Te ʼu Tapuakina ʼo Te Logo Lelei
“Ko Sehova neʼe ina fakanofo ʼau ke ʼau fakahā ki te kau agavaivai he logo lelei. Neʼe ina fekauʼi ʼau ke ʼau faitoʼo ia nātou ʼe lotomamahi, . . . mo fakafimālieʼi nātou ʼe putu.”—Isaia 61:1, 2.
1, 2. (a) Koteā ʼaē neʼe fakahā e Sesu ʼo ʼuhiga mo ia, pea neʼe feafeaʼi te faʼahi ʼaia? (b) Koteā te ʼu tapuakina ʼaē ʼe tou maʼu ʼi te logo lelei ʼaē neʼe tala e Sesu?
ʼI TE tahi ʼaho Sapato ʼi te kamata ʼo tana minisitelio, neʼe nofo ia Sesu ʼi te sinakoka ʼo Nasaleti. ʼE ʼui fēnei ʼi te evaselio, “neʼe fakatoʼo age kia te ia te takaiga tohi ʼo te polofeta ko Isaia, pea neʼe ina folahi te takaiga tohi ʼo ina maʼu te faʼahi ʼaē ʼe tohi ai: ‘Ko te laumālie ʼo Sehova ʼe ia te ʼau, koteʼuhi kua ina fakanofo ʼau ke ʼau fakahā te logo lelei.’ ” Neʼe hoko atu e Sesu tana lau te koga tohi faka polofeta. Neʼe ʼalu leva ʼo heka pea mo ʼui maʼana: “ ʼI te ʼaho nei, ko te folafola ʼaenī ʼo te Tohi ʼaē kua koutou logo kiai, kua hoko ia.”—Luka 4:16-21, MN.
2 ʼAki tana fakamahino ʼaia, neʼe fakahā lelei e Sesu ko ia te tagata fai faka mafola evaselio ʼaē neʼe talanoa kiai te lea faka polofeta, ia ia ʼaē ka ina tala te logo lelei pea mo foaki te fakafimālie. (Mateo 4:23) Pea ʼe ko he logo lelei ʼaē neʼe tala e Sesu! Neʼe ina ʼui fēnei kia nātou ʼaē neʼe fagono: “E ko au te malama o te malama-nei; Ko ae e mulimuli mai ia te au, e mole haele anai ia i te fakapouli, kae e ina maù anai te malama o te mauli.” (Soane 8:12) Neʼe ina toe ʼui fēnei: “Kapau e koutou nofoaki taku folafola, ko aku tisipulo mooni koutou. E koutou iloi anai te mooni, pea e fakaateaina anai koutou e te mooni.” (Soane 8:31, 32) Ei, neʼe nofo ia Sesu mo “te u folafola o te mauli heegata.” (Soane 6:68, 69) ʼE mahino ia ko te mālama, mo te maʼuli, mo te ʼāteaina ʼe ko he ʼu tapuakina ke taupau fakalelei!
3. Koteā te logo lelei ʼaē neʼe faka mafola e te kau tisipulo ʼa Sesu?
3 ʼI te ʼosi ʼo te Penikosite ʼo te taʼu 33 ʼo totatou temi, neʼe hoko atu e te ʼu tisipulo te fai faka mafola evaselio ʼa Sesu. Neʼe nātou faka mafola ia te “Logolelei . . . o te Puleaga” ki te kau Iselaele pea mo te hahaʼi ʼo te ʼu puleʼaga. (Mateo 24:14; Gaue 15:7; Loma 1:16) Ko te hahaʼi ʼaē neʼe nātou tali te logo neʼe nātou ʼiloʼi ai pe ko ai ia Sehova ʼAtua. Neʼe faka ʼāteaina nātou mai te popūla faka lotu pea mo nātou kau ki te puleʼaga foʼou fakalaumālie, ko te “Iselaele a te Atua,” te hahaʼi ʼaē ka nātou hau tuʼumaʼu anai mo tonatou ʼAliki ko Sesu Kilisito ʼi te lagi. (Kalate 5:1; 6:16; Efeso 3:5-7; Kolose 1:4, 5; Apokalipesi 22:5) Ko nātou ʼaia neʼe nātou maʼu te ʼu tapuakina lahi!
