‘Kotou ʼOmai Kia Te Au, Pea ʼe Au Fakafimalieʼi Anai Koutou’

1. Ka tou lau ia Mateo 11:28-30, kotea te fakapapau ʼae neʼe fai e Sesu?

NEʼE fai e Sesu ia he fakapapau taulekaleka ʼi te temi ʼae neʼe faiakonaki ai ki he hahaʼi kaugā malie. Neʼe ina ui fenei: “Kotou ʼomai kia te au, . . . pea ʼe au fakafimalieʼi anai koutou.” (Lau ia Mateo 11:28-30.) Neʼe mole ko he ʼu palalau neʼe ina fai feia pe. Kotou manatuʼi tana haga ʼo fakamalolo ia te fafine ʼae neʼe tau mo he mahaki faigataʼa.

2. Kotea ʼae neʼe fai e Sesu ki he fafine mahaki?

² Neʼe fakaʼamu lahi te fafine ʼaia ke tokoni age he tahi ki ai. Neʼe kua lahi te ʼu toketa neʼe alu ki ai ke natou faitoʼo ia ia. Kua taʼu 12 tana tau mo te mahaki faigataʼa ʼaia, kae neʼe mole he tahi neʼe ina lava fakamalolo ia ia. Pea neʼe tohi ʼi te Lao, ko he tahi ʼe ina maʼu ia te mahaki ʼaia, ʼe ko he tahi ʼe heʼe maʼa. (Lev. 15:25) Pea neʼe logo leva te fafine ki te fakamatala ʼae ʼe lava fakamalolo e Sesu ia natou ʼae ʼe mahahaki. Koia neʼe alu ai ʼo kumi ia Sesu. ʼI tana maʼu leva ia Sesu, neʼe fa leva ki tona kofu tuʼa, pea neʼe puli atu aipe tona mahaki. Kae neʼe mole fakamalolo pe e Sesu ia tona mahaki. Neʼe loto e Sesu ke mahino te fafine neʼe ʼofainaʼi pea mo fakaʼapaʼapaʼi. Ohage la, ʼi tana palalau age, neʼe ina ui age “taʼahine.” ʼE mahino ia, neʼe lotomalohi ai te fafine pea mo fimalie ai tona loto.—Luka 8:43-48.

3. Kotea te ʼu fehuʼi ʼae ka tou tali anai ki ai?

³ Kotou tokagaʼi, ʼe ko te fafine ʼae neʼe faiga ke alu kia Sesu. ʼE toe feia pe ia ʼaho nei, ʼe tonu ke tou faiga malohi ke tou “ ʼomai” kia Sesu. ʼE moʼoni ʼe mole fakamalolo e Sesu ia te ʼu mahaki fakasino ʼo natou ʼae ʼe “ ʼomai” kia te ia, ia ʼaho nei. Kae ʼe ina toe fai mai pe te fakaafe ʼaeni: “Kotou ʼomai kia te au, . . . pea ʼe au fakafimalieʼi anai koutou.” ʼE tou tali anai ʼi te alatike ʼaeni kia fehuʼi ʼe nima: Kotea ʼae ʼe tonu ke tou fai ke tou “ ʼomai” ai kia Sesu? Kotea ʼae neʼe fia ui e Sesu ʼi tana ui fenei: “Kotou toʼo taku ʼakau ʼamo”? Kotea ʼae ʼe tou ako mai ia Sesu? He koʼe ʼe feala ke tou maʼu he fakalotofimalie ʼi te gaue ʼae neʼe ina tuku mai ke tou fai? ʼE feafeaʼi hatatou haga maʼu he fakalotofimalie moka tou toʼo tana ʼakau ʼamo?

“KOTOU ʼOMAI KIA TE AU”

4-5. Kotea ʼae ʼe tonu ke tou fai mo kapau ʼe tou fia “ ʼomai” kia Sesu?

