Ko He Hāofaki Mai Te Hoge!
‘ ʼE LAGI koutou feʼekeʼaki peʼe ko te faʼahiga pakupaku fea. Ko he pakupaku ʼi te meʼa kai fakalaumālie! Neʼe fakakikite te hoge ʼaia e te polofeta Hepeleo: “ ‘Koʼeni ʼe hoko mai te ʼu ʼaho, ko te ʼui ʼaia ʼa te Tuʼi ʼAliki ko Sehova, pea ʼe ʼau fakahoko anai te hoge ki te fenua, ʼe mole ko he hoge moʼi pane, pe ko he fia ʼinu ki he moʼi vai, kae ʼe ko he hoge ki te fagono ki te ʼu folafola ʼa Sehova.’ ” (Amosi 8:11) Moʼo hāofaki te hahaʼi mai te hoge fakalaumālie, ko te toko 48 kau ako ʼo te 112 kalasi ʼo te Faleako Faka Tohi-Tapu ʼo Kalaate ʼo Te Watchtower, ʼaē ʼe tuʼu ʼi Patterson, ʼi New York, ʼe ʼolo anai ki te ʼu fenua kehekehe e 19.
ʼE nātou ʼolo mo te ʼu meʼa fuli ʼaē ʼe ʼaoga ki tonatou ʼu telituale, ʼe mole ko he kanoʼi manu mo he pulapula fakasino, kae ko te ʼatamai mālama, mo te ʼu faʼahiga meʼa kua nātou māhani kiai, pea mo te ako kua nātou maʼu. Lolotoga te ʼu māhina e nima neʼe lahi tanatou ako ia te Tohi-Tapu moʼo fakamālohiʼi tonatou tui ki te gāue faka misionea ʼi te tahi ʼu telituale. ʼI te ʼaho 9 ʼo Malesio ʼo te taʼu 2002, ko te toko 5 554 ʼaē neʼe ʼōmai ki te tufa ʼo te ʼu pepa ʼa te kau misionea, neʼe nātou fakalogo fakafiafia ki te polokalama ʼaia.
Neʼe avahi te polokalama e Stephen Lett, ʼaē ʼe kau ki te Kolesi Pule ʼa te kau Fakamoʼoni ʼa Sehova. Neʼe ina fai he fakamālo makehe ki te kau fakaafe tokolahi ʼaē neʼe ʼōmai mai te ʼu potu kehekehe ʼo te malamanei. Pea neʼe ina kamata fakaʼaogaʼi te ʼu palalau ʼaenī ʼa Sesu, “Ko koutou ko te mālama ʼo te malamanei,” ki te gāue ʼa nātou ʼaē ka liliu ko he kau misionea. (Mateo 5:14, MN ) Neʼe ina fakamahino fēnei: ‘ ʼI takotou telituale ʼe koutou “faka mālamaʼi” anai te ʼu koga kehekehe ʼo te ʼu gāue fakaofoofo ʼa Sehova, ʼo koutou faka fealagia ai ki te hahaʼi faitotonu ke nātou sisio ki te matalelei ʼo Sehova mo tana ʼu fakatuʼutuʼu.’ Neʼe fakaloto mālohiʼi te kau misionea e te Tēhina ko Lett ke nātou fakaʼaogaʼi te mālama ʼo te Folafola ʼa te ʼAtua moʼo fakahāhā te fakapōʼuli ʼo te ʼu akonaki hala pea mo foaki he takitaki kia nātou ʼaē ʼe nātou kumi ia te moʼoni.