Te Faka Mafola ʼo Te Evaselio Ia ʼAho Nei
4. Neʼe fakahoko feafeaʼi ia ʼaho nei te faka mafola ʼo te logo lelei?
4 Ia ʼaho nei, ko te kau Kilisitiano fakanofo ʼaē ʼe lagolago ki ai te “hahaʼi tokolahi” ʼo te “tahi ʼu ōvi,” ʼe nātou haga fakahoko te gāue faka polofeta ʼaē neʼe ʼuluaki fai e Sesu. (Apokalipesi 7:9, MN; Soane 10:16, MN ) ʼAki tanatou gāue ʼaia, kua faka mafola te logo lelei ʼi te ʼu faʼahi ʼo te kele ʼaē neʼe mole heʼeki fakaaʼu kiai. ʼI te ʼu fenua pea mo te ʼu telituale e 235, neʼe ʼolo kiai te kau Fakamoʼoni ʼa Sehova moʼo “fakahā ki te kau agavaivai he logo lelei . . . , [pea mo] faitoʼo ia nātou ʼe lotomamahi, mo faka mafola te ʼāteaina kia nātou ʼe pilisoni, pea ki te kau kivi ke nātou toe sisio; mo faka mafola te taʼu ʼo te loto manavaʼofa ʼo Sehova pea mo te ʼaho lagavaka ʼo totatou ʼAtua; mo fakafimālieʼi nātou ʼe putu.” (Isaia 61:1, 2) Koia, ko te gāue faka evaselio ʼa te kau Kilisitiano ʼe ina haga foaki te ʼu tapuakina ki te tokolahi, pea mo te fīmālie moʼoni kia “nātou ʼaē ʼe tau mo he ʼu faʼahiga mamahi kehekehe.”—2 Kolonito 1:3, 4, MN.
5. ʼO ʼuhiga mo te faka mafola ʼo te logo lelei, koteā te kehekehe ʼo te kau Fakamoʼoni ʼa Sehova pea mo te ʼu lotu ʼo te Keletiate?
5 ʼE moʼoni ko te ʼu lotu ʼo te Keletiate neʼe nātou fakatuʼutuʼu te ʼu agaaga kehekehe ʼo te faka mafola ʼo te evaselio. ʼE lahi te ʼu lotu neʼe nātou fekauʼi te kau misionea ke nātou ʼolo ki te tahi ʼu fenua moʼo fakatafoki te hahaʼi ki tanatou lotu. Ohage la, ʼe fakamatala e te The Orthodox Christian Mission Center Magazine te ʼu gāue ʼa te kau misionea Orthodoxes ʼi Madagascar, mo te potu saute ʼo Afelika, mo Tanzanie, pea mo Zimbabwe. Kae ʼi te Lotu Orthodoxe, ʼo feiā ki te tahi ʼu lotu ʼo te Keletiate, ko te tokolahi ʼo tanatou ʼu hahaʼi ʼe mole kau ki te gāue ʼaia. Kae ko te kau Fakamoʼoni ʼa Sehova ʼe nātou faiga fuli ke nātou kau ki te faka mafola ʼo te evaselio. ʼE mahino kia nātou ko te faka mafola ʼo te logo lelei ʼe ko he fakamoʼoni ʼaia ki tanatou tui moʼoni. Neʼe ʼui fēnei e Paulo: “ ʼAki te loto ʼe kita tui ki te faitotonu, kae ʼaki te gutu ʼe kita palalau ki te kaugamālie ʼo ʼuhiga mo te fakamaʼuli.” Ei, ko te tui ʼaē ʼe mole fai ʼaki he ʼu gāue, ʼe mate ia.—Loma 10:10, MN; Sakopo 2:17.
Te Logo Lelei ʼAē ʼe Ina Foaki Te ʼu Tapuakina Heʼegata
6. Koteā te logo lelei ʼaē ʼe faka mafola ia ʼaho nei?
6 ʼE faka mafola e te kau Fakamoʼoni ʼa Sehova ia te logo lelei ʼe mole hona fakatatau. ʼE nātou avahi tanatou Tohi-Tapu pea mo fakahā ki te hahaʼi ʼaē ʼe fia logo, ko Sesu neʼe ina sakilifisioʼi tona maʼuli maʼa te malamanei ke feala hanatou fakaōvi ki te ʼAtua, pea mo fakamolemole tanatou ʼu agahala, pea mo maʼu te ʼamanaki ʼo te maʼuli heʼegata. (Soane 3:16; 2 Kolonito 5:18, 19) ʼE nātou tala ko te Puleʼaga ʼaia ʼo te ʼAtua kua fakatuʼu ʼi te lagi pea ʼe takitaki e te Hau ko Sesu Kilisito, pea kua vave hoko mai te temi ʼaē ka haga ai te puleʼaga ʼaia ʼo pulihi te agakovi ʼi te kele pea mo ina takitaki te toe fakatuʼu ʼo te Palatiso. (Apokalipesi 11:15; 21:3, 4) ʼO mulimuli ki te fakahoko ʼo te lea faka polofeta ʼa Isaia, ʼe nātou fakahā ki tonatou ʼu tatau ko te temi ʼaenī ʼe ko “te taʼu ʼo te loto manavaʼofa ʼo Sehova,” heʼe kei lava ki te hahaʼi ke nātou tali te logo lelei. ʼE nātou toe fakatokaga foki ki te hahaʼi kua vave hoko mai “te ʼaho lagavaka ʼo totatou ʼAtua,” ʼaē ka fakaʼauha ai e Sehova te kau agakovi ʼaē ʼe mole fakahemala.—Pesalemo 37:9-11.