⁴ Kapau ʼe tou fia “ ʼomai” kia Sesu, ʼe tonu ke tou ako ke tou iloʼi lelei ʼana gaue pea mo ʼana akonaki. (Luka 1:1-4) ʼE mole he tahi ʼe feala ke ina fai te faʼahi ʼaia maʼa tatou. Ko tatou totonu ʼae ʼe tonu ke tou ako ia te ʼu fakamatala ʼae neʼe fai ʼo ʼuhiga mo Sesu. ʼE tou “ ʼomai” kia Sesu moka tou toʼo te tonu ʼae ke tou papitema pea mo tou liliu ko hana ʼu tisipulo.

⁵ ʼE tou toe fakaha ʼe tou fia “ ʼomai” kia Sesu moka tou fakaovi ki te kau tagata ʼafeā ʼo totatou kokelekasio ke natou tokoni mai. ʼE fakaʼaogaʼi e Sesu ia te ‘ ʼu tagata ʼaia ko he ʼu meʼa ʼofa,’ ke natou tokakaga ki tana faga ovi. (Efe. 4:7, 8, 11; Soa. 21:16; 1 Pet. 5:1-3) ʼE tonu ke tou kole tokoni kia natou. ʼE mole tonu ke tou ui ʼe natou iloʼi lelei pe ʼatatou manatu pea mo te ʼu meʼa ʼae ʼe ʼaoga kia tatou. Neʼe hoko te aluʼaga ʼaia ki te tehina ʼe higoa ko Julien. Neʼe ina ui fenei: “Neʼe au mavae ʼi te Petele he neʼe au mahaki. Pea neʼe ui mai e toku kaumeʼa ke au kole ki te kau tagata ʼafeā ke natou ʼomai ʼo fakalotomalohiʼi au. ʼI te kamata, neʼe au manatu ʼe mole ʼaoga ke ʼaʼahi au. Kae ki muli age leva, neʼe au kole age ke natou ʼomai ʼo fakalotomalohiʼi au. Pea neʼe au fiafia ʼaupito ʼi te ʼomai ʼa te ʼu tagata ʼafeā ʼo ʼaʼahi au. Neʼe ko he meʼa ʼofa taulekaleka.” ʼE hage pe te kau tagata ʼafeā fuli ko te ʼu tagata ʼafeā ʼe toko lua ʼae neʼe olo ʼo ʼaʼahi ia Julien. ʼE feala ke natou tokoni mai ke tou iloʼi “te manatu ʼa Kilisito,” ko tona fakaʼuhiga ke tou mahino pea mo faʼifaʼitakiʼi ia te manatu ʼa Kilisito pea mo tana aga. (1 Ko. 2:16; 1 Pet. 2:21) Ka natou tokoni feia mai kia tatou, ʼe ko he meʼa ʼofa ʼe taulekaleka ʼaupito.

“KOTOU TOʼO TAKU ʼAKAU ʼAMO”

6. Kotea ʼae neʼe fia ui e Sesu ʼi tana ui fenei: “Kotou toʼo taku ʼakau ʼamo”?

⁶ Neʼe ui fenei e Sesu: “Kotou toʼo taku ʼakau ʼamo.” Kotea te fakaʼuhiga ʼo ʼana palalau ʼaia? Neʼe lagi ina fia ui: “Kotou tali taku takitaki.” Pe neʼe lagi ina fia ui: “Kotou toʼo fakatahi mo au taku ʼakau ʼamo, ke tou gaue fakatahi maʼa Sehova.” Ko te manatu tafito, ʼe tonu ke tou fakahoko he gaue.