Te Aga ʼAē ʼe Tonu Ke Fai Ke Maʼu Ai He Fua
ʼI te hili ʼo te avahi ʼo te polokalama e te pelesita ʼo te fakatahi, ko Baltasar Perla, ʼe kau ki te komite ʼo te filiale ʼo Amelika, neʼe ina fai te ʼuluaki akonaki moʼo tokoni ki te kau maʼu pepa ke nātou liliu ko he kau misionea ʼe nātou maʼu he ʼu fua lelei. Neʼe palalau ki te kupu tāfito ʼaenī “Koutou Faʼa Kātaki Pea Mo Koutou Mālohi, Pea Mo Fai He ʼu Gāue.” (1 Fakamatala 28:20) Neʼe fakatoʼo age kia Salomone, te Hau ʼo te Iselaele ʼāfea, ia te gāue faigataʼa ke ina fai kae neʼe mole heʼeki ina fai ki muʼa atu—ko te laga ʼo te fale lotu ʼi Selusalemi. Neʼe fakahoko e Salomone ia te faʼahi ʼaia, pea ʼaki te lagolago ʼa Sehova neʼe fakaʼosi te laga ʼo te fale lotu. ʼI tana fakapipiki te ako ʼaia ki te kau ako, neʼe ʼui fēnei e te Tēhina ko Perla: ‘Neʼe fakatoʼo atu kia koutou te gāue foʼou, ke koutou liliu ko he kau misionea, pea ʼe tonu ai ke koutou faʼa kātaki mo mālohi.’ ʼE mahino ia ʼe loto fīmālie te kau ako ʼi tanatou ʼiloʼi papau ʼaē ʼe mole lītuʼa anai ia Sehova kia nātou mo kapau ʼe nātou nofo ōvi kia te ia. Ko te ʼu palalau fakaʼosi ʼa te Tēhina ko Perla neʼe malave ki te ʼu loto ʼo nātou ʼaē neʼe kau ki te fono: ‘ ʼI tokotou ʼuhiga misionea ʼe lahi te gāue ʼe koutou lava fakahoko. Ko te kau misionea ʼaē neʼe nātou ʼaumai te moʼoni ki toku famili pea mo ʼau!’
Ko Samuel Herd, ʼe kau ki te Kolesi Pule, neʼe ina fai te akonaki ʼo fakatafito ki te kupu tāfito ʼaenī “Koutou falala kia Sehova ke fua lelei takotou gāue.” ʼE hū te kau ako ki te gāue faka misionea, pea ʼe fakalogo tāfito te fua lelei ʼo tanatou gāue ki tanatou ʼu felogoi mo Sehova. Neʼe tokoniʼi fēnei nātou e te Tēhina ko Herd: ‘Kua lahi te ʼatamai mālama ʼo ʼuhiga mo te Tohi-Tapu kua koutou maʼu lolotoga takotou ako ʼi Kalaate. Neʼe koutou maʼu fakafiafia. Kae ʼi te temi nei, ke fua lelei moʼoni kia koutou, ʼe koutou kamata foaki anai te ʼu meʼa ʼaē neʼe koutou ako.’ (Gaue 20:35) ʼE lahi te ʼu faigamālie ʼe maʼu anai e te kau misionea moʼo fakahoko ʼo te faʼahi ʼaia, ʼi tanatou ‘foaki ia nātou totonu’ maʼa te hahaʼi.—Filipe 2:17.
Koteā te tokoni fakaʼosi ʼaē neʼe fai e te kau faiako ki te kau ako? Neʼe fakatafito te kupu tāfito ʼo te akonaki ʼa Mark Noumair kia Lute 3:18, “Koutou Nonofo Maʼu ʼo Aʼu Ki Takotou Sio Ki Tona Ikuʼaga.” ʼI tana talanoa ki te faʼifaʼitaki ʼo Naomi mo Lute, neʼe fakaloto mālohi e te tagata faiakonaki ia te kau maʼu pepa ke nātou falala katoa ki te ʼu fakatuʼutuʼu ʼa te kautahi fakakelekele ʼa te ʼAtua pea mo fakaʼapaʼapa ki te pule faka teokalatike. ʼI te ʼu palalau ʼaē neʼe malave ki te loto ʼo te kau ako, neʼe ʼui fēnei e te Tēhina ko Noumair: ‘ ʼE ʼi ai anai he ʼu lakaga ʼe mole koutou mahino ai pe koʼe ʼe malave kia koutou te faʼahiga tonu neʼe fai, peʼe lagi ʼe koutou logoʼi mālohi ʼe ʼi ai te ʼu meʼa ʼe mole tonu ke fai feiā. Koteā anai ka koutou fai? ʼE koutou fai anai koa he ʼu puleʼaki ʼa koutou totonu, peʼe koutou “nonofo maʼu” anai, ʼo koutou falala ki te takitaki ʼa te ʼAtua, koteʼuhi ʼaki te temi, ʼe ina fakatupu anai he ʼu fua lelei.’ (Loma 8:28) Ko te tokoni ʼaē ke nātou ‘tuku katoa tanatou fakakaukau ki te ʼu meʼa ʼo te Puleʼaga, mo haga sio ki te ʼu meʼa ʼaē ʼe fai e te kautahi ʼa Sehova kae mole nātou sioʼi he ʼu hahaʼi,’ neʼe ko he tokoni ʼaoga kia nātou ʼaē ka liliu ko he kau misionea ʼi tonatou telituale foʼou.
