Kua Nātou Lotomālohi Moʼo Tauhi
KOTEĀ ʼaē neʼe ina uga te ʼu taumatuʼa e toko 24 ʼaē kei mālolohi ke nātou mavae ʼi tonatou ʼu famili, mo tonatou ʼu kaumeʼa, pea mo te ʼu koga meʼa kua nātou māhani kiai, moʼo fakahoko te gāue faka misionea ʼi te tahi ʼu fenua? He koʼe koa ʼe nātou fiafia ʼi te ʼolo ki te ʼu taʼi koga meʼa ohage ko Papuasia Niu-Kinea, pea mo Afelika pea mo te ʼu fenua ʼo Amelika ʼo te Potu Toga? ʼE nātou fai koa te faʼahi ʼaia ʼuhi ko hanatou fia mamata fenua? Kailoa ia. ʼE nātou ʼolo kiai heʼe uga nātou e te ʼofa moʼoni ki te ʼAtua pea mo te kāiga.—Mateo 22:37-39.
Ko ai te ʼu hahaʼi ʼaia? Ko te kau maʼu pepa ʼo te 109 kalasi ʼo te Faleako Faka Tohi-Tapu ʼo Kalaate. ʼI te Moeaki, ʼaho 9 ʼo Sepetepeli 2000, ko te toko 5 198 neʼe nātou fakatahi ʼi te Faleako ʼa te Sosiete Watchtower—ʼaē ʼe tuʼu ʼi Patterson, ʼi New York—pea mo te ʼu fale ʼe pikipiki mai kiai moʼo fakalogo ki te ʼu tokoni ʼofa ʼaē ʼe ʼaoga anai ki te kau maʼu pepa ʼaia ke nātou liliu ai ko he kau misionea ʼe fua lelei anai tanatou gāue.
Ko te pelesita ʼo te polokalama ʼaia neʼe ko Stephen Lett, ʼe kau ʼi te Komite Ako ʼo te Kolesi Pule ʼo te kau Fakamoʼoni ʼa Sehova. Neʼe ina avahi te polokalama ʼaki te ʼu palalau ʼa Mateo 5:13, “E ko koutou te masima o te kelekele.” Neʼe fakamahino e te Tēhina ko Lett ʼe faka ʼuhiga tonu te ʼu palalau ʼa Sesu ki te kau ako ʼaenī. Ohage la, ʼe lava fakaliliu e te māsima he faʼahiga meʼa kai ke kano lelei. ʼO toe feiā aipe mo nātou, ʼaki tanatou gāue fai faka mafola, ʼe hage te kau misionea ko he māsima fakatātā.
Ko He Fakaloto Mālohi
Neʼe fakaafe e te Tēhina ko Lett te ʼu kaugana ʼa Sehova kua nātou fualoa ʼi te moʼoni ke nātou fai te ʼu akonaki nounou kae maʼuhiga. Ko te ʼuluaki Tēhina ko John Wischuk, ʼaē ʼe gāue ʼi te Selevisi Tā Tohi. Ko te kupu tāfito ʼo tana akonaki, “ ʼE Fakaloto Mālohiʼi e Te Pesalemo ʼAē ʼe Nounou ʼOsi Te Manatu Faka Misionea,” neʼe fakatafito ki te Pesalemo 117. ʼI te temi nei, ʼe maʼuhiga ʼi te malamanei katoa ke fai ki te ʼu “puleʼaga” pea mo te ʼu “kūtuga hahaʼi,” he fagonogono ʼo ʼuhiga mo Sehova pea mo tona Puleʼaga. Neʼe fakaloto mālohiʼi te kau ako ke nātou fakahoko te ʼui ʼa te Pesalemo 117 ke nātou uga te hahaʼi ke nātou “Fakavikiviki kia Sah.”
