Te Faleako ʼo Kalaate Kua Taʼu 60 Te Fai ʼo Te Ako Ki Te Gāue Faka Misionea
“NEʼE lahi tamatou ako te Tohi-Tapu, koia kua mātou ōvi ʼaupito kia Sehova pea kua lahi age te ʼu meʼa ʼaē kua mātou ʼiloʼi ʼo ʼuhiga mo tana kautahi. Neʼe teuteuʼi ai mātou ki te maʼuli ʼi te ʼu fenua ʼaē ka hinoʼi ia mātou kiai.” Ko te ʼu palalau ʼaia neʼe fai e te tuagaʼane ʼo te ʼuluaki kalasi, moʼo fakamatala te ako ʼaē neʼe kau kiai ʼi te Faleako Faka Tohi-Tapu ʼo Kalaate ʼo te Watchtower. Talu mai tona avahi, kua hili kiai taʼu e 60, ʼe fekauʼi e te Faleako ʼo Kalaate ni kau misionea. ʼI te ʼaho 8 ʼo Malesio 2003, neʼe foaki ai te ʼu pepa ʼo te 114 kalasi ʼi te Faleako ʼo Patterson ʼi New York. Ko hahaʼi e toko 6 404 neʼe nātou fakatahitahi ʼi te foʼi fale ʼaia pea mo ʼihi neʼe nātou mulimuli fakalelei ki te polokalama ʼi te televisio, ʼaē neʼe fai ai te ʼu akonaki, mo te ʼu fakafehuʼi, pea mo te ʼu fai palalau.
Ko Theodore Jaracz, ʼaē ʼe kau ki te Kolesi Pule, neʼe ko ia te pelesita. Moʼo kamata, neʼe ina fakatokagaʼi ko te hahaʼi ʼaē neʼe kau ki te fakatahi ʼaia, neʼe ʼōmai mai te ʼu fenua kehekehe, ko ʼihi neʼe ʼōmai mai Asia, mo Caraïbes, mo te Lotomalie pea mo te Potu Saute ʼo Amelika, pea mo te Eulopa. Neʼe fakatafito e te Tēhina ko Jaracz tana ʼu palalau kia 2 Timoteo 4:5, pea neʼe ina fakahā lelei te fakatuʼutuʼu tāfito ʼo te ako ki te gāue faka misionea ʼo Kalaate—ke “fakahoko te gāue ʼa te tagata faka mafola evaselio.” ʼE fakamoʼoni e te kau misionea ki te moʼoni, ʼo nātou akoʼi te Tohi-Tapu ki te hahaʼi.
Te Ako Fakamuli ʼAē Neʼe Fai Ki Te Kau Ako
Moʼo kamata ʼo te ʼu akonaki nounou ʼaē neʼe fai, ko John Larson ʼaē ʼe kau ki te Komite ʼo Te Filiale ʼo Amelika, neʼe talanoa ʼo ʼuhiga mo te kupu tāfito pea mo fakaloto mālohi ʼaenī: “Kapau ʼe Kau Te ʼAtua Mo Tatou, Pea Ko Ai ʼAē Ka Fakafeagai Mai Kia Tatou?” (Loma 8:31) Neʼe fakamahino e te tēhina ki te kau ako, ia te tafitoʼaga faka Tohi-Tapu ʼaē ke nātou falala katoa ki te mālohi ʼa Sehova ke tokoni kia nātou, ke nātou tauʼi te ʼu faigataʼaʼia fuli pe ʼaē ʼe feala ke hoko ʼi tonatou telituale. ʼAki ia Loma 8:38, 39, neʼe fakatotonu e te Tēhina ko Larson ki te kau ako: “Koutou ʼai hakotou kiʼi tuʼu pea mo koutou fakakaukauʼi te mālohi ʼaē ʼe fakaʼaogaʼi e te ʼAtua maʼa koutou, pea mo koutou manatuʼi ʼe mole he meʼa ʼe feala ke ina fakagata te tokaga ʼa Sehova kia koutou.”
