Koutou Fakafiafia Ia Sehova Pea Mo Koutou Fiafia

KO TE lava lelei ʼo he fakatuʼutuʼu ʼaoga ʼe ko he toe meʼa fakafiafia ia. Ko te fono ʼaē neʼe fai ʼi te ʼaho 13 ʼo Malesio 1999 ʼi te Faleako ʼa te Sosiete Watchtower ʼi Patterson, ʼi New York, neʼe ko he lakaga fakafiafia maʼa te kau ako e toko 48 ʼo te 106 kalasi ʼo te Faleako Faka Tohi-Tapu ʼo Kalaate ʼo te Sosiete Watchtower.

Ko te ʼu ʼuluaki palalau neʼe fai e te pelesita ʼo te polokalama ko Theodore Jaracz, ʼaē ʼe kau ʼi te Kolesi Pule, pea neʼe kau ʼi te 7 kalasi ʼo Kalaate, pea neʼe ina faka maʼuhigaʼi te ʼu palalau ʼaē ʼe tuʼu ia Pesalemo 32:11: “Koutou fakafiafia ia Sehova, pea koutou fiafia, kau faitotonu.” ʼI tana fakamahino pe koʼe ʼe lelei kia nātou fuli ke nātou fakafiafia ʼi te lakaga ʼaia, neʼe ina ʼui fēnei: “ ʼE tou fakafiafia ʼi te ʼu lakaga fēnei, koteʼuhi ʼe lahi te ʼu meʼa ʼaē ʼe fakahoko e Sehova ʼaki ia nātou ʼaē ʼe faitotonu ʼonatou loto, ohage la ko te kau ako ʼo Kalaate.” Logope la neʼe fai e te kau ako hanatou ʼu fakatuʼutuʼu ke nātou kau ʼi te Ako ʼo Kalaate pea neʼe nātou faiga mālohi ke nātou faiva ki te selevisi misionea, kae ʼe ko Sehova ʼaē neʼe ina faka fealagia ke lava lelei te ʼu fakatuʼutuʼu ʼaia. (Tāʼaga Lea 21:5; 27:1) Neʼe ʼui ai e te Tēhina ko Jaracz, ko te faʼahi ʼaia ʼe ko he tupuʼaga ke tou ‘fakafiafia ia Sehova.’

ʼI te fale fono ʼo Patterson, neʼe ʼi ai te ʼu kāiga pea mo te kau fakaafe ʼo te kau ako neʼe nātou ʼōmai mai te ʼu fenua kehekehe e 12 ke nātou kau ki te fono fakafiafia ʼaia. Neʼe fakafiafia te toko 5 198 ʼaē neʼe kau ai​—te famili ʼo te Petele ʼi Brooklyn, mo Patterson pea mo Wallkill, ʼaē neʼe nātou sioʼi te polokalama ʼi te televisio​—ʼi tanatou fakatalitali ki te polokalama ʼaē ka fai ʼi te fono ʼaia.

ʼE Fakaloto Mālohiʼi Nātou Ke Nātou Taupau He Manatu Fiafia

ʼI te ʼosi fai e te Tēhina ko Jaracz te ʼu ʼuluaki palalau, neʼe ina fakaafe te ʼuluaki ʼo te ʼu tēhina faiakonaki e toko nima, ʼaē neʼe nātou teuteuʼi he ʼu fakaloto mālohi faka Tohi-Tapu maʼa te kau ako ʼo Kalaate pea mo nātou fuli ʼo te fono.