7. Ka tou lau ia Mateo 28:18-20, kotea te gaue ʼae neʼe tuku mai ke tou fakahoko? Pea kotea ʼae ʼe tou tui papau ki ai?

⁷ ʼE tou fakaha ʼe tou tali te fakaafe ʼa Sesu moka tou foaki ʼotatou maʼuli kia Sehova pea mo tou papitema. Neʼe fakaafe e Sesu ia te hahaʼi fuli ke natou ʼomai kia te ia, pea ʼe mole feala ke fakafisi ki he tahi ʼe fia tauhi moʼoni ki te ʼAtua. (Soa. 6:37, 38) ʼE maʼu e te ʼu tisipulo fuli ʼa Kilisito ia te pilivilesio ʼae ke natou fakahoko ia te gaue ʼae neʼe fakatotonu e Sehova ke fakahoko e Sesu. ʼE tou tui papau ʼe tokoni tuʼumaʼu mai anai ia Sesu ke tou fakahoko ia te gaue ʼaia.—Lau ia Mateo 28:18-20.

“KOTOU AKO MAI IA TE AU”

8-9. He koʼe neʼe mole matataku te hahaʼi masiva ʼi te fakaovi kia Sesu? Pea kotea te ʼu fehuʼi ʼe tonu ke tou fai?

⁸ Neʼe mole matataku te kau masisiva ʼi te olo kia Sesu. (Mat. 19:13, 14; Luka 7:37, 38) Kotea tona tupuʼaga? Neʼe mole hage ia Sesu ko te kau Faliseo. Neʼe agakovi ia te kau takitaki lotu pea neʼe natou fiameʼalahi. (Mat. 12:9-14) Kae neʼe agalelei ia Sesu pea mo fiamalalo. Neʼe lotolahi ia te kau Faliseo pea mo natou fiameʼameʼa ʼuhi ko ʼonatou tuʼulaga. Kae neʼe ui e Sesu ʼe mole lelei tanatou aga. Koia neʼe ina akoʼi ai ki ʼana tisipulo ke natou fiamalalo pea ke natou hage ko ni tagata faifekau. (Mat. 23:2, 6-11) Neʼe puleʼi fakamalohi e te kau Faliseo ia te hahaʼi. Koia neʼe matataku ai te hahaʼi ʼi te kau Faliseo naʼa hoko he tuʼutamaki mo kapau neʼe mole natou fia fakalogo kia natou. (Soa. 9:13, 22) Kae neʼe mole feia ia Sesu. Neʼe ina fakafimalieʼi ia te loto ʼo te hahaʼi, neʼe ina fai ni gaue pea mo ni palalau ʼe ha lelei ai tona manavaʼofa.

⁹ ʼE tou maʼuliʼi ko te ʼu akonaki ʼa Sesu? Koia ʼe lelei ke tou fai te ʼu fehuʼi ʼaeni: ‘Ko au koa ko he tahi ʼe fiamalalo pea mo agamalū? ʼE au tali lelei koa ke au fai te ʼu gaue ʼae ʼe mole faʼa maʼuhiga? ʼE au agalelei koa?’

10. Kotea ʼae neʼe fai e Sesu ke fiafia ʼana tisipulo ʼi te gaue fakatahi mo ia?

¹⁰ Neʼe faigaʼi e Sesu ke fiafia ʼana tisipulo ʼi te gaue fakatahi mo ia. Neʼe toe fiafia ʼi te akoako age kia natou te gaue ʼae neʼe tonu ke natou fai. (Luka 10:1, 19-21) Neʼe ina uga ʼana tisipulo ke natou fai age ni fehuʼi. Pea neʼe ina fia iloʼi ʼanatou manatu. (Mat. 16:13-16) Neʼe hage pe te tuputupu ʼo ʼana tisipulo ko ni fuʼu ʼakau ʼe maʼuli lelei. Neʼe natou fakalogo lelei ki te ʼu akonaki ʼae neʼe fai e Sesu, pea neʼe iloga ʼona fua ʼi ʼanatou gaue lelei.