Neʼe hoa kia ia ia Guy Pierce, ʼe kau ʼi te Kolesi Pule. Neʼe ina filifili te kupu tāfito: “Ke Fiafia Tuʼumaʼu Tokotou ʼu Mata!” (Luka 10:23) Neʼe ina fakamahino ko te fiafia moʼoni ʼe pipiki kiai te ʼiloʼi ʼo Sehova pea mo te mahino ki tana fakatuʼutuʼu heʼegata, pea mo te sio ʼaē ki te fakahoko ʼo te ʼu lea faka polofeta ʼo te Tohi-Tapu. Tatau aipe pe ko te telituale fea ʼaē ʼe nātou ʼolo kiai, kae ʼe feala ke taupau e te kau ako he fiafia moʼoni mo kapau ʼe nātou taupau ke fiafia tuʼumaʼu tonatou ʼu mata. Ko te Tēhina ko Pierce neʼe ina fakaloto mālohiʼi te kau maʼu pepa ke nātou metitasio loloto ʼo ʼuhiga mo te agalelei ʼa Sehova, pea ke maʼuhiga tuʼumaʼu ʼi tonatou ʼatamai pea mo tonatou loto te fai ʼo Tona finegalo. (Pesalemo 77:12) Kapau ʼe nātou maʼu he manatu ʼe lelei, pea ʼe feala ke kātakiʼi e te kau ako te ʼu fihifihia fuli pe ʼaē ka hoko kia nātou.
Pea moʼo fakaʼosi neʼe ko he ʼu palalau fakaloto mālohi ʼaē neʼe fai e te ʼu tagata faiako e lua ʼaē neʼe nā akoako nātou ʼi te ʼaho fuli pe. ʼI te kupu tāfito ʼo tana akonaki, neʼe fehuʼi fēnei e te tēhina ko Lawrence Bowen “ ʼE Koutou Faiga Koa Ke Koutou ʼIloa?” Tokolahi te hahaʼi ʼe nātou manatu ko te kolōlia ʼe pipiki ki tonatou fakavikiviki, mo tonatou fakaʼapaʼapaʼi pea mo tonatou faka maʼuhigaʼi. Kae neʼe mahino ki te tagata fai pesalemo ko Asafe te kolōlia moʼoni—te koloā maʼuhiga ʼaē ke tou maʼu he ʼu felogoi lelei mo Sehova. (Pesalemo 73:24, 25) Ko te kau ako ʼaē neʼe maʼu tanatou ʼu pepa, neʼe fakaloto mālohiʼi nātou ke nātou taupau he ʼu felogoi lelei mo Sehova ʼo nātou haga fai he ako loloto ʼa te Tohi-Tapu. Neʼe “fakaamuʼage te kau aselo ke natou fakasiosio” te ʼu manatu ʼo ʼuhiga mo te fakahoko ʼo te fakatuʼutuʼu ʼa Sehova ʼaki ia Kilisito. (1 Petelo 1:12) ʼE nātou fia ako he ʼu tuʼuga meʼa ʼo ʼuhiga mo tanatou Tāmai ke feala ke hā tona kolōlia. Pea neʼe fakaloto mālohi e te tēhina te kau ako ke nātou faka kolōlia ia Sehova ʼi tanatou telituale misionea, ʼo nātou tokoni ki te hahaʼi ke nātou maʼu te koloā maʼuhiga ʼaia.
Ko te sikalaipe ʼo te faleako, ia Wallace Liverance, neʼe ina fakaʼosi te ʼu akonaki ʼaki te akonaki ʼaē ko tona kupu tāfito “Tou Palalau Ki Te Poto ʼo Te ʼAtua ʼAē Ko He Meʼa Fakalilo Tapu.” (1 Kolonito 2:7) Koteā te poto fakaʼatua ʼaia ʼaē neʼe talanoa kiai te ʼapositolo ko Paulo lolotoga tana gāue faka misionea? Ko te poto ʼa Sehova pea mo te ʼu meʼa mālohi ʼaē ka ina fakaʼaogaʼi moʼo fakatuʼu te tokalelei pea mo te logo tahi ʼi te malamanei katoa. Ko te poto ʼaia ʼe faka ʼuhiga tāfito kia Sesu. Neʼe mole faka mafola e Paulo he evaselio faka sosiale, kae neʼe tokoni ia ki te hahaʼi ke nātou ʼiloʼi peʼe fetogi feafeaʼi anai e te ʼAtua te ʼu fua kovi ʼo te agahala ʼo Atama. (Efeso 3:8, 9) Neʼe fakaloto mālohiʼi fēnei e te tēhina: “Koutou fakaʼaogaʼi takotou pilivilesio gāue ohage ko tona fai e Paulo, heʼe kia ia ko tana gāue faka misionea neʼe ko he faigamālie moʼo tokoni ki te hahaʼi ke nātou sio peʼe fakahoko feafeaʼi anai e Sehova tana fakatuʼutuʼu.”
