi ohage he evaselio kia nātou ʼaē ʼe nonofo ʼi te kele, pea mo te puleʼaga kehekehe, te telepi kehekehe, te lea kehekehe pea mo te hahaʼi kehekehe.” (Apokalipesi 14:6, MN ) ʼI te taʼu 2001, neʼe ko fenua pea mo telituale e 235, ʼo feiā mo te ʼu fenua ʼe ʼui ʼe ko te ʼu fenua Kilisitiano. ʼE tonu koa ke fai faka mafola te kau Fakamoʼoni ʼa Sehova ʼi te ʼu koga meʼa ʼaē kua tuʼu ai te ʼu ʼēkelesia ʼo te Keletiate? Ko ʼihi ʼe mole nātou tali te faka mafola ʼo te evaselio ʼaia heʼe ʼi tanatou manatu ʼe ko he “kaihaʼa ʼo te ʼu ōvi.” Kae ʼe manatuʼi e te kau Fakamoʼoni ʼa Sehova te aga ʼa Sesu ki te kau Sutea agavaivai ʼo tona temi. Logola neʼe kua ʼi ai tanatou ʼu pelepitelo, kae neʼe faka mafola e Sesu te logo lelei kia nātou. Neʼe “ ʼofa mamahi ia kia nātou, he neʼe nātou ʼāhua pea mo mavetevete, ohage he faga ōvi ʼe mole honatou tagata tauhi.” (Mateo 9:36, MN ) ʼE fufū koa e te kau Fakamoʼoni ʼa Sehova te logo lelei ki te hahaʼi agavaivai ʼaē ʼe mole nātou ʼiloʼi ia Sehova pea mo tona Puleʼaga ʼuhi pe heʼe nātou kau ki te tahi lotu? ʼO mulimuli ki te faʼifaʼitaki ʼa te kau ʼapositolo ʼa Sesu, ʼe mole nātou fufū te logo lelei. ʼE tonu muʼa ke faka mafola te logo lelei ki “te ʼu puleʼaga fuli.”—Maleko 13:10, MN.

Neʼe Faka Mafola Te Evaselio e Te Kau ʼUluaki Kilisitiano Fuli

9. ʼI te ʼuluaki sēkulō, ko ai ʼi te kokelekasio faka Kilisitiano neʼe kau ki te gāue fai faka mafola?

⁹ Ko ai ʼi te ʼuluaki sēkulō neʼe kau ki te gāue fai faka mafola? Ko te kau Kilisitiano fuli neʼe ko te kau faka mafola ʼo te evaselio. ʼE ʼui fēnei e te tagata faitohi ko W. S. Williams: “ ʼE fakamoʼoni ʼe ko te ʼu Kilisitiano fuli ʼo te ’Ēkelesia ʼo te temi muʼa . . . neʼe nātou faka mafola te evaselio.” ʼO ʼuhiga mo te ʼu meʼa ʼaē neʼe hoko ʼi te Penikosite ʼo te taʼu 33 ʼo totatou temi, ʼe ʼui fēnei e te Tohi-Tapu: “Nee natou fonu katoa [tagata mo fafine] i te Laumalie-Maonioni, o natou lea ki ihiʼage lea o faipe ki tona tufa e te Laumalie kia natou ke natou lea ai.” Neʼe kau ki te faka mafola ʼo te evaselio ia te ʼu tagata mo te ʼu fafine, mo te kau tūpulaga pea mo te hahaʼi matutuʼa, mo te kaugana pea mo te tagata ʼāteaina. (Gaue 1:14; 2:1, 4, 17, 18; Soele 2:28, 29; Kalate 3:28) Neʼe tokolahi te kau Kilisitiano ʼaē neʼe feholaki mai Selusalemi ʼuhi ko te fakataga, pea “ko nātou ʼaē neʼe fakamavetevete neʼe nātou fakalaka ʼi te fenua mo tala te logo lelei ʼo te folafola.” (Gaue 8:4, MN ) “Ko nātou [fuli] ʼaē neʼe fakamavetevete,” neʼe nātou faka mafola te evaselio, kae mole ko he kiʼi tokosiʼi pe ʼo te kau fakanofo.

