Ko He Gāue ʼe Ina Fakafimālie
1 Ko te logo ʼo te Tohi-Tapu ʼe ina fakafimālieʼi ia nātou fuli ʼaē ʼe nātou tali te logo ʼaia pea mo nātou maʼuliʼi. (Pes. 19:7, 8) ʼE tokoni kia nātou ke nātou ʼāteaina mai te ʼu akonaki hala pea mo te ʼu faʼahiga maʼuli fakatupu tuʼutāmaki, pea mo foaki age kia nātou he ʼamanaki moʼoni ʼo ʼuhiga mo te temi ka haʼu. Kae ko nātou ʼaē ʼe nātou tali te logo lelei ʼe mole fua lelei pe kia nātou ʼaia. Ko nātou ʼaē ʼe nātou vaevae te ʼu moʼoni faka Tohi-Tapu fakaloto fīmālie ʼaia ki te hahaʼi, ʼe nātou maʼu mo nātou ia he fakafimālie.—Taag. 11:25.
2 ʼE Fakaloto Mālohiʼi Ia Nātou e Te Minisitelio: Neʼe ʼui e Sesu ʼo ʼuhiga mo nātou ʼaē ka nātou tali anai tona ʼakau toho ʼi tanatou liliu ko he ʼu tisipulo Kilisitiano, ʼaē ʼe kau kiai ia te gāue fai faka mafola pea mo te fai ʼo ni tisipulo, ʼe nātou “maʼu anai he fīmālie ki [ʼonatou] nefesi.” (Mat. 11:29, MN ) Māʼiape foki la mo ia neʼe ina maʼu he fakaloto mālohi ʼi tana fagonogono ki te hahaʼi. Neʼe hage kia ia ko hana meʼa kai. (Soa. 4:34) ʼI te temi ʼaē neʼe ina fekauʼi ai te toko 70 tisipulo ke nātou ʼolo ʼo fai faka mafola, neʼe nātou fakafiafia ʼi tanatou sisio ki te lagolago ʼa Sehova ki tanatou ʼu faiga.—Luka 10:17.
3 Tokolahi te kau Kilisitiano ʼe fakaloto mālohiʼi feiā ia nātou ʼi tanatou kau ki te gāue fai faka mafola. Neʼe ʼui fēnei e te tuagaʼane: “Ko te minisitelio ʼe ko he meʼa fakaloto mālohi, koteʼuhi ʼe ʼau maʼu ai ki toku maʼuli hoku ʼaluʼaga pea mo he ʼuhiga kiai. ʼE liliu toku ʼu fihifihia mo taku hoha ʼo mole faʼa maʼuhiga mokā ʼau kau ki te gāue fai faka mafola.” Neʼe ʼui fēnei e te tahi tuagaʼane ʼe faʼafai ʼi te fai faka mafola: “ ʼE fakamanatuʼi mai e te minisitelio . . . ko Sehova ʼe maʼuli moʼoni pea ʼe ʼau maʼu ai te fīmālie pea mo he faʼahiga fiafia ʼe mole feala haku maʼu ʼi he tahi age gāue.” Pea ʼe ko he pilivilesio hatatou liliu “ko te u kauga gaue a te Atua”!—1 Ko. 3:9.
4 Ko Te ʼAkau Toho ʼa Kilisito ʼe Mālū: Logope ʼe uga te kau Kilisitiano ke nātou ‘faiga mālohi,’ kae ʼe mole fakamaʼua mai e Sesu he meʼa ʼe laka age ʼi te meʼa ʼaē ʼe tou lavaʼi. (Luka 13:24) ʼI tona fakahagatonu, ʼe ina fakaafe tatou ʼaki te lotoʼofa ke tou ‘ ʼamo fakatahi tona ʼakau mo ia.’ (Mat. 11:29, kiʼi nota ʼi te lalo pasina) Ko nātou ʼaē ʼe nātou felāveʼi mo he ʼu ʼaluʼaga faigataʼa, ʼe feala hanatou falala ko te gāue ʼaē ʼe nātou fai ʼaki tonatou loto katoa, tatau aipe peʼe siʼisiʼi, kae ʼe tali leleiʼi e te ʼAtua.—Mko 14:6-8; Kol. 3:23.
5 ʼE ko he meʼa fakafimālie hatatou tauhi ki he ʼAtua ʼe ina faka maʼuhiga te ʼu meʼa fuli ʼaē ʼe tou fai maʼa tona huafa! (Hep. 6:10) ʼOfa pe ke tou faiga tuʼumaʼu ke tou foaki age ki ai te ʼu meʼa lelei ʼaupito ʼaē ʼe tou maʼu.