7. Koteā te meʼa neʼe hoko ʼe hā ai te logo tahi ʼa te kau Fakamoʼoni ʼa Sehova, pea he koʼe ʼe nātou maʼu te logo tahi ʼaia?
7 ʼI he mālama ʼe tau mo te ʼu mamahi pea mo te ʼu maveuveu, ʼe ko te logo lelei pe ʼaia e tahi ʼe maʼu ai te ʼu tapuakina heʼegata. Ko nātou ʼaē ʼe nātou tali te logo lelei ʼaia, ʼe nātou liliu anai ko he ʼu hahaʼi ʼe kau ki te foʼi famili Kilisitiano faka malamanei pea mo logo tahi, pea ko tanatou logo tahi ʼaia ʼe mole lava maumauʼi e te ʼu fihi faka fenua, mo faka telepi, peʼe faka ekonomika. ʼE nātou “kofuʼi ia te ʼofa, he ko he noʼo haohaoa ia ki te logo tahi.” (Kolose 3:14, MN; Soane 15:12) Neʼe ʼi ai te fakamoʼoni ki te faʼahi ʼaia, neʼe hoko ʼi te taʼu kua hili ʼi te kolo ʼo Afelika. ʼI te tahi uhu neʼe ʼaʼala te hahaʼi ʼo te kolo lahi ʼuhi ko te logoaʼa ʼo te ʼu pa fana, he neʼe fakahifo te puleʼaga e te kau solia. Neʼe liliu te tokakovi ʼaia ko he tau ʼo te hahaʼi ʼo te ʼu lanu kehekehe, pea neʼe palalau kovi te hahaʼi ki te famili Fakamoʼoni he neʼe ina tali te kau Fakamoʼoni ʼo te tahi lanu ki tonatou ʼapi. Neʼe fēnei te tali ʼa te famili: “ ʼI tomatou ʼapi ko mātou fuli ko te kau Fakamoʼoni ʼa Sehova.” Maʼa nātou, neʼe mole he ʼuhiga ʼo te ʼu fakapalatahi; kae neʼe maʼuhiga age te ʼofa faka Kilisitiano, koteʼuhi ʼe ina foaki te fakafimālie kia nātou ʼaē neʼe ʼaoga kiai. ʼE ʼui fēnei e tonatou kāiga ʼe mole ko he Fakamoʼoni ʼa Sehova: “Ko te hahaʼi logola tanatou lotu tahi kae neʼe nātou lavakiʼi te ʼu hahaʼi ʼo tonatou lotu, gata pe ki te kau Fakamoʼoni ʼa Sehova.” ʼE lahi te ʼu meʼa feiā neʼe hoko ʼi te ʼu fenua tai ʼuhi ko te ʼu tau faka sivile, pea ʼe fakahā ai ʼe gata pe ko te kau Fakamoʼoni ʼa Sehova ʼe “ ʼoʼofa ki te famili katoa ʼo te ʼu tēhina.”—1 Petelo 2:17, MN.
Ko Te Logo Lelei ʼe Ina Fetogi Te Hahaʼi
8, 9. (a) Koteā te ʼu fetogi ʼe fai e nātou ʼaē ʼe nātou tali te logo lelei? (b) Koteā te ʼu faʼifaʼitaki ʼe hā ai te mālohi ʼo te logo lelei?
8 Ko te logo lelei ʼe ʼalutahi mo te meʼa ʼaē neʼe ʼui e Paulo, ʼo ʼuhiga mo te “maʼuli ʼaenī pea mo te maʼuli ʼaē ka haʼu.” (1 Timoteo 4:8, MN ) ʼE mole ina foaki pe he ʼamanaki taulekaleka pea mo moʼoni ki te ka haʼu kae ʼe ina toe hikihiki te “maʼuli ʼaenī.” Ko te kau Fakamoʼoni ʼa Sehova ʼe nātou mulimuli ki te takitaki ʼa te Folafola ʼa te ʼAtua, ia te Tohi-Tapu, ke ʼalutahi tonatou maʼuli mo te finegalo ʼo te ʼAtua. (Pesalemo 119:101) Kua fakafoʼou tonatou ʼulugaaga ʼuhi heʼe nātou fakatuputupu te ʼu kalitate ohage ko te faitotonu pea mo te agatonu.—Efeso 4:24.