11. Kotea te ʼu fehuʼi ʼae ʼe tonu ke tou fai?

¹¹ ʼE kotou nonofo koa mo hokotou ʼu tuʼulaga? Kapau ko ia, ʼe lelei ke kotou fai te ʼu fehuʼi ʼaeni: ‘ ʼE feafeaʼi koa taku aga ʼi toku fale gaue, peʼe ʼi toku loto fale? ʼE fiafia koa toku kiʼi famili peʼe ko ʼoku kaugā gaue ʼi te fakatahi mo au? ʼE au uga koa natou ke natou faifehuʼi mai? ʼE au fia fagono lelei koa ki ʼanatou manatu?’ ʼE mole tonu ke tou hage ko te kau Faliseo. Neʼe natou iita kia natou ʼae neʼe mole natou tali ʼanatou akonaki, pea neʼe natou gaohi koviʼi ia natou ʼae ʼe mole manatu tahi mo natou.—Mko. 3:1-6; Soa. 9:29-34.

“ ʼE KOTOU MAʼU ANAI HE FAKAFIMALIE”

12-14. He koʼe ʼe tou maʼu ia he fakalotofimalie ʼi te gaue ʼae neʼe tuku mai e Sesu ke tou fai?

¹² He koʼe ʼe tou maʼu ia he fakalotofimalie ʼi te gaue ʼae neʼe tuku mai e Sesu ke tou fakahoko? ʼE lahi ʼona tupuʼaga, kae ʼe mole tou vakaʼi fuli anai.

¹³ Ko ʼotatou pule ʼe ko te ʼu pule ʼe lelei tukupau. Ko Sehova ʼe ko totatou Pule lahi ʼaia. ʼE ko he pule ʼe agalelei, pea ʼe ina fakapale ʼana kaugana. ʼE fiafia ʼi te ʼu gaue ʼae ʼe tou fai. (Hep. 6:10) ʼE ina foaki mai ia te malohi ʼae ʼe ʼaoga ke tou fakahoko ʼaki te gaue ʼae neʼe ina tuku mai. (2 Ko. 4:7; Kal. 6:5, nota.) Ko Sesu ko totatou Hau ʼaia. Neʼe ina tuku mai he faʼifaʼitaki ʼe lelei tukupau, ke tou iloʼi ai te aga ʼae ʼe tonu ke tou fai ki te hahaʼi. (Soa. 13:15) Pea ʼe faigaʼi e te kau tagata ʼafeā ke natou faʼifaʼitakiʼi ia Sesu, ia “te tagata tauhi ovi lahi.” (Hep. 13:20; 1 Pet. 5:2) ʼE natou faiga malohi ke natou agalelei, mo lototoʼa pea mo fakalotomalohiʼi tatou, lolotoga tanatou akoʼi, mo takitaki pea mo puipui tatou.

¹⁴ Ko ʼotatou tehina mo tuagaʼane ʼe ko ʼotatou kaumeʼa lelei. ʼE mole he tahi age hahaʼi ʼe natou maʼu he ʼu kaumeʼa lelei ohage ko tatou pea mo he gaue ʼe maʼuhiga age. Kotou fakakaukauʼi age muʼa, ʼe tou maʼu te pilivilesio ʼae ke tou gaue fakatahi mo ʼotatou tehina mo tuagaʼane, pea ʼe lelei tukupau tanatou aga he ʼe natou maʼuliʼi te ʼu lao ʼa te ʼAtua. Kae ʼe mole natou manatu ʼe natou lelei age natou ʼi ʼihi. ʼE lahi ʼonatou fealagia, kae ʼe mole natou laupisiʼi pe ia natou totonu, he ʼe natou fiamalalo. ʼE mole tou kaugā gaue fakatahi pe mo natou, kae ʼe tou kaumeʼa lelei mo natou. ʼE tou feʼofaʼofani moʼoni, koia ʼe tali anai e he tahi ke mate moʼo haofaki tona tehina.