Pea neʼe fakaafe leva e te pelesita ia Guy Pierce ʼo te Kolesi Pule. Neʼe ina fai te akonaki ʼaenī “Koutou Tui Papau Kae ʼAua Naʼa Koutou Fefeka Fau.” ʼE mālohi te Folafola ʼa te ʼAtua. ʼE fakahigoaʼi ia Sehova ʼAtua ko te Maka ia Teutalonome 32:4, kae ʼe mole fefeka tana Folafola koteʼuhi neʼe tohi maʼa te ʼu lea fuli pea mo te ʼu agaʼi fenua fuli—ei, neʼe tohi maʼa te hahaʼi fuli. Neʼe fakatotonu ki te kau ako ke nātou faka mafola te Folafola ʼa te ʼAtua, pea ke nātou tuku ke lave te logo ki te ʼu loto pea mo te leʼo ʼo loto ʼo te hahaʼi. (2 Kolonito 4:2) Koʼeni te fakaloto mālohi ʼaē neʼe fai e te Tēhina ko Pierce, “Koutou pipiki mālohi ki te ʼu pelesepeto faitotonu, kae ʼaua naʼa koutou fefeka fau. ʼAua naʼa koutou meʼa noaʼi te hahaʼi ʼo te ʼu fenua ʼaē ʼe hinoʼi koutou kiai ʼuhi pe heʼe kehe tanatou agaʼi fenua.”
Ko Karl Adams, ʼaē ʼe kau ki te kau faiako ʼo Kalaate, pea ʼe gāue ʼi te ʼu pilō takitaki talu mai taʼu ʼe teitei 53, neʼe ina fai te akonaki ʼaenī ʼe fakatupu fakakaukau “ ʼE Koutou ʼOlo Anai Kifea Mokā Koutou Mavae ʼi Henī?” ʼI tona fakahagatonu, kua hinoʼi te ʼu taumatuʼa e 24 ke nātou ʼolo ʼo gāue ʼi te ʼu fenua kehekehe e 20 ʼi te malamanei, kae neʼe lagaʼi te fehuʼi ʼaenī, Ka koutou ʼolo anai ki te telituale ʼaē neʼe hinoʼi koutou kiai, koteā anai ʼaē ka koutou fai? ʼE tou maʼuʼuli ʼi te mālama ʼe maveuveu. ʼE fia ʼolo te hahaʼi ki he ʼu koga meʼa foʼou pea mo fai he ʼu meʼa foʼou ke feala hanatou fiafia ai. Kae ʼi te tahi faʼahi, neʼe hinoʼi te kau ako e Sehova ke nātou ʼolo ki he koga meʼa ʼe ina loto ke nātou ʼolo kiai moʼo taupau fakalelei tana “ ʼu ōvi.” ʼE mole tonu ke nātou hage ko te kau Iselaele ʼāfea, ʼuhi ko tanatou manatu pe ʼaē kia nātou, neʼe nātou līaki te faigamālie ʼaē ke fakaʼaogaʼi nātou e Sehova moʼo tapuakina te hahaʼi fuli. Kae ʼe tonu ke nātou faʼifaʼitaki kia Sesu Kilisito, ʼaē neʼe ina fai tuʼumaʼu te finegalo ʼo tana Tāmai ʼaki he loto katoa, pea neʼe talagafua ʼi te ʼu ʼaluʼaga fuli ʼaē neʼe hoko kia ia.—Soane 8:29; 10:16.
“Koutou Faka Maʼuhigaʼi Te ʼu Meʼa Loloto ʼa Te ʼAtua,” neʼe ko te kupu tāfito ʼo te akonaki ʼa Wallace Liverance, te sikalaipe ʼo te Faleako ʼo Kalaate. ʼE lahi te ʼu lakaga ʼe fakatatau ai e te Tohi-Tapu ia te Folafola ʼa te ʼAtua ki te ʼu koloā, mo te ʼu maka maʼuhiga, mo te ʼu ukamea maʼuhiga, mo te ʼu meʼa ʼe maʼugataʼa pea mo totogi kovi ʼaupito. Moʼo maʼu “te ʼatamai mālama ʼo ʼuhiga mo te ʼAtua,” ʼe fakahā mai ia Tāʼaga Lea 2:1-5 ʼe tonu ke tou kumi ohage ko “he ʼu koloā maʼuhiga neʼe fufū.” Neʼe fakaloto mālohiʼi te kau ako e te tagata fai akonaki, ke nātou haga kumi te ʼu meʼa loloto ʼa te ʼAtua ʼi te ʼu telituale foʼou ʼaē ka nātou gāue ai. Neʼe fai e te Tēhina ko Liverance te fakakaukau ʼaenī: “ ʼE ʼaoga te potu ʼaia, koteʼuhi ʼe ina fakatuputupu te tui pea mo te falala kia Sehova, pea ʼe ina fakamālohiʼi anai tokotou loto ke koutou pipiki maʼu ki te faʼahi ʼaē neʼe hinoʼi koutou kiai. ʼE tokoni anai kia koutou ke koutou palalau ʼaki he loto papau pea mo koutou liliu ko he ʼu hahaʼi faiako faiva moʼo fakamahinohino te ʼu fakatuʼutuʼu ʼa Sehova ki te hahaʼi.”