9 Tou vakaʼi te faʼifaʼitaki ʼa Franco. Ko tona fihifihia ko te ʼita. Ka hoko he fihifihia, pea neʼe kovi ʼosi tona ʼita pea neʼe ina maumauʼi te ʼu meʼa. Neʼe ako e tona ʼohoana ia te Tohi-Tapu mo te kau Fakamoʼoni ʼa Sehova, pea ko te faʼifaʼitaki faka Kilisitiano ʼa te kau Fakamoʼoni neʼe tokoni māmālie kia Franco, ke mahino ki te ʼu meʼa ʼaē ʼe tonu ke ina fetogi ʼi tona maʼuli. Neʼe ina ako te Tohi-Tapu mo nātou pea neʼe ina maʼuliʼi te ʼu fua ʼo te laumālie maʼoniʼoni ʼaē ko te tokalelei pea mo te loto lolomi. (Kalate 5:22, 23) Neʼe kau ʼi te toko 492 ʼaē neʼe papitema ʼi Pelesike ʼi te taʼu gāue ʼo te taʼu 2001. Tou vakaʼi mo te faʼifaʼitaki ʼa Alejandro. Ko te tama ʼaia neʼe maʼuli popūla ki te toloke pea neʼe kai ki te ʼu toega meʼa kai ʼi te ʼu tuka, pea ko te ʼu meʼa ʼaē neʼe ina maʼu ai neʼe ina fakatau moʼo totogi ʼaki tana toloke. ʼI tona taʼu 22, neʼe fakaafe e te kau Fakamoʼoni ʼa Sehova ia Alejandro ke ina ako te Tohi-Tapu, pea neʼe ina tali lelei. Neʼe ina lau te Tohi-Tapu ʼi te ʼaho fuli, pea mo kau ki te ʼu fono. Neʼe ina fetogi tona maʼuli pea ʼi tana tuputupu vave ʼi te faʼahi fakalaumālie, neʼe māhina ono pe pea kua feala tana kau ki te faka mafola ʼo te evaselio—neʼe kau ʼi te toko 10 115 ʼaē neʼe papitema ʼi te taʼu kua ʼosi ʼi Panama.
Ko Te Logo Lelei —Ko Te Tapuakina Ki Te Kau Agavaivai
10. Ko ai ʼaē ʼe nātou tali te logo lelei, pea ʼe fetogi feafeaʼi tanatou manatu?
10 Neʼe fakakikite e Isaia ʼe faka mafola anai te logo ki te hahaʼi agavaivai. Ko ai te kau agavaivai ʼaia? ʼE ʼui ʼi te tohi ʼo Gaue “ko nātou fuli ʼaē neʼe lotolelei ki te maʼuli heʼegata.” (Gaue 13:48, MN ) ʼE tou maʼu te hahaʼi agavaivai ʼi te ʼu faʼahiga hahaʼi kehekehe ʼo te sosiete, pea ʼe nātou tali lelei te logo ʼo te moʼoni. ʼE mahino kia nātou ʼaia ko te fai ʼo te finegalo ʼo te ʼAtua ʼe maʼu ai te ʼu tapuakina ʼe maʼuhiga age ʼi te ʼu lelei ʼaē ʼe foaki e te mālama. (1 Soane 2:15-17) Kae ʼe lave feafeaʼi ki tonatou loto te faka mafola evaselio ʼa te kau Fakamoʼoni ʼa Sehova?
11. ʼO mulimuli ki te ʼui ʼa Paulo, ʼe tonu ke feafeaʼi te faka mafola ʼo te logo lelei?
