“Omai Kia Te Au, . . . Pea e Au Fakafimalieʼi Anai Koutou”
ʼE Maʼu Te Fakafimālie ʼi Te ‘Faka Mafola ʼo Te Folafola’
NEʼE ko te tagata haohaoa pea neʼe ina fai te gāue maʼuhiga. “Nee ofolele te hahai ki tana akonaki” he neʼe lelei ʼaupito tana faʼahiga faiakonaki. (Mateo 7:28) Tahi ʼaē meʼa, neʼe ko te tagata fai faka mafola mālohi. Neʼe ina fakaʼaogaʼi tona temi, mo tona mālohi, mo tona ʼu fealagia ki te faka mafola ʼo te Puleʼaga ʼo te ʼAtua. ʼIo, neʼe feʼaluʼaki ia Sesu Kilisito ʼi tona fenua katoa, he neʼe lahi tana fai faka mafola pea mo tana faiakonaki.—Mateo 9:35.
Ko te gāue maʼuhiga ʼa Sesu neʼe ko te faka mafola ʼo “te Logolelei . . . o te Puleaga” ki te hahaʼi ʼo tona temi, pea mo teuteuʼi fakalelei tana ʼu tisipulo ki te gāue ʼaia ʼi he ʼaluʼaga lahi age. (Mateo 4:23; 24:14; 28:19, 20) Ko te lahi ʼo tanatou gāue faka mafola pea mo te lahi ʼo te telituale, ʼe mamafa anai koa ki tana kau tisipulo heʼe haohaoa ʼaē neʼe tuʼakoi tonatou ʼu fealagia?
Kailoa ia! ʼI tana ʼosi fakatotonu age ki tana kau tisipulo ke nātou faikole “ki te Aliki o te taukai,” ko Sehova ʼAtua ke lahi age te kau gāue, neʼe fekauʼi nātou e Sesu ke nātou ʼolo ʼo akoʼi te hahaʼi. (Mateo 9:38; 10:1) Pea neʼe ina fakahā lelei age ko te maʼua ʼaē ke nātou liliu ko tana kau tisipulo—ʼe kau kiai te faka mafola—heʼe maʼu ai anai te ʼāteaina moʼoni pea mo te fīmālie. Neʼe ʼui fēnei e Sesu: “[Koutou] omai kia te au, . . . pea e au fakafimalieʼi anai koutou.”—Mateo 11:28.
Ko Te Matapuna ʼo Te Fiafia
ʼI fakaafe manavaʼofa, mo ʼofa pea mo agalelei! ʼE hā ʼaki mai te ʼofa ʼaē ʼo Sesu ki tana kau tisipulo. ʼE maʼu e tana kau tisipulo te fīmālie ʼi tanatou faka mafola “te Logolelei” ʼo te Puleʼaga ʼo te ʼAtua. ʼE nātou maʼu ai te fiafia moʼoni pea mo te fīmālie.—Soane 4:36.
ʼI muʼa ʼo te haʼu ʼa Sesu ki te kele, neʼe ʼui ʼi te Tohi-Tapu, ko te fiafia ʼe pipiki ki te tauhi taputapu ʼa te ʼAtua. Neʼe hā lelei te faʼahi ʼaia ʼi te hiva ʼaenī ʼa te tagata fai pesalemo: “Koutou fai he ʼu kalaga ʼo te mālo kia Sehova, ia koutou fuli ʼaē ko te hahai ʼo te kele. Koutou tauhi kia Sehova ʼaki te loto fiafia. Koutou hū ki ai ʼaki he kalaga fakafiafia.” (Pesalemo 100:1, 2) Ia ʼaho nei, ʼe fakafiafia te hahaʼi ʼo te ʼu puleʼaga fuli kia Sehova, pea ko tanatou ʼu fakavikiviki ʼe hage ko he kalaga ʼe fai e he foʼi tau mokā mālo. Ko te hahaʼi ʼaē ʼe nātou tauhi moʼoni ki te ʼAtua ʼe nātou ʼōmai kia te ia “ ʼaki he kalaga fakafiafia.” Pea ʼe tonu ke feiā heʼe ko Sehova ko “te ʼAtua fiafia,” pea ʼe loto ke fiafia tana ʼu kaugana ʼi tanatou tauhi age ʼaē kia te ia.—1 Timoteo 1:11, MN.
Te ʼu Minisi Kua Fakafimālie
ʼE lava feafeaʼi ki he gāue kinakina ʼi te minisitelio ke mole fakatupu gaʼegaʼe kae ke ina fakafimālie moʼoni? Ko te fai ʼo te gāue ʼa Sehova neʼe hage ko he meʼa kai maʼa Sesu. Neʼe ina ʼui fēnei: “Ko taku meakai e ko taku fai te finegalo o ia ae nee ina fekaui au pea mo au fakakatoa tana gaue.”—Soane 4:34.
ʼE toe feiā ia ʼaho nei, ʼe fiafia te kau fai faka mafola ʼi tanatou “kalagai te Folafola.” (2 Timoteo 4:2) Ko Connie, neʼe ko te fafine Kilisitiano kua taʼu nimagofulu, ʼi tana fai faka mafola ʼe ina fai ia hola e 70, pea ʼe ina ʼui fēnei: “ ʼI taku kau ki te minisitelio, ʼe ʼau fiafia pea mo loto fīmālie, tatau aipe pe neʼe ʼau gaʼegaʼe mokā ʼosi toku ʼaho gāue.”