Ko te ʼuluaki Tēhina faiakonaki neʼe ko William Malenfant, ʼaē neʼe kau ʼi te 34 kalasi ʼo Kalaate, pea ʼe tokoni ʼi te temi nei ki te Komite Faiako ʼo te Kolesi Pule. ʼO ʼalutahi mo tona kupu tāfito ʼaenī “ ʼE mole vaʼiganoa ia meʼa fuli!” ʼaē ʼe toʼo mai ia Tagata Tānaki 1:2, neʼe ina lagaʼi te fehuʼi ʼaenī: “Neʼe ʼui koa e Salomone, ʼe ko meʼa fuli ʼaē ʼe vaʼiganoa?” Neʼe ina tali fēnei: “Kailoa. Neʼe ina fia fakahā mai, ko te ʼu fakatuʼutuʼu fakatagata ʼaē ʼe mole nātou tokagaʼi te finegalo ʼa te ʼAtua, pea mo te ʼu fakatuʼutuʼu fuli ʼaē ʼe mole kau ʼi te finegalo ʼa te ʼAtua​—ko te ʼu meʼa ʼaia ʼe vaʼiganoa.” Kae ko te tauhi ki te ʼAtua moʼoni, ia Sehova, ʼe mole ko he meʼa vaʼiganoa ia; ʼo feiā mo te ako ʼo te Folafola ʼa te ʼAtua, ia te Tohi-Tapu, pea mo tona akoʼi ki te hahaʼi. ʼE mole galo kia Sehova te ʼu faiga ʼaia ʼa tana hahaʼi kaugana. (Hepeleo 6:​10) ʼI tona fakahagatonu, tatau aipe peʼe hoko mai he ʼu faigataʼaʼia kia nātou ʼaē ʼe leleiʼia e te ʼAtua, kae ʼe “kofukofu anai [nātou] ʼi te taga ʼo te maʼuli ʼa Sehova.” (1 Samuele 25:29) ʼI meʼa fakaloto māfana kia tatou! Kapau ʼe manatuʼi te ʼu puani ʼaia e te hahaʼi kaugana ʼa Sehova, pea ʼe nātou taupau anai he manatu fiafia.

Ko John Barr ʼaē ʼe kau ʼi te Kolesi Pule, neʼe ina fakaloto mālohiʼi te kalasi ʼaki tana akonaki ʼaenī “Koutou Leleiʼia Takotou Gāue Misionea.” Neʼe ina fakahā ai, talu mai fualoa ko te selevisi misionea ʼe ko he meʼa maʼuhiga ʼaupito ki te loto ʼo Sehova. “Ko te gāue ʼaia neʼe ʼi ai tona pikipikiga mo te meʼa ʼofa ʼaē neʼe fai e Sehova ki te malamanei, he neʼe Ina fekauʼi mai tona ʼAlo ʼulu tokotahi ki te kele. Ko Sesu neʼe ko te tagata misionea lahi tokotahi, pea neʼe ko te tagata misionea tāfito.” Neʼe mahino ki te kau ako te ʼu fetogi ʼaē neʼe tonu ke fai e Sesu ke lava lelei tana fekau ʼi te kele, pea ʼe kei feala ke maʼu ia ʼaho nei he ʼu fua lelei ʼo te selevisi misionea ʼa Sesu, mo kapau ʼe tou tokagaʼi tana gāue. Neʼe fakahā e te Tēhina ko Barr, neʼe feala te faʼahi ʼaia he neʼe fiafia ʼaupito ia Sesu ʼi tana fai te gāue ʼa te ʼAtua, pea neʼe ʼofa ki te hahaʼi. (Tāʼaga Lea 8:​30, 31) Ko te Tēhina ko Barr neʼe ina fakaloto mālohiʼi te kau ako ke nātou pipiki maʼu ki tanatou gāue, mole ʼuhi pe heʼe nātou faʼa kātaki, kae koteʼuhi ʼe nātou fiafia ʼi te gāue ʼaia. Neʼe ina ʼui fēnei ki te kalasi, “Koutou falala kia Sehova; heʼe mole ina līaki anai koutou.”​—Pesalemo 55:22.

