ʼE Lotolelei Te Hahaʼi ʼo Nātou ’Ōmai Ki Kalaate

ʼE FAKATUʼUTUʼU te Faleako Faka Tohi-Tapu ʼo Kalaate ʼo Te Sosiete Watchtower ke ina akoʼi te hahaʼi tagata mo fafine kua papitema ke nātou ʼolo ʼo misionea ʼi he tahi ʼu fenua. Ko ai ʼaē ʼe lava ʼōmai ki Kalaate? Ko te hahaʼi ʼaē ʼe nātou lotolelei ki te faʼahi ʼaia. (Pesalemo 110:3) Pea neʼe hoko te faʼahi ʼaia ʼi te ʼaho 8 ʼo Sepetepeli 2001, he neʼe foaki ai te ʼu pepa ʼo te 111 kalasi ʼo Kalaate.

Ko ʼihi ia nātou ʼaia neʼe kua nātou lotolelei ke nātou mavae ʼi tonatou ʼu famili, mo tonatou ʼu kaumeʼa pea mo tonatou ʼu fenua, ke nātou ʼolo ki te ʼu koga meʼa ʼaē ʼe ʼaoga lahi ai ke tala te logo. ʼI tanatou fai te faʼahi ʼaia, neʼe nātou vakaʼi ai peʼe nātou lava maʼuʼuli ʼi he faʼahi pe ʼe nātou ʼolo kiai. Ohage la moʼo faka mafola te logo lelei ʼo te Puleʼaga, ko Richer pea mo Nathalie neʼe ʼolo ki Polivia, ko Todd mo Michelle ki te République Dominicaine, pea ko David mo Monique ki te fenua ʼo Asia. Ko ʼihi kau ako neʼe kua nātou faka mafola ʼi Nicaragua, mo Équateur, pea mo Alepania.

Neʼe fakaloto mālohiʼi ia Christy ke ina ako te lea faka Sepania ʼi te faleako, moʼo tokoni kia ia ki te ʼu taʼu e lua ʼaē ka nofo ai ʼi Équateur ʼi muʼa ʼo tana ʼohoana. Ko ʼihi ʼi te ʼu fenua ʼaē ʼe nātou nonofo ai, neʼe nātou kau ki te ʼu kokelekasio ʼo te tahi ʼu lea. ʼI tanā felāveʼi mo te ʼu faigataʼa kehekehe, neʼe lotolelei e Saul pea mo Priscilla ke nā gāue mālohi moʼo hikihiki tanā Fakapilitānia ʼi muʼa ʼo tanā ʼolo ki te ako.

Ko te ʼu vāhaʼa e 20 ʼo te ako ʼa te kau misionea neʼe mata nounou. Kua hoko mai leva te ʼaho ʼaē ʼe tufa ai te ʼu pepa ʼo te kau misionea, ʼo kau fakatahi ai tonatou ʼu kaumeʼa pea mo tonatou ʼu famili, pea ko te kau ako neʼe nātou fakalogo ki te ʼu tokoni pea mo te ʼu fakaloto mālohi ʼaē neʼe fai age.

Ko te pelesita ʼo te polokalama ʼaia neʼe ko Theodore Jaracz, ʼaē neʼe maʼu tona pepa misionea ʼi te fitu kalasi ʼo te Faleako ʼo Kalaate, pea ʼe kau ʼi te Kolesi Pule ʼa te kau Fakamoʼoni ʼa Sehova. Neʼe ina fakahā lelei ʼi tana ʼu ʼuluaki palalau ʼi totatou ʼuhiga kautahi, ʼe mole tonu ke galo ia tatou te fakatuʼutuʼu ʼo te ako ʼaē ʼe fai ki te kau ako ʼo Kalaate, ʼaē ko te faka mafola ʼo te logo lelei ʼo te Puleʼaga ki te kele katoa. (Maleko 13:10) ʼE akoʼi e Kalaate te kau ako popoto moʼo fai te gāue fai faka mafola ʼaia ʼi te tahi ʼu fenua pea mo te ʼu potu ʼo te malamanei ʼaē ʼe ʼaoga tāfito kiai te kau misionea. Neʼe fakatotonu e te Tēhina ko Jaracz ki te kau ako ke nātou fakaʼaogaʼi lelei tanatou ako ʼaē ʼi Kalaate, heʼe kua nātou kau ʼi te temi nei ʼi te kau misionea ʼaē ʼe gāue ʼi te ʼu fenua e 19.