Ko Wallace Liverance, ʼaē neʼe misionea mo ia pea ʼe kau nei ki te kau faiako ʼi Kalaate, neʼe ina fai te akonaki fakaʼosi ʼo te ʼu akonaki ʼaē neʼe avahi ʼaki te polokalama. Ko tana akonaki neʼe fakatafito ki te kupu tāfito ʼaenī “Koutou Pipiki Maʼu Ki Takotou Fakatuʼutuʼu, Koutou Nonofo ʼi Te Selevisi ʼa Te ʼAtua.” Neʼe ina fakahā neʼe kua mahino ki te polofeta ko Taniela ʼaki te tō ʼo Papiloni pea mo te meʼa ʼaē neʼe fakakikite e Selemia, kua ōvi mai te faka ʼāteaina ʼo te kau Iselaele mai tanatou ʼaunofo. (Selemia 25:11; Taniela 9:2) Neʼe mahino ia Taniela ki te fakaʼaluʼalu ʼo te temi e Sehova, pea ko te faʼahi ʼaia neʼe tokoni kia ia ke haga sio maʼu ki te hoholo ʼo te fakatuʼutuʼu ʼa te ʼAtua. Kae ki te kau Iselaele ʼo te temi ʼo Asea neʼe nātou ʼui fēnei: “ ʼE mole heʼeki hoko mai te temi.” (Asea 1:2) Neʼe mole kei nātou mahino ki te ʼu temi ʼaē neʼe nātou maʼuʼuli ai, kae neʼe nātou tokakaga pe ki tonatou fīmālie pea mo tonatou maʼuli faka feʼauga, pea neʼe nātou lītuʼa ki te gāue ʼaē neʼe tupu ai tonatou faka ʼāteaina mai Papiloni, ko te toe laga ʼo te fale lotu. Neʼe fakaʼosi fēnei e te Tēhina ko Liverance: “Koutou tapiki maʼu ʼo koutou manatuʼi ʼi te temi fuli pe ia te fakatuʼutuʼu ʼa Sehova.”
Ko te tagata faiako ʼi Kalaate ko Lawrence Bowen neʼe talanoa ki te akonaki ʼaenī “ ʼE Tapuakina e Sehova Ia Nātou ʼAē ʼe Nātou Fakaʼaogaʼi Ia Te Folafola Maʼuli.” (Hepeleo 4:12) Neʼe palalau ia te koga ʼaia ki te ʼu meʼa ʼaē neʼe hoko ki te fai faka mafola ʼo te kau ako, ʼo ina faka maʼuhigaʼi te tapuakina e Sehova ia nātou ʼaē ʼe nātou fakaʼaogaʼi ia te Tohi-Tapu mokā nātou fai faka mafola pea mo faiako. Neʼe palalau te tagata faiakonaki ki te faʼifaʼitaki lelei ʼaē neʼe tuku e Sesu Kilisito ki te kau minisi fuli ʼa te ʼAtua: ‘Neʼe ʼui fakahagatonu e Sesu neʼe mole ina akoʼi ki te hahaʼi he ʼu meʼa ʼa ia totonu, kae neʼe palalau ki te Folafola ʼa te ʼAtua.’ Neʼe sisio ai te hahaʼi faitotonu ki te moʼoni pea neʼe nātou tali fakalelei. (Soane 7:16, 17) ʼE toe feiā pe ʼi te temi nei.