“Tou Haʼele ʼi Te Huafa ʼo Sehova ʼo Talu Ai,” neʼe ko te kupu tāfito ʼaia ʼo te akonaki ʼaē neʼe hoa kiai, pea neʼe fai e Lloyd Barry, te tahi Tēhina ʼo te Kolesi Pule. Mai tona ʼuhiga ʼaē neʼe gāue misionea lolotoga taʼu e 25 ʼi Saponia, ʼi tana ʼosi maʼu pepa ʼi te 11 kalasi ʼo Kalaate, koia neʼe fakamatala ai e te Tēhina ko Barry te ʼu meʼa ʼaē neʼe hoko ki te kau ʼuluaki misionea pea mo ina fakahā te ʼu fihifihia ʼaē neʼe tau mo nātou. Koteā te tokoni ʼaoga ʼaē neʼe ina fai ki te kalasi? “Ko te meʼa ʼaē ʼe maʼuhiga tāfito, ke koutou tokaga kia koutou ʼi te faʼahi fakalaumālie. Tahi ʼaē, koutou ako te lea pea mo te ʼu agaʼi fenua. Koutou popoto ʼi te fakahuahua. Pea koutou haga fai takotou gāue; ʼaua naʼa koutou fiu peʼe lotovaivai.” Neʼe fakahā e te Tēhina ko Barry ki te kau ako, ʼi te ʼu fenua matāpule ʼaē ka nātou ʼolo kiai, ʼe nātou felāveʼi anai mo te hahaʼi ʼe nātou haʼele ʼi te huafa ʼo te ʼu ʼatua kehekehe, pea neʼe ina fakamanatuʼi age te ʼu palalau ʼaenī ʼa Mikea: “Ko te hahaʼi fuli ʼe nātou tahi haʼele anai ʼi te huafa ʼo tonatou ʼatua; kae ko tatou ʼe tou haʼele anai ʼi te huafa ʼo Sehova totatou ʼAtua ʼo heʼegata, ei, ʼo talu ai.” (Mikea 4:5) Ko te faʼifaʼitaki ʼo te kau misionea ʼāfea ʼe ina uga te hahaʼi kaugana ʼa te ʼAtua ke nātou haga haʼele ʼi te huafa ʼo Sehova pea ke nātou tauhi agatonu kia te ia.

Neʼe hoa kiai te Tēhina faiako ʼo Kalaate ko Lawrence Bowen. Ko te kupu tāfito ʼo tana akonaki neʼe ina lagaʼi te fehuʼi ʼaenī, “Koteā Anai Te Fua ʼo Takotou Gāue?” Neʼe ina fakahā ai, ko te lava lelei ʼo takita selevisi ki te ʼAtua, ʼe fakalogo ki takita tui pea mo takita falala kia Sehova. ʼUhi ko tana falala katoa kia Sehova, neʼe mālo te Hau ko Asa ʼi te foʼi solia fakafeagai neʼe tahi miliona. Kae neʼe fakamanatuʼi age e te polofeta ko Asalia te ʼaoga ʼaē ke falala tuʼumaʼu ki te ʼAtua: “Ko Sehova ʼe nofo mo koutou mo kapau ʼe koutou nonofo mo ia.” (2 Fakamatala 14:​9-​12; 15:​1, 2) Mai tona ʼuhiga ʼaē ʼe hā ʼi te huafa ʼo Sehova, ʼe ina fakahoko te ʼu meʼa ʼaē ʼe finegalo kiai​—tatau aipe peʼe tonu ke ina Foaki, peʼe Puipui, peʼe Tauteaʼi​—koia ko te kau misionea ʼaē ʼe nātou falala kia Sehova pea mo nātou gāue ʼo mulimuli ki tana ʼu fakatuʼutuʼu, ʼe lava lelei anai tanatou gāue. (Ekesote 3:​14) Neʼe fakaʼosi fēnei e te Tēhina ko Bowen, “ ʼAua naʼa galo kia koutou, kapau ko takotou ʼu fakatuʼutuʼu ʼe ʼalutahi mo te fakatuʼutuʼu ʼa Sehova, pea ʼe ina fakahoko anai ia meʼa fuli ʼaē ʼe ʼaoga ki takotou gāue.”