10. Koteā te ʼu gāue e lua neʼe hoko ʼi muʼa ʼo te fakaʼauha ʼo te fakatuʼutuʼu Sutea?

¹⁰ Ko te faʼahi ʼaia neʼe hoko moʼoni ʼi te ʼu taʼu kua ʼosi atu. Neʼe fakakikite fēnei e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14, MN ) Neʼe hoko te ʼu palalau ʼaia ʼi te ʼuluaki sēkulō, heʼe ko te logo lelei neʼe kua faka mafola katoa ʼi muʼa ʼo te fakaʼauha e te kautau Loma ia te fakatuʼutuʼu faka lotu pea mo faka politike ʼa te kau Sutea. (Kolose 1:23) Ki muli age, neʼe fakalogo te kau tisipulo fuli ʼa Sesu ki tana fakatotonu ʼaenī: “Koia, koutou olo o fakahoko he u tisipulo i te atu puleaga, papitema natou i te Huafa o te Tamai, mo te Alo, mo te Laumalie-Maonioni. Koutou fakaʼako natou ki te taupau o meafuape nee au fakatotonu kia koutou.” (Mateo 28:19, 20) Neʼe mole fakaloto mālohiʼi e te kau ʼuluaki Kilisitiano te hahaʼi agavaivai ke nātou tui pe kia Sesu pea mo tuku feiā nātou, ohage ko te fai faka mafola ʼa ʼihi ia ʼaho nei. Kae ʼe nātou akoʼi te hahaʼi ke liliu mo nātou ko ni ʼu tisipulo ʼa Sesu pea mo toe akoʼi nātou ʼi te ʼu kokelekasio ke nātou liliu ko te kau fai faka mafola pea mo fai ni ʼu tisipulo. (Gaue 14:21-23) Ia ʼaho nei, ʼe muliʼi e te kau Fakamoʼoni ʼa Sehova ia te faʼifaʼitaki ʼaia.

11. Ko ai ia ʼaho nei ʼe kau ki te tala ʼo te logo lelei ʼaē ʼe lelei ʼaupito ki te malamanei?

¹¹ Tokolahi te kau Fakamoʼoni ʼa Sehova ʼe nātou muliʼi te ʼu faʼifaʼitaki ʼo te ʼuluaki sēkulō ohage ko Paulo, mo Palenapasi, pea mo ʼihi, ʼo nātou ʼolo ʼo misionea ʼi te tahi ʼu fenua. ʼE fua lelei ʼaupito tanatou gāue, koteʼuhi ʼe mole nātou kau ki te ʼu meʼa faka politike, peʼe ko te tahi ʼu gāue, ʼaē neʼe feala ai ke nātou hēhē ʼi tanatou faka mafola ia te logo lelei. Neʼe nātou fakalogo ki te fakatotonu ʼaenī ʼa Sesu: “ ʼI takotou ʼalu ʼi ala, koutou faka mafola.” Kae ʼe mole feala ke misionea fuli te kau Fakamoʼoni ʼa Sehova. ʼUhi he tokolahi ia nātou ʼe gāue, peʼe kei ako, pea mo taupau tanatou ʼu fānau. Kae ko te logo lelei ʼaē neʼe nātou ako ʼe nātou faka mafola ki te hahaʼi. Ko te kau tūpulaga pea mo te kau matutuʼa, tagata mo fafine, ʼe nātou tali fakafiafia te tokoni ʼaenī ʼa te Tohi-Tapu: “Faka mafola te folafola, fai ʼaki te lotomālohi ʼi te temi faigamālie pea mo te temi faigataʼa.” (2 Timoteo 4:2, MN ) ʼO mulimuli pe ki te faʼifaʼitaki ʼo tonatou ʼu kaugā fagona ʼo te ʼuluaki sēkulō, ʼe nātou haga “akoʼi pea mo tala te logo lelei ʼo ʼuhiga mo Kilisito, Sesu.” (Gaue 5:42, MN ) ʼE nātou tala te logo lelei ʼaē ʼe lelei ʼaupito ki te malamanei.