15. He koʼe ʼe maʼuhiga ia te gaue ʼae ʼe tou fakahoko?

¹⁵ Ko te gaue ʼae ʼe tou fakahoko ʼe ko te gaue ʼe maʼuhiga tokotahi. ʼE tou akoʼi ki te hahaʼi te moʼoni ʼo ʼuhiga mo Sehova, pea ʼe tou fakaha te ʼu loi ʼa te Tevolo. (Soa. 8:44) ʼE fakamafola e Satana ia he ʼu akonaki loi moʼo fakamamahiʼi te hahaʼi pea ke natou lotovaivai. Ohage la, ʼe ina fia fakalotoʼi te hahaʼi ke natou tui ʼe mole feala ke fakamolemole e Sehova ʼatatou agahala, pea ʼe mole ʼofa ia tatou. Kae ʼe ko te ʼu loi ʼaia ʼe ina fakalotovaivaiʼi te hahaʼi. Ka haʼu he tahi kia Kilisito, ʼe fakamolemole ʼana agahala. ʼE ʼofa mamahi ia Sehova ia tatou takitokotahi, pea ko te moʼoni ʼaia. (Loma 8:32, 38, 39) Koia ʼe tou fiafia ʼi te tokoni ki te hahaʼi ke natou falala kia Sehova, pea mo tou fakatokagaʼi te ʼu fetogi ʼae ʼe natou fai ʼi ʼonatou maʼuli.

TOU HAGA MAʼU HE FAKALOTOFIMALIE ʼI TATATOU GAUE FAKATAHI MO SESU

16. He koʼe ʼe mole tatau te gaue ʼae ʼe kole mai e Sesu ke tou fai pea mo te ʼu gaue fuli ake ʼae?

¹⁶ ʼE mole tatau te gaue ʼae ʼe kole mai e Sesu ke tou fai pea mo te ʼu gaue ake ʼae. Ohage la, ka ʼosi tatatou gaue fakamalama pea mo tou toe liliu ki fale, tokolahi ia tatou ʼe tou gaʼegagaʼe pea ʼe mole tou fiafia. Kae ka tou gaue maʼa Sehova pea mo Kilisito ʼe tou logoʼi ia te fiafia. Logo la ʼe tou logo gaʼegaʼe ʼi tatatou ʼosi gaue, kae ʼe tou faigaʼi pe ke tou olo ʼo fono ʼi te afiafi ʼaia. Pea ʼi te agamahani, ka tou toe liliu ki fale ʼi te hili ʼo te fono, ʼe tou logoʼi kua tou lotomalohi pea mo lotofimalie. ʼE toe feia pe moka tou olo ʼo faifakamafola, peʼe moka tou ako ia te Tohi-Tapu. Ka tou faiga ke tou fai te ʼu gaue ʼaia ʼe tou logoʼi totatou lotomalohi mo totatou lotofimalie.

17. Kotea ʼae ʼe tonu ke tou mahino ki ai? Kotea ʼae ʼe tonu ke tou tokakaga ki ai?

¹⁷ ʼE tonu ke tou mahino ʼe mole tatau ʼotatou malohi. Koia ʼe tonu ai ke tou aga fakapotopoto pea mo tou fakakaukauʼi lelei te ʼu gaue ʼae ʼe tou fia fakahoko. Ohage la, ʼe feala ke puli noa totatou malohi ʼi tatatou faiga ʼae ke tou maʼu koloa. Neʼe ʼi ai te tama tupulaga neʼe maʼu koloa ʼi te temi ʼo Sesu. Neʼe ina fai te fehuʼi ʼaeni kia Sesu: “Kotea ʼae ʼe tonu ke au fai ke au maʼu ai te maʼuli heʼe gata?” Neʼe kua fakalogo te tupulaga ʼaia ki te Lao. ʼE mahino ia neʼe ko he tagata agalelei he ʼe ui ʼi te Evaselio ʼo Maleko neʼe ‘ ʼofa ia Sesu ia ia.’ Pea neʼe tali fenei e Sesu ki ai: “Alu ʼo fakatau ʼou koloa, . . . pea ke haʼu ʼo mulimuli mai ia te au.” Neʼe fia muliʼi e te tagata ia Sesu, kae neʼe mole ina fia tuku “ ʼona koloa.” (Mko. 10:17-22) ʼI tana fai te faʼahi ʼaia, neʼe ina liʼaki ai te ʼakau ʼamo ʼae neʼe foaki age e Sesu. Pea neʼe hoko atu pe tana kaugana ki “te Paʼaga.” (Mat. 6:24) Kae ʼe feafeaʼi la mo kapau neʼe ko tatou?