Ko te Tēhina faiakonaki fakaʼosi ʼo te koga ʼaia ʼo te fono neʼe ko Wallace Liverance, ʼaē neʼe gāue misionea ʼi muʼa atu pea kua gāue sikalaipe ʼi te temi nei ʼi te faleako ʼo Kalaate. Ko tana akonaki ʼaenī, “Ke Maʼuli Pea Mo Gāue Tuʼumaʼu Te Folafola ʼa Te ʼAtua Ia Koutou,” neʼe fakahā tāfito ai te logo heʼegata peʼe ko te fakapapau ʼa te ʼAtua ʼaē kua vave hoko. (Hepeleo 4:​12) Ko te logo ʼaia ʼe ina fetogi te maʼuli ʼo nātou ʼaē ʼe nātou tali te faʼahi ʼaia. (1 Tesalonika 2:​13) ʼE tou lava taupau feafeaʼi te folafola ʼaia ke maʼuli pea mo gāue tuʼumaʼu ʼi totatou maʼuli? ʼE tonu ke tou fai fakalelei hatatou ako Tohi-Tapu. Ko te Tēhina ko Liverance, neʼe ina fakamanatuʼi ki te kau ako te ʼu faʼahiga fai ʼo te ako Tohi-Tapu ʼaē neʼe nātou ako ʼi Kalaate, ʼaē neʼe kau ai te lau, mo te fakamahino, pea mo te fakaʼaogaʼi ʼo te Folafola ʼa te ʼAtua. Neʼe ina fakaʼaogaʼi te ʼu palalau ʼaē neʼe fai e Albert Schroeder, ko te Tēhina ʼo te Kolesi Pule ʼaē neʼe ina takitaki te komite ʼaē neʼe ina fakatuʼu te faleako ʼo Kalaate kua hili kiai taʼu e 50: “Kapau ʼe kita fakaʼaogaʼi te ʼu vaega fuli ʼo he kapite, pea ʼe kita maʼu ai te mālohi fakalaumālie ʼaē ʼe foaki mai e te ʼAtua ʼi tana Folafola.” Ko te faʼahiga fai ʼaia ʼo te ako Tohi-Tapu ʼe ina faka fealagia ki te Folafola ʼa te ʼAtua ke maʼuli pea mo gāue ia tatou.

Ko He ʼu Fakafehuʼi Mo He ʼu Fakamatala Fakafiafia

ʼI te ʼosi fai ʼo te ʼu akonaki, neʼe fai e te kau ako tanatou ʼu fakamatala fakafiafia kia nātou ʼo te fono. ʼI te takitaki ʼo Mark Noumair, ʼaē neʼe gāue misionea ʼi te temi muʼa pea kua faiako ʼi te faleako ʼo Kalaate, ko te kau ako neʼe nātou fakamatala pe neʼe feafeaʼi tanatou faiga ʼaē ke nātou fai faka mafola ʼi te ʼu ʼaluʼaga kehekehe. Ko ʼihi neʼe nātou kamata he ʼu ako Tohi-Tapu mo te hahaʼi ʼo te telituale, he neʼe nātou fakasiosio lelei ki tonatou ʼaluʼaga pea mo nātou tokaga moʼoni kia nātou. ʼI tanatou fai te faʼahi ʼaia, ko te kau ako neʼe nātou ‘tokaga kia nātou pea mo tanatou faiako,’ pea neʼe nātou fia tokoni fakamalotoloto ki te hahaʼi ke hāofaki nātou.​—1 Timoteo 4:​16.

Neʼe lahi te ʼu tokoni ʼaē neʼe fai ki te kau ako, pea neʼe fakamatala te fiafia ʼa te kau misionea e te ʼu tēhina faiva ʼaē neʼe nātou kau ʼi te ako ʼaē ʼe fai ki te ʼu tēhina ʼo te ʼu komite ʼo te ʼu filiale, ʼaē ʼe fai ʼi te Faleako ʼa te Sosiete Watchtower. Ko te ʼu Tēhina ko Samuel Herd pea mo Robert Johnson ʼaē ʼe nā kau ʼi te ʼu tēhina takitaki ʼo te Petele, neʼe nā fai te tahi ʼu fakafehuʼi ki te ʼu tēhina mai te ʼu filiale ʼa te Sosiete ʼi Bolivie, Zimbabwe, Nicaragua, République Centrafricaine, République Dominicaine, Papouasie Nouvelle-Guinée, pea mo Cameroun.