ʼE Teuteuʼi e Te Ako ʼi Kalaate Te Kau Ako Moʼo Fai Te ʼu Gāue Lelei Fuli Pe
Neʼe hoa mai leva ia te ʼu tēhina kua fualoa tanatou kau ki te famili ʼo te Petele, ko Richard Abrahamson mo Patrick LaFranca, neʼe nā fakafehuʼi te toko ono misionea ʼe nātou lolotoga kau nei ʼi te ʼu faʼahiga gāue kehekehe ʼo te temi katoa. Neʼe lotomālohi ia te kau maʼu pepa ʼo te 112 kalasi ʼi tanatou logo ko te toko ono ʼaia, hili kiai ni ʼu taʼu, ʼe kei nātou fakaʼaogaʼi te ʼu meʼa ʼaē neʼe nātou ako ʼi Kalaate moʼo fai te ʼu ako ʼo te Tohi-Tapu, ki te ʼu faʼahiga kumi, pea mo te palalau ki te hahaʼi.
Ko Theodore Jaracz, ʼe kau ki te Kolesi Pule, neʼe ina fai te akonaki tāfito ʼo te polokalama. Ko tona kupu tāfito “Te Meʼa ʼAē ʼe Fai ʼAki Te Kātakiʼi ʼo Te Fehiʼa ʼa Satana.” Lolotoga te ʼu māhina e nima kua hili, neʼe maʼuʼuli te kau ako ʼi te nofoʼaga fīmālie pea mo faka teokalatike. Kae ohage ko tona faka maʼuhigaʼi lolotoga tanatou ako, ʼe tou maʼuʼuli ʼi te mālama ʼo te fili. ʼE tauʼi te hahaʼi ʼa Sehova ʼi te malamanei katoa. (Mateo 24:9) ʼAki te ʼu tuʼuga fakamatala faka Tohi-Tapu neʼe ina fakaʼaogaʼi, neʼe fakatokagaʼi e te Tēhina ko Jaracz ‘ ʼe makehe totatou tauʼi e te Tevolo. ʼE tonu ai ke tou fakamālohiʼi tatatou ʼu felogoi mo Sehova pea mo tatou totonu mokā tou tau mo he ʼu ʼahiʼahi.’ (Sopo 1:8; Taniela 6:4; Soane 15:20; Apokalipesi 12:12, 17) Neʼe fakaʼosi e te Tēhina ko Jaracz ʼo ina ʼui, logope te fehiʼa hoholo ʼaē ʼe fai ki te hahaʼi ʼa te ʼAtua, kae ohage ko tona ʼui e Isaia 54:17, ‘ ʼe mole ʼi ai he ʼu mahafu tau ʼe faʼu moʼo fakafeagai kia tatou ʼe lava anai. ʼE fai anai e Sehova he puleʼaki moʼo hāofaki tatou ʼi tona lakaga tonu ʼo mulimuli ki tona loto.’
ʼE mahino ia, ko te kau maʼu pepa ʼo te 112 kalasi ʼo Kalaate, ʼaē kua “teuteu lelei,” ʼe nātou faiga lahi anai ke nātou tokoni ki te hahaʼi ʼaē ʼe hoge ʼi te meʼa kai fakalaumālie ʼi te ʼu fenua ʼaē ka nātou gāue ai. (2 Timoteo 3:16, 17, MN ) ʼE tou fakatalitali ke tou maʼu he ʼu fakamatala ʼo ʼuhiga mo tanatou ʼave te logo ʼaē ʼe ina fafaga te hahaʼi ʼo te ʼu fenua ʼaia.
[Talanoa ʼo te pasina 23]
KO TE ʼU AGAAGA ʼO TE KALASI
ʼE nātou ʼōmai mai te ʼu fenua e: 6
ʼE nātou ʼolo ki te ʼu fenua e: 19
Ko te kau ako e: 48
Te fakafuafua ʼo tonatou ʼu taʼu: 33,2
Te fakafuafua ʼo tonatou ʼu taʼu ʼi te moʼoni: 15,7
Te fakafuafua ʼo tonatou ʼu taʼu ʼi te gāue temi katoa: 12,2
[Paki ʼo te pasina 24]
Ko Te 112 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.