ʼE Nātou Fakatafoki Koa Peʼe Nātou Faka Mafola Te Evaselio?

12. Koteā te gāue faka poloselite, pea neʼe faka ʼuhiga feafeaʼi?

¹² ʼI te lea faka Keleka ko te kupu prosêlutos ko tona faka ʼuhiga “fetogi lotu.” Pea ʼe haʼu mai ai te kupu “poloselite” ʼaē ko tona faka ʼuhiga “ko te fakaliliu ʼo he tahi ki he lotu.” Ia ʼaho nei, ʼe mole leleiʼia ʼe ʼihi te fakatafoki. Ko te alatike neʼe tā e te Fono ʼo Te ʼu ’Ēkelesia Faka Malamanei ʼe talanoa ki “te agahala ʼo te gāue faka poloselite.” Koteā tona tupuʼaga? ʼE ʼui fēnei e te Catholic World Report: “ ʼI te mole leleiʼia e te ’Ēkelesia Orthodoxe ia te ‘gāue faka poloselite’ neʼe faka ʼuhiga ai ko he fakaliliu fakakinau.”

13. Koteā te ʼu faʼifaʼitaki kovi ʼo ʼuhiga mo te gāue faka poloselite?

¹³ ʼE kovi koa te gāue faka poloselite? ʼE feala ke fakatupu kovi. Neʼe ʼui e Sesu ʼe kovi te fakatafoki ʼaē neʼe fai e te kau sekelipa pea mo te kau Faliseo. (Mateo 23:15) ʼE mahino ia ʼe kovi “te fakaliliu fakakinau.” Ohage la, ʼe ʼui e te tagata fai hisitolia ko Josèphe, ʼi te temi ʼaē neʼe pule ai te tagata Makape ko Jean Hyrcan ki te kau Itumea, neʼe “ina fakagafua ke nātou nonofo ʼi tonatou fenua, gata pe mo kapau ʼe silikosisioʼi nātou pea mo nātou mulimuli ki te ʼu lao ʼa te kau Sutea.” Kapau neʼe fia mulimuli te kau Itumea ki te takitaki ʼa te kau Sutea pea neʼe tonu ke nātou kau ki te lotu ʼa te kau Sutea. ʼE fakahā mai e te hahaʼi fai hisitolia, ʼi te valu sēkulō ʼo totatou temi, neʼe mālo ia Charlemagne ʼi te kau Saxons pagani ʼo te potu noleto ʼo Eulopa, pea mo ina fakamālohiʼi nātou ke nātou tafoki ki tana lotu.a Kae ko te fakatafoki ʼaia ʼo te kau Saxons peʼe ko te kau Itumea neʼe fakamalotoloto koa? Ohage la, ko te Hau Itumea ko Helote ʼaē neʼe ina faigaʼi ke ina matehi te kiʼi tamasiʼi ko Sesu, neʼe fakamalotoloto koa tana tauhi ki te Lao ʼa Moisese?—Mateo 2:1-18.

14. Koteā ʼaē ʼe fai e ʼihi misionea ʼo te Keletiate moʼo fakamālohiʼi te hahaʼi ke nātou tafoki ʼo fetogi lotu?

¹⁴ ʼE fakamālohiʼi koa te ʼu fakatafoki ia ʼaho nei? Ei. ʼE ʼui ko ʼihi misionea ʼo te Keletiate ʼe nātou fakahū ako ki te ʼu fenua tai te hahaʼi ʼaē ʼe feala ke tafoki ki te lotu. Peʼe nātou faiakonaki muʼa ki te hahaʼi māsisiva, pea nātou ʼavage leva hanatou meʼa kai. ʼI te alatike neʼe fai ʼi te taʼu 1992 ʼi te fakatahi ʼa te kau ’Ēpikopō Orthodoxe, neʼe tohi ai “ ʼi ʼihi temi ʼe fai te fakatafoki ʼaki he ʼu koloā pea ʼi ʼihi temi ʼaki he ʼu agamālohi.”

