‘Kotou Nonofo Teuteu Ki Te Gāue Lelei Fuli Pē’
1 ʼI te temi ʼaē neʼe fai ai e Sesu ia te fakatuʼutuʼu foʼou ʼo ʼuhiga mo te gāue fai fakamafola, neʼe ina toʼo ia te temi ke ina teuteuʼi ai ia te kau tisipulo. (Mat. 10:5-14) Logolā ʼe tou maʼumaʼua fuli, kae kā tou toʼo he ʼu kiʼi minuta ke tou teuteu ai ʼi muʼa ʼo tatatou kau ki te fai fakamafola ʼi te ʼu ʼapi, pea ʼe tokoni mai anai kiā tātou ke tou maʼu he ʼu fua ʼe lelei.—2 Ko. 9:6.
2 ʼE Tou Teuteu Feafeaʼi: Ko he teuteu ʼe lelei, ʼe kamata ʼaki tatatou fakamāmāhani mo te ʼu tohi ʼaē ʼe tou fakatuʼutuʼu ke tou tufa. Tou manatuʼi mo te faʼahiga hahaʼi ʼaē ʼe tou maʼu i totatou telituale. Koteā te ʼu fihifihia ʼaē ʼe natou tau mo ia ʼi tonatou maʼuli? Koteā te ʼu akonaki fakalotu ʼaē ʼe natou tui kiai? ʼE feala ke tou vakaʼi ia te ʼu faʼifaʼitaki ʼi Te Minisitelio ʼo Te Puleʼaga pea mo te ʼu manatu ʼi te kiʼi kaupepa Te ʼu Tokoni Ki Te ʼu Fai Palalau Faka Tohi-Tapu.
3 Tou tōkakaga ʼo fakalogo ki te ʼu faʼifaʼitaki ʼaē ʼe fai ʼi te Fono Gāue heʼe toe tokoni mai anai kiā tātou. ʼI tatatou kua popoto ʼi te fakahā ʼo te tufa, ʼe mole kei ʼaoga anai ke tou fakaʼaogaʼi he temi ke lahi moʼo teuteuʼi tatatou fai fakamafola. Kae kapau ʼi muʼa ʼo tatatou ʼolo ki te fai fakamafola, ʼe tou vakaʼi te ʼu manatu ʼaē kā tou palalau anai kiai pea mo tou faigaʼi ke lelei age tatatou ʼu ʼuluaki palalau, ʼe toe lahi age anai tona lelei. Tou toe toʼo foki mo he temi moʼo fakatoka lelei ia tatatou kato fai fakamafola peʼe kātoa ai ia te ʼu tohi ʼaē kā tou fakaʼaogaʼi anai ʼi te minisitelio.
4 Koteā ʼaē kā tokoni mai anai ke tou manatuʼi ia tatatou ʼu ʼuluaki palalau? Kapau ʼe tou akoako leʼolahi ia te ʼu palalau ʼaē kā tou fai, pea ʼe tou maʼu fakaʼatamai anai ia te ʼu manatu ʼaē ʼe tou fia talanoa kiai. Ko ʼihi ʼe natou fai te ʼu faʼifaʼitaki ʼi te ʼu temi ʼaē ʼe natou fai ai tanatou ako fakafāmili. Ko ʼihi ʼe natou tohi fakanounou tanatou ʼu palalau ki he kiʼi moʼi pepa pea ʼe natou vakaʼi fakavilivili ʼi muʼa ʼo hanatou fai he matapā.
5 Tona ʼAoga: ʼE lelei tatatou minisitelio pea mo tou fiafia ai, mo kapau ʼe tou teuteu lelei. ʼE tokoni mai ke ʼaua naʼa tou mātataku pea mo lotohoha ʼi te muʼa matapā. ʼE feala ai ke tou tōkakaga tāfito ki te tagata ʼo te ʼapi ʼi hatatou hoha fau ki te ʼu manatu ʼaē ʼe tou fia talanoa kiai. Tahi ʼaē faʼahi, ʼi tatatou kua ʼiloʼi te ʼu manatu ʼaē ʼe tuʼu ʼi te tohi, ʼe ko he faʼahi kā tokoni mai anai kiā tātou ke tou loto māfana mokā tou palalau kiai.
6 ʼE fakalotomālohiʼi tātou ʼi te Tohi-Tapu ke tou “nonofo teuteu ki te gāue lelei fuli pē.” (Tito 3:1) Koteā he tahi age gāue lelei ke tou fai gata pē ke tou kau ki te fakamafola ʼo te logo lelei? ʼAki tatatou teuteu lelei, ʼe tou fakahā ai ʼe tou fakaʼapaʼapa ki te tagata ʼo te ʼapi ʼaē ʼe ina tali lelei te logo, pea kiā Sehova, te ʼAtua ʼaē ʼe tou fakafofoga ʼi tatatou minisitelio.—Isa. 43:10.