“Kotou Toʼo Kiā Koutou Taku ʼAkau ʼAmo”
1 ʼI te mālama nei kua fonu ai te ʼu fakaneke pea mo te ʼu tuʼania, kua tou maʼu ia he fakalotofīmālie moʼoni ʼi tatatou tali ia te fakaafe fakalotomāfana ʼa Sesu ʼaē ke tou maʼu ia he fakalotofīmālie mai tana takitaki. (Mat. 11:29, 30) ʼI tatatou tali ʼaē ke tou liliu ko he tisipulo ʼa Sesu, ʼe tonu ke tou kau ki te gāue ʼe mole faigafua kae ʼe fakalotofīmālie. Ko te gāue ʼaia ʼe ko tatatou kau ki te fai fakamafola ʼo te logo lelei ʼo te Puleʼaga pea mo tokoni ki niʼihi ke natou maʼu mo nātou ia he fakalotofīmālie ʼi te takitaki agalelei ʼa Sesu.—Mat. 24:14; 28:19, 20.
2 Te Fakalotofīmālie ʼAē ʼe Maʼu ʼi Te Minisitelio: Neʼe mole ʼui age e Sesu ki tana kau tisipulo ke natou hilifaki ki te ʼu meʼa ʼaē kua nātou ʼamo ia tana ʼāmoga, kae neʼe ina fakaafe nātou ke natou tuku tanatou ʼāmoga mamafa kae natou ʼamo tana ʼāmoga ʼaē ʼe maʼamaʼa age. ʼE mole kei tou mafasia ʼi te ʼu tuʼania pea mo te heʼe ʼamanaki ʼo te tuʼu ʼo te ʼu faʼahiga meʼa ʼaenī, ʼe mole kei tou gāue ki he ʼu koloa ʼe fakalākilua. (Luka 21:34; 1 Tim. 6:17) Logolā tatatou maʼumaʼua pea mo gāue ke tou maʼu ia te ʼu meʼa ʼaē ʼe ʼaoga ki te ʼaho fuli, kae ʼe tou fakamuʼamuʼa ʼi totatou maʼuli ia tatatou tauhi ʼaē ki te ʼAtua. (Mat. 6:33) ʼE tou maʼu tuʼumaʼu anai ʼi te minisitelio ia te fakalotofīmālie, kae ʼe mole ko he kavega ia, mo kapau ʼe tou maʼu ia te manatu ʼaē ʼe lelei ʼo ʼuhiga mo te ʼu meʼa ʼaē ʼe maʼuhiga tāfito.—Filp. 1:10.
3 ʼI te agamāhani, ʼe tou fiafia mokā ʼe tou palalau ʼo ʼuhiga mo te ʼu meʼa fuli ʼaē ʼe maʼuhiga kiā tātou. (Luka 6:45) ʼE tōkakaga moʼoni ia te kau Kilisitiano fuli ʼo ʼuhiga mo Sehova pea mo te ʼu tapuakina ʼo te Puleʼaga ʼaē neʼe ina fakapapauʼi mai. Koia, ʼe ko he meʼa fakalotofīmālie hatatou palalau ʼo ʼuhiga mo “te ʼu logo lelei ʼo te ʼu meʼa lelei,” ʼo mole tou fakamaʼuhigaʼi fau totatou ʼu tuʼania ʼo te ʼaho fuli kae tou kau ki te minisitelio! (Loma 10:15) ʼE mahino ia, kapau ʼe lahi te ʼu gāue ʼaē ʼe tou fai, pea ʼe toe lahi age mo tatatou faiva mo tatatou fiafia. Koia lā ʼaē, kapau ʼe tou fakaʼaogaʼi lahi ai he temi ki te minisitelio, pea ʼe tou maʼu ai anai ia he tahi age fakalotofīmālie. Pea ʼe ko he meʼa fakalotofīmālie mokā ʼe tali e te hahaʼi ia tatatou fai fakamafola! (Gāue 15:3) Tatau aipē mokā ʼe tou felāveʼi mo ni ʼu hahaʼi ʼe mole natou fia logo ki tatatou fai fakamafola peʼe natou fakafeagai mai, kae ʼe tou maʼu anai ʼi te minisitelio ia he fakalotofīmālie fakalaumālie mo kapau ʼe tou manatuʼi tuʼumaʼu ko tatatou ʼu faiga ʼe leleiʼia e Sehova pea ʼe tou maʼu he ʼu fua lelei ʼuhi ko tana tapuakina.—Gāue 5:41; 1 Ko. 3:9.
4 ʼAki tatatou tali ia te fakaafe ʼa Sesu, ʼe tou maʼu ia te pilivilēsio ʼaē ke tou tauhi fakatahi kiā te ia mo te kau Fakamoʼoni ʼa Sehova. (Isa. 43:10; Fakh. 1:5) ʼE ko he faʼahi ʼe fakalotofīmālie age!