15. ʼE fakamālohiʼi koa te fakatafoki ʼa te kau Fakamoʼoni ʼa Sehova ohage ko tona fai ʼi te temi nei? Koutou fakamahino.

¹⁵ ʼE mole lelei te fakamālohiʼi ʼo te hahaʼi ke fetogi tanatou lotu. ʼE mole fai feiā e te kau Fakamoʼoni ʼa Sehova.b Ei ʼe mole nātou fakamālohiʼi he tahi ke fetogi lotu ohage ko tona fai ʼi te temi nei. ʼE nātou faka mafola te logo lelei ki te hahaʼi fuli ohage pe ko te kau Kilisitiano ʼo te ʼuluaki sēkulō. Ko he tahi ʼe ina tali lelei te logo, ʼe nātou fakaafe ia ia ke ina ako te Tohi-Tapu moʼo fakatuputupu tana mahino. Ko te hahaʼi fia logo ʼaia ʼe nātou ako ke nātou maʼu te tui, ʼo ʼuhiga mo te ʼAtua pea mo tana ʼu fakatuʼutuʼu, ʼaē ʼe fakatafito ki te ʼatamai mālama ʼo te Tohi-Tapu. Pea ʼe nātou faka ʼuhiga te huafa ʼo te ʼAtua ko Sehova ʼe ko te fakamaʼuli. (Loma 10:13, 14, 17) Peʼe nātou tali peʼe kailoa te logo lelei kae ʼe fakalogo pe kia nātou. ʼE mole fakakinauʼi nātou. Kapau ʼe fakakinauʼi pea ʼe mole he ʼuhiga ʼo te fakatafoki ʼaia. Ke tali tatou e te ʼAtua, ʼe tonu ke tou tauhi kia te ia ʼaki totatou loto katoa.—Teutalonome 6:4, 5; 10:12.

Te Faka Mafola ʼo Te Evaselio Ia ʼAho Nei

16. Neʼe tuputupu feafeaʼi te faka mafola ʼo te evaselio ʼa te kau Fakamoʼoni ʼa Sehova ʼi te ʼu temi ʼaenī?

¹⁶ ʼI te lolotoga ʼo te ʼu temi ʼaenī, kua lahi ʼaupito te faka mafola ʼa te kau Fakamoʼoni ʼa Sehova ia te logo lelei ʼo te Puleʼaga ohage ko tona ʼui ia Mateo 24:14. Ko te meʼa gāue ʼaē ʼe nātou fakaʼaogaʼi tāfito ʼi tanatou faka mafola te evaselio ʼe ko Te Tule Leʼo.c ʼI te taʼu 1879, ʼi te tā ʼo te ʼu ʼuluaki alatike ʼo Te Tule Leʼo, neʼe tufa ia nusipepa e 6 000 ʼi te lea e tahi. ʼI te taʼu 2001, kua hili taʼu e 122, kua aʼu nei te tufa ʼo te nusipepa ʼaia ki te 23 042 000 ia lea e 141. ʼE toe tuputupu mo te faka mafola ʼo te evaselio ʼa te kau Fakamoʼoni ʼa Sehova, mokā ʼe fakatatau te ʼu lauʼi afe hola ʼo te taʼu fuli ʼaē neʼe fai ai te gāue evaselio ʼi te 19 sēkulō mo te ʼu hola e 1 169 082 225 ʼaē neʼe fai ʼi te gāue faka mafola ʼo te taʼu 2001. Koutou fakatokagaʼi te toko 4 921 702 hahaʼi ʼaē neʼe nātou ako te Tohi-Tapu ʼi te taʼu ʼaia. ʼE ko he toe gāue lahi pea mo lelei ʼaē neʼe fai! Pea neʼe fakahoko te gāue ʼaia e te kau faka mafola ʼo te Puleʼaga e toko 6 117 666.