11 Tou vakaʼi age mo te faʼifaʼitaki ʼa te ʼapositolo ko Paulo, ʼaē neʼe ina tohi fēnei ki te kau Kolonito: “Mo au, i taku alu atu kia koutou, u tehina, nee mole au alu atu aki te faiva lea mo te poto o fagonogono kia koutou te misitelio o te Atua. Koia, nee au tonu ke aua naʼa au iloi he mea e tahi ia koutou, gatape kia Sesu Kilisito, iaʼia nee [“haʼi ʼi te pou,” MN ].” (1 Kolonito 2:1, 2) ʼAki te ʼu meʼa ʼaē neʼe ako e Paulo, neʼe mole faiga ia ke fia hā kia nātou ʼaē neʼe fagono ki tana ʼu faiakonaki. Neʼe mole ko he ʼu meʼa ʼaʼana totonu ʼaē neʼe ina akoʼi age kia nātou, kae neʼe ina akoʼi age te ʼu meʼa mai te ʼAtua, ʼaē ʼe talanoa kiai te Tohi-Tapu. Koutou toe fakatokagaʼi, te fakaloto mālohi ʼa Paulo ki tona kaugā fagona evaselio ko Timoteo: “Faka mafola te folafola, fai ʼaki te lotomālohi ʼi te temi faigamālie.” (2 Timoteo 4:2, MN ) Neʼe faka mafola e Timoteo “te folafola,” ia te logo ʼa te ʼAtua. Neʼe toe tohi fēnei e Paulo kia Timoteo: “Faigai ia koe, o hage ko he tagata kua tuha ke ke tuu ia mua o te Atua, ko he tagata gaue e mole ufiufi, e ina ave fakahagatonu te folafola o te mooni.”—2 Timoteo 2:15.
12. ʼE fakaʼaogaʼi feafeaʼi e te kau Fakamoʼoni ʼa Sehova ia ʼaho nei te ʼu palalau ʼa Paulo pea mo tana faʼifaʼitaki?
12 ʼE fakaʼaogaʼi e te kau Fakamoʼoni ʼa Sehova te faʼifaʼitaki ʼa Paulo, ʼo toe feiā mo te ʼu palalau ʼaē neʼe ina fai kia Timoteo. ʼE mahino kia nātou te mālohi ʼo te Folafola ʼo te ʼAtua pea ʼe nātou fakaʼaogaʼi lelei mokā nātou kumi te hahaʼi ʼo fakahā kia nātou te ʼu palalau ʼaē ʼe fakaloto fīmālie. (Pesalemo 119:52; 2 Timoteo 3:16, 17; Hepeleo 4:12) ʼE moʼoni, ʼe nātou fakaʼaogaʼi lelei te ʼu tohi faka Tohi-Tapu ke feala ki te hahaʼi ʼaē ʼe fia logo ke lahi tanatou maʼu ia te ʼatamai mālama ʼo te Tohi-Tapu. Kae ʼe nātou faiga tuʼumaʼu ke nātou fakahā ki te hahaʼi te ʼu palalau ʼa te Tohi-Tapu. ʼE nātou ʼiloʼi ko te Folafola ʼa te ʼAtua ʼe ina uga anai te loto ʼo te hahaʼi agavaivai. Pea ʼi tanatou fai feiā, ʼe nātou fakamālohiʼi ai mo tanatou tui.
“Fakafimālieʼi Nātou ʼe Putu”
13. ʼI te taʼu 2001, koteā te ʼu meʼa ʼaē neʼe hoko pea neʼe ʼaoga lahi ai he fakaloto fīmālie ki te hahaʼi ʼaē neʼe putu?
13 Neʼe ʼi ai te ʼu tokakovi ʼi te taʼu 2001, pea neʼe ʼaoga ai ke fakaloto fīmālieʼi te tokolahi. ʼI Sepetepeli ʼo te taʼu kua ʼosi, neʼe tou sio ki te meʼa fakamataku neʼe hoko ʼi Amelika, te faka paʼulu e te hahaʼi fai fakapō ia te ʼu vakalele ki te ʼu foʼi falefata ʼo te World Trade Center ʼi New York pea mo te fale solia ʼo te Pentagone ʼaē ʼe tuʼu ōvi ʼi Washington. Neʼe punamaʼuli ʼaupito te fenua katoa ki te ʼu fai fakapō ʼaia! ʼI te hoko ʼo te meʼa ʼaia, neʼe faiga aipe te kau Fakamoʼoni ʼa Sehova ke nātou fakahoko tanatou gāue ʼaē ko te ‘fakafimālieʼi ʼo nātou ʼaē neʼe putu.’ Ko te ʼu kiʼi faʼifaʼitaki ʼe nātou fakahā anai pe koteā ʼaē neʼe nātou fai.
14, 15. Neʼe fakaʼaogaʼi lelei feafeaʼi e te kau Fakamoʼoni te ʼu vaega faka Tohi-Tapu moʼo fakaloto fīmālieʼi ia nātou ʼe putu?