18. Kotea ʼae ʼe tonu ke tou fakakaukauʼi ʼi ʼihi temi? Pea kotea tona tupuʼaga?

¹⁸ ʼE lelei ke tou fakakaukauʼi ʼi ʼihi temi pe ʼe kotea ʼae ʼe tou fakamuʼamuʼa ʼi totatou maʼuli. Kotea tona tupuʼaga? He ʼe tonu ke tou vakaʼi pe ʼe tou fakaʼaogaʼi lelei totatou malohi. Koʼeni te tala manatu ʼa te tama tupulaga ʼe higoa ko Marc: “Talu mai ni taʼu, neʼe au manatu ʼe au maʼuli fakafeʼauga. Neʼe au pionie, kae neʼe au manatu tuʼumaʼu pe ki te falā, pea ʼe feafeaʼi anai he fimalie ʼo toku maʼuli. Neʼe au faiga ke au mahino pe koʼe ʼe faigataʼa toku maʼuli. Koia neʼe au mahino ai leva, neʼe au kumi muʼa te ʼu meʼa ʼae ʼe lelei kia au, pea hoki au fakaʼaogaʼi leva toku temi mo toku malohi ʼae ʼe kei toe maʼa Sehova.” Neʼe fetogi leva e Marc tana faʼahiga manatu pea mo tona faʼahiga maʼuli ke lahi age tana gaue maʼa Sehova. ʼE toe ui fenei e Marc: “ ʼI ʼihi temi ʼe au tuʼania ʼo ʼuhiga mo te falā, kae ʼe tokoni mai ia Sehova pea mo Sesu, ke au tokaga tafito ki taku tauhi ʼae kia Sehova.”

19. He koʼe ʼe maʼuhiga ke tou taupau te faʼahiga manatu ʼae ʼe lelei?

¹⁹ Kapau ʼe tou loto ke tou haga maʼu he fakalotofimalie ʼi tatatou gaue fakatahi mo Sesu, ʼe tonu ke tou fakahoko aluʼaga ʼe tolu. ʼUluaki, ʼe tonu ke tou taupau te faʼahiga manatu ʼae ʼe lelei. ʼE tou fakahoko ia te gaue ʼa Sehova, koia ʼe tonu ke tou fakahoko ʼaki te takitaki ʼa Sehova. Ko tatou ko te kau gaue, kae ko Sehova ko totatou Pule. (Luka 17:10) Kapau ʼe tou fakahoko te gaue ʼo mulimuli ki totatou poto, ʼe faigataʼa anai ia te gaue. Tou vakaʼi he faʼifaʼitaki. Ko he pipi ʼe takitaki ʼe he tagata ʼaki tana ʼakau masila. Tatau aipe pe ʼe malohi te pipi kae kapau ʼe mole fia fakalogo ki te takitaki ʼa te tagata, ʼe feala pe ke vaivai pea ke lavea ʼi te ʼakau masila. Kae kapau ʼe tou fakahoko te gaue ʼo mulimuli ki te takitaki ʼa Sehova, ʼe tou fakahoko anai he ʼu gaue neʼe mole tou ʼamanaki ʼe tou lava fakahoko anai. Pea ʼe tou katakiʼi anai he ʼu faigataʼaʼia neʼe mole tou manatu ʼe tou lavaʼi anai. Tou manatuʼi ʼe mole feala ke taʼofi e he tahi te fakahoko e Sehova ia tona finegalo.—Loma 8:31; 1 Soa. 4:4.