Ko Te ʼu Tokoni ʼAoga Ki Te Kau Misionea Foʼou

Neʼe lahi te ʼu akonaki neʼe fai. Ko William Van De Wall, ko te tēhina ʼe kau ʼi te Komite ʼo te Filiale ʼo Amelika, neʼe palalau ki te kupu tāfito ʼaenī “Ko Te Faʼafai ʼa Te Kau Misionea—Ko He Fakaʼiloga ʼo Te Kau Kilisitiano Moʼoni.” Neʼe talanoa tāfito ki te gāue ʼaē ko te fai ʼo “he u tisipulo,” ohage ko tona tuʼu ia Mateo 28:19, 20, pea mo fakaloto mālohiʼi fēnei te kau ako: “Koutou faʼifaʼitakiʼi ia Sesu, ʼaē neʼe faʼafai pea mo fiafia ʼi tana gāue misionea.” Moʼo tokoni ki te kau misionea foʼou ʼaia ke nātou faʼafai ʼi tanatou gāue misionea, neʼe ina tokoniʼi fēnei nātou: “Koutou fai hakotou polokalama lelei, koutou fai tuʼumaʼu takotou ʼu ako takitokotahi, koutou nonofo ʼalaʼala ʼo ʼuhiga mo te ʼu fakatuʼutuʼu faka teokalatike; pea ke koutou manatuʼi tuʼumaʼu te ʼu tupuʼaga ʼo takotou gāue ʼaia.”

Neʼe hoa kiai te tēhina ko Guy Pierce, ʼe kau ʼi te Kolesi Pule. Neʼe fēnei te kupu tāfito ʼo tana akonaki “Koutou Haga Fakatuputupu ‘Tokotou ʼAtamai.’ ” (Loma 12:1) Neʼe ina foaki te tokoni ʼe ʼaoga ki te kau misionea ʼo ina fakaloto mālohiʼi nātou ke nātou fakaʼaogaʼi tonatou ʼu fealagia moʼo fai ʼo he ʼu tonu ʼe lelei. Neʼe ina ʼui fēnei: “Koutou metitasio pe koteā ʼaē ʼe ʼui atu e Sehova ʼi tana Folafola. Ko te faʼahi ʼaia ʼe ina hāofaki anai koutou.” (Tāʼaga Lea 2:11) Neʼe toe fakaloto mālohiʼi e te Tēhina ko Pierce te kalasi ʼaia ke ʼaua naʼa nātou fia pipiki fau ki hanatou ʼu tonu, koteʼuhi ʼe mole nātou faka fealagia anai ki tonatou “ ʼatamai” ke gāue lelei. ʼE mahino ia, ko te ʼu fakamanatu ʼaoga ʼaia, ʼe tokoni anai ki te kau misionea.

Pea neʼe fakaafe leva e te pelesita ia Lawrence Bowen ʼaē ʼe kau ki te kau faiako ʼo Kalaate, pea neʼe ina fai te akonaki ʼaenī “Koutou Fakatotonu Ke Mole Koutou ʼIloʼi He Meʼa.” Neʼe ina fakamahino ko Paulo ʼi tana gāue misionea ʼi Kolonito, “neʼe [ina] fakatotonu ke mole ina ʼiloʼi he meʼa . . . gata pe ia Sesu Kilisito ia ia ʼaē neʼe haʼi ki te pou.” (1 Kolonito 2:2, MN ) Neʼe mahino kia Paulo ko te mālohi lahi ʼaupito ʼo te ʼatulaulau, ia te laumālie maʼoniʼoni, ʼe lagolago ki te logo ʼaē ʼe tuʼu ʼi te Tohi-Tapu, ʼaē ko te faka lākatonuʼi ʼo te pule faʼitaliha ʼa Sehova ʼaki te Hāko ʼaē neʼe fakapapauʼi mai. (Senesi 3:15) Neʼe fakaloto mālohiʼi te kau ako maʼu pepa e toko 48 ke nātou hage ko Paulo pea mo Timoteo, pea ke nātou mulimuli ki “te faʼifaʼitaki ʼo te ʼu folafola” ke fua lelei tanatou gāue misionea.—2 Timoteo 1:13, MN.