14 Ko te tuagaʼane Fakamoʼoni ʼe fai faka mafola temi katoa neʼe fakaōvi ki te fafine ʼi te kauala, pea neʼe ina fehuʼi age pe koteā tana manatu ki te ʼu tuʼutāmaki ʼaē neʼe hoki ʼosi atu. Neʼe kamata tagi te fafine, pea neʼe ina ʼui age ʼe lotomamahi pea ʼe ina fakaʼamu ke tokoni ʼi he faʼahiga ʼaluʼaga pe. Neʼe ʼui age e te Fakamoʼoni ko te ʼAtua ʼe tokaga ʼaupito kia tatou fuli, pea neʼe ina lau age ia Isaia 61:1, 2. Ko te ʼu palalau ʼaia mai te ʼAtua neʼe matatonu ki te fafine, he neʼe ina ʼui ko te hahaʼi fuape kua putu. Neʼe ina tali te kiʼi pepa lotu pea mo kole age ki te tuagaʼane ke ʼalu age ki tona ʼapi.
15 Ko te ʼu Fakamoʼoni e toko lua neʼe nā fai faka mafola pea nā felāveʼi mo te tagata ʼe gāue ʼi tona fale gāue. Pea neʼe nā fia fakahā age te ʼu palalau fakaloto fīmālie ʼo te Tohi-Tapu ʼuhi ko te tuʼutāmaki ʼaē neʼe hoko ʼi te ʼu falefata ʼo te World Trade Center. Neʼe lotolelei kiai te tagata pea neʼe nā lau age ia 2 Kolonito 1:3-7, ʼaē ʼe ʼui fēnei: “[ʼE] lahi . . . totatou fakafimalie ia Kilisito.” Neʼe fakamālo te tagata ki te fia vaevae e te kau Fakamoʼoni he ʼu manatu fakaloto fīmālie mo ʼihi pea neʼe ina ʼui fēnei: “ ʼOfa pe ke tapuakina e te ʼAtua te gāue taulekaleka ʼaē ʼe koutou lolotoga fai.”
16, 17. Koteā te ʼu faʼifaʼitaki e lua ʼe hā mai ai te mālohi ʼo te Tohi-Tapu moʼo tokoni ki te hahaʼi ʼaē neʼe lotomamahi peʼe lotohoha ʼi te ʼu tuʼutāmaki ʼaē neʼe hoko?
16 ʼI tana ʼaʼahi te hahaʼi ʼaē ʼe nātou tali te logo, neʼe felāveʼi te Fakamoʼoni mo te tama ʼa te fafine neʼe fia logo ʼi muʼa atu, pea neʼe ina fakamahino age ʼe tuʼania peʼe feafeaʼi anai te maʼuli ʼo te hahaʼi ʼi te tuʼutāmaki ʼaē neʼe hoki ʼosi atu. Neʼe malave ki te tagata tana sio ki te Fakamoʼoni ʼe ina fakaʼaogaʼi tona temi moʼo ʼaʼahi te hahaʼi pea mo vakaʼi peʼe nātou feafeaʼi. Neʼe ʼui age e te tagata neʼe gāue ōvi ki te ʼu foʼi falefata ʼo te World Trade Center ʼi te temi ʼaē neʼe hoko ai te tuʼutāmaki pea neʼe sio katoa ki te meʼa ʼaē neʼe hoko. ʼI tana fehuʼi age ki te Fakamoʼoni pe koʼe ʼe fakagafua e te ʼAtua te ʼu mamahi, neʼe lau age e te tēhina te vaega faka Tohi-Tapu ʼo Pesalemo 37:39, ʼaē ʼe ʼui fēnei: “Ko te fakamaʼuli ʼo te kau agatonu ʼe haʼu mai ia Sehova; ko ia ko tonatou tule mālohi ʼi te temi ʼo te mamahi.” Neʼe fehuʼi age e te tagata peʼe feafeaʼi te Fakamoʼoni mo tona famili, pea neʼe ina fakaafe ia ia ke toe haʼu, pea neʼe fakamālo lahi ki tana ʼaʼahi.
17 ʼI te toko lauʼi afe hahaʼi lotomamahi ʼaē neʼe fakaloto fīmālieʼi e te kau Fakamoʼoni ʼa Sehova ʼi te ʼu ʼaho ki muli age ʼo te tuʼutāmaki, neʼe ʼi ai te fafine neʼe felāveʼi mo nātou ʼi tanatou gāue fai faka mafola. Neʼe malave ʼaupito ki te fafine te meʼa ʼaē neʼe hoko pea neʼe fakalogo ki tanatou lau age ia Pesalemo 72:12-14: “[ʼE] ina hāofaki anai te masiva ʼaē ʼe pāui ke tokoni age ki ai, ʼo toe feiā mo ia ʼaē ʼe lotomamahi pea mo ia ʼaē ʼe mole he tahi ke tokoni age ki ai. ʼE fakaʼofaʼofa anai kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva. Mai te taʼomia pea mo te agamālohi ʼe ina totogi anai tonatou ʼu nefesi, pea ʼe maʼuhiga anai tonatou toto ki ʼona mata.” Neʼe maʼuhiga te ʼu palalau ʼaia! Neʼe kole age e te fafine ki te kau Fakamoʼoni ʼa Sehova ke nātou toe lau age te ʼu vaega, pea neʼe ina fakaafe nātou ke nātou hū ki tona ʼapi moʼo hoko ai tanatou fai palalau. ʼI te ʼosi ʼo tanatou fai palalau, neʼe kamata ai tana ako Tohi-Tapu.