ʼI te ʼosi ʼo te ʼu fakamatala pea mo te ʼu fakafehuʼi, neʼe fai te akonaki fakaʼosi e te Tēhina ko Gerrit Lösch, ʼaē neʼe kau ʼi te 41 kalasi ʼo Kalaate pea kua kau ʼi te Kolesi Pule, pea neʼe talanoa ki te kupu tāfito maʼuhiga ʼaenī, “Ko Koutou Ko Te Hahaʼi ‘Lelei ʼAupito’ Koa?” ʼUluaki, neʼe fakamanatuʼi e te Tēhina ko Lösch, ko Sesu te ʼAlo haohaoa ʼa te ʼAtua neʼe mole faka ʼuhiga ia ia e te hahaʼi ko he tagata neʼe lelei ʼaupito, kae “neʼe fehiʼaʼinaʼi, pea neʼe līʼakina e te hahaʼi.” (Isaia 53:3) Koia, ʼe mole tou punamaʼuli ia ʼaho nei ʼi te mole tali leleiʼi ʼo te kau misionea ʼi te ʼu fenua kehekehe ʼo te malamanei. ʼI te tahi faʼahi, ko Taniela ʼaē neʼe gāue lolotoga ni ʼu taʼu ʼi Papiloni, neʼe tuʼa tolu tona fakahigoaʼi e te Tupuʼaga ʼaki tana ʼaselo, ko Taniela ʼe ko he tahi ʼe “lelei ʼaupito.” (Taniela 9:​23; 10:11, 19) Koteā ʼaē neʼe tokoni kia Taniela ke liliu ʼo lelei ʼaupito? Neʼe mole he temi neʼe ina maumauʼi ai te ʼu pelesepeto ʼa te Tohi-Tapu mo kapau neʼe tonu ke mulimuli ki te ʼu agaʼi fenua ʼo Papiloni; neʼe aga fakahagatonu tuʼumaʼu, ʼo mole ina fakaʼaogaʼi tona tuʼulaga ke ina maʼu hana ʼu meʼa; pea neʼe ina ako fakamalotoloto te Folafola ʼa te ʼAtua. (Taniela 1:​8, 9; 6:4; 9:2) Tahi ʼaē meʼa, neʼe faikole tuʼumaʼu kia Sehova pea neʼe fakavikiviki tuʼumaʼu aipe ki te ʼAtua ʼo ʼuhiga mo te ʼu gāue ʼaē neʼe ina fai. (Taniela 2:​20) Kapau ʼe nātou mulimuli ki te faʼifaʼitaki ʼa Taniela, pea ʼe feala ki te hahaʼi kaugana ʼa te ʼAtua ke nātou liliu ʼo lelei ʼaupito, mole lagi ʼo ʼuhiga mo te mālama ʼaenī, kae ʼo ʼuhiga mo Sehova ʼAtua.

Moʼo fakaʼosi te fono ʼaia ʼaē neʼe fakaloto mālohi ʼi te faʼahi fakalaumālie, neʼe lau e te pelesita he ʼu tohi neʼe momoli mai te ʼu fenua kehekehe ʼo te malamanei. ʼOsi ʼaia, pea neʼe maʼu pepa te ʼu taumatuʼa e 24, pea neʼe tala age te fenua ʼaē ka nātou ʼolo kiai. Moʼo fakaʼosi, ko te tēhina fakafofoga ʼo te kalasi neʼe ina lau te tohi ʼaē neʼe fai ki te Kolesi Pule pea mo te famili ʼo te Petele, moʼo fakahā tanatou loto fakafetaʼi ki te ako ʼaē neʼe fai age kia nātou lolotoga māhina e nima.

ʼI te fakaʼosi ʼo te fono, ko te hahaʼi kaugamālie ʼo te fono ʼaia “neʼe nātou fakafiafia, ʼaki he ʼu fakafetaʼi.”​—Nehemia 12:27.

[Talanoa ʼo te pasina 27]

Ko Te ʼu Agaaga ʼo Te Kalasi

ʼE nātou ʼōmai mai te ʼu fenua e: 10

ʼE nātou ʼolo ki te ʼu fenua e: 19

Ko te kau ako e: 48

Ko te ʼu taumatuʼa e: 24

Te fakafuafua ʼo tonatou ʼu taʼu: 33

Te fakafuafua ʼo tanatou ʼu taʼu ʼi te moʼoni: 16

Te fakafuafua ʼo tanatou ʼu taʼu ʼi te gāue temi katoa: 13

[Paki ʼo te pasina 25]

Ko Te 106 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower

ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.