ʼI te ʼu ʼuluaki akonaki, koʼeni leva te kupu tāfito ʼo te akonaki fakaʼosi “Koutou Leleiʼia Tokotou Pilivilesio, Ko Te Meʼa ʼOfa Mai Te ʼAtua.” Ko te sikalaipe ʼo te Faleako ʼo Kalaate ko Wallace Liverance, neʼe ina tokoniʼi te kau maʼu pepa ke nātou leleiʼia te ʼu pilivilesio ʼaia heʼe ko te fakamoʼoni ʼo te ʼofa makehe ʼo te ʼAtua, kae mole ko he meʼa neʼe nātou maʼu feiā. ʼI tana palalau ki te faʼifaʼitaki ʼa te ʼapositolo ko Paulo, neʼe ʼui fēnei e te Tēhina ko Liverance: “Neʼe mole fili e Sehova ia Paulo ke liliu ko tana ʼapositolo ʼo te ʼu puleʼaga ʼuhi he neʼe gāue lelei, ke feala ai hatatou ʼui neʼe tāu mo Paulo ke foaki age ki ai te pilivilesio ʼaia. Pea neʼe mole fili ia ia ʼuhi he kua matuʼa peʼe poto. ʼI te sio fakatagata, neʼe tonu ke foaki te pilivilesio ʼaia kia Palenapasi. Pea neʼe mole fai te fili ʼuhi ko he fealagia ʼa Paulo; koteʼuhi neʼe lagi poto palalau age ia Apolose ia Paulo. Neʼe ko he fakamoʼoni ia ʼo te ʼofa makehe ʼo te ʼAtua.” (Efeso 3:7, 8) Neʼe fakaloto mālohiʼi e te Tēhina ko Liverance te kau maʼu pepa ke nātou fakaʼaogaʼi tonatou ʼu meʼa ʼofa, peʼe ko tanatou pilivilesio misionea, moʼo tokoni ki te hahaʼi ke nātou liliu ko te ʼu kaumeʼa ʼo te ʼAtua pea mo nātou maʼu “te meaofa o te Atua e ko te mauli heegata ia Kilisito Sesu totatou Aliki.”—Loma 6:23.

Pea ko te tahi tēhina faiako ʼo Kalaate ko Mark Noumair, neʼe ina takitaki te fai palalau mo te kau ako ʼaki te akonaki ʼaenī “Ko Te Teuteu ʼe Kita Maʼu Ai He ʼu Fua Lelei.” (Tāʼaga Lea 21:5) ʼE hā mai neʼe fua lelei te ʼu gāue, he neʼe teuteu lelei te kaugā fai faka mafola ki te minisitelio, tāfito la mokā ina teuteuʼi tona loto, pea ʼe tokaga moʼoni anai ki te hahaʼi. ʼE mole lotolotolua anai ki te ʼu palalau ʼaē ka ina fai. Kae ʼe palalau anai pea mo fai te ʼu meʼa ʼaē ʼe ʼaoga moʼo tokoni ki te hahaʼi ʼi te faʼahi fakalaumālie. “ ʼE fua lelei anai takotou gāue misionea mo kapau ʼe koutou fai te faʼahi ʼaia,” ko te ʼui ʼaia ʼa te Tēhina ko Noumair, ʼo ina fakamatala te ʼu fua lelei ʼo tana gāue misionea ʼi Afelika.