18. Neʼe tokoni feafeaʼi te Fakamoʼoni ki tona ʼu tatau ʼi tona fakaafe ʼaē ke faikole maʼa nātou?
18 Ko te Fakamoʼoni ʼe gāue ʼi te fale kai, pea ʼi te agamāhani ko te hahaʼi maʼu meʼa ʼaē ʼe ʼōmai ki ai ʼe mole nātou fia logo ki te logo lelei ʼo te Puleʼaga. ʼI te ʼosi ʼo te tuʼutāmaki, neʼe kua mataku ʼaupito te hahaʼi. ʼI te Feliaono hili hoʼatā ʼi te ʼosi ʼo te ʼohofi, ko te fafine patolo ʼo te fale kai neʼe ina fakaafe te hahaʼi fuli ke nātou ʼolo ki tuʼa mo te ʼu foʼi sela ʼo tutuʼu fakalogologo ai moʼo fakamanatuʼi ia nātou ʼaē kua mamate ʼi te tuʼutāmaki ʼaia. ʼI tana fakaʼapaʼapa ki te ʼu meʼa ʼaē ʼi ʼonatou loto, neʼe ʼalu te Fakamoʼoni ki tuʼa ʼo tuʼu fakalogologo ʼi te kauala. Neʼe ʼiloʼi e te fafine patolo ko ia ko te Fakamoʼoni ʼa Sehova, koia ʼi te ʼosi ʼo tanatou tuʼu fakalogologo neʼe ina kole age ki te tēhina ke ina fai honatou kole, pea neʼe ina tali te faʼahi ʼaia. ʼI tana faikole, neʼe talanoa ki te mafola ʼo te ʼu mamahi, kae neʼe ina ʼui ʼe ʼi ai te ʼamanaki maʼa te hahaʼi ʼaē kua mamate tonatou ʼu kāiga. Neʼe palalau ki te temi ʼaē ʼe mole toe ʼi ai anai te ʼu aga fakapō ʼaia, pea neʼe ina ʼui ʼe lava ki te hahaʼi fuli ke nātou fakaōvi ki te ʼAtua ʼo te fakaloto fīmālie, ʼaki te ʼatamai mālama ʼaē ʼe haʼu mai te Tohi-Tapu. ʼI tanatou tali fuli “Ameni,” ko te fafine patolo neʼe haʼu ki te tēhina, ʼo fakamālo ki ai, pea mo fāʼufua kia ia—pea mo te toko 60 tupu hahaʼi ʼaē neʼe tutuʼu ʼi tuʼa ʼo te fale kai—heʼe ko tana hoki logo ʼaē ki te faikole feiā.
Ko Te Tapuakina Ki Te Hahaʼi
19. Koteā te faʼifaʼitaki ʼe hā ai ko ʼihi ʼe nātou fakamoʼoni ki te lelei ʼo te ʼu lekula ʼa te kau Fakamoʼoni ʼa Sehova?
19 ʼI te ʼu ʼaho ʼaia, neʼe ʼui e te tokolahi ia nātou ʼaē neʼe fai faka mafola ki ai te kau Fakamoʼoni ʼa Sehova, neʼe nātou leleiʼia ʼaupito tanatou gāue. Ei ko te hahaʼi ʼaē ʼe lagolago ki te tokalelei, mo te agatonu, pea mo te aga maʼa, ʼe ko he mālohi ʼe ina uga te hahaʼi ke nātou fai te meʼa ʼaē ʼe lelei. ʼI te tahi fenua ʼi Asie Centrale, neʼe felāveʼi te kau Fakamoʼoni ʼa Sehova mo te polisi kua letelete ʼo te kau polisi ʼāfea ʼo te loto fenua. Neʼe ina ʼui neʼe kua tuku age ke ina fai te sivi ʼo ʼuhiga mo te ʼu faʼahiga kautahi faka lotu kehekehe. ʼI tana sivisivi ia te kau Fakamoʼoni ʼa Sehova, neʼe malave kia ia tanatou agatonu pea mo tanatou aga ʼaē ʼe lelei. Neʼe malave kia ia te mālohi ʼo tanatou tui pea mo te fakatafito ʼo tanatou ʼu akonaki ki te Tohi-Tapu. Neʼe tali e te tagata ʼaia ke fai hana ako Tohi-Tapu.