Ohage ko hana palalau ki he kalasi, neʼe toe fakamanatuʼi e te tahi tagata faiako ʼo te Faleako ʼo Kalaate, te tapuakinaʼi e Sehova te gāue fai faka mafola ʼa te kau ako lolotoga te ʼu māhina e nima kua hili. Neʼe fakatokagaʼi e Lawrence Bowen te ʼu palalau ʼa te ʼapositolo ko Paulo ia Gaue 20:20 ʼo ʼuhiga mo tana gāue ʼi Efeso, ʼo ina fakahāhā lelei neʼe fakaʼaogaʼi lelei e te ʼapositolo ʼaia te ʼu fealagia fuli moʼo fai tana fagonogono. Ohage ko te ʼapositolo ko Paulo, neʼe ʼiloga te potu ʼaia ʼi te ʼu meʼa ʼaē neʼe hoko ki te kau ako, he neʼe uga nātou e te ʼofa ki te ʼAtua pea mo te kāiga ʼi totatou temi, pea neʼe mole he temi neʼe nātou fakatātāʼofi ai ke nātou palalau ki te moʼoni pea mo tuku te Folafola ʼa te ʼAtua ke gāue ki te hahaʼi. Neʼe nātou maʼu ai te ʼu tapuakina lahi ʼa Sehova.
Te ʼu Fakamatala ʼa Nātou Kua Māhani
Lolotoga te temi fakaʼosi ʼo tanatou ako, neʼe toe maʼu foki e te kau ako ʼaia ʼo Kalaate te faigamālie ʼaē ke nātou fakatahi mo te ʼu tēhina ʼo te ʼu Komite ʼo te ʼu Filiale e 23, ʼaē neʼe fai tanatou ako makehe ʼi te Faleako ʼo Patterson. Ko Leon Weaver mo Merton Campbell mai te Selevisi Gāue, neʼe nā fakafehuʼi ʼihi ʼo te ʼu tēhina ʼaia ʼo te ʼu Komite ʼo te ʼu Filiale, pea ko ʼihi ia nātou neʼe nātou kau ki te ʼu kalasi ʼāfea ʼo te Faleako ʼo Kalaate. Neʼe ko he meʼa fakaloto mālohi ki te kau ako foʼou mo ʼonatou famili pea mo ʼonatou ʼu kaumeʼa ke nātou maʼu he ʼu logo mai te kau misionea ʼāfea ʼaia.
ʼI te ʼu tokoni ʼaē neʼe fai ki te kau ako foʼou ʼo ʼuhiga mo te ʼu fetogi ʼaē ʼe tonu ke nātou fai ʼo mulimuli ki tonatou telituale foʼou, neʼe kau ai te ʼu fakatokaga ʼaenī: “Koutou maʼu he manatu ʼe lelei. Kapau ʼe koutou sio ki he meʼa ʼe mata foʼou kia koutou peʼe mole koutou mahino kiai, ʼaua naʼa koutou vaivai ai. Kae koutou falala kia Sehova”; “koutou fiafia ʼaki pe te meʼa ʼaē ʼe koutou maʼu, pea mo koutou falala ʼe foaki atu anai e Sehova te ʼu meʼa ʼaē ʼe ʼaoga ki tokotou maʼuli.” Ko te tahi ʼu fakamatala neʼe nātou faka maʼuhigaʼi te tokoni ʼaē ʼe ʼaoga ki te kau ako ke nātou taupau tanatou fiafia ʼi te fenua ʼaē neʼe hinoʼi nātou kiai. Koʼeni te ʼu palalau ʼaē neʼe fai: “ ʼAua naʼa koutou fakatatau te koga meʼa ʼaē neʼe hinoʼi koutou kiai pea mo te koga meʼa ʼaē ʼe koutou haʼu mai ai”; “koutou ako te lea ʼo te koga meʼa pea mo palalauʼi lelei ke feala hakotou felogoi mo te hahaʼi”; “koutou ako te ʼu agaʼi fenua ʼo te hahaʼi pea mo tonatou faʼahiga maʼuli, koteʼuhi ʼe tokoni atu anai ke koutou pipiki ki takotou telituale foʼou.” Ko te ʼu fakamatala ʼaia neʼe ko he ʼu fakaloto mālohi lahi ki te kau misionea foʼou.