Ko Te Gāue Misionea—ʼe Ko He Gāue Fakafiafia

Neʼe fakafehuʼi e Ralph Walls pea mo Charles Woody te kau misionea kua māhani, ʼaē neʼe nātou kau ʼi te ako makehe ʼaē neʼe fai ʼi te Faleako ʼo Patterson. Neʼe fakahā lelei ʼi te ʼu fakafehuʼi, ʼe maʼu te fiafia ʼi te gāue misionea mokā kita ʼofa ki te hahaʼi. Neʼe ko he meʼa fakaloto fīmālie ki te kau ako pea mo tonatou ʼu famili pea mo tonatou ʼu kaumeʼa, ia te fakalogo ki te ʼu fakamatala ʼaia ʼa te kau misionea pea mo tanatou ʼui ʼaē, he koʼe ko te gāue misionea ʼe ko he gāue fakafiafia.

Ko John E. Barr ʼaē ʼe kau ʼi te Kolesi Pule, neʼe ina fai te akonaki tāfito ʼaē ʼe fēnei tona kupu tāfito “Koutou Hiva Kia Sehova ʼAki He Hiva Foʼou.” (Isaia 42:10) Neʼe ʼui e te Tēhina ko Barr ko te kupusiga palalau “ko he hiva foʼou” ʼe maʼu tuʼa hiva ʼi te Tohi-Tapu. Neʼe ina fehuʼi fēnei, “Koteā te hiva foʼou ʼaia?” Pea neʼe ina tali fēnei: “ ʼE ʼasi mai ʼi te ʼu vaega ki muʼa atu ʼe fai te hiva foʼou koteʼuhi neʼe fai e Sehova tana ʼu gāue foʼou ʼo ʼuhiga mo tona pule faʼitaliha.” Neʼe ina fakaloto mālohiʼi te kau ako ke nātou kau fakatahi ʼo haga hivaʼi te ʼu fakavikiviki ʼo te mālo ʼo te Puleʼaga ʼo te ʼAtua ʼi te ʼu nima ʼo te Hau Faka Mesianike ko Sesu Kilisito. Neʼe fakahā e te Tēhina ko Barr ko te ako ʼaē neʼe fai kia nātou ʼi Kalaate ʼe tokoni anai kia nātou ke toe lelei age tanatou mahino ki te ʼu faʼahi kehekehe ʼo te “hiva foʼou” ʼaia. “Neʼe fakahā lelei e te ako ʼaia ia te maʼuhiga ke koutou ‘hiva’ te ʼu fakavikiviki kia Sehova mo tokotou ʼu tēhina mo tuagaʼane ʼi te ʼu potu ʼaē ʼe koutou ʼolo kiai, ʼo koutou fakatuputupu tuʼumaʼu te logo tahi mo ʼihi ʼo tokotou telituale.”

ʼI te ʼosi fakatoʼo ʼo te ʼu pepa ʼa te kau misionea, neʼe lau e te tēhina ʼo te kalasi te tohi moʼo fakamālo lahi ki te ako ʼaē neʼe nātou maʼu ʼi Kalaate.

ʼE feala koa ke koutou fakalahi takotou gāue ki te ʼAtua pea mo fai ke fua lelei age? Kapau koia, pea koutou fakaʼaogaʼi te ʼu tokoni ʼaē neʼe fai ki te kau misionea ʼaia. Neʼe ko te faʼahi ʼaia ʼaē neʼe ina faka fealagia ke nātou kau ki te gāue misionea. ʼE tou fiafia ʼaupito mokā tou lotolelei ke tou kau ki te gāue ʼa te ʼAtua.—Isaia 6:8.

[Talanoa ʼo te pasina 25]

KO TE ʼU AGAAGA ʼO TE KALASI

ʼE nātou ʼōmai mai te ʼu fenua e: 10

ʼE nātou ʼolo ki te ʼu fenua e: 19

Ko te kau ako e: 48

Te fakafuafua ʼo tonatou ʼu taʼu: 33,2

Te fakafuafua ʼo tonatou ʼu taʼu ʼi te moʼoni: 16,8

Te fakafuafua ʼo tonatou ʼu taʼu ʼi te gāue temi katoa: 12,6

[Talanoa ʼo te pasina 26]

Ko Te 111 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower

ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.