20. (a) Koteā ʼaē ʼe hā mai ʼi te tānaki gāue ʼa te kau Fakamoʼoni ʼa Sehova ʼi te taʼu ʼaenī kua ʼosi? (b) Koteā ʼaē ʼe hā mai ʼe kei lahi te gāue, pea ʼe tou faka ʼuhiga feafeaʼi totatou pilivilesio ʼaē ko te faka mafola ʼo te evaselio?
20 ʼAki te ʼu kiʼi faʼifaʼitaki ʼo te alatike ʼaenī, ʼo mole lau te toko lauʼi afe ʼaē neʼe tou talanoa kiai, ʼe hā mai neʼe maʼumaʼua te kau Fakamoʼoni ʼa Sehova ʼi te taʼu gāue ʼo te taʼu 2001.a Neʼe nātou fai palalau mo te toko lauʼi miliona hahaʼi, pea neʼe nātou fakafimālieʼi te hahaʼi tokolahi neʼe putu, pea neʼe ʼi ai te ʼu fua lelei ʼo tanatou faka mafola te evaselio. Neʼe ko te toko 263 431 neʼe nātou papitema moʼo foaki tonatou maʼuli ki te ʼAtua. ʼI te malamanei, neʼe tuputupu te hahaʼi ʼo te kau faka mafola evaselio ʼi te 1.7 ʼi te teau. Pea ʼe ʼiloga ʼi te toko 15 374 986 ʼaē neʼe kau ki te ʼAho Fakamanatu ʼo te mate ʼo Sesu, ʼe kei lahi te gāue. (1 Kolonito 11:23-26) ʼOfa pe ke tou haga kumi te hahaʼi agavaivai ʼaē ʼe nātou tali te logo lelei. Pea ʼo mulimuli pe ki te kei fakahā e Sehova ʼo tona taʼu ʼo te loto manavaʼofa, tou haga fakafimālieʼi ia nātou ʼaē ʼe “lotomamahi.” ʼE ko he pilivilesio ʼe tou maʼu! ʼE mahino ia ʼe tou fakahoko anai te ʼu palalau ʼaenī ʼa Isaia: “Ei, ʼe ʼau fakafiafia anai ia Sehova. ʼE fakafiafia anai toku nefesi ʼi toku ʼAtua.” (Isaia 61:10) ʼOfa pe ke hoko atu totatou fakaʼaogaʼi e te ʼAtua moʼo tala te ʼu lea faka polofeta ʼaenī: “[ʼE] fakatupu anai e te Tuʼi ʼAliki ko Sehova te faitotonu pea mo te fakavikiviki ʼi muʼa ʼo te ʼu puleʼaga fuli.”—Isaia 61:11.
[Kiʼi nota]
a ʼE tou maʼu ʼi te pasina 19 ki te 22 ia te tānaki gāue ʼa te kau Fakamoʼoni ʼa Sehova ʼo te taʼu gāue ʼo te taʼu 2001.
Kei Koutou Manatuʼi Koa?
• Neʼe tapuakinaʼi feafeaʼi te hahaʼi agavaivai ʼaki te logo lelei ʼaē neʼe faka mafola e Sesu?
• ʼI te ʼuluaki sēkulō, koteā te ʼu tapuakina neʼe maʼu e te hahaʼi ʼaē neʼe nātou tali te faka mafola ʼo te evaselio e te ʼu tisipulo ʼa Sesu?
• Neʼe tapuakinaʼi feafeaʼi ia ʼaho nei te hahaʼi ʼaē neʼe nātou tali te logo lelei?
• ʼE tou faka ʼuhigaʼi feafeaʼi totatou pilivilesio ʼaē ko te faka mafola ʼo te evaselio?
[Tānaki ʼo te taʼu gāue, pasina 19-22]
2001 TĀNAKI ʼO TE GĀUE FAKA MALAMANEI ʼA TE KAU FAKAMOʼONI ʼA SEHOVA
(Vakaʼi te nusipepa)
[Paki ʼo te pasina 15]
ʼE manatuʼi tuʼumaʼu e te kau Fakamoʼoni ʼa Sehova tonatou maʼua ʼaē ko te faka mafola ʼo te evaselio
[Paki ʼo te pasina 17]
Ko te hahaʼi ʼaē ʼe nātou tali te logo lelei ʼe nātou liliu ko he ʼu hahaʼi ʼo te foʼi famili faka tautēhina logo tahi ʼi te malamanei