ʼOsi ʼaia te ʼu fai fehuʼi, pea ko David Splane, te misionea ʼāfea pea neʼe kau ki te 42 kalasi ʼo Kalaate, pea ʼe kau nei ki te kau faʼufaʼu ʼo te Kolesi Pule ʼo te kau Fakamoʼoni ʼa Sehova, neʼe ina fakahoko te akonaki tāfito ʼaki tana kupu tāfito ʼaenī “Ko He Kau Ako Peʼe Ko He Kau Maʼu pepa?” Neʼe ina fehuʼi age ki te kalasi: “ ʼE koutou faka ʼuhiga feafeaʼi ia koutou mokā koutou ʼolo ki takotou telituale foʼou? Ohage koa ko he kau maʼu pepa kua nātou ʼiloʼi ia meʼa fuli ʼo ʼuhiga mo te gāue faka misionea peʼe ko he kau ako ʼe kei lahi pe te ʼu meʼa ʼaē ʼe tonu ke nātou ako?” Neʼe fakahā e te Tēhina ko Splane ko ia ʼaē ʼe maʼu pepa pea mo fakapotopoto, ʼe ina faka ʼuhiga ia ia ohage he tahi ʼe ako. ʼE tonu ke manatu e te kau misionea, ko he tahi pe ʼe felāveʼi mo nātou ʼi tonatou telituale faka misionea, ʼe feala ke ina akoʼi age kia nātou he faʼahiga meʼa pe. (Filipe 2:3) Neʼe fakaloto mālohiʼi te kau ako ke nātou gāue fakatahi mo ʼonatou ʼu tēhina mo tuagaʼane misionea ʼo te ʼu fenua ʼaē ʼe nātou ʼolo kiai, mo te filiale pea mo te kokelekasio ʼo te koga meʼa ʼaia. Neʼe fakaloto mālohiʼi fēnei e te Tēhina ko Splane “Kua ʼosi takotou sivi, kae ʼe mole heʼeki ʼosi takotou ako. Koutou fakahāhā fakalelei ki te hahaʼi fuli ʼe koutou fia ako.”
Hili te akonaki ʼaia, pea neʼe fakatoʼo ki te kau ako tanatou pepa, pea neʼe fakahā ki te hahaʼi ʼo te fakatahi te ʼu koga meʼa ʼaē neʼe hinoʼi kiai te kau misionea. Neʼe ko he lakaga neʼe malave ki te kau ako, he neʼe lau te tohi e te tēhina ʼo te kalasi ʼaia ʼe hā ai te lotomālohi ʼa te kau maʼu pepa, ke nātou fakaʼaogaʼi te ʼu meʼa ʼaē neʼe nātou ako moʼo fai ʼo he ʼu gāue ʼe lahi age ʼo te tauhi taputapu.
ʼE mahino ia neʼe ʼio fuli te hahaʼi ʼaē neʼe kau ʼi te fakatahi, ki te fakatupu lotomālohi ʼo te ʼu tokoni ʼaē neʼe maʼu e te kau maʼu pepa, moʼo haga fakahā tonatou ʼofa ki te ʼAtua pea mo te kāiga. Pea neʼe toe fakatuputupu ia nātou he lotomālohi ke nātou tokoni ʼi te faʼahi fakalaumālie ki te hahaʼi ʼo tonatou telituale faka misionea.
[Talanoa ʼo te pasina 25]
TE AGAAGA ʼO TE KALASI
ʼE nātou ʼōmai mai te ʼu fenua e: 10
ʼE nātou ʼolo ki te ʼu fenua e: 20
Ko te kau ako e: 48
Te fakafuafua ʼo tonatou ʼu taʼu: 33,7
Te fakafuafua ʼo tonatou ʼu taʼu ʼi te moʼoni: 16,2
Te fakafuafua ʼo tonatou ʼu taʼu ʼi te gāue temi katoa: 12,5
[Paki ʼo te pasina 26]
Ko Te 109 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.