20. He koʼe ʼe tou tali ia te ʼakau ʼamo ʼa Sesu?

²⁰ Lua, ʼe tonu ke tou fai te gaue he ʼe tou ʼoʼofa ia Sehova. ʼE tou loto fuli ke tou fakakololiaʼi ia tatatou Tamai ʼofa ko Sehova. ʼI te temi ʼo Sesu, tokolahi te hahaʼi neʼe natou ʼomai kia te ia ke natou maʼu he ʼu lelei. Koia neʼe natou lotomamahi ai pea mo natou liʼaki te ʼakau ʼamo ʼa Sesu. (Soa. 6:25-27, 51, 60, 66; Flp. 3:18, 19) Kae neʼe ʼi ai ʼihi neʼe natou ʼoʼofa moʼoni ʼi te ʼAtua pea mo te hahaʼi. Koia neʼe natou tali ai te ʼakau ʼamo ʼa Sesu ʼi tonatou maʼuli katoa, pea mo natou ʼamanaki ʼe natou gaue fakatahi anai mo Sesu ʼi selo. ʼE tou fia faʼifaʼitakiʼi ia natou ʼaia, koia ʼe tou tali anai ʼaki he lotofiafia ia te ʼakau ʼamo ʼa Sesu, he ʼe tou ʼoʼofa ia Sehova.

21. Ka tou lau ia Mateo 6:31-33, kotea ʼae ʼe tou tui papau ki ai ʼo ʼuhiga mo Sehova?

²¹ Tolu, ʼe tonu ke tou fakapotopoto. Neʼe tou fakatotonu ke tou foaki totatou maʼuli kia Sehova pea ke tou gaue kinakina maʼa ia. Neʼe kua fakatokaga mai e Sesu ʼe fakatagaʼi anai tatou. Kae ʼe tou tui papau ʼe foaki mai anai e Sehova ia te malohi ke tou lava tauʼi ia te ʼu faigataʼaʼia fuli. Kapau ʼe tou faʼa kataki pea ʼe tou ʼaʼasili malohi anai. (Sakp. 1:2-4) ʼE tou tui papau ʼe foaki mai anai e Sehova ia te ʼu meʼa ʼae ʼe ʼaoga kia tatou, ʼe takitaki anai tatou e Sesu, pea ʼe fakalotomalohiʼi anai tatou e ʼotatou tehina mo tuagaʼane. (Lau ia Mateo 6:31-33; Soa. 10:14; 1 Tes. 5:11) ʼE tou maʼu ia meʼa fuli ʼe ʼaoga kia tatou ke tou lava katakiʼi te ʼu faigataʼaʼia fuli.

22. He koʼe ʼe tou fiafia?

²² Ko te fafine ʼae neʼe fakamalolo e Sesu, neʼe ina logoʼi atu aipe ia tona fimalie. Pea kapau neʼe liliu ia te fafine ko he tisipulo agatonu ʼa Sesu, kua ina maʼu he fakafimalie ʼe mole hona gataʼaga. Ki tau manatu la, kotea ʼae neʼe ina fai? Kotou fakakaukauʼi age muʼa ia te toe fakapale ʼe ina maʼu mo kapau la neʼe ina tali te ʼakau ʼamo ʼa Sesu pea mo liliu ai ko tana tisipulo. Kua nofo nei mo Sesu ʼi selo. ʼE mahino ia neʼe lelei te tonu ʼae neʼe ina toʼo ke ina liʼaki ia meʼa fuli kae ina muliʼi ia Kilisito. Koia tatau aipe pe ʼe tou maʼuʼuli anai ʼo heʼe gata ʼi te kele peʼe ko selo, kae ʼe tou fiafia he neʼe tou tali ia te fakaafe ʼaeni neʼe fai mai e Sesu: “Kotou ʼomai kia te au.”