E feafeaʼi mo kapau ʼe mole tali lelei te logo ʼo te Puleʼaga? ʼE toe ʼui fēnei e Connie: “Tatau aipe peʼe mole tali e te hahaʼi, kae ʼe mole ʼau fakahemala ʼi he ʼaho ʼi taku kau ki te minisitelio. Pea ʼi taku ʼiloʼi ʼaē ʼe leleiʼia e Sehova te meʼa ʼaē ʼe ʼau fai, ʼe ʼau fiafia ʼi taku fakahā ia te moʼoni, heʼe ko te ʼamanaki taulekaleka ʼaia mai te Tohi-Tapu ʼe ina faka ʼāsili mālohiʼi toku loto.”
Ko te tokoni ʼaē ki te hahaʼi ke nātou maʼu te ʼatamai mālama ʼo te ʼAtua, ʼe nātou maʼu ai te ʼuhiga ʼo tonatou maʼuli. Ko te fafine kei finemui ko Meloney ʼe ina fai tuʼumaʼu ia hola e 50 ʼi te gāue faka mafola, ʼe ina ʼui fēnei: “ ʼE fakaloto fīmālie te minisitelio koteʼuhi ʼe ina takitaki toku maʼuli. ʼE mole ʼau tokagaʼi te ʼu fihifihia pea mo te ʼu hoha ʼo te ʼaho fuli mokā ʼau kau ki te minisitelio.”
Ko Millicent, ko te tahi minisi faʼafai ʼa te kau Fakamoʼoni ʼa Sehova, ʼe ina ʼui fēnei: “ ʼE maʼuhiga te ʼaho fuli ʼuhi ko te minisitelio, ʼe ʼau palalau mo te hahaʼi ʼo ʼuhiga mo te ʼu fakatuʼutuʼu ʼa te ʼAtua ki te malamanei pea mo fakamahino kia nātou peʼe ina fakatuʼu feafeaʼi anai te Palatiso ʼi te kele. ʼI te ʼaho fuli ʼe moʼoni ia Sehova kia ʼau pea ʼe ina foaki mai te tokalelei, pea mo te fiafia ʼaē ʼe mole tou lava maʼu ʼi he tahi ʼu faʼahi.”
Te ʼu Hahaʼi Fiafia
ʼE mahino ia ʼe fiafia te kau fai faka mafola ʼi te gāue faka minisitelio, pea ko te hahaʼi ʼaē ʼe nātou tali te logo ʼo te maʼuli, ʼe nātou maʼu ai he loto fīmālie. Logola ko te fafine faiako ʼi Potukalia neʼe akoʼi e te kau taupoʼou pea mo te kau patele, kae ko tana fia mahino ki te ʼu meʼa fakalaumālie neʼe mole fai e te lotu ʼaē neʼe kau ai. Neʼe mole ʼi ai he ʼu tali ki tana ʼu fehuʼi faka Tohi-Tapu. Ko te ako tuʼumaʼu ʼo te Tohi-Tapu mo te Fakamoʼoni ʼa Sehova, neʼe mahino māmālie ai leva ki te Tohi-Tapu. Neʼe fiafia te fafine faiako. Neʼe ina ʼui fēnei: “Neʼe ʼau loto ke foimo hoko mai te Feliafā kae fai taku ako, pea ʼaki te Tohi-Tapu neʼe ʼau maʼu te ʼu tali ki taku ʼu fehuʼi fuli.” ʼI te temi nei, ko te fafine ʼaia ko te kaugana ʼa Sehova, pea ʼe ina toe fakafimālieʼi te hahaʼi ʼaki te ʼu moʼoni ʼo te Tohi-Tapu.
Koia ʼe mahino lelei mai, ʼe mole mafasia te kau Fakamoʼoni ʼa Sehova ʼuhi ko te maʼuhiga ʼo tanatou gāue fai faka mafola peʼe ko te lahi ʼo tonatou telituale. ʼE mole nātou lotovaivai ʼuhi ko te mole tokagaʼi ʼo tanatou gāue peʼe ko te fakafeagai ʼa te hahaʼi. ʼE nātou tokakaga ʼo gāue lahi ki te fakahoko ʼo tanatou faka mafola ia te Puleʼaga. ʼE nātou faka mafola te logo lelei ʼi te ʼu potu fuli ʼe nātou felāveʼi ai mo te hahaʼi—ʼi te taulaga kamio ʼi Amelika (1), ʼi te malaʼe vakalele ʼi Kolea (2), ʼi te ʼu Andes (3), ʼi te fale koloā ʼi Lonitoni (4). Ko te kau tisipulo ʼa Sesu ia ʼaho nei, ʼe nātou fiafia ʼi te fakahā ʼo tanatou gāue ʼi te malamanei. Pea ʼo mulimuli ki tana fakapapau, neʼe ina fakafimālieʼi nātou pea mo fakaʼaogaʼi nātou moʼo fakafimālieʼi te hahaʼi.—Apokalipesi 22:17.