Neʼe hoa kia ia ia Mark Noumair, ko te tahi tagata faiako ʼo Kalaate, ʼo ina takitaki te fai palalau fakafiafia mo ʼihi kau ako ʼo te kalasi. Ko tona kupu tāfito “ ʼAki Te Ako ʼo Te Folafola ʼa Te ʼAtua ʼe Tou Liliu Ai Ko He Kau Minisi Faiva,” neʼe faka maʼuhigaʼi ai te ʼu palalau ʼa Paulo ia Loma 10:10. Neʼe fakamatala e te kalasi te ʼu meʼa fakafiafia ʼaē neʼe hoko lolotoga tanatou kau ki te ako. Neʼe fakahā e te ʼu faʼahi ʼaia, ka tou ako pea mo metitasio ki te Folafola ʼa te ʼAtua, pea ko te ʼu meʼa lelei ʼo ʼuhiga mo Sehova ʼAtua pea mo tona Puleʼaga ʼe nātou fakafonu totatou loto pea mo tou palalau ki te hahaʼi ʼo ʼuhiga mo te ʼu meʼa ʼaia. Lolotoga te ʼu māhina e nima ʼaē neʼe nātou nonofo ai ʼi te Faleako ʼo Te Watchtower, neʼe kamata e te kau faiako ia te ʼu ako Tohi-Tapu e 30 tupu ʼi te ʼu telituale ʼaē ʼe fai tuʼumaʼu e te ʼu kokelekasio ʼaē neʼe ōvi kiai.
Ko Nātou ʼAē ʼe Popoto Neʼe Nātou Fai Tokoni
Lolotoga tanatou ako, neʼe fakatahi te kau faiako mo ʼihi ʼo te famili ʼo te Petele ʼo Amelika. Ko te ʼu tēhina ʼe nā kau ki te filiale ʼo Amelika, ko Robert Ciranko pea mo Robert P. Johnson neʼe nā fakafehuʼi he ʼu kaugana kua fualoa tanatou tauhi agatonu kia Sehova, ʼo kau ai mo te ʼu tagata taupau feʼoloʼaki ʼaē neʼe mulimuli mo nātou ki te ako makehe ʼi te Faleako ʼo Te Watchtower. Ko nātou fuli ʼaē neʼe fakafehuʼi neʼe nātou maʼu pepa ʼi Kalaate, pea neʼe nātou gāue misionea. Neʼe ko he fakaloto fīmālie ʼaia ki te kau ako pea mo tonatou famili pea mo kaumeʼa, tanatou logo ki te ʼu palalau poto mai te ʼu tagata ʼaia kua māhani pea mo manatu fakalaumālie.
Neʼe kau ai te ʼu tokoni ʼaenī: “Koutou maʼumaʼua tuʼumaʼu ʼi te minisitelio pea mo te kokelekasio.” “ ʼAua naʼa koutou fia maʼuhiga fau. Koutou manatuʼi tāfito te fakatuʼutuʼu ʼo takotou gāue misionea, pea ke liliu te fenua ʼaē ʼe koutou gāue ai ko tokotou fenua.” Ko te tahi ʼu palalau fakaloto mālohi neʼe hā ai peʼe ʼaoga feafeaʼi te ako ʼi Kalaate ki he minisi ke gāue lelei, logola te potu ʼaē ʼe hinoʼi kiai. Ohage ko te ʼu palalau ʼaenī: “ ʼE tou ako ke tou felagolagoʼaki pea mo tou gāue fakatahi.” “ ʼE tokoni mai te ako ke tou tali te ʼu agaʼi fenua foʼou.” “Neʼe akoʼi mātou ke mātou fakaʼaogaʼi te Tohi-Tapu ʼaki he manatu foʼou.”