17. (a) Ko ai te ʼu ʼatua loi ʼaē ʼe tauhi ki ai te hahaʼi ia ʼaho nei? (b) Koteā ʼaē ʼe tonu ke ʼiloʼi e te hahaʼi tatau aipe te kehekehe ʼo tanatou lea, mo tonatou fenua peʼe ko tonatou maʼuli faka sosiale?

¹⁷ ʼE ʼui fēnei e te tagata fai Pesalemo: “Ko te ʼu ʼatua fuli ʼo te hahaʼi ʼe mole honatou ʼuhiga; kae ko Sehova neʼe ina fakatupu ia te lagi.” (Pesalemo 96:5) ʼI te malamanei, kua tauhi pe te hahaʼi ki tonatou fenua, ki te ʼu hahaʼi ʼiloa, pea mo te ʼu koloā. (Mateo 6:24; Efeso 5:5; Kolose 3:5) Neʼe ʼui fēnei e te tahi ʼaho e te tagata Inituisi ko Mohandas K. Gandhi: “ ʼE ʼau tui mālohi . . . ia ʼaho nei ʼe ʼui gutu pe ko te Eulopa ʼe Kilisitiano. ʼE tauhi tāfito ia kia Mammon [te ʼu koloā].” ʼE tonu ke tala te logo lelei ʼi te ʼu potu fuli. Ko te hahaʼi fuli ʼe tonu ke nātou ʼiloʼi ia Sehova pea mo tana ʼu fakatuʼutuʼu, tatau aipe te kehekehe ʼo tanatou lea, mo tonatou fenua, peʼe ko tonatou maʼuli faka sosiale. ʼE tou fakaʼamu ke tali e te hahaʼi fuli te ʼu palalau ʼaenī ʼa te tagata fai Pesalemo: “Koutou foaki kia Sehova te kolōlia pea mo te mālohi. Koutou foaki kia Sehova te kolōlia ʼe tāu mo tona huafa”! (Pesalemo 96:7, 8) Ko te kau Fakamoʼoni ʼa Sehova ʼe nātou akoʼi te hahaʼi ke nātou ʼiloʼi ia Sehova ke feala ai hanatou faka kolōlia kia te ia. Pea ʼe tapuakina lahi te hahaʼi ʼaē ʼe nātou tali te ako ʼaia. Koteā te ʼu lelei ʼaē ʼe nātou maʼu? ʼE tou vakaʼi anai te ʼu lelei ʼaia ʼi te alatike ka hoa mai.

[Kiʼi nota]

ʼE Feala Koa Hakotou Fakamahino?

• He koʼe ko te kau Fakamoʼoni ʼa Sehova ko te kau faka mafola evaselio faʼafai?

• He koʼe ʼe fai faka mafola te kau Fakamoʼoni ʼa Sehova ʼi te ʼu koga meʼa ʼaē kua tuʼu ai te lotu ʼo te Keletiate?

• He koʼe ʼe mole tatau te fakatafoki ʼa te kau Fakamoʼoni ʼa Sehova ohage ko tona fai ʼi te temi nei?

• Neʼe tuputupu feafeaʼi te gāue faka evaselio ʼa te kau Fakamoʼoni ʼa Sehova ʼi te temi nei?

[Paki ʼo te pasina 9]

Ko Sesu neʼe ko te tagata faka mafola evaselio faʼafai pea neʼe ina akoʼi te hahaʼi ke feiā mo nātou

[Paki ʼo te pasina 10]

Ko te kokelekasio katoa neʼe kau ki te faka mafola ʼo te evaselio

[Paki ʼo te pasina 11]

ʼE mole lelei te fakatafoki mālohi ʼo te hahaʼi ke fetogi tanatou lotu