Ko John E. Barr, ʼaē kua fualoa tana kau ki te Kolesi Pule, neʼe ina foaki te akonaki tāfito ʼo te polokalama. Ko tona kupu tāfito neʼe fakatafito ki te Tohi-Tapu: “Nee Mafola Onatou Leo i Te Kelekele Katoa.” (Loma 10:18) Neʼe ina fai te fehuʼi ʼaenī: Ia ʼaho nei, neʼe lava fakahoko koa e te hahaʼi ʼa te ʼAtua te gāue lahi ʼaia? Ei! ʼI te taʼu 1881, ko te kau lautohi ʼo te nusipepa Te Tule Leʼo neʼe nātou fehuʼi fēnei: “ ʼE koutou fai faka mafola koa?” Pea neʼe fakamanatuʼi e te tēhina ki te hahaʼi fuli te pāui ʼaē neʼe fai ʼi te fakatahi ʼi te taʼu 1922 ʼi Cedar Point, Ohio, Amelika: “Koutou Kalagaʼi Te Hau Pea Mo Tona Puleʼaga!” ʼAki te temi, ko te faʼafai ʼa te ʼu kaugana agatonu ʼa te ʼAtua neʼe ina uga ai nātou ke nātou tala te ʼu moʼoni fakatalakitupua ʼo te Puleʼaga ki te ʼu fenua fuli pe. ʼAki te ʼu tohi ʼaē neʼe tā pea mo tanatou palalau, neʼe aʼu te logo lelei ki te ʼu potu taupotu ʼo te kele—moʼo faka kolōlia pea mo fakavikiviki ai kia Sehova. Neʼe mālohi te ʼu palalau fakaʼosi ʼo te Tēhina ko Barr, he neʼe ina fakaloto mālohi te kau maʼu pepa ke nātou lau tanatou ʼu tapuakina, ʼo ina ʼui fēnei: “ ʼI te ʼaho fuli, ka koutou faikole kia Sehova, koutou palalau ki takotou gāue, mo fakafetaʼi kia te ia ʼaki tokotou loto katoa ki takotou kau ki te fakahoko ʼo te ʼu palalau ʼaenī, ‘Neʼe mafola tonatou ʼu leʼo ʼi te kele katoa.’ ”
Hili te akonaki ʼaia, neʼe lau te ʼu fakamālo, pea neʼe foaki e te pelesita te ʼu pepa ki te kau ako takitokotahi. Pea ʼaki he loto fiafia pea mo he lotomamahi ʼi tanatou mavae ʼi te faleako, ko te tēhina neʼe ina fakafofoga te kalasi neʼe ina lau te tohi neʼe malave ki te loto, neʼe fai ki te Kolesi Pule pea mo te famili ʼo te Petele, ʼo nātou fakahā ai te lotomālohi ʼa te kau maʼu pepa ke nātou vikiʼi ia Sehova “ ʼi te temi nei pea ki he ʼu temi heʼegata.”—Pesalemo 115:18.
ʼE tou faikole ke feala ki te kau maʼu pepa ʼaia ʼo Kalaate ke nātou fakaʼalutahi tonatou maʼuli mo te maʼuli ʼi tonatou fenua foʼou, pea mo nātou lagolago ki te tuputupu ʼo te gāue fai faka mafola ʼi te malamanei, ohage pe ko tona fai e nātou ʼaē neʼe fekauʼi lolotoga te ʼu taʼu e 60 ki muʼa atu.
[Paki ʼo te pasina 23]
KO TE ʼU AGAAGA ʼO TE KALASI
ʼE nātou ʼōmai mai te ʼu fenua e: 12
ʼE nātou ʼolo ki te ʼu fenua e: 16
Ko te kau ako e: 48
Te Fakafuafua ʼo tonatou ʼu taʼu: 34,4
Te Fakafuafua ʼo tonatou ʼu taʼu ʼi te moʼoni: 17,6
Te Fakafuafua ʼo tonatou ʼu taʼu ʼi te gāue temi katoa: 13,5
[Paki ʼo te pasina 24]
Ko Te 114 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.